နကဲထီၣ်ယွၤ အတံၤသကိး ကသ့ဒ်လဲၣ်

၁, ၂. ယဟိဝၤယွၤ အတံၤသကိးတနီၤန့ၣ်​ မ့ၢ်မတၤသ့ၣ်တဖၣ်လဲၣ်.

မ့ၢ်နအဲၣ်ဒိး အိၣ်ဒီးတံၤသကိး ဒ်လဲၣ်တကလုာ်လဲၣ်. နကအဲၣ်ဒိး တံၤသကိးလၢ အတၢ်ပာ်သူၣ်ပာ်သး လီၤဂာ်ဒီးနၤ တကးဒံးဘၣ်​ အဝဲကဘၣ်မ့ၢ် ပှၤလၢနရ့အီၤညီ ဒီးနၢ်ပၢၢ်နၤလီၤ. အဂၤတမံၤန့ၣ်​ ကဘၣ်မ့ၢ် ပှၤလၢအအိၣ်ဒီး တၢ်သူၣ်ဂ့ၤသးဝါ ဒီးတၢ်ဂ့ၤတၢ်ဝါတဖၣ်လၢ အလီၤဘၣ်သူၣ်ဘၣ်သးန့ၣ်လီၤ.

^၂ ယဟိဝၤယွၤ ဃုထၢဝဲ ပှၤဟီၣ်ခိၣ်ဖိတနီၤလၢ အတံၤသကိးလီၤ. အဒိ စီၤအၤဘြၤဟၣ် မ့ၢ်ယွၤအတံၤသကိးတဂၤလီၤ. (ယၡါယၤ ၄၁:၈; ယၤကိာ် ၂:၂၃) ယဟိဝၤယွၤ ဘၣ်သူၣ်ဘၣ်သးဝဲစီၤဒၤဝံး စ့ၢ်ကီးလီၤ. အဝဲစံးဝဲလၢ စီၤဒၤဝံးမ့ၢ် “ပှၤလၢအဘၣ်ယသးတဂၤ” လီၤ. (မၤတၢ် ၁၃:၂၂) မ့မ့ၢ်ဝံဒၤနံးယ့လးန့ၣ်​ ယဟိဝၤယွၤထံၣ်အီၤဒ်လဲၣ်. မူခိၣ်ကလူးတဂၤစံးဘၣ်​ ဝံဒၤနံးယ့လးလၢ “နဘၣ်တၢ်အဲၣ်နၤဒိၣ်မးလီၤ.”—ဒၤနံးယ့လး ၉:၂၃.

၃. ဘၣ်မနုၤအဃိ စီၤအၤဘြၤဟၣ်, စီၤဒၤဝံးဒီး စီၤဒၤနံးယ့လး ကဲထီၣ်ယွၤအတံၤသကိးလဲၣ်.

^၃ စီၤအၤဘြၤဟၣ်, စီၤဒၤဝံးဒီး စီၤဒၤနံးယ့လးန့ၣ်​ ကဲထီၣ်​ ယွၤအတံၤသကိးဒ်လဲၣ်. ယဟိဝၤယွၤ စံးဘၣ်စီၤအၤဘြၤဟၣ်လၢ– “မ့ၢ်နဒိကနၣ်​ ယကလုၢ်အဃိ” လီၤ. (၁ မိၤၡ့ ၂၂:၁၈) ယဟိဝၤယွၤ ဒီတံၤဒီသကိးဒီး ပှၤလၢအဆီၣ်လီၤသး ဒီးဒိကနၣ်အကလုၢ်လီၤ. ပှၤဒီတကလုာ်ဒၣ်လဲာ် ကဲထီၣ်ယွၤအတံၤသကိးသ့ဝဲလီၤ. အဒိ ယဟိဝၤယွၤ စံးဘၣ်ပှၤအံၣ်စရ့လးဖိတဖၣ်လၢ– “မ့မ့ၢ် ယမၤလိာ်အီၤလၢတၢ်အံၤ, ဒီးစံး, ဒိကနၣ်ယကလုၢ်တက့ၢ်, ဒီးယကကဲထီၣ်သုကစၢ်, ဒီးသုကကဲထီၣ်​ ယပှၤဂီၢ်မုၢ်” လီၤ. (ယံးရမံယၤ ၇:၂၃) နမ့ၢ်အဲၣ်ဒိးကဲထီၣ်​ ယဟိဝၤယွၤ အတံၤသကိးနီၢ်ကီၢ်န့ၣ်​ နကဘၣ်ဒိကနၣ်​ ယွၤအကလုၢ်စ့ၢ်ကီးလီၤ.

ယဟိဝၤယွၤ ဒီသဒၢ အတံၤသကိးတဖၣ်

၄, ၅. ယဟိဝၤယွၤ ဒီသဒၢ အတံၤသကိးသ့ၣ်တဖၣ်​ လၢကျဲဒ်လဲၣ်.

^၄ လံာ်စီဆှံစံးဝဲလၢ ယဟိဝၤယွၤ “ကွၢ်ထံကွၢ်ဆးတၢ်လၢ ဟီၣ်ခိၣ်ဒီဘ့ၣ်ညါအဖီခိၣ်, ဒ်သိးအကဟ့ၣ်ဂံၢ်ဟ့ၣ်ဘါပှၤတဖၣ်လၢ အအိၣ်ဒီး တၢ်သးတီဒီးအီၤန့ၣ်လီၤ.” (၂ ကွဲးနီၣ်တၢ် ၁၆:၉, ခ့ခါစှီၤကျိာ်) ဖဲ စံးထီၣ်ပတြၢၤ ၃၂:၈ န့ၣ်ယဟိဝၤယွၤအၢၣ်လီၤ အတံၤသကိးတဖၣ်လၢ “ယကသိၣ်က့ၤသီက့ၤနၤ, ဒီးဒုးနဲၣ်နၤလၢ ကျဲလၢနဘၣ်လဲၤန့ၣ်လီၤ. ယကဟ့ၣ်ကူၣ်နၤလၢ ယမဲာ်လီၤ.”

^၅ ပဒုၣ်ပဒါလၢ အိၣ်ဒီးအစိကမီၤတဂၤ အဲၣ်ဒိးမၤဟးဂီၤကွံာ် ပတၢ်ရ့လိာ်သးဒီးယဟိဝၤယွၤလီၤ. ဘၣ်ဆၣ်​ ယဟိဝၤယွၤ အဲၣ်ဒိးဒီသဒၢပှၤလီၤ. (ဖး စံးထီၣ်ပတြၢၤ ၅၅:၂၂ တက့ၢ်.) ဒ်ပမ့ၢ် ယဟိဝၤယွၤ အတံၤသကိးအသိး ပမၤအတၢ်မၤလၢ ပသးဒီဖျၢၣ်န့ၣ်လီၤ. တကးဒံးဘၣ်​ ဖဲပထံၣ်ဘၣ်​ တၢ်ကီတၢ်ခဲအဆၢကတီၢ်ဒၣ်လဲာ် ပတီဒီးကစၢ်ယွၤလီၤ. ပအိၣ်ဒီး တၢ်နာ်ဂၢၢ်ကျၢၤ ဒ်ပှၤကွဲးထါစံးထီၣ်ပတြၢၤတဂၤ အသိးန့ၣ်လီၤ. အဝဲကွဲးဝဲလၢ ယဟိဝၤယွၤ– “အိၣ်လၢ ယစုထွဲဒီး, ယတဟူးတဝးဘၣ်.” (စံးထီၣ်ပတြၢၤ ၁၆:၈; ၆၃:၈) ဒ်သိး ပတၢ်ရ့လိာ်သးဒီး ယဟိဝၤယွၤ ကဟးဂီၤဝဲအဂီၢ် မုၣ်ကီၤလံၢ် ဂုာ်ကျဲးစၢးမၤဝဲဒ်လဲၣ်.

မုၣ်ကီၤလံၢ် ပာ်တၢ်ကမၣ်လၢ ပှၤဟီၣ်ခိၣ်ဖိအလိၤဒ်လဲၣ်

၆. မုၣ်ကီၤလံၢ် ပာ်တၢ်ကမၣ်လၢ ပှၤဟီၣ်ခိၣ်ဖိအလိၤ ဒ်လဲၣ်.

^၆ လၢတၢ်မၤလိ ၁၁ အပူၤန့ၣ်​ ပမၤလိဘၣ်လၢ မုၣ်ကီၤလံၢ် ပာ်တၢ်ကမၣ်လၢ ယွၤအလိၤဒီးစံးဝဲလၢ ကစၢ်ယွၤမ့ၢ်ပှၤလၢ အကတိၤကဘျံးကဘျၣ်တၢ်လီၤ. ဒီးမုၣ်ကီၤလံၢ် စံးစ့ၢ်ကီးဝဲလၢ ယဟိဝၤယွၤမ့ၢ်ပှၤလၢ အပၢတၢ်တကြၢးတဘၣ်ဘၣ်. မ့ၢ်လၢကစၢ်တဟ့ၣ်​ နီၢ်အံၣ်အု ဒီးစီၤအၤဒၣ်​ အခွဲးလၢ အဝဲသ့ၣ်ကဆၢတဲာ်ဝဲ တၢ်အဘၣ်ဒီးတၢ်အကမၣ်​ လၢအနီၢ်ကစၢ်ဒၣ်ဝဲအဃိလီၤ. လံာ်ယိၤဘး သိၣ်လိပှၤလၢ ကယဲၢ်ပှၤဟီၣ်ခိၣ်ဖိ လၢအအဲၣ်ဒိးကဲထီၣ်​ ယွၤအတံၤသကိးန့ၣ်​ မုၣ်ကီၤလံၢ်ပာ်တၢ်ကမၣ်​ လၢအဝဲသ့ၣ်အလိၤလီၤ. မုၣ်ကီၤလံၢ် စံးဝဲလၢ ပှၤတဖၣ်အံၤမၤ ယဟိဝၤယွၤအတၢ်မၤန့ၣ်​ မ့ၢ်လၢအဝဲသ့ၣ်အဲၣ်ဒိး ဒိးန့ၢ်ဘၣ်တၢ်လၢ ကစၢ်ယွၤအအိၣ်အဃိလီၤ. ဒီးတမ့ၢ်လၢ အဝဲသ့ၣ်အဲၣ်​ ယွၤအဃိဘၣ်. တကးဒံးဘၣ်​ မုၣ်ကီၤလံၢ်စံးကဒီးဝဲလၢ ပှၤဟီၣ်ခိၣ်ဖိ ကိးဂၤဒဲး ကပာ်တ့ၢ်ကွံာ်ယွၤအဂီၢ် အဝဲကွဲန့ၢ်လွဲန့ၢ်ဝဲသ့လီၤ. ပမၤလိန့ၢ်တၢ်လၢ စီၤယိၤဘးအအိၣ်​ သ့ဒ်လဲၣ်​ ဒီးယဟိဝၤယွၤ ဒီသဒၢအီၤဒ်လဲၣ်န့ၣ်​ ပကသမံသမိးကွၢ် တၢ်ဂ့ၢ်တၢ်ကျိၤတဖၣ်အံၤလီၤ.

၇, ၈. (က) ယဟိဝၤယွၤ ထံၣ်စီၤယိၤဘးဒ်လဲၣ်. (ခ) ဘၣ်ဃးဒီးစီၤယိၤဘးန့ၣ်​ မုၣ်ကီၤလံၢ် စံးဝဲဒ်လဲၣ်.

^၇ စီၤယိၤဘး မ့ၢ်ပှၤဒ်လဲၣ်တဂၤလဲၣ်. စီၤယိၤဘးမ့ၢ်ပှၤလၢ အတီအလိၤတဂၤ ဒီးအဝဲအိၣ်မူတ့ၢ်ဝဲလၢ အပူၤကွံာ်အနံၣ်​ ၃,၆၀၀ ဘျဲၣ်န့ၣ်လီၤ. ဖဲစီၤယိၤဘး အိၣ်မူဝဲအဆၢကတီၢ်န့ၣ်​ ယဟိဝၤယွၤစံးဝဲလၢ ပှၤလီၤဂာ်ဒီးအီၤ တအိၣ်နီတဂၤဘၣ်. ဒီးအဝဲမ့ၢ်ပှၤလၢ အယူးယီၣ်ပာ်ကဲ ကစၢ်ယွၤဒီး သးဟ့တၢ်အၢန့ၣ်လီၤ. (ယိၤဘး ၁:၈) စီၤယိၤဘး မ့ၢ်ယဟိဝၤယွၤ အတံၤသကိးတံၢ်နီၢ်တဂၤလီၤ.

^၈ မုၣ်ကီၤလံၢ်စံးဝဲလၢ စီၤယိၤဘး ဘူၣ်ထီၣ်ဘါထီၣ်ယွၤ လၢအနီၢ်ကစၢ်အဘျုး အဂီၢ်လီၤ. ဒီးမုၣ်ကီၤလံၢ် စံးဘၣ်ယဟိဝၤယွၤလၢ– “နမၤကရၢ ဝးတရံးအီၤ, ဒီးဝးတရံးအဟံၣ်, ဒီးဝးတရံးကယဲၢ်တၢ်လၢ အအိၣ်ဒီးအီၤ တခီလၢ်လၢ်, တမ့ၢ်ဘၣ်ဧါ. နဆိၣ်ဂ့ၤအစုအတၢ်မၤ, ဒီးအတၢ်ဖိတၢ်လံၤ အါထီၣ်ဂီၢ်ထီၣ်လၢ ကီၢ်အပူၤလီၤ. မ့မ့ၢ်ယူာ်ထီၣ်လၢ်နစု, ဒီးထိးကယဲၢ်တၢ်လၢ အအိၣ်ဒီးအီၤ, ဒီးကဆိၣ်မးနၤလၢ နမဲာ်သၣ်ပူၤလီၤ.” —ယိၤဘး ၁:၁၀, ၁၁.

၉. ယဟိဝၤယွၤ ဟ့ၣ်မုၣ်ကီၤလံၢ်အခွဲးလၢ ကမၤဝဲတၢ်မနုၤလဲၣ်.

^၉ မုၣ်ကီၤလံၢ် ပာ်တၢ်ကမၣ်လၢ စီၤယိၤဘးအလိၤ ဒီးစံးဝဲလၢ အဝဲဘူၣ်ထီၣ်ဘါထီၣ်​ ယဟိဝၤယွၤ ခီဖျိလၢ ယွၤဆိၣ်ဂ့ၤအီၤအဃိလီၤ. မုၣ်ကီၤလံၢ် စံးစ့ၢ်ကီးဝဲလၢ ဒ်သိးစီၤယိၤဘး ကပာ်တ့ၢ်ကွံာ်ယွၤအဂီၢ် အဝဲကွဲန့ၢ်လွဲန့ၢ်ဝဲသ့လီၤ. ယဟိဝၤယွၤ တအၢၣ်လီၤတူၢ်လိာ် မုၣ်ကီၤလံၢ် အတၢ်ကတိၤဘၣ်. ဘၣ်ဆၣ်သနာ်က့ မ့ၢ်စီၤယိၤဘးကဲထီၣ်ယွၤအတံၤသကိး ဒီးမၤယွၤအတၢ်မၤ မ့ၢ်လၢအဝဲအဲၣ်ယွၤအဃိဧါ. ယဟိဝၤယွၤ ဟ့ၣ်အခွဲးလၢ မုၣ်ကီၤလံၢ်ကမၤကွၢ်အီၤလီၤ.

မုၣ်ကီၤလံၢ် မၤကွၢ်စီၤယိၤဘး

၁၀. မုၣ်ကီၤလံၢ် မၤကွၢ်စီၤယိၤဘး ဒ်လဲၣ်. ဒီးစီၤယိၤဘး မၤဆၢက့ၤဝဲ ဒ်လဲၣ်.

^၁၀ အဆိကတၢၢ်န့ၣ်​ စီၤယိၤဘး အဆၣ်ဖိကီၢ်ဖိ ဘၣ်တၢ်ဟုၣ်ကွံာ်အီၤတနီၤ ဒီးအဂၤတနီၤန့ၣ်​ ဘၣ်တၢ်မၤသံကွံာ်အီၤလီၤ. ဝံၤဒီးမုၣ်ကီၤလံၢ်မၤသံကွံာ် စီၤယိၤဘး အပျဲၢ်အါဂၤလီၤ. တၢ်လၢအိၣ်ဒီးစီၤယိၤဘးန့ၣ်​ လီၤမၢ်ကွံာ်ဝဲခဲလၢာ်လံ. တၢ်မၤကွၢ် လၢခံကတၢၢ်တခါန့ၣ်​ မုၣ်ကီၤလံၢ် မၤသံကွံာ်စီၤယိၤဘး အဖိမုၣ်ဖိခွါအဂၤတဆံန့ၣ်လၢ ကလံၤမုၢ်လီၤ. ဘၣ်ဆၣ်​ စီၤယိၤဘး တီဒီးယဟိဝၤယွၤလီၤ. “လၢကယဲၢ်တၢ်အံၤအပူၤ ခဲလၢာ်န့ၣ်​ စီၤယိၤဘး တမၤတၢ်ဒဲးဘးဘၣ်, ဒီးတပာ်တၢ်ကမၣ်​ လၢယွၤအလိၤဘၣ်.”—ယိၤဘး ၁:၁၂-၁၉, ၂၂.

၁၁. (က) မုၣ်ကီၤလံၢ် မၤဆါစီၤယိၤဘး ဒ်လဲၣ်. (ခ) စီၤယိၤဘး မၤဆၢက့ၤဝဲ ဒ်လဲၣ်.

^၁၁ မုၣ်ကီၤလံၢ် တဟ့ၣ်အၡူဒံးဘၣ်. အဝဲစံးဘၣ်ယွၤလၢ– “ထိးအဃံ, ဒီးအညၣ်တက့ၢ်. ဒီးကဆိၣ်မးနၤလၢ နမဲာ်သၣ်ပူၤလီၤ.” တၢ်န့ၣ်အလီၢ်ခံမုၣ်ကီၤလံၢ် မၤဆါစီၤယိၤဘး နးနးကလဲာ်လၢ တၢ်ဆါတခါန့ၣ်လီၤ. (ယိၤဘး ၂:၅, ၇) ဘၣ်ဆၣ်​ စီၤယိၤဘး ဆဲးတီဒီးယွၤလီၤ. ဒီးအဝဲစံးဝဲလၢ– “ယတချုးသံဒံးဘၣ်ဒီး, ယတသုးကွံာ်ဘၣ်​ ယတၢ်လၢတၢ်ပှဲၤ လၢယအိၣ်ဘၣ်.”—ယိၤဘး ၂၇:၅.

၁၂. မုၣ်ကီၤလံၢ် မ့ၢ်ပှၤလၢအလီတၢ်န့ၣ်​ စီၤယိၤဘး ပာ်ဖျါထီၣ်ဝဲဒ်လဲၣ်.

^၁၂ မုၣ်ကီၤလံၢ် ပာ်တၢ်ကမၣ်လၢအလိၤဒ်လဲၣ်​ ဒီးဘၣ်မနုၤအဃိ အဝဲတူၢ်ဘၣ်​ တၢ်နးတၢ်ဖှီၣ်တဖၣ်အံၤလဲၣ်န့ၣ်​ စီၤယိၤဘး တသ့ၣ်ညါတၢ်ဂ့ၢ်နီတမံၤဘၣ်. ဒီးအဝဲဆိကမိၣ်ဝဲလၢ ယဟိဝၤယွၤ ဒုးအိၣ်ထီၣ်ဝဲ အတၢ်ကီတၢ်ခဲတဖၣ်န့ၣ်လီၤ. (ယိၤဘး ၆:၄; ၁၆:၁၁-၁၄) ဘၣ်ဆၣ်သနာ်က့ စီၤယိၤဘး တီလၢယွၤအဖီခိၣ်လီၤ. လၢတၢ်န့ၣ်အဃိ တၢ်စံးဆၢဖျါထီၣ်ဝဲ လီၤတံၢ်လီၤဆဲးလၢ စီၤယိၤဘး တဘူၣ်ထီၣ်ဘါထီၣ်​ ယွၤထဲလၢအနီၢ်ကစၢ် အဘျုးအဂီၢ်ဘၣ်. အဝဲမ့ၢ်ယွၤအတံၤသကိး မ့ၢ်လၢအဝဲအဲၣ်ယွၤအဃိလီၤ. ဒီးမုၣ်ကီၤလံၢ် ပာ်တၢ်ကမၣ်လၢအလိၤန့ၣ်​ မ့ၢ်တၢ်လီတၢ်ဝ့ၤခဲလၢာ်လီၤ.

၁၃. ခီဖျိလၢ စီၤယိၤဘး တီဒီးယွၤအဃိ တၢ်အဘျုးအိၣ်ထီၣ်ဝဲ ဒ်လဲၣ်.

^၁၃ စီၤယိၤဘး မ့ၢ်တသ့ၣ်ညါ တၢ်မၤအသး လၢမူခိၣ်သနာ်က့ အဝဲတီဒီး ယဟိဝၤယွၤလီၤ. ဒီးအဝဲပာ်ဖျါထီၣ်ဝဲလၢ မုၣ်ကီၤလံၢ် မ့ၢ်ပှၤအၢပှၤသီလီၤ. ယဟိဝၤယွၤ ဆိၣ်ဂ့ၤအတံၤသကိး စီၤယိၤဘးလၢ အတီဒီးအီၤလီၤ.—ယိၤဘး ၄၂:၁၂-၁၇.

မုၣ်ကီၤလံၢ် ပာ်တၢ်ကမၣ်လၢ နလိၤဒ်လဲၣ်

၁၄, ၁၅. မုၣ်ကီၤလံၢ် ပာ်တၢ်ကမၣ်လၢ ပှၤကိးဂၤဒဲးအလိၤဒ်လဲၣ်.

^၁၄ နမ့ၢ်ဆိကမိၣ်ထံ တၢ်လၢအမၤအသးဒီး စီၤယိၤဘးန့ၣ်​ နကမၤလိန့ၢ် တၢ်လၢအရ့ဒိၣ်တဖၣ်လီၤ. မုၢ်မဆါတနံၤအံၤ မုၣ်ကီၤလံၢ်စံးဝဲလၢ ပဘူၣ်ထီၣ်ဘါထီၣ်​ ယဟိဝၤယွၤမ့ၢ်လၢ ပဒိးန့ၢ်ဘၣ်တၢ်လၢအအိၣ်အဃိလီၤ. ယိၤဘး ၂:၄ စံးဝဲလၢ– “ကယဲၢ်တၢ်လၢ အအိၣ်ဒီးအီၤန့ၣ်​ ပှၤကဟ့ၣ်ဝဲလၢ အသးသမူအဂီၢ်လီၤ.” လၢတၢ်န့ၣ်အဃိ မုၣ်ကီၤလံၢ် ပာ်တၢ်ကမၣ်လၢ စီၤယိၤဘးအလိၤ တကးဒံးဘၣ်​ အဝဲအဲၣ်ဒိးစံးစ့ၢ်ကီးဝဲလၢ ပှၤဟီၣ်ခိၣ်ဖိခဲလၢာ်န့ၣ်​ ဃုဝဲထဲအနီၢ်ကစၢ်အဘျုးလီၤ. စီၤယိၤဘး သံပူၤကွံာ်နံၣ်လၢ အကယၤဝံၤအလီၢ်ခံန့ၣ်​ မုၣ်ကီၤလံၢ် ကတိၤဒုၣ်ဒွဲၣ်ဒံး ယဟိဝၤယွၤ ဒီးပာ်တၢ်ကမၣ်လၢ ယွၤအခ့အပှၤတဖၣ်အလိၤလီၤ. အဒိ ကတိၤဒိ ၂၇:၁၁ စံးဝဲလၢ– “ယဖိခွါဧၢ, ကူၣ်တၢ်သ့, ဒီးမၤခုယသး ဒ်သိးယကစံးဆၢပှၤလၢ အဒုၣ်ဒွဲၣ်ယၤန့ၣ်တက့ၢ်.”

^၁၅ နဃုထၢလၢ နကဒိကနၣ်​ ယဟိဝၤယွၤအကလုၢ် ဒီးကဲထီၣ်အတံၤသကိး လၢအတီဒီးအီၤသ့ဝဲလီၤ. ဒီးနပာ်ဖျါထီၣ်လၢ မုၣ်ကီၤလံၢ် မ့ၢ်ပှၤလၢအလီတၢ်န့ၣ်​ သ့ဝဲစ့ၢ်ကီးလီၤ. ဒ်သိးနကကဲထီၣ်​ ယွၤအတံၤသကိးအဂီၢ် ဘၣ်သ့ၣ်သ့ၣ်လၢ နတၢ်အိၣ်မူအပူၤန့ၣ်​ တၢ်လၢနကဘၣ်ဆီတလဲအီၤ ကအိၣ်ဝဲအါမးလီၤ. ဘၣ်ဆၣ်​ တၢ်အံၤမ့ၢ်တၢ်ဃုထၢ အဂ့ၤကတၢၢ်လၢနဂီၢ်လီၤ. တၢ်ဃုထၢဒ်အံၤန့ၣ်​ မ့ၢ်တၢ်လၢ အရ့ဒိၣ်ကတၢၢ်လီၤ. မုၣ်ကီၤလံၢ် စံးဝဲလၢ နမ့ၢ်ထံၣ်ဘၣ်တၢ်ကီတၢ်ခဲန့ၣ်​ တမ့ၢ်လၢနကတီဒီးယွၤလၢၤဘၣ်. ဒီးဒ်သိးပသုတတီဒီး ကစၢ်ယွၤတဂ့ၤအဂီၢ် မုၣ်ကီၤလံၢ် ဂုာ်ကျဲးစၢးလီန့ၢ်ပှၤလီၤ. အဝဲလီန့ၢ်ပှၤလၢ ကျဲဒ်လဲၣ်.

၁၆. (က) ဒ်သိးပှၤဟီၣ်ခိၣ်ဖိ သုတဘူၣ်ထီၣ်ဘါထီၣ်လၢၤ ယွၤတဂ့ၤအဂီၢ် မုၣ်ကီၤလံၢ်သူဝဲ ကျဲမနုၤတဖၣ်လဲၣ်. (ခ) ဒ်သိး နကပတုာ်မၤယွၤအတၢ်မၤအဂီၢ် မုၣ်ကီၤလံၢ်ဒုးအိၣ်ထီၣ်ဝဲ တၢ်သးဒ့ဒီလၢကျဲဒ်လဲၣ်.

^၁၆ မုၣ်ကီၤလံၢ် ဂုာ်ကျဲးစၢးမၤဟးဂီၤကွံာ် ပတၢ်ရ့လိာ်သးဒီး ယဟိဝၤယွၤလၢ ကျဲအါဘိလီၤ. အဒိ လံာ်စီဆှံစံးဝဲလၢ– “ဒ်ခ့ယုၢ်ကညီၤရုၢ်ရုၢ်အသိးန့ၣ်, သုဒုၣ်သုဒါ မုၣ်ကီၤလံၢ် ဟးဝ့ၤဝီၤဃုပှၤလၢ အကယူၢ်လီၤဝဲလီၤ.” (၁ ပ့းတရူး ၅:၈) နကြၢးသ့ၣ်ညါပာ်စၢၤလၢ နတံၤသကိးတဖၣ်, နဘူးနတံၢ်တဖၣ်​ ဒီးပှၤအဂၤတဖၣ်န့ၣ်​ ကဂုာ်ကျဲးစၢးဝဲ ဒ်သိးနသုတမၤလိလံာ်စီဆှံ ဒီးမၤတၢ်လၢအဘၣ်​ တဂ့ၤအဂီၢ်န့ၣ်လီၤ. နကတူၢ်ဘၣ်ဒ်သိး တၢ်မၤကွၢ်ဖးဒိၣ်တခါ လၢနဂီၢ်န့ၣ်လီၤ.a (ယိၤဟၣ်​ ၁၅:၁၉, ၂၀) မုၣ်ကီၤလံၢ် မၤလီၤဂာ်အသး ဒ်သိးဒီး “တၢ်ကပီၤ အကလူးလီၤ.” လၢတၢ်န့ၣ်အဃိ အဝဲဂုာ်ကျဲးစၢး လီန့ၢ်ပှၤဒ်သိး ပသုတဒိကနၣ်​ ယဟိဝၤယွၤ အကလုၢ်တဂ့ၤအဂီၢ်လီၤ. (၂ ကရံၣ်သူး ၁၁:၁၄) ကျဲအိၣ်ဒံးတဘိလၢ မုၣ်ကီၤလံၢ်ဂုာ်ကျဲးစၢးဝဲ ဒ်သိးပသုတဘူၣ်ထီၣ်ဘါထီၣ်​ ယဟိဝၤယွၤ တဂ့ၤအဂီၢ်န့ၣ်လီၤ. အဝဲဂုာ်ကျဲးစၢး ဒုးဆိကမိၣ်ပှၤလၢ ပတတုၤထီၣ်ထီၣ်ဘး လၢပကမၤယွၤအတၢ်မၤ အဂီၢ်န့ၣ်လီၤ.—ကတိၤဒိ ၂၄:၁၀.

ဒိကနၣ်​ ယဟိဝၤယွၤ အကလုၢ်

၁၇. ဘၣ်မနုၤအဃိ ပဒိကနၣ်​ ယဟိဝၤယွၤအကလုၢ်လဲၣ်.

^၁၇ ဖဲပဒိကနၣ်​ ယဟိဝၤယွၤ အကလုၢ်အခါ ပပာ်ဖျါထီၣ်လၢ မုၣ်ကီၤလံၢ် မ့ၢ်ပှၤလၢအကတိၤကဘျံးကဘျၣ်တၢ်လီၤ. ဒ်သိးပကအိၣ်ဒီး တၢ်ဒိကနၣ်အဂီၢ် တၢ်မနုၤကမၤစၢၤပှၤလဲၣ်. လံာ်စီဆှံ စံးဝဲလၢ– “နဘၣ်အဲၣ်ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ ဒီးနဂံၢ်နဘါခဲလၢာ်လီၤ.” (၅ မိၤၡ့ ၆:၅) ပဒိကနၣ်​ ယဟိဝၤယွၤအကလုၢ် မ့ၢ်လၢပအဲၣ်အီၤအဃိလီၤ. ဒ်ပတၢ်အဲၣ်​ ယဟိဝၤယွၤ ဒိၣ်ထီၣ်ဝဲအသိး ပကသးအိၣ်မၤတၢ်လၢ ကစၢ်မၢပမၤကိးမံၤဒဲးန့ၣ်လီၤ. တၢ်မၢဖိ ယိၤဟၣ်ကွဲးဝဲလၢ– “တၢ်အဲၣ်ယွၤ မ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ်​ တကီတခဲဘၣ်လီၤ.”—၁ ယိၤဟၣ်​ ၅:၃.

၁၈, ၁၉. (က) တၢ်လၢယဟိဝၤယွၤ တဘၣ်အသးတဖၣ်န့ၣ်​ မ့ၢ်တၢ်မနုၤလဲၣ်. (ခ) ယဟိဝၤယွၤ တမၢဆူၣ်ပှၤလၢပကမၤ တၢ်လၢပမၤအီၤတန့ၢ်ဘၣ်န့ၣ်​ ပသ့ၣ်ညါဘၣ်ဒ်လဲၣ်.

^၁၈ တၢ်လၢ ယဟိဝၤယွၤတဘၣ်အသးတဖၣ်န့ၣ်​ မ့ၢ်တၢ်မနုၤလဲၣ်. တၢ်အဒိတနီၤန့ၣ်​ ပကထံၣ်ဘၣ်လၢ တၢ်လွံၢ်နၢၣ်အပူၤလီၤ. ဒီးအခိၣ်တီမ့ၢ်ဝဲ– “သးဟ့တၢ်လၢ ယဟိဝၤယွၤ သးဟ့ဝဲတက့ၢ်.” အဆိကတၢၢ်န့ၣ်​ ဘၣ်သ့ၣ်သ့ၣ်​ နကဆိကမိၣ်လၢ တၢ်ဂ့ၢ်တဖၣ်အံၤအကျါတနီၤန့ၣ်​ တအၢထဲန့ၣ်ညါဘၣ်. ဘၣ်ဆၣ်​ ဖးလံာ်စီဆှံအဆၢ လၢဘၣ်တၢ်ပာ်ဖျါထီၣ်အီၤ ဒီးဆိကမိၣ်အီၤလီၤတံၢ်လီၤဆဲးတက့ၢ်. နမ့ၢ်မၤဒ်န့ၣ်န့ၣ်​ နကနၢ်ပၢၢ်လၢ တၢ်ဒိကနၣ်​ ယဟိဝၤယွၤ အတၢ်သိၣ်တၢ်သီန့ၣ်​ မ့ၢ်ကျဲလၢအဂ့ၤကတၢၢ်လီၤ. ဘၣ်သ့ၣ်သ့ၣ်​ နကတူၢ်ဘၣ်လၢ နကဘၣ်ဆီတလဲ နလုၢ်လၢ်သကဲာ်ပဝးတနီၤန့ၣ်လီၤ. နကဆီတလဲနတၢ်အိၣ်မူန့ၣ်​ တမ့ၢ်တၢ်လၢအညီဘၣ်. ဘၣ်ဆၣ်သနာ်က့ နမ့ၢ်ဆီတလဲနသးန့ၣ်​ နပာ်ဖျါထီၣ်လၢ နမ့ၢ်ယွၤအတံၤသကိးလၢ အတီဒီးအီၤတဂၤ ဒီးနကအိၣ်ဒီးတၢ်သူၣ်မံသးမုာ် ဒီးတၢ်သူၣ်ဖှံသးညီန့ၣ်လီၤ. (ယၡါယၤ ၄၈:၁၇, ၁၈) ပဆီတလဲပသး ကသ့ဒ်လဲၣ်.

^၁၉ တၢ်လၢပမၤအီၤတန့ၢ်ဘၣ်န့ၣ်​ ယဟိဝၤယွၤ တမၢဆူၣ်ပှၤနီတဘျီဘၣ်. (၅ မိၤၡ့ ၃၀:၁၁-၁၄) ဒ်အဝဲမ့ၢ် တံၤသကိးတံၢ်နီၢ်တဂၤအသိး အဝဲသ့ၣ်ညါ ပတၢ်အိၣ်သးဂ့ၤန့ၢ်ဒံး ပသ့ၣ်ညါလီၤပသးန့ၣ်လီၤ. အဝဲသ့ၣ်ညါ ပတၢ်ဂ့ၤတၢ်ဝါ ဒီးပတၢ်ဂံၢ်စၢ်ဘါစၢ်တဖၣ်လီၤ. (စံးထီၣ်ပတြၢၤ ၁၀၃:၁၄) တၢ်မၢဖိပီလူး ဟ့ၣ်ဂံၢ်ဟ့ၣ်ဘါပှၤ ဒီးစံးဝဲလၢ “ယွၤမၤဝဲ အကလုၢ်တီသတးဒီး, တၢ်လ့ပစီလၢ အဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢ တၢ်လ့ပစီအပူၤ, ကမၤထီၣ်ကျဲဒ်သိး သုကပူၤဖျဲးလၢအီၤလီၤ.” (၁ ကရံၣ်သူး ၁၀:၁၃) လၢတၢ်န့ၣ်အဃိ ပနာ်သ့သပှၢ်ကတၢၢ်လၢ ယဟိဝၤယွၤ ကဟ့ၣ်ပှၤတၢ်ဂံၢ်တၢ်ဘါ လၢပကမၤတၢ်အဘၣ်အဂီၢ်န့ၣ်လီၤ. ကစၢ်ယွၤကဟ့ၣ်နၤ “အစိအကမီၤ ဒိၣ်ကဲၣ်ဆိး” ဒ်သိး နတူၢ်တၢ်ကီတၢ်ခဲ ကန့ၢ်အဂီၢ်လီၤ. (၂ ကရံၣ်သူး ၄:၇) စီၤပီလူးဒိးန့ၢ်ဘၣ်​ ယဟိဝၤယွၤအတၢ်မၤစၢၤအဃိအဝဲ စံးဝဲလၢ– “ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ်​ ယဂံၢ်ယဘါတဂၤအပူၤလီၤ.”—ဖံလံးပံၤ ၄:၁၃.

အဲၣ်တၢ်လၢ ကစၢ်ယွၤအဲၣ်ဝဲတဖၣ်

၂၀. နကြၢးကွၢ်လိမၤဒိး ယွၤအတၢ်ဂ့ၤတၢ်ဝါ မနုၤတဖၣ်လဲၣ်. ဒီးလၢ တၢ်ဂ့ၢ်မနုၤအဃိလဲၣ်.

^၂၀ ပမ့ၢ်အဲၣ်ဒိးကဲထီၣ်​ ယွၤအတံၤသကိးန့ၣ်​ ပတဘၣ်မၤတၢ်လၢ အတဘၣ်ယဟိဝၤယွၤအသးန့ၣ်ဘၣ်. (ရိမ့ၤ ၁၂:၉) တကးဒံးဘၣ်​ ကစၢ်ယွၤ အတံၤသကိးတဖၣ်န့ၣ်​ အဲၣ်တၢ်လၢ ယွၤအဲၣ်ဝဲလီၤ. အဝဲသ့ၣ်တဖၣ်​ ကအိၣ်မူဝဲဒ်လဲၣ်န့ၣ်​ စံးထီၣ်ပတြၢၤ ၁၅:၁-၅ ပာ်ဖျါထီၣ်န့ၢ်ပှၤလီၤ. (ဖးတက့ၢ်.) ယဟိဝၤယွၤ အတံၤသကိးတဖၣ်န့ၣ်​ ကွၢ်လိမၤဒိးဝဲ ကစၢ်ယွၤ အတၢ်ဂ့ၤတၢ်ဝါ ဒီးပာ်ဖျါထီၣ်ဝဲ “တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နာ်, တၢ်ဆီၣ်လီၤပသး, တၢ်ကီၤသူၣ်ကီၤသးသ့ၣ်တဖၣ်န့ၣ်လီၤ.”—ကလၤတံ ၅:၂၂, ၂၃.

၂၁. ဒ်သိးနပာ်ဖျါထီၣ်​ တၢ်ဂ့ၤတၢ်ဝါလၢ ကစၢ်ယွၤဘၣ်သူၣ်ဘၣ်သးတဖၣ်ကသ့အဂီၢ်န့ၣ်​ နကဘၣ်မၤဒ်လဲၣ်.

^၂၁ ဒ်သိးနပာ်ဖျါထီၣ်တၢ်ဂ့ၤတၢ်ဝါ လၢအလီၤဘၣ်သူၣ်ဘၣ်သးတဖၣ်အံၤ ကသ့အဂီၢ်န့ၣ်​ နကဘၣ်မၤဒ်လဲၣ်. နကဘၣ်မၤလိတၢ်လၢ ယဟိဝၤယွၤအဲၣ်ဝဲတဖၣ်​ ခီဖျိလၢတၢ်ဖးလံာ်စီဆှံ ဒီးမၤလိယွၤအကလုၢ်ကထါ ဘၣ်ဆၢဘၣ်ကတီၢ်န့ၣ်လီၤ. (ယၡါယၤ ၃၀:၂၁) နမ့ၢ်မၤဒ်န့ၣ်န့ၣ်​ နတၢ်အဲၣ်​ ယဟိဝၤယွၤ ကဒိၣ်ထီၣ်အါထီၣ်ဝဲလီၤ. ဒ်နတၢ်အဲၣ်​ ယဟိဝၤယွၤ ဒိၣ်ထီၣ်ဝဲအသိး နကအဲၣ်ဒိးဒိကနၣ်​ အကလုၢ်လီၤ.

၂၂. နမ့ၢ်ဒိကနၣ်​ ယဟိဝၤယွၤ အကလုၢ်န့ၣ်​ နကဒိးန့ၢ်ဘၣ်တၢ်အဘျုး မနုၤလဲၣ်.

^၂၂ တၢ်လၢ နကဘၣ်ဆီတလဲအီၤ လၢနတၢ်အိၣ်မူပူၤန့ၣ်​ လီၤဂာ်ဒ်သိးဒီး နဘ့ၣ်လီၤကွံာ်ဆ့ကၤလီၢ်လံၤ ဒီးကူသိးထီၣ်က့ၤဆ့ကၤ လၢအသီန့ၣ်လီၤ. လံာ်စီဆှံ စံးဝဲလၢ “ပှၤလီၢ်လံၤဒီး အတၢ်မၤတဖၣ်န့ၣ်, သုဘ့ၣ်လီၤကွံာ်လံ” ဒီးစံးကဒီးဝဲလၢ ပကဘၣ်ကူထီၣ်သိးထီၣ်​ “ပှၤသီ” န့ၣ်လီၤ. (ကလီးစဲ ၃:၉, ၁၀) ပမၤဒ်အံၤ မ့ၢ်တညီဝဲဒၣ်လဲာ် ပမ့ၢ်ဆီတလဲပတၢ်အိၣ်မူ ဒီးဒိကနၣ်​ ယဟိဝၤယွၤ အကလုၢ်န့ၣ်​ အဝဲအၢၣ်လီၤပှၤလၢ အကဟ့ၣ်ပှၤ “အဘျုးဖးဒိၣ်” န့ၣ်လီၤ. (စံးထီၣ်ပတြၢၤ ၁၉:၁၁) ဝံသးစူၤဒိကနၣ်​ ယဟိဝၤယွၤ အကလုၢ်ဒီး ပာ်ဖျါထီၣ်လၢ မုၣ်ကီၤလံၢ်မ့ၢ်ပှၤလၢ အကတိၤကဘျံးကဘျၣ်တၢ်တက့ၢ်. ဒီးတဘၣ်မုၢ်လၢ် ထဲခိၣ်ဖးတခါဧိၤလၢ ခါဆူညါအဂီၢ်တဂ့ၤ. ဆၢတဲာ်လီၤနသးလၢ နကမၤယွၤအတၢ်မၤလၢ နအဲၣ်အီၤအဃိတက့ၢ်. နမ့ၢ်မၤဒ်န့ၣ်န့ၣ်​ နကကဲထီၣ်​ ယွၤအတံၤသကိး တံၢ်နီၢ်တဂၤလီၤ.