အကူာ် ၅
ဟဲက့ၤဆူ “ပှၤကွၢ်သိ, ဒီးသုသးအပှၤကွၢ်တၢ်တဂၤ” အအိၣ်
ဘရိၣ်ခၠၣ်တဘ့ၣ်အံၤပာ်ဖျါထီၣ်ဝဲ ပဒီပုၢ်ဝဲၢ်တဖၣ်ထံၣ်ဘၣ်ဝဲ တၢ်ကီတၢ်ခဲတဖၣ်အဂ့ၢ်န့ၣ်လီၤ. မ့ၢ်နဘၣ်သဂၢၢ်ဒီး တၢ်ကီတၢ်ခဲဒ်အံၤ အိၣ်တမံၤမံၤဧါ. ပဒီပုၢ်ဝဲၢ်အါဂၤန့ၣ် သဂၢၢ်ဘၣ်ဝဲတၢ်ကီတၢ်ခဲ ဒ်န့ၣ်အိၣ်ဝဲစ့ၢ်ကီးလီၤ. အဒိ, ယွၤအခ့အပှၤလၢညါ ဒီးခဲအံၤသ့ၣ်တဖၣ်န့ၣ် အဝဲသ့ၣ်ဘၣ်သဂၢၢ်ဒီး တၢ်မၤကွၢ် ဒ်သိးလိာ်အသးလီၤ. ဒီးလၢအဝဲသ့ၣ် ကမၤနၢၤဝဲ တၢ်မၤကွၢ်တဖၣ်အဂီၢ်န့ၣ် အဝဲသ့ၣ်ဒိးန့ၢ်ဘၣ်ဝဲ တၢ်မၤစၢၤလၢ ယဟိဝၤယွၤအအိၣ်န့ၣ်လီၤ. နၤစ့ၢ်ကီးနဒိးန့ၢ်ဘၣ် ကစၢ်ယွၤအတၢ်မၤစၢၤ သ့ဝဲလီၤ.
နမ့ၢ်ဟဲက့ၤဆူ ယဟိဝၤယွၤအအိၣ်န့ၣ် အဝဲကအိၣ်ဒီးနၤ ဒီးကကဟုကယာ်နၤလီၤ.
နမ့ၢ်ဟဲက့ၤကဒါက့ၤဆူ ယဟိဝၤယွၤ အအိၣ်န့ၣ် အဝဲကတူၢ်လိာ်မုာ်နၤ သပှၢ်ကတၢၢ်လီၤ. ဒီးအဝဲကမၤစၢၤနၤ လၢနလဲၤခီဖျိ တၢ်ဘၣ်ယိၣ်ဘၣ်ဘှီကန့ၢ်, ကမၤစှၤလီၤ နသးအတၢ်တူၢ်ဘၣ်သ့ၣ်တဖၣ်, ဒီးနကဒိးန့ၢ်ဘၣ် တၢ်သူၣ်မံသးမုာ် ခီဖျိ သးလၢအသ့ၣ်ညါဒၣ်တၢ်လၢ အကဆှီန့ၣ်လီၤ. ဘၣ်သ့ၣ်သ့ၣ် တၢ်ကထိၣ်ဟူးထိၣ်ဂဲၤထီၣ်နသး လၢနကမၤက့ၤ ယဟိဝၤယွၤအတၢ်မၤ ဃုာ်ဒီး ပှၤစူၢ်တၢ်နာ်တၢ်ကဒဲကဒဲသ့ၣ်တဖၣ်လီၤ. နတၢ်အိၣ်သးန့ၣ် ကလီၤဂာ်ဒ် ခရံာ်ဖိတနီၤလၢ တၢ်မၢဖိအစိၤအသိးန့ၣ်လီၤ. တၢ်မၢဖိစီၤပီလူး ကွဲးဝဲလၢ– “သုမ့ၢ်တ့ၢ်ဒ်သိလၢ အဟးဖျိးကျဲအသိးန့ၣ် ဘၣ်ဆၣ်ဒီး, ခဲကနံၣ်အံၤ, သုတုၤက့ၤလၢပှၤကွၢ်သိ, ဒီးသုသးအပှၤကွၢ်တၢ်တဂၤ, အအိၣ်န့ၣ်လီၤ.”—၁ ပ့းတရူး ၂:၂၅.
နမ့ၢ်ဟဲက့ၤဆူ ယဟိဝၤယွၤအအိၣ်န့ၣ် မ့ၢ်ကျဲလၢ အဂ့ၤကတၢၢ်တဘိလီၤ. ဘၣ်မနုၤအဃိလဲၣ်. မ့ၢ်လၢယဟိဝၤယွၤ ကသးခုဝဲအဃိန့ၣ်လီၤ. (ကတိၤဒိ ၂၇:၁၁) ဒ်နသ့ၣ်ညါအသိး ယဟိဝၤယွၤ အိၣ်ဒီးသးအတၢ်တူၢ်ဘၣ်အဃိ ပတၢ်အိၣ်မူသကဲာ်ပဝးန့ၣ် မၤသးခု ယဟိဝၤယွၤအသးသ့ မ့တမ့ၢ် မၤသးအုးအီၤ သ့စ့ၢ်ကီးလီၤ. ဘၣ်ဆၣ် ယဟိဝၤယွၤ တမၢဆူၣ်နၤလၢ နကအဲၣ်အီၤဒီး မၤအတၢ်မၤဘၣ်. (၅ မိၤၡ့ ၃၀:၁၉, ၂၀) ပှၤကူၣ်ဘၣ်ကူၣ်သ့လၢ အသ့လံာ်စီဆှံတဂၤစံးဝဲလၢ– ‘တၢ်လၢပှၤကညီအသးပဲတြီန့ၣ် ပှၤအဂၤဟဲအိးထီၣ်အီၤတသ့ဘၣ်. ပကဘၣ်အိးထီၣ်လၢ ပနီၢ်ကစၢ်ဒၣ်ဝဲလီၤ.’ ဒ်သိးပအိးထီၣ် သးအပဲတြီကသ့အဂီၢ် ပကဘၣ်ဃုထၢလၢ ပနီၢ်ကစၢ်ဒၣ်ဝဲလၢ ပကဘူၣ်ထီၣ်ဘါထီၣ် ယဟိဝၤယွၤလၢ ပသးဒီဖျၢၣ်လီၤ. ပမ့ၢ်မၤဒ်န့ၣ်န့ၣ် မ့ၢ်ပဟ့ၣ်အီၤတၢ်ဟ့ၣ်လၢ အလုၢ်ဒိၣ်ပှ့ၤဒိၣ်လၢအမ့ၢ်—ပတၢ်သးတီ—ဒီးမ့ၢ်ဒၣ်ပဟ့ၣ်အီၤတၢ်သူၣ်ခုသးခုလၢ အဒိၣ်အမုၢ်န့ၣ်လီၤ. တၢ်သူၣ်ခုသးခုလၢ ပဒိးန့ၢ်ဘၣ်အီၤခီဖျိလၢ ပဘူၣ်ထီၣ်ဘါထီၣ်ယဟိဝၤယွၤန့ၣ် ပထိၣ်သတြီၤအီၤဒီး တၢ်အဂၤတသ့နီတမံၤဘၣ်. —မၤတၢ် ၂၀:၃၅; လီၣ်ဖျါ ၄:၁၁.
အါန့ၢ်အန့ၣ် နမ့ၢ်ဘူၣ်ထီၣ်ဘါထီၣ်ကဒါက့ၤ ယဟိဝၤယွၤန့ၣ် နနီၢ်သးအတၢ်လိၣ်ဘၣ်သ့ၣ်တဖၣ် ကဟဲလၢပှဲၤထီၣ်က့ၤဝဲလီၤ. (မးသဲ ၅:၃) လၢကျဲဒ်လဲၣ်. အဒိ ဖဲယဟိဝၤယွၤတ့လီၤ ပှၤဟီၣ်ခိၣ်ဖိအခါ အဝဲဖၢနုာ်ဃုာ်ဝဲဒီး နီၢ်သးအတၢ်လိၣ်ဘၣ်တဖၣ်လီၤ. လၢတၢ်န့ၣ်အဃိ ပှၤအါဂၤလၢဟီၣ်ခိၣ်ဒီဘ့ၣ်န့ၣ် ဆိကမိၣ်ဘၣ်ဝဲလၢ, ‘ဘၣ်မနုၤအဃိ ပဟဲအိၣ်မူဘၣ်လၢ ဟီၣ်ခိၣ်အံၤလဲၣ်.’ အဝဲသ့ၣ်အဲၣ်ဒိးသ့ၣ်ညါဝဲ တၢ်သံကွၢ်အံၤ အတၢ်စံးဆၢတခါလၢ ဘၣ်ဃးဒီးတၢ်အိၣ်မူ အတၢ်တိာ်ပာ်အဂ့ၢ်လီၤ. ကစၢ်ယွၤတ့လီၤပှၤဒ်သိး ပမ့ၢ်မၤအတၢ်မၤန့ၣ် ပကဒိးန့ၢ်ဘၣ်တၢ်သူၣ်ဖှံသးညီလီၤ. လၢတၢ်န့ၣ်အဃိ ပမ့ၢ်သ့ၣ်ညါလီၤပသးလၢ ပဘူၣ်ထီၣ်ဘါထီၣ် ယဟိဝၤယွၤလၢ တၢ်အဲၣ်နီၢ်နီၢ်ဒီး လၢသးဒီဖျၢၣ်ညါန့ၣ် ပကဒိးန့ၢ်ဘၣ် တၢ်သူၣ်မံသးမုာ်ဒိၣ်ဒိၣ်မုၢ်မုၢ်လီၤ.—စံးထီၣ်ပတြၢၤ ၆၃:၁-၅.
ပအဲၣ်ဒိးဒုးသ့ၣ်ညါနၤလၢ ယဟိဝၤယွၤဘၣ်အသးလၢ နကဟဲက့ၤကဒါက့ၤဆူအအိၣ်လီၤ. နသ့ၣ်ညါကသ့ဒ်လဲၣ်. ဆိကမိၣ်ကွၢ်–ဖဲပကတဲာ်ကတီၤ ဘရိၣ်ခၠၣ်တဘ့ၣ်အံၤအခါ ပဃ့ဘါထုကဖၣ်ဆူၣ်ဆူၣ်လီၤ. ဒီးတၢ်အိၣ်ဖှိၣ်သးပှၢ် မ့တမ့ၢ် ပှၤစူၢ်တၢ်နာ်တၢ်ကဒဲကဒဲတဂၤ ဟ့ၣ်ဖးနၤဘရိၣ်ခၠၣ်တဘ့ၣ်အံၤလီၤ. ဝံၤဒီးတၢ်ထိၣ်ဟူးထိၣ်ဂဲၤထီၣ်နသးလၢ နကဖးအီၤ ဒီးတၢ်ကစီၣ်သ့ၣ်တဖၣ်အံၤ ထုးန့ၢ်နသးလီၤ. တၢ်ဂ့ၢ်သ့ၣ်တဖၣ်အံၤ ပာ်ဖျါထီၣ်ဝဲလၢ ယဟိဝၤယွၤတသးပ့ၤနီၣ်နၤ နီတဘျီဘၣ်. လၢတၢ်န့ၣ်အဃိ ယဟိဝၤယွၤထုးက့ၤနၤကယီကယီ လၢနကဟဲက့ၤဆူအအိၣ်လီၤ.—ယိၤဟၣ် ၆:၄၄.
ပသ့ၣ်ညါဘၣ်လၢ ယဟိဝၤယွၤတသးပ့ၤနီၣ် အခ့အပှၤလၢ အဟးဖျိးကျဲဘၣ်အဃိ မ့ၢ်တၢ်လၢအမၤမုာ်ပသးဒိၣ်မးလီၤ. ဘၣ်ဃးဒီး တၢ်ဂ့ၢ်သ့ၣ်တဖၣ်အံၤန့ၣ် ဒီပုၢ်ဝဲၢ်မုၣ်ဒိနၣ် စံးဝဲလၢ– “ယယံၤထီၣ်ဒီးတၢ်မ့ၢ်တၢ်တီ ကယီကယီလီၤ. ဘၣ်ဆၣ် ယဆိကမိၣ်ထံ လံာ်စီဆှံအဆၢဖဲ စံးထီၣ်ပတြၢၤ ၁၃၉:၂၃, ၂၄ န့ၣ်တဘျုးဘျီညါ. လံာ်စီဆှံတဆၢအံၤ စံးဝဲလၢ ‘ကစၢ်ဧၢ, ဃုကွၢ်ယၤ, ဒီးသ့ၣ်ညါယသးတက့ၢ်. မၤကွၢ်ယၤ, ဒီးသ့ၣ်ညါယတၢ်ဆိကမိၣ်တက့ၢ်. ဒီးကျဲအအၢလၢယပူၤ မ့ၢ်အအိၣ်, တအိၣ်လဲၣ်န့ၣ်ကွၢ်, ဒီးဆှၢယၤလၢ ကျဲအထူအယိာ်အပူၤတက့ၢ်.’ လၢတၢ်န့ၣ်အဃိ ယသ့ၣ်ညါလၢ ယတဘၣ်ဃးဒီးဟီၣ်ခိၣ်အံၤဘၣ်—ယအိၣ်လၢအဝဲသ့ၣ်အကျါ တမုာ်စ့ၢ်ကီးဘၣ်.—ယသ့ၣ်ညါလၢ ယကဘၣ်အိၣ်လၢ ယဟိဝၤယွၤ အတၢ်ကရၢကရိအပူၤလီၤ. ယတူၢ်ဘၣ်လၢ ယဟိဝၤယွၤတပာ်တ့ၢ်ယၤနီတဘျီအဃိ ယဃုကျဲလၢ ယကဟဲက့ၤကဒါက့ၤဆူအအိၣ်လီၤ. ခီဖျိလၢယမၤဒ်န့ၣ်အဃိ ယသးခုဒိၣ်မးလီၤ.”
“ယတူၢ်ဘၣ်လၢ ယဟိဝၤယွၤတပာ်တ့ၢ်ယၤ နီတဘျီအဃိ ယဃုကျဲလၢ ယကဟဲက့ၤကဒါက့ၤဆူအအိၣ်လီၤ”
ပဃ့ထုကဖၣ်လၢ နကဒိးန့ၢ်ဘၣ်က့ၤ “ယွၤအတၢ်သူၣ်ခုသးခု” န့ၣ်လီၤ. (နဃ့မယၤ ၈:၁၀) နမ့ၢ်ဟဲက့ၤဆူ ယဟိဝၤယွၤအအိၣ်န့ၣ် တလိၣ်နပီၢ်ယၢ်လီၤက့ၤနသးလၢ နတၢ်ဃုထၢအံၤအဃိ နီတဘျီဘၣ်.