တၢ်မၤလိ ၁
ကစၢ်ယွၤတ့လီၤ မူခိၣ်ဒီးဟီၣ်ခိၣ်
ယဟိဝၤယွၤမ့ၢ်ပတၢ်ဘၣ်တ့ကစၢ်. တၢ်လၢပထံၣ်အီၤလၢ ပမဲာ်ချံသ့မ့ၢ်ဂ့ၤ တၢ်လၢပထံၣ်အီၤလၢ ပမဲာ်ချံတသ့မ့ၢ်ဂ့ၤ ကစၢ်ယွၤတ့လီၤဝဲခဲလၢာ်လီၤ. တချုးလၢကစၢ်ယွၤတ့လီၤ တၢ်လၢပထံၣ်အီၤလၢပမဲာ်ချံ သ့န့ၣ် အဝဲတ့လီၤဆိဝဲမူခိၣ်ကလူးတဖၣ်. မူခိၣ်ကလူးတဖၣ် မ့ၢ်ပှၤဒ်လဲၣ်န့ၣ် မ့ၢ်နသ့ၣ်ညါဧါ. မူခိၣ်ကလူးတဖၣ်အံၤ မ့ၢ်ပှၤနီၢ်သးဖိဒ် ယဟိဝၤယွၤအသိး. ဒ်ပထံၣ်ကစၢ်ယွၤတသ့အသိး မူခိၣ်ကလူးစ့ၢ်ကီး ပထံၣ်အဝဲသ့ၣ်တသ့ဘၣ်. မူခိၣ်ကလူးအဆိကတၢၢ်တဂၤလၢ ယဟိဝၤယွၤတ့လီၤဝဲန့ၣ် ကဲထီၣ် အပှၤမၤစၢၤတၢ်ဖိတဂၤ. ဖဲယဟိဝၤယွၤတ့လီၤ ဆၣ်တဖၣ်, ဟီၣ်ခိၣ်ဖျၢၣ်တဖၣ် ဒီးတၢ်အဂၤတဖၣ်အခါ မူခိၣ်ကလူးတဂၤအံၤ မၤစၢၤအီၤ. ကစၢ်ယွၤတ့လီၤဝဲ ဟီၣ်ခိၣ်လၢအဃံအလၤတဖျၢၣ်အံၤဒ်သိး ပှၤဟီၣ်ခိၣ်ဖိကအိၣ်ဝဲအဂီၢ်.
ဝံၤဒီးယဟိဝၤယွၤ ကတဲာ်ကတီၤပာ်ဝဲဟီၣ်ခိၣ်အံၤ ဒ်သိးဆၣ်ဖိကီၢ်ဖိ ဒီးပှၤဟီၣ်ခိၣ်ဖိတဖၣ် အိၣ်ဝဲလၢအပူၤကသ့အဂီၢ်. ဒီးကစၢ်ယွၤတ့လီၤမုၢ်လၢ ကဟ့ၣ်ထီၣ်တၢ်ကပီၤလၢ ဟီၣ်ခိၣ်ချၢ. ကစၢ်ယွၤတ့လီၤစ့ၢ်ကီး ကစၢၢ်, ပီၣ်လဲၣ် ဒီးထံကျိတဖၣ်.
ကစၢ်ယွၤတ့လီၤဒံး တၢ်မနုၤလဲၣ်. ယဟိဝၤယွၤတဲဝဲလၢ ‘ယကတ့လီၤနီၣ်, တၢ်မုၢ်တၢ်ဘိ ဒီးသ့ၣ်ထူၣ်ဝၣ်ထူၣ်တဖၣ်လီၤ.’ ယဟိဝၤယွၤတ့လီၤဝဲ သ့ၣ်သူဝၣ်သၣ် အကလုာ်ကလုာ်, တၢ်ဒိးတၢ်လၣ်အကလုာ်ကလုာ် ဒီးဖီအကလုာ်ကလုာ်. လၢခံ ယဟိဝၤယွၤတ့လီၤဝဲ ဆၣ်ဖိကီၢ်ဖိတဖၣ်. ဆၣ်ဖိကီၢ်ဖိတနီၤန့ၣ် ယူၤလၢတၢ်ဖးဖီ, တနီၤန့ၣ်အိၣ်လၢထံကျါ ဒီးအဂၤတနီၤန့ၣ် အိၣ်လၢဟီၣ်ခိၣ်လိၤ. ကစၢ်ယွၤတ့လီၤဝဲ ဆၣ်ဖိကီၢ်ဖိလၢအဆံး ဒ်သိးဒီးပဒဲတဖၣ် ဒီးဆၣ်ဖိကီၢ်ဖိလၢအဒိၣ် ဒ်သိးဒီး ကဆီတဖၣ်. ဆၣ်ဖိကီၢ်ဖိလၢ နအဲၣ်အီၤဒိၣ်ကတၢၢ်န့ၣ် မ့ၢ်မနုၤလဲၣ်.
ဝံၤဒီး ယဟိဝၤယွၤတဲဘၣ် မူခိၣ်ကလူးအဆိကတၢၢ်တဂၤလၢ “မ်ပတ့လီၤ ပှၤဟီၣ်ခိၣ်ဖိ.” ပှၤဟီၣ်ခိၣ်ဖိန့ၣ် လီၤဆီဒီးဆၣ်ဖိကီၢ်ဖိတဖၣ်. အဝဲသ့ၣ်အိၣ်ဒီးတၢ်သ့တၢ်ဘၣ် အါန့ၢ်ဒံးဆၣ်ဖိကီၢ်ဖိတဖၣ်. အဒိ ပှၤဟီၣ်ခိၣ်ဖိန့ၣ် တဲတၢ်, နံၤ ဒီးဃ့ဘါထုကဖၣ်တၢ်သ့ဝဲ. အဝဲသ့ၣ်ဘၣ်ကွၢ်ထွဲဝဲ ဟီၣ်ခိၣ်ဒီးဆၣ်ဖိကီၢ်ဖိတဖၣ်. ပှၤဟီၣ်ခိၣ်ဖိအဆိကတၢၢ်တဂၤန့ၣ် မ့ၢ်မတၤတဂၤလဲၣ်. မ့ၢ်နသ့ၣ်ညါဧါ. တၢ်မၤလိလၢခံတခါန့ၣ် ပကတဲသကိးတၢ်ဂ့ၢ်အံၤ.
“လၢအခီၣ်ထံးန့ၣ် ကစၢ်ယွၤတ့လီၤ မူခိၣ်ဒီးဟီၣ်ခိၣ်လီၤ.”—၁ မိၤၡ့ ၁:၁