တၢ်မၤလိ ၈
နီၢ်စၤရါဒီးစီၤအၤဘြၤဟၣ် ဒိကနၣ်ကစၢ်ယွၤအကလုၢ်
ဖဲဝ့ၢ်အူၢ်အပူၤန့ၣ် ပှၤဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်. ဘၣ်ဆၣ် ပှၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် အိၣ်ဝဲတဂၤ. အမံၤမ့ၢ်ဝဲ စီၤအၤဘြၤဟၣ်. ဝ့ၢ်အူၢ်န့ၣ် အိၣ်တယံၤဘၣ်ဒီး ဝ့ၢ်ဘၤဘ့းလးဘၣ်.
ယဟိဝၤယွၤ တဲဘၣ်စီၤအၤဘြၤဟၣ်လၢ ‘ဟးထီၣ်ကွံာ်လၢနဟံၣ်နဃီ ဒီးလၢနဘူးနတံၢ်တဖၣ် အအိၣ် ဒီးလဲၤဆူကီၢ်လၢ ယကဒုးနဲၣ်နၤ.’ ဝံၤဒီး ကစၢ်ယွၤအၢၣ်လီၤအီလီၤ စီၤအၤဘြၤဟၣ်လၢ ‘နကကဲထီၣ်ပှၤကလုာ် ဖးဒိၣ်တကလုာ် ဒီးယကဆိၣ်ဂ့ၤပှၤအါဂၤလၢ အအိၣ်လၢ ဟီၣ်ခိၣ်ဒီဘ့ၣ် ခီဖျိလၢနၤလီၤ.’
စီၤအၤဘြၤဟၣ် ကဘၣ်လဲၤလၢ ထံကီၢ်ဖဲလဲၣ်တဘ့ၣ်လဲၣ်န့ၣ် အဝဲတသ့ၣ်ညါဝဲဘၣ်. ဘၣ်ဆၣ် အဝဲနာ်န့ၢ် ယဟိဝၤယွၤ. အဃိ စီၤအၤဘြၤဟၣ်, အမါနီၢ်စၤရါ, အပၢ်စီၤတ့ရၤ ဒီးအဖိဒိၣ်ခွါစီၤလိာ် ဒိကနၣ် ကစၢ်ယွၤအကလုၢ် ဒီးဘိၣ်ထီၣ်အတၢ်ဖိတၢ်လံၤ ဒီးစးထီၣ်လဲၤတၢ်.
ဖဲစီၤအၤဘြၤဟၣ် အသးနံၣ်အိၣ်ဝဲ ၇၅ နံၣ်အခါ အဝဲဒီးအဟံၣ်ဖိဃီဖိ လဲၤတုၤဝဲဆူ ထံကီၢ်လၢ ယဟိဝၤယွၤ အဲၣ်ဒိးဒုးနဲၣ်အီၤ. ထံကီၢ်အဝဲန့ၣ် တၢ်ကိးအမံၤလၢ ကီၢ်ကနၤဧၣ်. ဖဲန့ၣ်န့ၣ် ကစၢ်ယွၤတဲတၢ်ဒီး စီၤအၤဘြၤဟၣ် ဒီးမၤဝဲတၢ်အၢၣ်လီၤအီလီၤဒီးအီၤ. ကစၢ်ယွၤတဲဝဲလၢ ‘ထံကီၢ်လၢ နထံၣ်အီၤအံၤန့ၣ် ယကဟ့ၣ်လီၤ နဖိနလံၤ.’ ဘၣ်ဆၣ် နီၢ်စၤရါဒီးစီၤအၤဘြၤဟၣ် အဖိတအိၣ် နီတဂၤဒံးဘၣ် ဒီးအဝဲသ့ၣ် သးပှၢ်ထီၣ်ဝဲဖးဒိၣ်လံ. အဃိ ယဟိဝၤယွၤ အတၢ်အၢၣ်လီၤအီလီၤအံၤ ကဟဲလၢထီၣ်ပှဲၤထီၣ်ဝဲဒ်လဲၣ်.
“ခီဖျိလၢ တၢ်နာ်အဃိ ဖဲစီၤအၤဘြၤဟၣ် ဘၣ်တၢ်ကိးအီၤအခါ အဝဲဒိကနၣ်ဝဲ ခီဖျိအလဲၤဝဲလၢ တၢ်လီၢ်လၢ အကဒိးန့ၢ်ဘၣ်ဝဲ ဒ်တၢ်န့ၢ်သါအသိးလီၤ. အဝဲကဘၣ်လဲၤလၢ တၢ်လီၢ်ဖဲလဲၣ်န့ၣ် အတသ့ၣ်ညါဝဲဘၣ် သနာ်က့ အဟးထီၣ်ဒီးလဲၤဝဲလီၤ.”—ဧ့ၤဘြံၤ ၁၁:၈