တၢ်မၤလိ ၁၂
စီၤယၤကိာ်ဒိးန့ၢ်ဘၣ်တၢ်န့ၢ်သါ
ဖဲစီၤအံၤစဲး အသးနံၣ်အိၣ်ဝဲအနံၣ် ၄၀ အခါ အဝဲဖျီအသးဒီး နီၢ်ရံးဘကၤ. စီၤအံၤစဲး အဲၣ်အမါဒိၣ်မး. လၢခံန့ၣ် အဝဲသ့ၣ် ဒိးန့ၢ်ဘၣ် အဖိတဃံာ်ခံဂၤ.
အဖိခွါလၢအဒိၣ်တဂၤန့ၣ် အမံၤလၢ စီၤဧ့ၡီၤ ဒီးအဖိခွါလၢ အဆံးတဂၤန့ၣ် အမံၤလၢ စီၤယၤကိာ်. စီၤဧ့ၡီၤ မ့ၢ်ပှၤခးအီၣ်တၢ်ဖိ ဒီးဟးခးအီၣ်တၢ်လၢ ပှၢ်ကျါမုာ်မး. မ့မ့ၢ်စီၤယၤကိာ်န့ၣ် အိၣ်လၢဟံၣ်မုာ်ဝဲ.
လၢပျၢၤဖိဝဲၢ်ကိန့ၣ် ကဒိးန့ၢ်ဘၣ်ဝဲ တၢ်လီၢ်တၢ်ကျဲ ဒီးကျိၣ်ဧိၤစ့ဧိၤ အါန့ၢ်ဒံး အဒီပုၢ်ဝဲၢ်အဂၤတဖၣ် ဖဲအပၢ်သံဝံၤအလီၢ်ခံ. တၢ်သ့ၣ်တဖၣ်အံၤန့ၣ် ပကိးလၢတၢ်န့ၢ်သါ. ဘၣ်ဆၣ် လၢစီၤအံၤစဲး အဟံၣ်ဖိဃီဖိအကျါ ပှၤလၢအန့ၢ်ဘၣ် တၢ်န့ၢ်သါန့ၣ် ကန့ၢ်ဃုာ်ဒီး တၢ်ဆိၣ်ဂ့ၤလၢ ယဟိဝၤယွၤ အၢၣ်လီၤအီလီၤဝဲဒီး စီၤအၤဘြၤဟၣ်. ဘၣ်ဃးဒီး တၢ်အၢၣ်လီၤအီလီၤတဖၣ်န့ၣ် စီၤဧ့ၡီၤ တပာ်လုၢ်ပာ်ပှ့ၤဝဲဘၣ်. ဘၣ်ဆၣ် စီၤယၤကိာ် သ့ၣ်ညါဝဲလၢ တၢ်အၢၣ်လီၤအီလီၤတဖၣ်န့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်.
ဘၣ်တနံၤန့ၣ် စီၤဧ့ၡီၤလဲၤ ခးအီၣ်တၢ်လၢ ပှၢ်ပူၤဒီးဖဲအဝဲဟဲက့ၤလၢဟံၣ်အခါ လီၤဘှံးဝဲဒိၣ်မး. ဖဲန့ၣ်အဆၢကတီၢ် ဘၣ်လၢစီၤယၤကိာ် ဖီအီၣ်တၢ် ဒီးကသူနၢမူထီၣ်ဝဲအဃိ စီၤဧ့ၡီၤ အဲၣ်ဒိးအီၣ်ဝဲ. စီၤဧ့ၡီၤတဲဘၣ်အပုၢ်လၢ ‘ယဟၢဖၢလီၤဘဲဒိၣ်မး, ဒုးအီၣ်ယၤကသူမီၤ.’ စီၤယၤကိာ်တဲဆၢက့ၤ အဝဲၢ်ခွါလၢ ‘ယကဒုးအီၣ်နၤ, ဘၣ်ဆၣ် အဆိကတၢၢ်န့ၣ် နကဘၣ်အၢၣ်လီၤယၤလၢ နကဟ့ၣ်လီၤယၤလၢ နတၢ်န့ၢ်သါ.’ စီၤဧ့ၡီၤတဲက့ၤအပုၢ်လၢ ‘ယတလီကီတၢ်န့ၢ်သါဘၣ်. ဟံးန့ၢ်ခီ. ယအဲၣ်ဒိးအီၣ်တၢ်လံ.’ စီၤဧ့ၡီၤ တပာ်လုၢ်ပာ်ပှ့ၤ အတၢ်န့ၢ်သါ အဃိ မ့ၢ်အဝဲအိၣ်ဒီး တၢ်ကူၣ်သ့ဧါ. အဝဲတအိၣ်ဒီး တၢ်ကူၣ်သ့ဘၣ်. စီၤဧ့ၡီၤ ခီလဲကွံာ်ဝဲ အတၢ်န့ၢ်သါလၢ အလုၢ်ဒိၣ်ပှ့ၤဒိၣ်ဒီး ကသူထဲတခွးလီၤ.
ဖဲစီၤအံၤစဲး သးပှၢ်ထီၣ်အခါ တၢ်ဆၢကတီၢ်ဘၣ်လၢ ကဘၣ်ဆိၣ်ဂ့ၤ အဖိခွါဝဲၢ်ကိ. ဘၣ်ဆၣ် နီၢ်ရံးဘကၤမၤစၢၤ အဖိခွါစီၤယၤကိာ်လၢ ကဒိးန့ၢ်ဘၣ်တၢ်ဆိၣ်ဂ့ၤအဂီၢ်. ဖဲစီၤဧ့ၡီၤ သ့ၣ်ညါဘၣ်တၢ်ဂ့ၢ်အံၤအခါ အသးပှံၢ်ထီၣ်တၢ်ဒိၣ်မး ဒီးကူၣ်ထီၣ်ဝဲလၢ ကမၤသံအပုၢ်. စီၤအံၤစဲးဒီးနီၢ်ရံးဘကၤ အဲၣ်ဒိးဒီသဒၢဝဲ စီၤယၤကိာ်အဃိ အဝဲသ့ၣ် တဲဘၣ်အဖိခွါလၢ ‘လဲၤအိၣ်ဒီး နမိၢ်အဝဲၢ်ခွါစီၤလၤဘၣ် တုၤလၢစီၤဧ့ၡီၤ အတၢ်သးဒိၣ်ခုၣ်လီၤ.’ စီၤယၤကိာ် ဒိကနၣ်အမိၢ်အပၢ်အကလုၢ် ဒီးဃ့ၢ်ပူၤဖျဲးအသး.
“ပှၤတဂၤဂၤ မ့ၢ်န့ၢ်ဘၣ် ဟီၣ်ခိၣ်ဒီတဘ့ၣ် သနာ်က့ အသးသမူ မ့ၢ်လီၤမၢ်ကွံာ်န့ၣ် မ့ၢ်အဘျုး ကအိၣ်လၢအဂီၢ်ဒ်လဲၣ်. ပှၤတဂၤ ခီလဲဝဲ အသးသမူဒီး တၢ်မနုၤကကဲလဲၣ်.”—မၢ်ကူး ၈:၃၆, ၃၇