တၢ်မၤလိ ၂၉
ယဟိဝၤယွၤဃုထၢထီၣ်စီၤယိၤၡူ
စီၤမိၤၡ့ကဲခိၣ်ကဲနၢ်လၢ ပှၤအံၣ်စရ့လးဖိတဖၣ် အဖီခိၣ် ယံာ်ဝဲအနံၣ်ဖးယံာ်လံ. ခဲအံၤ စီၤမိၤၡ့ အသးပှၢ်ထီၣ်ဝဲ ဖးဒိၣ်လံ. ယဟိဝၤယွၤ တဲဘၣ်အီၤလၢ ‘နတမ့ၢ်ပှၤတဂၤလၢ အကတီခိၣ်ရိၤမဲဘၣ် ပှၤအံၣ်စရ့လးဖိလၢ ကလဲၤနုာ်လီၤဝဲဆူ ကီၢ်တၢ်စံးပာ်အပူၤဘၣ်. ဘၣ်ဆၣ် ယကဒုးထံၣ်စိနၤ ကီၢ်တၢ်စံးပာ်.’ ဝံၤဒီး စီၤမိၤၡ့ဃ့ယဟိဝၤယွၤလၢ ကဃုထၢထီၣ် ပှၤလၢအသီတဂၤ ဒ်သိး ကကဲခိၣ်ကဲနၢ်လၢ ပှၤအံၣ်စရ့လးဖိတဖၣ် အဖီခိၣ်. ဒီးယဟိဝၤယွၤ တဲဘၣ်စီၤမိၤၡ့လၢ ‘လဲၤဆူစီၤယိၤၡူအအိၣ် ဒီးတဲဘၣ်အီၤလၢ အဝဲမ့ၢ်ပှၤတဂၤလၢ ကကဲထီၣ် ပှၤအံၣ်စရ့လးဖိတဖၣ် အခိၣ်အနၢ်.’
စီၤမိၤၡ့ အသးပှၢ်ထီၣ်ဝဲ ဖးဒိၣ်လံအဃိ တဲဘၣ်ပှၤဂီၢ်မုၢ်လၢ တယံာ်လၢၤဘၣ်န့ၣ် အဝဲကသံဝဲဒီး ယဟိဝၤယွၤ ဃုထၢထီၣ် စီၤယိၤၡူဒ်သိး ကဆှၢဝဲပှၤဂီၢ်မုၢ်တဖၣ်အံၤလၢ ကီၢ်တၢ်စံးပာ်အပူၤ. စီၤမိၤၡ့ တဲဘၣ်စီၤယိၤၡူလၢ ‘ပျံၤတၢ်တဂ့ၤ. ယဟိဝၤယွၤ ကမၤစၢၤနၤ.’ ဝံၤဒီး စီၤမိၤၡ့ လဲၤထီၣ်ဝဲဆူ ကစၢၢ်နဘိ အဒီခိၣ်. ဖဲန့ၣ်န့ၣ် ယဟိဝၤယွၤ ဒုးထံၣ်စီၤမိၤၡ့လၢ ကီၢ်တၢ်စံးပာ်လၢ အအၢၣ်လီၤအီလီၤဝဲလၢ ကဟ့ၣ်လီၤ စီၤအၤဘြၤဟၣ်, စီၤအံၤစဲး ဒီးစီၤယၤကိာ်. ဖဲစီၤမိၤၡ့သံအခါ အသးနံၣ်အိၣ်ဝဲ ၁၂၀.
ယဟိဝၤယွၤ တဲဘၣ်စီၤယိၤၡူလၢ ‘ခီဂာ်ထံကျိယၢ်ဒ့ၣ် ဒီးလဲၤနုာ်လီၤဆူ ကီၢ်ကနၤဧၣ်အပူၤ. ယကမၤစၢၤနၤ ဒ်ယမၤစၢၤတ့ၢ် စီၤမိၤၡ့အသိး. ဒီးယတၢ်သိၣ်တၢ်သီန့ၣ် နကဘၣ်ဖးအီၤ ကိးနံၤဒဲး. ပျံၤတၢ်တဂ့ၤ, အိၣ်ဒီးတၢ်သးဒူဒီး ကယဲၢ်တၢ်လၢ ယမၤလိာ်နၤန့ၣ် မၤအီၤခဲလၢာ်.’
စီၤယိၤၡူ မၢလီၤပှၤကွၢ်ဟုၣ်တၢ်ခံဂၤ ဒ်သိး အဝဲသ့ၣ် ကလဲၤကွၢ်ဟုၣ်ဝဲ ဝ့ၢ်ယရံၤဃိအဂီၢ်. လၢတၢ်မၤလိ လၢခံတခါအပူၤ ပကသ့ၣ်ညါအါထီၣ်လၢ တၢ်မနုၤဟဲကဲထီၣ်အသး ဖဲဝ့ၢ်ယရံၤဃိလဲၣ်. ဖဲပှၤကွၢ်ဟုၣ်တၢ်ခံဂၤ ဟဲက့ၤအခါ အဝဲသ့ၣ် တဲဝဲလၢ ခဲအံၤမ့ၢ်တၢ်ဆၢကတီၢ်ဂ့ၤဝဲလၢ ပကလဲၤနုာ်လီၤဆူ ကီၢ်ကနၤဧၣ်အပူၤ. လၢခံတနံၤန့ၣ် စီၤယိၤၡူတဲဘၣ် ပှၤဂီၢ်မုၢ်လၢ အဝဲသ့ၣ် ကဘၣ်ကတဲာ်ကတီၤထီၣ်အသး လၢကလဲၤတၢ်အဂီၢ်. ဝံၤဒီးစီၤယိၤၡူမၢ ပှၤလုၢ်တၢ်ဒိၣ်တဖၣ် လၢအယိးဝဲ တၢ်အၢၣ်လီၤအီလီၤ အတလါ ဒ်သိးကလဲၤလၢညါဆူ ထံကျိယၢ်ဒ့ၣ်. ဒီးဘၣ်ဖဲ ထံကျိယၢ်ဒ့ၣ်န့ၣ် ထံဒိၣ်ထီၣ်ဝဲအဆၢကတီၢ်. ဘၣ်ဆၣ် ဖဲပှၤလုၢ်တၢ်ဒိၣ်တဖၣ် ယီၢ်လီၤဝဲ ထံဖံးခိၣ်အခါ ထံပတုာ်ယွၤလီၤဝဲ ဒီးဃ့ထီဝဲ. ပှၤလုၢ်တၢ်ဒိၣ်တဖၣ် လဲၤလၢထံကျိခၢၣ်သး ဒီးဆၢထၢၣ်ဝဲဖဲန့ၣ်. ဝံၤဒီးပှၤအံၣ်စရ့လးဖိတဖၣ် ခီဂာ်ဝဲ ထံကျိယၢ်ဒ့ၣ်. တၢ်မၤအသးအံၤ ကဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်လၢ ဆၢကတီၢ်ဖဲ ယဟိဝၤယွၤ မၤတၢ်လီၤလး လၢပီၣ်လဲၣ်ဂီၤ, တမ့ၢ်ဘၣ်ဧါ.
ခဲအံၤန့ၣ် ပှၤအံၣ်စရ့လးဖိတဖၣ် အိၣ်ဘၣ်ဝဲလၢ ကီၢ်တၢ်စံးပာ်အပူၤလံ. အဝဲသ့ၣ် သူၣ်ထီၣ်ဝဲ အဟံၣ်အဃီ ဒီးဝ့ၢ်တဖၣ်. ဒီးပှၤအံၣ်စရ့လးဖိတဖၣ် သူၣ်အီၣ်ဖျးအီၣ်တၢ် လၢစံာ်ပူၤ, သူၣ်ဝဲစပံးသၣ်ကရၢၢ် ဒီးသူၣ်ဝဲ တၤသူတၤသၣ် လၢအဂၤတဖၣ်စ့ၢ်ကီး. ကီၢ်တၢ်စံးပာ်န့ၣ် မ့ၢ်ကီၢ်လၢ အပှဲၤဝဲဒီး တၢ်နုၢ်ထံဒီးကနဲစီ.
“ယဟိဝၤယွၤ ကဆှၢသုထီဘိ, လၢကီၢ်လၢအဃ့ထီ အပူၤဒၣ်လဲာ် အဝဲကဒုး သူၣ်မံသးမုာ်သု.”—ယၡါယၤ ၅၈:၁၁