တၢ်မၤလိ ၃၀
နီၢ်ရၤဃးပာ်ခူသူၣ် ပှၤကွၢ်ဟုၣ်တၢ်ဖိခံဂၤ
ဖဲပှၤကွၢ်ဟုၣ်တၢ်ဖိခံဂၤ လဲၤလၢဝ့ၢ်ယရံၤဃိအခါ အဝဲသ့ၣ် လဲၤအိၣ်ဝဲလၢ နီၢ်ရၤဃးအဟံၣ်. ဖဲယရံၤဃိ အစီၤပၤသ့ၣ်ညါဝဲအခါ အဝဲမၢလီၤဝဲ ပှၤသုးဖိတဖၣ်ဆူ နီၢ်ရၤဃးအဟံၣ်. နီၢ်ရၤဃး ပာ်ခူသူၣ် ပှၤကွၢ်ဟုၣ်တၢ် ခံဂၤအံၤလၢ အဟံၣ်ခိၣ်ဒီး မၢဝဲယရံၤဃိ အသုးဖိတဖၣ် လဲၤဃုကွၢ်အဝဲသ့ၣ်လၢ တၢ်လီၢ်အဂၤတတီၤ. ဝံၤဒီး နီၢ်ရၤဃးတဲဘၣ်ပှၤကွၢ်ဟုၣ်တၢ် ခံဂၤအံၤလၢ ‘ယမၤစၢၤသုန့ၣ် ခီဖျိလၢ ယသ့ၣ်ညါလၢ ယဟိဝၤယွၤ အိၣ်ဒီးသု ဒီးကဟ့ၣ်လီၤသု ထံကီၢ်တဘ့ၣ်အံၤအဃိ. ဝံသးစူၤ အၢၣ်လီၤအီလီၤယၤလၢ သုကမၤပူၤဖျဲး ယဟံၣ်ဖိဃီဖိမီၤ.’
ဒီးပှၤကွၢ်ဟုၣ်တၢ်ခံဂၤန့ၣ် တဲဘၣ်နီၢ်ရၤဃးလၢ ‘ပအၢၣ်လီၤအီလီၤနၤလၢ ကယဲၢ်ပှၤအိၣ်လၢ နဟံၣ်ပူၤန့ၣ် ကပူၤဖျဲးဝဲခဲလၢာ်. ဘၣ်ဆၣ် နကဘၣ်စဲၤလီၤပျံၤဂီၤတဘိ လၢနပဲတြီအချၢ. နမ့ၢ်မၤဒ်န့ၣ်န့ၣ် နၤဒီးနဟံၣ်ဖိဃီဖိ ကပူၤဖျဲးဝဲ.’
နီၢ်ရၤဃးစဲၤလီၤပျံၤလၢ ပဲတြီအချၢဒီးမၢဝဲ ပှၤကွၢ်ဟုၣ်တၢ်ခံဂၤအံၤ စံၣ်လီၤဝဲ. ပှၤကွၢ်ဟုၣ်တၢ်ခံဂၤအံၤ လဲၤဃ့ၢ်လၢကစၢၢ်ခိၣ် ဒီးအိၣ်ခူသူၣ်ဝဲ ဖဲန့ၣ်သၢသီ. ဝံၤဒီးအဝဲသ့ၣ် က့ၤကဒါက့ၤဆူ စီၤယိၤၡူအအိၣ်. ပှၤအံၣ်စရ့လးဖိတဖၣ် ခီဂာ်ဝဲ ထံကျိယၢ်ဒ့ၣ် ဒီးကတဲာ်ကတီၤထီၣ်အသးလၢ ကလဲၤမၤန့ၢ်ထံကီၢ်. ဝ့ၢ်ယရံၤဃိန့ၣ် မ့ၢ်ဝ့ၢ်အဆိကတၢၢ်တဖျၢၣ်လၢ ပှၤအံၣ်စရ့လးဖိ မၤနၢၤဝဲ. ယဟိဝၤယွၤ မၢပှၤအံၣ်စရ့လးဖိတဖၣ် ဟးတရံးဝ့ၢ်အံၤ တနံၤတဘျီလၢ ဃုသီအတီၢ်ပူၤ. ဘၣ်ဆၣ် ဖဲနွံသီတသီန့ၣ် ပှၤအံၣ်စရ့လးဖိတဖၣ် ကဘၣ်ဟးတရံးဝ့ၢ်အံၤ နွံဘျီညါ. ဝံၤဒီး ပှၤလုၢ်တၢ်ဒိၣ်တဖၣ် အူထီၣ်ဝဲကွဲၤ ဒီးပှၤအံၣ်စရ့လး အသုးဖိတဖၣ်န့ၣ် ကိးပသူထီၣ်လၢ အကလုၢ်ဖးဒိၣ်. ဒီးဝ့ၢ်ယရံၤဃိ အဝ့ၢ်ခိၣ်ဒူ လီၤပှီၢ်ဝဲတဘျီဃီ. ဘၣ်ဆၣ် နီၢ်ရၤဃးအဟံၣ်န့ၣ် တလီၤပှီၢ်ဝဲဘၣ်. မ့ၢ်လၢနီၢ်ရၤဃးအိၣ်ဒီး တၢ်နာ်ယဟိဝၤယွၤအဃိ အဝဲဒီးအဟံၣ်ဖိဃီဖိ ပူၤဖျဲးဝဲ.
“ဒ်န့ၣ်အသိး နီၢ်ရၤဃး . . . တူၢ်လိာ်ခီၣ်ဆၢ ပှၤကွၢ်ဟုၣ်တၢ်တဖၣ်ဂ့ၤဂ့ၤ ဒီးဆှၢထီၣ် အဝဲသ့ၣ်လၢ ကျဲလၢအဂၤတဘိ ဝံၤအလီၢ်ခံ အဝဲဘၣ်တၢ်ပာ်တီပာ်လိၤအီၤ ခီဖျိအတၢ်မၤန့ၣ် တမ့ၢ်ဘၣ်ဧါ.”—ယၤကိာ် ၂:၂၅