ခိၣ်နၢ်လၢအသီတဂၤ ဒီးပိာ်မုၣ်လၢအသးဒူခံဂၤ

စီၤယိၤၡူကဲခိၣ်ကဲနၢ်လၢ ယဟိဝၤယွၤ အပှၤဂီၢ်မုၢ်အဖီခိၣ်​ အါနံၣ်အါလါ ဝံၤအလီၢ်ခံ အဝဲသံဝဲဖဲ အသးအိၣ်​ ၁၁၀ နံၣ်. ဖဲစီၤယိၤၡူ အိၣ်မူဝဲအခါ ပှၤအံၣ်စရ့လးဖိတဖၣ်​ ဘူၣ်ထီၣ်ဘါထီၣ်ဝဲ ယဟိဝၤယွၤ. ဘၣ်ဆၣ်​ ဖဲစီၤယိၤၡူသံဝံၤ အလီၢ်ခံန့ၣ်​ ပှၤအံၣ်စရ့လးဖိတဖၣ်​ စးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်​ ဒ်ပှၤကနၤဧၣ်ဖိတဖၣ်အသိး. ခီဖျိလၢ ပှၤအံၣ်စရ့လးဖိတဖၣ်​ တအိၣ်မူပိာ်ထွဲဝဲ ဒ်သိးဒီး စီၤယိၤၡူအဃိ ယဟိဝၤယွၤ ဟ့ၣ်အခွဲးလၢ ပှၤကနၤဧၣ်ဖိ အစီၤပၤယၤဘံၣ်​ ကမၤနၢၤအီၣ်​ အဝဲသ့ၣ်. ဖဲန့ၣ်အဆၢကတီၢ် ပှၤအံၣ်စရ့လးဖိတဖၣ်​ ဃ့ကညးဝဲလၢ ယဟိဝၤယွၤ ကမၤစၢၤအဝဲသ့ၣ်. ဒီးယဟိဝၤယွၤ ဃုထၢထီၣ်န့ၢ် ပှၤအံၣ်စရ့လးဖိ အခိၣ်နၢ်လၢ အသီတဂၤ လၢအမံၤမ့ၢ်ဝဲစီၤဘါရး. စီၤဘါရးမၤစၢၤဝဲ ပှၤအံၣ်စရ့လးဖိတဖၣ်​ ဒ်သိး အဝဲသ့ၣ်​ ကဟဲက့ၤ ဘူၣ်ထီၣ်ဘါထီၣ်က့ၤ ယဟိဝၤယွၤအဂီၢ်.

ဝံမုၣ်လၢအမ့ၢ် နီၢ်ဒဘိရၤန့ၣ်​ မၢပှၤဟဲကိး စီၤဘါရးဆူအအိၣ်. နီၢ်ဒဘိရၤ တဲဘၣ်အီၤ တၢ်ကစီၣ်လၢ အဟဲလၢ ယဟိဝၤယွၤအအိၣ်​ ဒီးတဲဝဲလၢ ‘ကိးထီၣ်ပှၤပိာ်ခွါအဂၤ ၁၀,၀၀၀ ဒီးလဲၤဒုးတၢ်ဒီး စီၤပၤယၤဘံၣ်​ အသုးဖိတဖၣ်လၢ ထံကျိကံၡိၣ်. ဖဲန့ၣ်န့ၣ်​ နကဒုးလိာ်သးဒီး စီၤစံစရၤ လၢအမ့ၢ် စီၤပၤယၤဘံၣ်​ အသုးခိၣ်ဖးဒိၣ်တဂၤ ဒီးနကမၤနၢၤအီၤ.’ စီၤဘါရး တဲဘၣ်နီၢ်ဒဘိရၤလၢ ‘နမ့ၢ်လဲၤဒီးယၤန့ၣ်​ ယကလဲၤ.’ နီၢ်ဒဘိရၤ တဲဆၢက့ၤအီၤလၢ ‘ယကလဲၤဒီးနၤ, ဘၣ်ဆၣ်​ နဘၣ်သ့ၣ်ညါလၢ နတမၤသံဘၣ်​ စီၤစံစရၤဘၣ်. ယဟိဝၤယွၤ တဲဝဲလၢ ပှၤပိာ်မုၣ်တဂၤ ကမၤသံအီၤ.’

နီၢ်ဒဘိရၤ လဲၤတၢ်ဒီးစီၤဘါရး ဒီးအသုးဖိတဖၣ်လၢ ကစၢၢ်တၤဘိၢ် ဒ်သိးကဒုးတၢ်အဂီၢ်. ဖဲစီၤစံစရၤ နၢ်ဟူဝဲ တၢ်ဂ့ၢ်အံၤအခါ အဝဲကိးထီၣ်​ အသုးဖိတဖၣ်​ ဒီးကတဲာ်ကတီၤထီၣ်​ အလ့ၣ်ကဟၣ်​ ဒီးလဲၤဝဲဆူ ထံကျိကံၡိၣ်​ လၢအိၣ်လၢ ကစၢၢ်အဖီလာ်. နီၢ်ဒဘိရၤ တဲဘၣ်စီၤဘါရးလၢ ‘တနံၤအံၤ ယဟိဝၤယွၤ ကဟ့ၣ်နၤ တၢ်မၤနၢၤ.’ စီၤဘါရး ဒီးအပှၤသုးဖိအဂၤ ၁၀,၀၀၀ လဲၤလီၤလၢ ကစၢၢ်ဖီလာ် ဒ်သိးကဒုးတၢ်ဒီး စီၤစံစရၤ အပှၤသုးဖိလၢ အဂံၢ်ဆူၣ်ဘါဆူၣ်တဖၣ်.

ဒီးယဟိဝၤယွၤ မၤဒိၣ်ထီၣ်ဝဲ ထံကျိကံၡိၣ်အထံ. စီၤစံစရၤ အလ့ၣ်ကဟၣ်တဖၣ်​ အိၣ်ကတာ်ဝဲလၢ ကပံာ်အကျါ. အဃိ စီၤစံစရၤပာ်တ့ၢ်ကွံာ် အလ့ၣ်ကဟၣ်​ ဒီးဃ့ၢ်ထီၣ်ကွံာ်ဝဲ. စီၤဘါရးဒီးအပှၤသုးဖိ မၤနၢၤဝဲစီၤစံစရၤ အသုးဖိတဖၣ်​ ဘၣ်ဆၣ်​ စီၤစံစရၤ လဲၤဃ့ၢ်ဝဲဖးယံၤ ဒီးလဲၤအိၣ်ခူသူၣ်ဝဲလၢ နီၢ်ယဧ့လးအဒဲပူၤ. နီၢ်ယဧ့လး ဟ့ၣ်ဒုးအီစီၤစံစရၤလၢ တၢ်နုၢ်ထံ ဝံၤဒီးဟ့ၣ်လုးထီၣ်အီၤလၢ ယၣ်တဘ့ၣ်. မ့ၢ်လၢ စီၤစံစရၤ လီၤဘှံးဒိၣ်မး အဃိ အဝဲမံဘၣ်အသး. ဝံၤဒီး နီၢ်ယဧ့လး ဟဲဝဲဆူ စီၤစံစရၤအအိၣ်​ ကယီကယီ ဒီးဆဲးဝဲအခိၣ်လၢ နီၣ်ပျၤတဘိ ဒီးစီၤစံစရၤသံဝဲ.

စီၤဘါရး ဟးဃုကွၢ်ဝဲ စီၤစံစရၤ. နီၢ်ယဧ့လး ဟးထီၣ်လၢ အဒဲချၢ ဒီးတဲဘၣ်စီၤဘါရးလၢ ‘ဟဲနုာ်လီၤလၢယဒဲပူၤ ဒီးယကဒုးနဲၣ်နၤလၢ ပှၤလၢနဃုအီၤတဂၤန့ၣ်.’ စီၤဘါရး လဲၤနုာ်လီၤဝဲလၢဒဲပူၤ ဒီးထံၣ်ဘၣ်ဝဲလၢ စီၤစံစရၤသံဝဲလံ. စီၤဘါရး ဒီးနီၢ်ဒဘိရၤ စံးထီၣ်ပတြၢၤ ယဟိဝၤယွၤလၢ တၢ်သးဝံၣ်တယုၢ် မ့ၢ်လၢ ပှၤအံၣ်စရ့လးဖိတဖၣ်မၤနၢၤဝဲ အဒုၣ်အဒါတဖၣ်အဃိ. တၢ်မၤအသးတဖၣ်အံၤ ဝံၤအလီၢ်ခံ ပှၤအံၣ်စရ့လးဖိတဖၣ်​ အိၣ်ဘၣ်ဝဲ မုာ်မုာ်ခုၣ်ခုၣ်​ အနံၣ် ၄၀.