တၢ်မၤလိ ၃၈
ယဟိဝၤယွၤ ဒုးဆူၣ်ထီၣ် စီၤၡံၡိၣ်အဂံၢ်အဘါ
ပှၤအံၣ်စရ့လးဖိအါဂၤ ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ် လၢအသီတဘျီကဒီးလံ. အဃိ ယဟိဝၤယွၤ ဟ့ၣ်အခွဲးလၢ ပှၤဖလ့ၡသးဖိတဖၣ် ကပၢဝဲ ပှၤအံၣ်စရ့လးဖိ အတၢ်လီၢ်တၢ်ကျဲတဖၣ်. ဘၣ်ဆၣ် ပှၤအံၣ်စရ့လးဖိလၢ အအဲၣ်ယဟိဝၤယွၤန့ၣ် အိၣ်ဒံးဝဲတနီၤ. လၢအကျါန့ၣ် ပၣ်ဃုာ်ဒီးစီၤမၤနိ. စီၤမၤနိဒီးအမါန့ၣ် အဖိတအိၣ် နီတဂၤဘၣ်. ဘၣ်တနံၤန့ၣ် ယဟိဝၤယွၤ ဆှၢလီၤအမူခိၣ်ကလူးတဂၤ လၢစီၤမၤနိအမါအအိၣ်. မူခိၣ်ကလူးတဂၤအံၤ တဲဘၣ်အီၤလၢ ‘နကအိၣ်ဖျဲၣ်ထီၣ် ဖိခွါတဂၤ, နဖိခွါတဂၤအံၤ ကမၤပူၤဖျဲး ပှၤအံၣ်စရ့လးဖိလၢ ပှၤဖလ့ၡသးဖိ အစုပူၤ ဒီးအဝဲကမ့ၢ် ပှၤနစၤရံဖိတဂၤ.’ ပှၤနစၤရံဖိ မ့ၢ်ပှၤဒ်လဲၣ်န့ၣ် မ့ၢ်နသ့ၣ်ညါဧါ. အဝဲသ့ၣ် မ့ၢ်ယဟိဝၤယွၤ အခ့အပှၤလၢ အလီၤဆီတဖၣ်. ပှၤနစၤရံဖိတဖၣ်န့ၣ် အဝဲသ့ၣ် တဘၣ်တံာ် အခိၣ်ဆူၣ်ဘၣ်.
ဖဲစီၤမၤနိအမါ အိၣ်ဖျဲၣ်ထီၣ် အဖိခွါအခါ အဝဲသ့ၣ် ကိးန့ၢ်ဝဲအမံၤလၢ စီၤၡံၡိၣ်. ဖဲစီၤၡံၡိၣ် ဒိၣ်ထီၣ်အခါ ယဟိဝၤယွၤ ဟ့ၣ်လီၤအီၤ တၢ်ဂံၢ်တၢ်ဘါ လၢလၢပှဲၤပှဲၤ. စီၤၡံၡိၣ်မၤသံဝဲ ခ့ယုၢ်လၢအစု. ဘၣ်တဘျီန့ၣ် စီၤၡံၡိၣ်မၤသံဝဲ ပှၤဖလ့ၡသးဖိအဂၤ ၃၀ လၢအနီၢ်ကစၢ်. လၢတၢ်န့ၣ်အဃိ ပှၤဖလ့ၡသးဖိတဖၣ် သးဟ့စီၤၡံၡိၣ် ဒီးဃုမၤသံအီၤ. ဘၣ်တနၤ ဖဲစီၤၡံၡိၣ်မံလၢ ဝ့ၢ်ဂါစၤအပူၤအခါ ပှၤဖလ့ၡသးဖိတဖၣ် လဲၤအိၣ်ခိးစီၤၡံၡိၣ်လၢ ဝ့ၢ်အတြဲၤဒ်သိး ကမၤသံအီၤလၢ မုၢ်ဝါထီၣ်အခါ. ဘၣ်ဆၣ် ဖဲဖးဖီမုၢ်အဆၢကတီၢ်န့ၣ် စီၤၡံၡိၣ်ဂဲၤဆၢထၢၣ်, လဲၤဝဲဆူ ဝ့ၢ်အတြဲၤ ဒီးထုးထီၣ်ဝဲဝ့ၢ် အတြဲၤဒီးအထူၣ်. ဝံၤဒီး စီၤၡံၡိၣ် ယိးထီၣ်ဝဲ ဝ့ၢ်အတြဲၤလၢ အဖံဘၣ်ခိၣ် ဒီးလဲၤယိးဝဲလၢ ကစၢၢ်ဒီခိၣ် လၢအိၣ်ဘူးဝဲဒီး ဝ့ၢ်ဃ့ဘြိၣ်.
လၢခံန့ၣ် ပှၤဖလ့ၡသးဖိတဖၣ် လဲၤဝဲဆူ စီၤၡံၡိၣ်အတၢ်အဲၣ်တီ နီၢ်ဒလံလၤအအိၣ် ဒီးတဲဘၣ်အီၤလၢ ‘နမ့ၢ်တဲဘၣ်ပှၤလၢ ဘၣ်မနုၤအဃိ စီၤၡံၡိၣ် အဂံၢ်ဆူၣ်ဘါဆူၣ်လဲၣ်န့ၣ် ပကဟ့ၣ်လီၤနၤ စ့အဘ့ၣ်လၢ အကထိတဖၣ်. ပအဲၣ်ဒိးဖီၣ်န့ၢ်အီၤ ဒီးပၢနုာ်အီၤလၢဃိာ်ပူၤ.’ နီၢ်ဒလံလၤ သးလီဝဲစ့အဃိ မၤဝဲတၢ်အၢၣ်လီၤအီလီၤဒီး ပှၤဖလ့ၡသးဖိ. လၢအခီၣ်ထံးန့ၣ် စီၤၡံၡိၣ် တတဲဘၣ်ဝဲ နီၢ်ဒလံလၤ တီတီလိၤလိၤဘၣ်. ဘၣ်ဆၣ် နီၢ်ဒလံလၤ သံကွၢ်အီၤ တဘျီဝံၤတဘျီ တုၤလၢ စီၤၡံၡိၣ် ကနၣ်ဝဲတကဲလၢၤဘၣ်. ဝံၤဒီးစီၤၡံၡိၣ် တဲဖျါထီၣ် အတၢ်ခူသူၣ်လၢ ‘ယမ့ၢ်ပှၤနစၤရံဖိ အဃိ ယတတံာ်ယခိၣ်ဆူၣ် နီတဘျီဘၣ်. ပှၤမ့ၢ်တံာ်ယခိၣ်ဆူၣ်န့ၣ် ယဂံၢ်ယဘါ ကလီၤမၢ်ကွံာ်ဝဲ.’ ခီဖျိလၢ စီၤၡံၡိၣ် တဲဖျါထီၣ်အတၢ်ခူသူၣ် အဃိ ကဲထီၣ်တၢ်ကမၣ်ဖးဒိၣ် လၢအဂီၢ်.
တဘျီဃီန့ၣ် နီၢ်ဒလံလၤတဲဘၣ် ပှၤဖလ့ၡသးဖိလၢ ‘ယသ့ၣ်ညါ စီၤၡံၡိၣ် အတၢ်ခူသူၣ်လံ.’ နီၢ်ဒလံလၤ မၤမံစီၤၡံၡိၣ်လၢ အကံၣ်ဒုၣ်လိၤ ဒီးအဝဲ မၢပှၤတဂၤတံာ်ကွံာ် စီၤၡံၡိၣ် အခိၣ်ဆူၣ်. ဝံၤဒီးနီၢ်ဒလံလၤ ကိးပသူထီၣ်လၢ ‘စီၤၡံၡိၣ်ဧၢ, ပှၤဖလ့ၡသးဖိတဖၣ် ဟဲတုၤလံ.’ ဘၣ်ဆၣ် ဖဲစီၤၡံၡိၣ် ပၢၢ်ထီၣ်အခါ အဂံၢ်အဘါ တအိၣ်လၢၤဘၣ်. အဃိ ပှၤဖလ့ၡသးဖိတဖၣ် ဖီၣ်န့ၢ်စီၤၡံၡိၣ်, အူခွဲးထီၣ်ကွံာ် အမဲာ်ချံ ဒီးပၢနုာ်အီၤ လၢဃိာ်ပူၤ.
ဘၣ်တနံၤန့ၣ် ပှၤဖလ့ၡသးဖိလၢ အကထိတဖၣ် ပာ်ဖှိၣ်ထီၣ်အသးလၢ အဝဲသ့ၣ်အယွၤလၢ အမံၤမ့ၢ်ဒၤကိၣ် အတၢ်လုၢ်ဟံၣ်ပူၤ. ဒီးအဝဲသ့ၣ် ကိးပသူထီၣ်လၢ ‘ပယွၤဟ့ၣ်လီၤပှၤလၢ စီၤၡံၡိၣ်လံ. ဟဲကိးစီၤၡံၡိၣ်မီၤ. ပကမၤဆဲးအဲးအီၤ.’ အဝဲသ့ၣ် မၢစီၤၡံၡိၣ် ဆၢထၢၣ်လၢ တၢ်လုၢ်ဟံၣ် အထူၣ်ခံထူၣ် အကဆူးဒီး အဝဲသ့ၣ် တဲဆါဝဲစီၤၡံၡိၣ်. ဖဲန့ၣ်အဆၢကတီၢ် စီၤၡံၡိၣ်အခိၣ်ဆူၣ် ဟဲထီထီၣ်ပာ်စၢၤလံ. အဃိ စီၤၡံၡိၣ် ကိးပသူထီၣ်လၢ ‘အိ ယဟိဝၤယွၤဧၢ, ဝံသးစူၤဟ့ၣ်လီၤယၤ တၢ်ဂံၢ်တၢ်ဘါ အလီၢ်ခံကတၢၢ်တဘျီ.’ ဒီးစီၤၡံၡိၣ် ဆီၣ်ဝဲတၢ်လုၢ်ဟံၣ်အထူၣ် လၢာ်ဂံၢ်လၢာ်ဘါ ဒီးတၢ်သူၣ်ထီၣ် ဒီတဖျၢၣ်န့ၣ် လီၤပှီၢ်ဒိးဝဲ ပှၤအိၣ်လၢအပူၤ ခဲလၢာ်. ဒီးပှၤအိၣ်လၢတၢ်လုၢ်ဟံၣ်ပူၤန့ၣ် သံဝဲကိးဂၤဒဲး ဃုာ်ဒီးစီၤၡံၡိၣ်.
“ယအိၣ်ဒီး တၢ်ဂံၢ်တၢ်ဘါလၢ ယကလဲၤခီဖျိတၢ်ခဲလၢာ် ခီဖျိပှၤတဂၤလၢ အဟ့ၣ်ယၤ တၢ်စိကမီၤန့ၣ်အဃိလီၤ.”—ဖံလံးပံၤ ၄:၁၃