တၢ်မၤလိ ၅၀
ယဟိဝၤယွၤ ဒီသဒၢ စီၤယဟိၡၤဖး
စီၤယဟိၡၤဖးမ့ၢ် ပှၤယူဒၤဖိ အစီၤပၤတဂၤလၢ မၤဟးဂီၤကွံာ်ဝဲ ဘဧၤလး အတၢ်လုၢ်လီၢ်တဖၣ် ဒီးအတၢ်ဂီၤတၢ်ဖှီၣ်တဖၣ်လၢ ထံကီၢ်အပူၤ. ဒီးအဝဲအဲၣ်ဒိးဝဲလၢ ပှၤဂီၢ်မုၢ်တဖၣ် သ့ၣ်ညါဝဲ ယဟိဝၤယွၤ အတၢ်သိၣ်တၢ်သီတဖၣ်. လၢတၢ်န့ၣ်အဃိ စီၤယဟိၡၤဖး ဆှၢလီၤဝဲ ပဒိၣ်ဒီးပှၤလ့ၤဝံဖိတဖၣ်လၢ ယူဒၤအဝ့ၢ်တဖၣ်အပူၤ ဒ်သိး ကသိၣ်လိပှၤဂီၢ်မုၢ် ဘၣ်ဃးဒီး ယဟိဝၤယွၤ အတၢ်သိၣ်တၢ်သီအဂီၢ်.
ခီဖျိလၢ ယဟိဝၤယွၤအိၣ်ဃူ အပှၤဂီၢ်မုၢ်အဃိ ထံကီၢ်လၢအအိၣ်ဘူးဒီး ကီၢ်ယူဒၤန့ၣ် ဟဲဒုးအဝဲသ့ၣ် တဘူၣ်ဘၣ်. လၢတၢ်န့ၣ်အလီၢ် အဝဲသ့ၣ် ဟဲစိာ်ဝဲတၢ်ဟ့ၣ်လၢ စီၤယဟိၡၤဖးအဂီၢ်. ဘၣ်ဆၣ် ပှၤမိၤအးဖိ ဒီးပှၤဧၣ်မိၣ်ဖိ ဒီးပှၤလၢအိၣ်လၢ စ့ဧၢ်အဟီၣ်ကဝီၤတဖၣ် ဟဲဒုးဝဲ ပှၤယူဒၤဖိတဖၣ်. စီၤယဟိၡၤဖး သ့ၣ်ညါဝဲလၢ အဝဲလိၣ်ဘၣ်ဝဲ ယဟိဝၤယွၤ အတၢ်မၤစၢၤ. အဝဲမၢကယဲၢ်ပှၤပိာ်ခွါ, ပိာ်မုၣ်ဒီးဖိသၣ်တဖၣ် ဟဲပာ်ဖှိၣ်ထီၣ်အသးလၢ ဝ့ၢ်ယရူၤၡလ့ၣ်အပူၤ. စီၤယဟိၡၤဖး ဆၢထၢၣ်ဝဲလၢ ပှၤဂီၢ်မုၢ်အမဲာ်ညါ ဒီးဃ့ထုကဖၣ်ဝဲလၢ ‘ယဟိဝၤယွၤဧၢ, မ့တမ့ၢ်လၢနၤန့ၣ် ပမၤနၢၤတၢ်တသ့ဘၣ်, ပကဘၣ်မၤဒ်လဲၣ်န့ၣ် ဝံသးစူၤတဲဘၣ်ပှၤ.’
ယဟိဝၤယွၤ စံးဆၢက့ၤ အတၢ်ထုကဖၣ် ဒီးတဲဝဲလၢ ‘ပျံၤတၢ်တဂ့ၤ. ယကမၤစၢၤသု. အိၣ်ဂၢၢ်ဆိးကျၢၤလၢသုလီၢ် ဒီးယကမၤပူၤဖျဲးသု ဒ်လဲၣ်န့ၣ် အိၣ်ခိးကွၢ်.’ ယဟိဝၤယွၤ ကမၤပူၤဖျဲး အဝဲသ့ၣ် ဒ်လဲၣ်.
လၢခံတဂီၤန့ၣ် စီၤယဟိၡၤဖးဃုထၢထီၣ် ပှၤသးဝံၣ်တၢ်ဖိတဖၣ် ဒီးမၢအဝဲသ့ၣ်လဲၤအိၣ်လၢ ပှၤသုးဖိအမဲာ်ညါ. ပှၤသးဝံၣ်တၢ်ဖိတဖၣ်အံၤ ဟးထီၣ်ဝဲလၢ ဝ့ၢ်ယရူၤၡလ့ၣ် ဒီးလဲၤတုၤဝဲလၢ တၢ်ဒုးပျီပူၤ ကိးဝဲအမံၤလၢ တကိၤ.
ဖဲပှၤသးဝံၣ်တၢ်ဖိတဖၣ် သးဝံၣ်စံးထီၣ်ပတြၢၤ ယဟိဝၤယွၤလၢ အကလုၢ်ဖးဒိၣ်အခါ ယဟိဝၤယွၤဒုးတၢ်လၢ အပှၤဂီၢ်မုၢ်အဂီၢ်. ယဟိဝၤယွၤ မၤဝဲတၢ်လီၤလး ဒ်သိးပှၤဧၣ်မိၣ်ဖိ ဒီးပှၤမိၤအးဖိ ကက့ၤဒုးလိာ်က့ၤအသး ဒီးအဝဲသ့ၣ် သံဝဲခဲလၢာ်. ဘၣ်ဆၣ် ယဟိဝၤယွၤ ဒီသဒၢဝဲ ပှၤယူဒၤဖိ, ပှၤလုၢ်တၢ်အဒိၣ် ဒီးသုးဖိတဖၣ်. တၢ်ကစီၣ်အံၤ ရၤလီၤအသးဆူ ထံကီၢ်လၢ အအိၣ်ဘူးဒီး ပှၤယူဒၤဖိတဖၣ်. ဒီးအဝဲသ့ၣ် သ့ၣ်ညါဝဲလၢ ယဟိဝၤယွၤ ဒီသဒၢဝဲ အပှၤဂီၢ်မုၢ်. ယဟိဝၤယွၤ မၤပူၤဖျဲး အပှၤဂီၢ်မုၢ်ဒ်လဲၣ်. ယဟိဝၤယွၤ မၤပူၤဖျဲးအဝဲသ့ၣ် လၢကျဲအါဘိ. ယဟိဝၤယွၤ တလိၣ်ဘၣ်ဝဲ ပှၤဟီၣ်ခိၣ်ဖိ အတၢ်မၤစၢၤဒ်သိး ကမၤပူၤဖျဲးဝဲ အပှၤဂီၢ်မုၢ် အဂီၢ်ဘၣ်.
“သုတလိၣ်ဒုးတၢ်လၢ တၢ်ဒုးအံၤအပူၤဘၣ်. ဟံးန့ၢ်သုလီၢ်, ဆၢထၢၣ်အိၣ်ဂၢၢ်ကျၢၤ ဒီးသုကထံၣ်ဘၣ် ယဟိဝၤယွၤ အတၢ်အုၣ်က့ၤခီၣ်က့ၤသုလီၤ.”—၂ ကွဲးနီၣ်တၢ် ၂၀:၁၇