တၢ်မၤလိ ၅၂
ယဟိဝၤယွၤ အသုးမုၢ်ဂီၢ်မုၢ်
စူၤရံအစီၤပၤ ဘ့ၣ်ဟဒး ဟဲဒုးဝဲ ပှၤအံၣ်စရ့လးဖိထီဘိ. ဘၣ်ဆၣ် မ့ၢ်လၢဝံအလံၤၡါ ဟ့ၣ်ပလီၢ်ဝဲ ပှၤအံၣ်စရ့လးဖိ အစီၤပၤ ကိးဘျီဒဲးအဃိ စီၤပၤဃ့ၢ်ပူၤဖျဲးအသး န့ၢ်ဝဲထီဘိ. အဃိ စီၤဘ့ၣ်ဟဒးအဲၣ်ဒိး ဖီၣ်န့ၢ်ဝဲ ဝံအလံၤၡါ. စီၤဘ့ၣ်ဟဒး သ့ၣ်ညါဝဲလၢ ဝံအလံၤၡါ အိၣ်လၢဝ့ၢ်ဒိၤသၣ်အပူၤ အဃိ အဝဲဆှၢလီၤဝဲ စူၤရံအသုးဖိတဖၣ်လၢ ကလဲၤဖီၣ်န့ၢ် ဝံအလံၤၡါ.
ဖဲမုၢ်နၤခီန့ၣ် စူၤရံအသုးဖိတဖၣ် လဲၤတုၤဝဲလၢ ဝ့ၢ်ဒိၤသၣ်. လၢခံတဂီၤန့ၣ် ဝံအလံၤၡါ အပျဲၢ်တဂၤ လဲၤထီၣ်ဝဲလၢတၢ်ချၢ ဒီးထံၣ်စိဝဲ စူၤရံအသုးဖိတဖၣ် အိၣ်ဝးတရံးဝဲ ဝ့ၢ်ဒိၤသၣ်. အဝဲပျံၤတၢ် ဒီးကိးပသူထီၣ်ဝဲလၢ ‘ဝံအလံၤၡါဧၢ, ပကမၤဒ်လဲၣ်.’ ဝံအလံၤၡါ တဲဘၣ်အီၤလၢ ‘ပပှၤနီၣ်ဂံၢ် အိၣ်အါန့ၢ်ဒံး အဝဲသ့ၣ်.’ ဖဲန့ၣ်အဆၢကတီၢ် ယဟိဝၤယွၤဒုးထံၣ် ဝံအလံၤၡါ အပျဲၢ်တဂၤအံၤလၢ ကစၢၢ်လၢ အအိၣ်ဝးတရံးဝ့ၢ်အံၤန့ၣ် ပှဲၤဝဲဒီး ကသ့ၣ်မ့ၣ်အူ ဒီးလ့ၣ်ကဟၣ်မ့ၣ်အူ.
ဖဲစူၤရံအသုးဖိတဖၣ် ကဟဲဖီၣ်ဝဲ ဝံအလံၤၡါအခါ အဝဲဃ့တၢ်မၤစၢၤလၢ ယဟိဝၤယွၤအအိၣ်. ဝံၤဒီးယဟိဝၤယွၤ မၤဘံဘူဝဲ ပှၤစူၤရံအသုးဖိတဖၣ် အခိၣ်နူာ် အဃိ အဝဲသ့ၣ် အိၣ်လၢတၢ်လီၢ်ဖဲလဲၣ်န့ၣ် တသ့ၣ်ညါဝဲလၢၤဘၣ်. ဒီးဝံအလံၤၡါ တဲဘၣ်အဝဲသ့ၣ်လၢ ‘သုဟဲဘၣ်လၢ ဝ့ၢ်လၢအကမၣ်တဖျၢၣ်လံ. ဟဲပိာ်ယခံ ယကလဲၤဆှၢသုလၢ ပှၤပိာ်ခွါလၢ သုဃုဖီၣ်အီၤတဂၤအအိၣ်.’ စူၤရံအသုးဖိတဖၣ်အံၤ လဲၤပိာ်ဝဲ ဝံအလံၤၡါအခံ တုၤလီၤလၢ ဝ့ၢ်ၡၤမရံ. ပှၤအံၣ်စရ့လးဖိ အစီၤပၤန့ၣ် အိၣ်ဝဲလၢ ဝ့ၢ်ၡၤမရံအပူၤ.
ဖဲန့ၣ်အဆၢကတီၢ် ပှၤစူၤရံသုးဖိတဖၣ် သ့ၣ်ညါလီၤက့ၤအသးလၢ အဝဲသ့ၣ် ဟဲတုၤလၢ ဝ့ၢ်ၡၤမရံအပူၤလံ. ပှၤအံၣ်စရ့လးဖိ အစီၤပၤသံကွၢ် ဝံအလံၤၡါလၢ ‘မ့ၢ်ယကဘၣ်မၤသံ အဝဲသ့ၣ်ဧါ.’ မ့ၢ်ဝံအလံၤၡါဟံးန့ၢ် တၢ်ခွဲးတၢ်ယာ်အံၤ ဒ်သိး ကမၤသံဝဲ ပှၤသုးဖိတဖၣ်လၢ အအဲၣ်ဒိး မၤဆါအီၤန့ၣ်ဧါ. အဝဲတမၤဝဲ ဒ်န့ၣ်ဘၣ်. ဝံအလံၤၡါ တဲဝဲလၢ ‘တဘၣ်မၤသံ အဝဲသ့ၣ်တဂ့ၤ. ဒုးအီၣ်အဝဲသ့ၣ် တၢ်အီၣ်တၢ်အီ ဒီးပျဲက့ၤ အဝဲသ့ၣ်.’ လၢတၢ်န့ၣ်အဃိ စီၤပၤမၢပှၤဟဲစိာ်ဝဲ တၢ်အီၣ်တၢ်အီ အါအါဂီၢ်ဂီၢ်, ဒုးအီၣ်ဝဲ စူၤရံအသုးဖိတဖၣ် ဝံၤဒီးပျဲက့ၤအဝဲသ့ၣ်.
“ပနာ်န့ၢ် ကစၢ်ယွၤလၢ ပမ့ၢ်ဃ့တၢ် တမံၤဂ့ၤတမံၤဂ့ၤ ဒ်အတၢ်ဘၣ်သးအသိးန့ၣ် အဝဲဒိကနၣ်ပှၤလီၤ.”—၁ ယိၤဟၣ် ၅:၁၄