တၢ်မၤလိ ၅၉
ပိာ်ခွါသးစၢ်လွံၢ်ဂၤ ဒိကနၣ် ယဟိဝၤယွၤ အကလုၢ်
ဖဲစီၤပၤနဘူၤကးန့စၢ် က့ၤကိးဝဲပှၤယူဒၤဖိ အပဒိၣ်ပပှၢ် ဒီးစီၤပၤအဒူၣ်ဖိထၢဖိတဖၣ်လၢ ကီၢ်ဘၤဘူၤလိၣ်အခါ အဝဲပာ်လီၤ အပဒိၣ်တဂၤ လၢအမံၤမ့ၢ် စီၤအၤၡပနးလၢ ကကွၢ်ထွဲ အဝဲသ့ၣ်. ဒီးလၢပှၤတဖၣ်အံၤအကျါ စီၤပၤနဘူၤကးန့စၢ်မၢ စီၤအၤၡပနး ဃုထၢထီၣ် ပှၤသးစၢ်လၢ အဖၠဲးကတၢၢ် ဒီးအိၣ်ဒီး တၢ်အိၣ်ဆူၣ်အိၣ်ချ့လၢ အဂ့ၤကတၢၢ်. ပိာ်ခွါသးစၢ်တဖၣ်န့ၣ် ကဒိးန့ၢ်ဘၣ် တၢ်မၤလိလၢ သၢနံၣ်အတီၢ်ပူၤ. တၢ်မၤလိအံၤ ကမၤစၢၤအဝဲသ့ၣ် ဒ်သိးကကဲထီၣ်ဝဲ ပဒိၣ်လၢ ကီၢ်ဘၤဘူၤလိၣ်အပူၤ. ပိာ်ခွါသးစၢ်တဖၣ်န့ၣ် ကဘၣ်မၤလိဝဲ ကီၢ်ဘၤဘူၤလိၣ်အကျိာ် လၢအမ့ၢ် အခါဒံၤယဲၤကျိာ် ဒ်သိး အဝဲသ့ၣ် တဲ, ဖး, ဒီးကွဲးလံာ် ကသ့ဂ့ၤဂ့ၤအဂီၢ်. ပိာ်ခွါသးစၢ်တဖၣ်အံၤ ကဘၣ်အီၣ် တၢ်အီၣ်ဒ် စီၤပၤဒီးပဒိၣ်တဖၣ် အီၣ်ဝဲအသိးစ့ၢ်ကီး. လၢပိာ်ခွါသးစၢ်တဖၣ်အကျါ ပိာ်ခွါလွံၢ်ဂၤလၢ အမံၤမ့ၢ်ဝဲ စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤန့ၣ် ပှၤကိးက့ၤန့ၢ် အဝဲသ့ၣ်အမံၤ လၢအသီ လၢပှၤဘၤဘူၤလိၣ်ဖိအကျိာ်. အဝဲသ့ၣ်အမံၤလၢ အသီန့ၣ်မ့ၢ်ဝဲ စီၤဘ့ၤလးတၡါစၢ်, စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ. တၢ်ကူၣ်ဘၣ်ကူၣ်သ့လၢ အဝဲသ့ၣ်ဒိးန့ၢ်ဘၣ်ဝဲလၢ ကီၢ်ဘၤဘူၤလိၣ်အပူၤန့ၣ် မ့ၢ်အကမၤဟးဂီၤအဝဲသ့ၣ် အတၢ်ရ့လိာ်သးဒီး ယဟိဝၤယွၤဧါ.
ပိာ်ခွါသးစၢ် လွံၢ်ဂၤအံၤ ဆၢတဲာ်လီၤအသး ဂၢၢ်ဂၢၢ်ကျၢၤကျၢၤလၢ အဝဲသ့ၣ် ကဒိကနၣ်ဝဲ ယဟိဝၤယွၤ အကလုၢ်. မ့ၢ်လၢယဟိဝၤယွၤ အတၢ်သိၣ်တၢ်သီ တဲဝဲလၢ စီၤပၤအတၢ်အီၣ်တၢ်အီတနီၤန့ၣ် တကဆှီဘၣ်. အဝဲသ့ၣ် သ့ၣ်ညါဝဲလၢ အတကြၢးအီၣ်ဝဲဘၣ်. အဝဲသ့ၣ်တဲဘၣ် စီၤအၤၡပနးလၢ ‘ဝံသးစူၤ မၢပအီၣ် စီၤပၤအတၢ်အီၣ်တဂ့ၤ’ စီၤအၤၡပနး တဲဆၢက့ၤအဝဲသ့ၣ်လၢ ‘သုမ့ၢ်တအီၣ်စီၤပၤအတၢ်အီၣ် ဒီးစီၤပၤမ့ၢ်ထံၣ်ဝဲလၢ သုတအိၣ်ဆူၣ်အိၣ်ချ့ဘၣ်န့ၣ် စီၤပၤကမၤသံယၤ.’
စီၤဒၤနံးယ့လးတဲဘၣ် စီၤအၤၡပနးလၢ ‘လၢအသီတဆံအတီၢ်ပူၤန့ၣ် ဝံသးစူၤ ဟ့ၣ်ဒုးအီၣ်ပှၤထဲ တၢ်ဒိးတၢ်လၣ် ဒီးထံ. ဝံၤဒီး ထိၣ်သတြီၤပှၤဒီး ပိာ်ခွါသးစၢ်လၢ အအီၣ်စီၤပၤအတၢ်အီၣ်မီၤ.’ စီၤအၤၡပနး တူၢ်လိာ်ဝဲ စီၤဒၤနံးယ့လး အတၢ်ကတိၤ.
ဖဲအသီတဆံ ဝံၤအလီၢ်ခံ ဖျါလၢ စီၤဒၤနံးယ့လး ဒီးအသကိးတဖၣ်န့ၣ် အတၢ်အိၣ်ဆူၣ်အိၣ်ချ့ ဂ့ၤန့ၢ်ဒံး ပိာ်ခွါသးစၢ် လၢအဂၤတဖၣ်. ဒီးခီဖျိလၢ အဝဲသ့ၣ်ဒိကနၣ် ယဟိဝၤယွၤ အကလုၢ်အဃိ ယဟိဝၤယွၤသးခု. တကးဒံးဘၣ် ယဟိဝၤယွၤဟ့ၣ်လီၤ စီၤဒၤနံးယ့လး တၢ်ကူၣ်သ့ ဒ်သိးကနၢ်ပၢၢ်ဝဲ တၢ်ထံၣ်လၢညါခီ ဒီးတၢ်မံမီၢ်တဖၣ် အခီပညီအဂီၢ်.
ဖဲတၢ်မၤလိဝံၤအခါ စီၤအၤၡပနး လဲၤကိးဝဲ ပိာ်ခွါသးစၢ်တဖၣ်လၢ စီၤပၤနဘူၤကးန့စၢ်အအိၣ်. ဖဲစီၤပၤတဲတၢ်ဒီး ပိာ်ခွါသးစၢ်တဖၣ်အခါ စီၤပၤထံၣ်ဘၣ်ဝဲလၢ စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤန့ၣ် ဖၠဲးဒီးအိၣ်ဒီး တၢ်ပလီၢ်သူၣ်ပလီၢ်သး ဒိၣ်န့ၢ်ဒံး ပိာ်ခွါသးစၢ်လၢအဂၤတဖၣ်. စီၤပၤဃုထၢထီၣ်ဝဲ ပိာ်ခွါသးစၢ် လွံၢ်ဂၤအံၤလၢ ကမၤတၢ်လၢအနီပူၤ. ဒီးဖဲတၢ်ဂ့ၢ်လၢအရ့ဒိၣ်တဖၣ် ဟဲအိၣ်ထီၣ်အခါ စီၤပၤဃ့ တၢ်ဟ့ၣ်ကူၣ်ဟ့ၣ်ဖးလၢ အဝဲသ့ၣ်အအိၣ်. ယဟိဝၤယွၤမၤစၢၤ ပှၤသးစၢ်လွံၢ်ဂၤအံၤ ဒ်သိးအဝဲသ့ၣ်ကအိၣ်ဒီး တၢ်ကူၣ်သ့အါန့ၢ်ဒံး စီၤပၤအပှၤကူၣ်တၢ်သ့ ဒီးပှၤအူတၢ်သမူတၢ်တဖၣ် စၢၢ်တလၢၢ်.
စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤ အိၣ်ဘၣ်လၢ ပှၤဂၤအထံအကီၢ်ဘၣ်ဆၣ် အဝဲသ့ၣ် တသးပ့ၤနီၣ်ဝဲလၢ အဝဲသ့ၣ်မ့ၢ် ယဟိဝၤယွၤ အခ့အပှၤတဖၣ်ဘၣ်. ဒ်န့ၣ်အသိး ဖဲနမိနပါ တအိၣ်ဒီးနၤအခါ မ့ၢ်နကသ့ၣ်နီၣ်ထီၣ် ယဟိဝၤယွၤ ထီဘိဧါ.
“တဘၣ်ပျဲ ပှၤဆိကမိၣ်ဆံးနၤလၢ နမ့ၢ်ပှၤသးစၢ်အဃိ နီတဂၤတဂ့ၤ. လၢတၢ်စံးတၢ်ကတိၤမ့ၢ်ဂ့ၤ, လုၢ်လၢ်သကဲာ်ပဝးမ့ၢ်ဂ့ၤ, တၢ်အဲၣ်တၢ်ကွံမ့ၢ်ဂ့ၤ, တၢ်နာ်မ့ၢ်ဂ့ၤ, တၢ်စီဆှံမ့ၢ်ဂ့ၤ ကဲထီၣ်တၢ်ဒိတၢ်တဲာ် လၢပှၤလၢအသးတီတဖၣ် အဂီၢ်တက့ၢ်.”—၁ တံၤမသ့း ၄:၁၂