တၢ်မၤလိ ၆၃
လံာ်မဲာ်ဖျၢၣ်လၢ တၢ်ဒူၣ်ကပၤလိၤ
တၢ်ဆၢကတီၢ် လဲၤပူၤကွံာ်ဒီး စီၤဘ့ၤလၡါစၢ် ကဲထီၣ်စီၤပၤလၢ ကီၢ်ဘၤဘူၤလိၣ်အပူၤ. ဘၣ်တနၤန့ၣ် အဝဲကွဲမုာ်ဝဲ အပဒိၣ်ဖးဒိၣ်တကထိ ဒ်သိး ကအီၣ်သကိးအီသကိးတၢ်အဂီၢ်. တကတီၢ်ဃီန့ၣ် စီၤပၤဘ့ၤလၡါစၢ်မၢ အခ့အပှၤတဖၣ်ဟဲစိာ်ဝဲ ထံခွးထူလၢ စီၤပၤနဘူၤကးန့စၢ် ဟဲက့ၤစိာ်ဝဲလၢ ယဟိဝၤယွၤ အတၢ်လုၢ်ဟံၣ်ပူၤ. စီၤပၤဘ့ၤလၡါစၢ် ဒီးအပှၤတမှံၤတဖၣ် အီစပံးထံလၢ ထံခွးတဖၣ်အံၤအပူၤ ဒီးစံးထီၣ်ပတြၢၤဝဲ အဝဲသ့ၣ် အကစၢ်ယွၤတဖၣ်. လၢတၢ် တပာ်သူၣ်ပာ်သးအပူၤန့ၣ် စုတခီ ဟဲဖျါထီၣ် ဒီးကွဲးလီၤဝဲလံာ်မဲာ်ဖျၢၣ်လၢ တၢ်ဒူၣ်အကပၤ.
စီၤပၤဘ့ၤလၡါစၢ် ပျံၤတၢ်ဒိၣ်မး. အဝဲကိးန့ၢ်ဝဲအခ့အပှၤလၢ အအူတၢ်သမူတၢ် ဒီးအၢၣ်လီၤအဝဲသ့ၣ်လၢ ‘ပှၤတဂၤဂၤ တဲဖျါထီၣ်တၢ်ကတိၤအံၤ အခီပညီမ့ၢ်ဘၣ်န့ၣ် ယကဒုးကဲထီၣ်အီၤလၢ ပှၤအဒိၣ်ကတၢၢ် သၢဂၤတဂၤလၢ ကီၢ်ဘၤဘူၤလိၣ်အပူၤ.’ ဘၣ်ဆၣ် အဝဲသ့ၣ်တဲဖျါထီၣ်ဝဲ တၢ်ကတိၤအံၤအခီပညီ တဘၣ်နီတဂၤဘၣ်. ဝံၤဒီး နီၢ်ပၤမုၣ် ဟဲနုာ်လီၤဝဲ ဒီးတဲဘၣ်အီၤလၢ ‘ပိာ်ခွါအိၣ်ဝဲတဂၤ လၢအမံၤမ့ၢ် စီၤဒၤနံးယ့လး ဒီးလၢညါန့ၣ် အဝဲတဲဘၣ်ဝဲ စီၤပၤနဘူၤကးန့စၢ် အတၢ်မံမီၢ်အခီပညီ. အဃိ ဘၣ်ဃးဒီး တၢ်ကတိၤတဖၣ်အံၤ အခီပညီန့ၣ် အဝဲတဲဘၣ်နၤသ့.’
စီၤဒၤနံးယ့လး လဲၤလၢစီၤပၤအအိၣ်. ဒီးစီၤပၤဘ့ၤလၡါစၢ် တဲဘၣ်အီၤလၢ ‘နဖးန့ၢ်ယၤ တၢ်ကွဲးအသးအံၤ ဒီးတဲဘၣ်ယၤ အခီပညီမ့ၢ်ဘၣ်န့ၣ် ယကဟ့ၣ်လီၤနၤ ဖဲထူ ဒီးယကဒုးကဲထီၣ်နၤလၢ ပှၤအဒိၣ်ကတၢၢ် သၢဂၤတဂၤ လၢကီၢ်ဘၤဘူၤလိၣ်အပူၤ.’ စီၤဒၤနံးယ့လး တဲဘၣ်အီၤလၢ ‘ယတလီကီနတၢ်ဟ့ၣ်တဖၣ်ဘၣ်, ဘၣ်ဆၣ် ယကတဲဘၣ်နၤ တၢ်ကွဲးအသးအံၤအခီပညီ. နပၢ်စီၤနဘူၤကးန့စၢ် ပာ်ထီၣ်ထီအသးအဃိ ယဟိဝၤယွၤ ဆီၣ်လီၤအီၤ. နသ့ၣ်ညါတၢ်လၢ အဟဲကဲထီၣ်သးဒီး နပၢ်ခဲလၢာ်. ဘၣ်ဆၣ် နတပာ်ကဲယဟိဝၤယွၤဘၣ် ဒီးနအီစပံးထံလၢ ထံခွးထူအပူၤ လၢပှၤဟဲက့ၤစိာ်အီၤလၢ ယဟိဝၤယွၤ အတၢ်လုၢ်ဟံၣ်အပူၤ. အဃိ ကစၢ်ယွၤ ကွဲးလီၤဝဲတၢ်ကတိၤ လၢအမ့ၢ် မန့ၤ, မန့ၤ, တက့လး ဒီးပၢ်စံၣ်. တၢ်ကတိၤတဖၣ်အံၤ အခီပညီမ့ၢ်ဝဲ ပှၤမၤဒဲဖိ ဒီးပှၤပၤရၣ်ဖိ ကမၤနၢၤကွံာ် ဘၤဘူၤလိၣ် ဒီးနတကဲစီၤပၤလၢၤဘၣ်.’
ဘၤဘူၤလိၣ် အထံကီၢ်န့ၣ် ဖျါလၢ ပှၤဟဲဒုးနၢၤဝဲ တန့ၢ်နီတဂၤဘၣ်. ဘီမုၢ်အံၤ ဘၣ်တၢ်ဒီသဒၢအီၤလၢ ဝ့ၢ်အဒူ လၢအကျၢၤ ဒီးထံကျိလၢအယိာ်. ဘၣ်ဆၣ် ဖဲတၢ်တနၤန့ၣ် ပှၤမၤဒဲဖိ ဒီးပှၤပၤရၣ်ဖိ ဟဲဒုးဝဲဝ့ၢ်အံၤ. ပၤရၣ်အစီၤပၤကိရ့ၣ် ခူၣ်ဝဲထံအကျိၤ ဒ်သိးကမၤလီၤစှၤကွံာ် ထံကျိအထံ ဒီးအပှၤသုးဖိတဖၣ် လဲၤဃီၤဝဲလၢ ဝ့ၢ်အတြဲၤ. ဖဲပှၤသုးဖိတဖၣ် လဲၤတုၤလၢ ဝ့ၢ်အတြဲၤအခါ အဝဲသ့ၣ်ထံၣ်ဘၣ်ဝဲလၢ တြဲၤန့ၣ် အိးထီၣ်ပာ်စၢၤအသး. အဃိ ပှၤသုးဖိတဖၣ် လဲၤနုာ်လီၤလၢဝ့ၢ်ပူၤ, ဒုးနၢၤဝဲဝ့ၢ် ဒီးမၤသံကွံာ် ဘၤဘူၤလိၣ်အစီၤပၤ. ဝံၤဒီး စီၤကိရ့ၣ် ပၢက့ၤဝဲ ဝ့ၢ်ဘၤဘူၤလိၣ်.
လၢတနံၣ် အတီၢ်ပူၤ စီၤကိရ့ၣ် တဲဝဲလၢ ‘ယဟိဝၤယွၤ မၢယတ့ထီၣ်က့ၤ အတၢ်လုၢ်ဟံၣ် လၢဝ့ၢ်ယရူၤၡလ့ၣ်အပူၤ. ဒီးကစၢ်ယွၤအပှၤဂီၢ်မုၢ် မ့ၢ်အဲၣ်ဒိး က့ၤမၤစၢၤတၢ် တဂၤဂၤန့ၣ် က့ၤသ့.’ အဃိ ဒ်ယဟိဝၤယွၤ အၢၣ်လီၤအီလီၤဝဲအသိး ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤ ပူၤကွံာ်အနံၣ် ၇၀ ဝံၤအလီၢ်ခံ ပှၤယူဒၤဖိအါဂၤ က့ၤကဒါလၢ ဝ့ၢ်ယရူၤၡလ့ၣ်. တကးဒံးဘၣ် စီၤကိရ့ၣ် ဆှၢကဒါက့ၤ ထံခွးထူ, ထံခွးစ့ ဒီးတၢ်ပီးတၢ်လီ အဂၤတဖၣ်လၢ စီၤပၤနဘူၤကးန့စၢ် ဟဲက့ၤစိာ်ဝဲလၢ ကစၢ်ယွၤ အတၢ်လုၢ်ဟံၣ်. ပထံၣ်ဘၣ်လၢ ယဟိဝၤယွၤသူဝဲ စီၤကိရ့ၣ် လၢကမၤစၢၤ အပှၤဂီၢ်မုၢ်အဂီၢ်.
“ပိာ်မုၣ်ဆါလီၤအီၣ်သး ဘၤဘူၤလိၣ်ဖးဒိၣ် လီၤပှီၢ်လံ, အဝဲလီၤပှီၢ်လံ. ဒီးအကဲထီၣ် တၢ်အိၣ်တၢ်ဆိးအလီၢ်လၢ တၢ်ဝံတၢ်နါတဖၣ်အဂီၢ်.”—လီၣ်ဖျါ ၁၈:၂