တၢ်မၤလိ ၆၇
ဝ့ၢ်ယရူၤၡလ့ၣ်အဒူၣ်
ပမ့ၢ်ကွၢ်ကဒါက့ၤ တၢ်ဆၢကတီၢ်လၢ အပူၤကွံာ်စှၤကိာ်နံၣ်န့ၣ် စီၤနဃ့မယၤ လၢအမ့ၢ်ပှၤအံၣ်စရ့လးဖိန့ၣ် အိၣ်ဝဲလၢဝ့ၢ်ၡူၡၣ် လၢဖၢၡၢၣ်အဘီမုၢ်အပူၤ. ဒီးအဝဲမ့ၢ်ဝဲ စီၤပၤအၢ်တၤၡါၡတၤ အခ့အပှၤတဂၤစ့ၢ်ကီး. စီၤနဃ့မယၤ အဒီပုၢ်ဝဲၢ်ခွါ ဟဲဝဲလၢကီၢ်ယူဒၤ ဒီးတဲဘၣ်အီၤတၢ်ကစီၣ်လၢ အလီၤသးအုးတခါ. အဝဲတဲဝဲလၢ ‘ပှၤလၢအက့ၤကဒါက့ၤလၢ ဝ့ၢ်ယရူၤၡလ့ၣ်န့ၣ် အဝဲသ့ၣ် အတၢ်အိၣ်မူပှဲၤဒီး တၢ်ဘၣ်ယိၣ် မ့ၢ်လၢဝ့ၢ်အဒူၣ် ဒီးအတြဲၤတဖၣ်လၢ ပှၤဘၤဘူၤလိၣ်ဖိ မၤဟးဂီၤဝဲန့ၣ် ပှၤတဘှီဂ့ၤထီၣ်က့ၤအီၤဒံးဘၣ်.’ စီၤနဃ့မယၤ သးအုးဝဲဒိၣ်မး. အဃိ အအဲၣ်ဒိးက့ၤလၢ ဝ့ၢ်ယရူၤၡလ့ၣ် ဒ်သိးကမၤစၢၤ အပှၤဂီၢ်မုၢ်အဂီၢ် ဒီးဒ်သိးစီၤပၤ ကပျဲက့ၤအီၤအဂီၢ် အဃ့ထုကဖၣ်တၢ်.
လၢခံ စီၤပၤထံၣ်ဝဲလၢ စီၤနဃ့မယၤ အမဲာ်တမုာ်ဘၣ်. စီၤပၤသံကွၢ်အီၤလၢ ‘ဘၣ်မနုၤအဃိ နသးအုးလဲၣ်.’ စီၤနဃ့မယၤ တဲက့ၤဝဲလၢ ‘ယသးအုးခီဖျိလၢ ပှၤတဘှီဂ့ၤထီၣ်က့ၤ ဝ့ၢ်ယရူၤၡလ့ၣ် အဒူၣ်ဒံးဘၣ်.’ စီၤပၤသံကွၢ်ဝဲလၢ ‘ယဘၣ်မၤစၢၤနၤဒ်လဲၣ်.’ တဘျီဃီန့ၣ် စီၤနဃ့မယၤ ဃ့ထုကဖၣ်လၢ ကစၢ်ယွၤအအိၣ် လၢအသးပူၤ. ဝံၤဒီး အဝဲတဲဝဲလၢ ‘ဝံသးစူၤ ပျဲယက့ၤဘှီဂ့ၤထီၣ်က့ၤ ဝ့ၢ်ယရူၤၡလ့ၣ်အဒူၣ်မီၤ.’ စီၤပၤအၢ်တၤၡါၡတၤ ဟ့ၣ်အခွဲးလၢ စီၤနဃ့မယၤ ကက့ၤဝဲလၢ ဝ့ၢ်ယရူၤၡလ့ၣ် ဒီးစီၤပၤရဲၣ်ကျဲၤဝဲဒ်သိး စီၤနဃ့မယၤ ကက့ၤဘၣ်ဝဲ ပူၤပူၤဖျဲးဖျဲး. စီၤပၤပာ်ထီၣ်စ့ၢ်ကီး စီၤနဃ့မယၤလၢ ပှၤယူဒၤဖိ အပဒိၣ်အခိၣ် ဒီးဟ့ၣ်အီၤသ့ၣ်လၢ ကဘှီဂ့ၤထီၣ်က့ၤ ဝ့ၢ်အတြဲၤတဖၣ်.
ဖဲစီၤနဃ့မယၤ ဟဲက့ၤတုၤလၢ ဝ့ၢ်ယရူၤၡလ့ၣ်အခါ အဟးကွၢ်ဝဲ ဝ့ၢ်အဒူၣ်တဖၣ်. ဝံၤဒီး စီၤနဃ့မယၤကိးဖှိၣ်ဝဲ ပှၤလုၢ်တၢ်အဒိၣ် ဒီးပှၤပၢတၢ်တဖၣ် ဒီးတဲဘၣ်အဝဲသ့ၣ်လၢ ‘ပကဘၣ်ဘှီဂ့ၤထီၣ်က့ၤ ဝ့ၢ်အဒူၣ်.’ အဝဲသ့ၣ် တူၢ်လိာ်ဝဲ ဒီးစးထီၣ်ဘှီဂ့ၤထီၣ်က့ၤ ဝ့ၢ်အဒူၣ်တဖၣ်.
ဘၣ်ဆၣ် ပှၤအံၣ်စရ့လးဖိ အဒုၣ်အဒါတနီၤ တဲဆါအဝဲသ့ၣ်လၢ ‘ဝ့ၢ်အဒူၣ်လၢ သုဘှီထီၣ်အီၤန့ၣ် ထွံၣ်မံၤမၤလီၤပှီၢ်ဝဲန့ၢ်.’ ဘၣ်ဆၣ် ပှၤမၤတၢ်ဖိတဖၣ် တဒိကနၣ်အဝဲသ့ၣ် အတၢ်ကတိၤဘၣ်. အဝဲသ့ၣ် ဆဲးဘှီထီၣ်ဝဲ ဝ့ၢ်အဒူၣ်တဖၣ်. ဝ့ၢ်အဒူၣ်ထီထီၣ် ဒီးဂၢၢ်ကျၢၤထီၣ်ဝဲ.
ဒုၣ်ဒါတဖၣ် ဆၢတဲာ်လီၤအသးလၢ ကဟဲဒုးဝဲ ဝ့ၢ်ယရူၤၡလ့ၣ်. ဖဲပှၤယူဒၤဖိတဖၣ် သ့ၣ်ညါဝဲအဒုၣ်အဒါ အတၢ်ကူၣ်အခါ အဝဲသ့ၣ်ပျံၤတၢ်. ဘၣ်ဆၣ် စီၤနဃ့မယၤ တဲဝဲလၢ ‘ပျံၤတၢ်တဂ့ၤ. ယဟိဝၤယွၤအိၣ်ဒီးပှၤ.’ စီၤနဃ့မယၤ ပာ်လီၤဝဲ ပှၤခိးတၢ်ဖိလၢ ကဒီသဒၢ ပှၤမၤတၢ်ဖိတဖၣ် ဒီးဒုၣ်ဒါတဖၣ် ဟဲဒုးအဝဲသ့ၣ် တန့ၢ်လၢၤဘၣ်.
လၢ ၅၂ သီအတီၢ်ပူၤန့ၣ် ပှၤဘှီဂ့ၤထီၣ်ဝဲဝ့ၢ်အဒူၣ် ဒီးအတြဲၤတဖၣ်ဝံၤဝဲ. ဝံၤဒီး စီၤနဃ့မယၤ ကိးဖှိၣ်ဝဲ ပှၤလ့ၤဝံဖိခဲလၢာ် ဒ်သိးကပာ်စီဆှံဝဲ ဝ့ၢ်ယရူၤၡလ့ၣ် အဒူၣ်အဂီၢ်. အဝဲနီၤဖးဝဲ ပှၤလ့ၤဝံဖိခံဒူၣ်လၢ ကသးဝံၣ်တၢ်အဂီၢ်. အဝဲသ့ၣ် လဲၤထီၣ်ဝဲလၢ ဝ့ၢ်ခိၣ်ဒူအဖီခိၣ် ဒီး ဟးတရံးဝဲဝ့ၢ်. အဝဲသ့ၣ် အူထီၣ်ကွဲၤ, ဒဲသီၣ်ဝဲစှၢၣ်စှံး, ဒ့တနၢ် ဒီးသးဝံၣ်စံးထီၣ်ပတြၢၤ ယဟိဝၤယွၤ. စီၤဧ့စြၤလဲၤတၢ်ဒီး ပှၤလ့ၤဝံဖိတၢတဒူၣ် မ့မ့ၢ်စီၤနဃ့မယၤန့ၣ် လဲၤတၢ်ဒီး ပှၤလ့ၤဝံဖိခံဒူၣ်တဒူၣ်. အဝဲသ့ၣ်ဟးဝဲ တုၤအထံၣ်လိာ်က့ၤအသးလၢ တၢ်လုၢ်ဟံၣ်. ပှၤပိာ်မုၣ်, ပိာ်ခွါဒီးဖိသၣ်ခဲလၢာ်န့ၣ် လုၢ်ထီၣ်တၢ်လၢ ယဟိဝၤယွၤအအိၣ် ဒီးမၤဝဲမူးပွဲ. အဝဲသ့ၣ် အတၢ်သူၣ်ဝံၣ်သးဆၢတဖၣ်န့ၣ် သီၣ်ဟူဝဲဖးယံၤ.
“တၢ်စုကဝဲၤလၢ ပှၤတ့ထီၣ်အီၤ ဒ်သိးကထီဒါနၤအဂီၢ်န့ၣ် ကကဲထီၣ် တၢ်ကလီကလီခဲလၢာ်လီၤ.”—ယၡါယၤ ၅၄:၁၇