တၢ်မၤလိ ၆၈
နီၢ်အ့းလံၤစါဘ့း ဒိးန့ၢ်ဘၣ် ဖိခွါတဂၤ
ပှၤဘှီဂ့ၤထီၣ်က့ၤ ဝ့ၢ်ယရူၤၡလ့ၣ်အဒူၣ် ပူၤကွံာ်အနံၣ် ၄၀၀ ဝံၤအလီၢ်ခံ ပှၤလုၢ်တၢ်ဒိၣ် စီၤစဃၤရံ ဒီးအမါ နီၢ်အ့းလံၤစါဘ့း အိၣ်ဝဲဘူးဒီး ဝ့ၢ်ယရူၤၡလ့ၣ်. အဝဲသ့ၣ်ဖျီအသးဖးယံာ်လံ ဘၣ်ဆၣ် အဖိတအိၣ် နီတဂၤဒံးဘၣ်. ဘၣ်တနံၤဖဲ စီၤစဃၤရံလဲၤစိာ် တၢ်နၢမူလၢ ယွၤအတၢ်လုၢ်ဟံၣ်ပူၤအခါ မူခိၣ်ကလူး ကၤဘြံၤအ့လး လီၣ်ဖျါထီၣ်အသး လၢအမဲာ်ညါ. စီၤစဃၤရံ ပျံၤတၢ်ဒိၣ်မး ဘၣ်ဆၣ် ကၤဘြံၤအ့လး တဲဘၣ်အီၤလၢ ‘ပျံၤတၢ်တဂ့ၤ. ယကတဲဘၣ်နၤ တၢ်သးခုကစီၣ်လၢ ယဟိဝၤယွၤအအိၣ်. နမါ နီၢ်အ့းလံၤစါဘ့းန့ၣ် ကအိၣ်ဖျဲၣ်ထီၣ်န့ၢ်နၤ ဖိခွါတဂၤ ဒီးနကဘၣ် ကိးန့ၢ်အမံၤလၢ စီၤယိၤဟၣ်. ယဟိဝၤယွၤ ဃုထၢထီၣ် စီၤယိၤဟၣ်လၢ ကမၤဝဲတၢ်မၤလၢ အရ့ဒိၣ်တခါ.’ စီၤစဃၤရံတဲဝဲလၢ ‘ယနာ်နၤကသ့ဒ်လဲၣ်. ယၤဒီးယမါန့ၣ် ပသးပှၢ်ဒိၣ်မးလံအဃိ ပဖိအိၣ်တသ့လၢၤဘၣ်.’ ကၤဘြံၤအ့လး တဲဝဲလၢ ‘ကစၢ်ယွၤဆှၢလီၤယၤ ဒ်သိး ယကဟဲတဲဘၣ်နၤ တၢ်ကစီၣ်အံၤ. ဘၣ်ဆၣ် နတနာ်ယၤဘၣ်အဃိ နတဲတၢ်တသ့လၢၤဘၣ် တုၤလၢ နဖိအိၣ်ဖျဲၣ်ထီၣ်.’
စီၤစဃၤရံ အိၣ်လၢ တၢ်လုၢ်ဟံၣ်ပူၤဖးယံာ် အဃိ ဖဲအဝဲဟဲက့ၤထီၣ်အခါ ပှၤလၢအိၣ်ခိးအီၤ လၢတၢ်ချၢန့ၣ် အဲၣ်ဒိးသ့ၣ်ညါဝဲ တၢ်မၤအသးဒီး အီၤဒ်လဲၣ်. ဘၣ်ဆၣ် စီၤစဃၤရံ တဲတၢ်တသ့ဘၣ်. အဃိ အဝဲဘၣ်နဲၣ်စုနဲၣ်ခီၣ် ဒ်သိးကတဲတၢ်ဒီး ပှၤဂၤအဂီၢ်. ဝံၤဒီး ပှၤဂီၢ်မုၢ်တဖၣ်န့ၣ် နၢ်ပၢၢ်ဝဲလၢ စီၤစဃၤရံ ဒိးန့ၢ်ဘၣ် တၢ်ကစီၣ်လၢ ကစၢ်ယွၤအအိၣ်တခါ.
တုၤတၢ်ဆၢကတီၢ်ဘၣ်န့ၣ် နီၢ်အ့းလံၤစါဘ့း ဒၢထီၣ်ဒီး အိၣ်ဖျဲၣ်ထီၣ်ဝဲအဖိခွါ ဒ်မူခိၣ်ကလူး တဲဘၣ်အီၤအသိး. အသကိး ဒီးအဘူးအတံၢ်တဖၣ် ဟဲကွၢ်ဝဲအဖိ. အဝဲသ့ၣ်သးခုလၢ နီၢ်အ့းလံၤစါဘ့းအဂီၢ်. နီၢ်အ့းလံၤစါဘ့း တဲဝဲလၢ ‘ဖိသၣ်တဂၤအံၤ ဘၣ်ကိးန့ၢ်အမံၤလၢ စီၤယိၤဟၣ်.’ ဘၣ်ဆၣ် ပှၤအဂၤတဖၣ် တဲဝဲလၢ ‘လၢနဟံၣ်ဖိဃီဖိ အကျါန့ၣ် ပှၤကိးန့ၢ်အမံၤလၢ စီၤယိၤဟၣ် တအိၣ်နီတဂၤဘၣ်. ကိးန့ၢ်နဖိခွါအမံၤလၢ စဃၤရံဒ်အပၢ်အမံၤအသိးမီၤ.’ ဖဲန့ၣ်အခါ စီၤစဃၤရံကွဲးလီၤဝဲ အဖိခွါအမံၤလၢ ‘စီၤယိၤဟၣ်.’ ဝံၤဒီး စီၤစဃၤရံ တဲတၢ်သ့ထီၣ်က့ၤ. တၢ်ကစီၣ် ဘၣ်ဃးဒီး ဖိသၣ်အဂ့ၢ်န့ၣ် ရၤလီၤသး သကုၤလၢ ကီၢ်ယူဒၤ ဒီးပှၤဂီၢ်မုၢ်တဖၣ် ဆိကမိၣ်ဝဲလၢ ‘ဖိသၣ်တဂၤအံၤ မ့ၢ်ဒိၣ်ထီၣ်န့ၣ် အဝဲကကဲထီၣ် ပှၤဒ်လဲၣ်တဂၤလဲၣ်.’
စီၤစဃၤရံ လၢပှဲၤထီၣ်ဒီး ယွၤအသးစီဆှံ ဒီးတဲဝဲလၢ ‘မ်ယဟိဝၤယွၤ ဘၣ်တၢ် စံးထီၣ်ပတြၢၤအီၤတက့ၢ်. ကစၢ်ယွၤ အၢၣ်လီၤတၢ်ဒီး စီၤအၤဘြၤဟၣ်လၢ အကဆှၢလီၤ ပှၤအုၣ်က့ၤခီၣ်က့ၤတၢ်တဂၤ လၢအမ့ၢ်မ့းၡံအၤ. အဝဲကမၤပူၤဖျဲးပှၤ. မ့မ့ၢ်စီၤယိၤဟၣ်န့ၣ် ကကဲထီၣ်ဝဲ ဝံတဂၤ လၢအကကတဲာ်ကတီၤန့ၢ်ဝဲ မ့းၡံအၤအကျဲ.’
တၢ်လီၤလး ဟဲကဲထီၣ်သးဒီး နီၢ်အ့းလံၤစါဘ့း အဘူးအတံၢ် နီၢ်မၤရံစ့ၢ်ကီး. ဘၣ်ဃးဒီး တၢ်ဂ့ၢ်တခါအံၤန့ၣ် ပကမၤလိအါထီၣ်ဘၣ်လၢ တၢ်မၤလိ လၢခံတခါ.
“လၢပှၤဟီၣ်ခိၣ်ဖိ အတၢ်ထံၣ်န့ၣ် အကဲထီၣ်အသးတသ့ဘၣ်. ဘၣ်ဆၣ် ကစၢ်ယွၤန့ၣ် မၤတၢ်သ့ ခဲလၢာ်လီၤ.”—မးသဲ ၁၉:၂၆