တၢ်မၤလိ ၆၉
ကၤဘြံၤအ့လး ဟဲလၢ နီၢ်မၤရံအအိၣ်
နီၢ်အ့းလံၤစါဘ့းအိၣ်ဒီး အဘူးအတံၢ်တဂၤ လၢအမံၤမ့ၢ်နီၢ်မၤရံ. နီၢ်မၤရံန့ၣ် အိၣ်ဝဲလၢ ဝ့ၢ်နစၤရ့း လၢကီၢ်ကၤလံၤလါအပူၤ. ဒီးနီၢ်မၤရံန့ၣ် အအၢၣ်လီၤပာ်စၢၤသးလၢ အကဖျီသးဒီး စီၤယိၤသး လၢအမ့ၢ် ပှၤစုသ့ဖိတဂၤ. ဖဲနီၢ်အ့းလံၤစါဘ့း ဒၢန့ၢ်ဃုလါအခါ မူခိၣ်ကလူး ကၤဘြံၤအ့လး ဟဲထံၣ်လိာ်သးဒီး နီၢ်မၤရံ. မူခိၣ်ကလူး တဲဘၣ်အီၤလၢ ‘နံၤလၢဂ့ၤ နီၢ်မၤရံဧၢ, ယဟိဝၤယွၤ ဘၣ်သူၣ်ဘၣ်သးနၤ.’ နီၢ်မၤရံတနၢ်ပၢၢ် တၢ်ကတိၤအံၤ အခီပညီဘၣ်. ဝံၤဒီး ကၤဘြံၤအ့လး တဲဘၣ်အီၤလၢ ‘နကဒၢထီၣ် ဒီးနကအိၣ်ဖျဲၣ်ထီၣ် ဖိခွါတဂၤ ဒီးနဘၣ်ကိးန့ၢ်အမံၤလၢ ယ့ၣ်ၡူး. အဝဲကကဲထီၣ် စီၤပၤတဂၤ ဒီးအဘီအမုၢ်ကအိၣ်ဝဲ လီၤထူလီၤယိာ်.’
နီၢ်မၤရံတဲက့ၤအီၤလၢ ‘ယကဲမုၣ်ကနီၤတဂၤဒံးအဃိ ယဒၢထီၣ်ကသ့ဒ်လဲၣ်.’ ကၤဘြံၤအ့လး တဲက့ၤအီၤလၢ ‘တၢ်လၢယဟိဝၤယွၤ မၤဝဲတသ့ဘၣ်န့ၣ် တအိၣ်နီတမံၤဘၣ်. သးစီဆှံ ကဟဲလီၤလၢနလိၤ ဒီးနကအိၣ်ဖျဲၣ်ထီၣ် ဖိခွါတဂၤ. နဘူးနတံၢ် နီၢ်အ့းလံၤစါဘ့း ဒၢထီၣ်ဝဲစ့ၢ်ကီး.’ ဝံၤဒီး နီၢ်မၤရံတဲဝဲလၢ ‘ယမ့ၢ် ယဟိဝၤယွၤ အကုၢ်မုၣ်. မ်တၢ်ကဲထီၣ်အသးဒီးယၤ ဒ်နတဲအသိးတက့ၢ်.’
နီၢ်မၤရံလဲၤဝဲလၢ နီၢ်အ့းလံၤစါဘ့းအအိၣ်. နီၢ်အ့းလံၤစါဘ့းန့ၣ် အိၣ်ဝဲလၢ ယူဒၤအဝ့ၢ် လၢကစၢၢ်ကလိအကျါ. ဖဲနီၢ်မၤရံ ဆၢဂ့ၤဆၢဝါ နီၢ်အ့းလံၤစါဘ့းအခါ ဖိသၣ်အိၣ်လၢ နီၢ်အ့းလံၤစါဘ့း အဟၢဖၢပူၤန့ၣ် ဟူးထီၣ်ဝဲ. သးစီဆှံဟဲလီၤလၢ နီၢ်အ့းလံၤစါဘ့းအလိၤ ဒီးအတဲဝဲလၢ ‘နီၢ်မၤရံဧၢ, ယဟိဝၤယွၤ ဆိၣ်ဂ့ၤနၤ. ယကစၢ်အမိၢ် ဟဲဟးလၢ ယအိၣ်အဃိ မ့ၢ်တၢ်ခွဲးတၢ်ယာ်ဖးဒိၣ် တခါလၢယဂီၢ်.’ နီၢ်မၤရံတဲဝဲလၢ ‘ယစံးထီၣ်ပတြၢၤ ယဟိဝၤယွၤလၢ ယသးဒီဖျၢၣ်ညါ.’ နီၢ်မၤရံအိၣ်ဝဲဒီး နီၢ်အ့းလံၤစါဘ့း သၢလါဝံၤဒီး အက့ၤဝဲလၢအဟံၣ်လၢနစၤရ့း.
ဖဲစီၤယိၤသး သ့ၣ်ညါဝဲလၢ နီၢ်မၤရံဒၢထီၣ်ဝဲအခါ အအဲၣ်ဒိး မၤလီၤဖးအသးဒီး နီၢ်မၤရံ. ဘၣ်ဆၣ် လၢစီၤယိၤသး အတၢ်မံမီၢ်အပူၤန့ၣ် မူခိၣ်ကလူး ဟဲတဲဘၣ်အီၤလၢ ‘တဘၣ်ပျံၤတၢ်လၢ နကဟံးဒီးနီၢ်မၤရံတဂ့ၤ. အတမၤကမၣ်တၢ်နီတမံၤဘၣ်.’ အဃိ စီၤယိၤသးဟံးန့ၢ် နီၢ်မၤရံဒ်အမါအသိး ဒီးက့ၤကိးအီၤလၢအဟံၣ်.
“လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤ . . . တၢ်လၢယဟိဝၤယွၤ ဘၣ်သးမၤဝဲန့ၣ် အဝဲမၤဝဲ ခဲလၢာ်လီၤ.”—စံးထီၣ်ပတြၢၤ ၁၃၅:၆