ယ့ၣ်ၡူးမၤသမူထီၣ်စီၤလါစရူး

လၢဝ့ၢ်ဘ့ၤသနံအပူၤန့ၣ်​ ယ့ၣ်ၡူး အတံၤသကိးလၢ အရ့ဝဲဘူးဘူးတံၢ်တံၢ်န့ၣ်​ အိၣ်ဝဲသၢဂၤ. အဝဲသ့ၣ်​ အမံၤမ့ၢ်ဝဲ စီၤလါစရူး, နီၢ်မၤရံဒီးနီၢ်မၢ်သၤ. ဘၣ်တနံၤ ဖဲယ့ၣ်ၡူးအိၣ်လၢ ထံကျိယၢ်ဒ့ၣ်ဝၢ်ဘးခီန့ၣ်​ နီၢ်မၤရံဒီးနီၢ်မၢ်သၤ ဆှၢတၢ်ကစီၣ်လၢ ယ့ၣ်ၡူးအအိၣ်လၢ ‘စီၤလါစရူး ဆိးက့နးမး, ဝံသးစူၤဟဲမ့ၢ်ချ့.’ ဘၣ်ဆၣ်​ ယ့ၣ်ၡူးတဟဲဝဲ တဘျီဃီဘၣ်. ယ့ၣ်ၡူး အိၣ်ခိးဒံးဝဲခံသီ. ဝံၤဒီး ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ ‘စီၤလါစရူး မံဘၣ်အသးလံ, ပကလဲၤလၢဝ့ၢ်ဘ့ၤသနံ ဒီးယကကိးပၢၢ်ထီၣ်အီၤ.’ တၢ်မၢဖိတဖၣ်​ တဲဘၣ်အီၤလၢ ‘စီၤလါစရူး မ့ၢ်မံဘၣ်အသးန့ၣ်​ အကကိညၢ်လီၤဝဲ.’ အဃိ ယ့ၣ်ၡူးတဲဘၣ်​ အဝဲသ့ၣ်လိၤလိၤလၢ ‘စီၤလါစရူး သံလံ.’

ဖဲယ့ၣ်ၡူးလဲၤတုၤလၢ ဝ့ၢ်ဘ့ၤသနံအခါ စီၤလါစရူး ဘၣ်တၢ်ပာ်လီၤအီၤလၢ တၢ်သွၣ်ခိၣ်အပူၤ အိၣ်ဝဲလွံၢ်သီလံ. ပှၤဂီၢ်မုၢ်တဖၣ်ဟဲလၢ နီၢ်မၤရံဒီးနီၢ်မၢ်သၤအအိၣ်​ ဒ်သိး ကမၤမုာ်ထီၣ်​ အဝဲသ့ၣ်​ အသးအဂီၢ်. ခီဖျိလၢ နီၢ်မၢ်သၤ နၢ်ဟူလၢ ယ့ၣ်ၡူး ဟဲလံအဃိ အဝဲကရီလဲၤထံၣ်လိာ်အသးဒီးအီၤ. နီၢ်မၢ်သၤ တဲဘၣ်အီၤလၢ “ကစၢ်ဧၢ, နမ့ၢ်အိၣ်ဘၣ်ဖုး ဖဲအံၤန့ၣ်​ ယဒီပုၢ်ဝဲၢ်ခွါ တသံဘၣ်.” ဖဲန့ၣ်​ ယ့ၣ်ၡူး တဲဘၣ်အီၤလၢ ‘နဒီပုၢ်ဝဲၢ်ခွါ ကဂဲၤဆၢထၢၣ်က့ၤ. မ့ၢ်နနာ်စ့ၢ်ကီးဧါ.’ ဒီးနီၢ်မၢ်သၤ တဲဘၣ်အီၤ ‘ယနာ်လၢ လၢခံန့ၣ်အက ဂဲၤဆၢထၢၣ်သမူထီၣ်က့ၤဝဲ.’ ယ့ၣ်ၡူး တဲက့ၤအီၤလၢ “ယမ့ၢ် တၢ်ဂဲၤဆၢထၢၣ်​ ဒီးတၢ်မူ.”

နီၢ်မၢ်သၤ လဲၤလၢနီၢ်မၤရံအအိၣ်ဒီး တဲဝဲလၢ ‘ယ့ၣ်ၡူးဟဲတုၤလံ.’ အဃိ နီၢ်မၤရံ လဲၤဃ့ၢ်ဆူ ယ့ၣ်ၡူးအအိၣ်​ ဒီးပှၤဂီၢ်မုၢ်တဖၣ်​ ပိာ်ထီၣ်အခံ. ဒီးနီၢ်မၤရံ ချံးလီၤအခီၣ်လၢ ယ့ၣ်ၡူးအမဲာ်ညါ ဒီးဟီၣ်ဝဲသပှၢ်တၢၢ်. အဝဲတဲဘၣ်​ ယ့ၣ်ၡူးလၢ ‘ကစၢ်ဧၢ, နမ့ၢ်အိၣ်ဘၣ်ဖုးဖဲအံၤန့ၣ်​ ပဒီပုၢ်ဝဲၢ်ခွါ တသံဘၣ်.’ ယ့ၣ်ၡူး ထံၣ်ဝဲလၢ နီၢ်မၤရံသးဘၣ်ဒိဒိၣ်မး အဃိ ယ့ၣ်ၡူး ဟီၣ်ဝဲစ့ၢ်ကီး. ဖဲပှၤဂီၢ်မုၢ်တဖၣ်ထံၣ်ဝဲလၢ ယ့ၣ်ၡူး အမဲာ်ထံလီၤအခါ အဝဲသ့ၣ်​ တဲဝဲလၢ ‘ယ့ၣ်ၡူးအဲၣ်​ စီၤလါစရူးဒိၣ်မး.’ ဘၣ်ဆၣ်​ ပှၤတနီၤနီၤန့ၣ်​ ဆိကမိၣ်ဝဲလၢ ‘ဘၣ်မနုၤအဃိ ယ့ၣ်ၡူး တမၤစၢၤဝဲ အသကိးလဲၣ်’ တဘျီအံၤ ယ့ၣ်ၡူး ကမၤဝဲဒ်လဲၣ်.

ယ့ၣ်ၡူး လဲၤဝဲလၢ တၢ်သွၣ်ခိၣ်. တၢ်သွၣ်ခိၣ်အခိၣ်ထိးန့ၣ်​ ပှၤကးတံာ်ဃာ်အီၤလၢ လၢၢ်ဖးဒိၣ်တဖျၢၣ်. ယ့ၣ်ၡူး တဲဝဲလၢ ‘သုးကွံာ်လၢၢ်တက့ၢ်.’ ဘၣ်ဆၣ်​ နီၢ်မၢ်သၤ တဲဝဲလၢ ‘အဝဲသံအိၣ်ဝဲလွံၢ်သီလံ. အစိၣ်ကနၢအုၣ်လံဧါသၢၤ.’ သနာ်က့ ပှၤသ့ၣ်တဖၣ်န့ၣ်​ သုးကွံာ်ဝဲလၢၢ် ဒီးယ့ၣ်ၡူး ဃ့ထုကဖၣ်ဝဲလၢ ‘ပၢ်ဧၢ, နဒိကနၣ်ယၤအဃိ တၢ်ဘျုးဒိၣ်မး. ယသ့ၣ်ညါလၢနဒိကနၣ်​ ယကလုၢ်ထီဘိ. ဘၣ်ဆၣ်​ ယကိးထီၣ်နၤလၢ ယကလုၢ်ဖးဒိၣ်ဒ်သိး ပှၤဂီၢ်မုၢ်တဖၣ်အံၤ ကသ့ၣ်ညါလၢ နဆှၢလီၤယၤလီၤ.’ ဝံၤဒီး ယ့ၣ်ၡူး ကိးထီၣ်လၢ အကလုၢ်ဖးဒိၣ်လၢ “စီၤလါစရူးဧၢ, ဟဲက့ၤထီၣ်ဟီ.” ဖဲစီၤလါစရူး ဟဲက့ၤထီၣ်​ အခါန့ၣ်​ ပှၤအိၣ်ဖဲန့ၣ်တဖၣ်​ ကမၢကမၣ်ဝဲဒိၣ်မး. စီၤလါစရူး အမိၢ်ပှၢ်ဘိၣ်ဘံဃာ်အသးဒီး တၢ်ကံးညာ်အဃိ ယ့ၣ်ၡူး တဲဝဲလၢ “ဒ်သိးအဝဲ ဟးကသ့အဂီၢ် ဃဲၣ်လီၤကွံာ်အီၤဟီ.”

ပှၤအါဂၤထံၣ်ဘၣ်ဝဲ ယ့ၣ်ၡူး မၤတၢ်လီၤလးအံၤအဃိ အဝဲသ့ၣ်​ စူၢ်က့ၤနာ်က့ၤအီၤ. ဘၣ်ဆၣ်​ ပှၤတနီၤန့ၣ်​ လဲၤတဲဘၣ်ဝဲ ပှၤဖၤရံၤၡဲတဖၣ်လၢ တၢ်ဂ့ၢ်အံၤ. အဃိ စးထီၣ်လၢ မုၢ်နံၤအဝဲန့ၣ်န့ၣ်​ ပှၤဖၤရံၤၡဲတဖၣ်​ အဲၣ်ဒိးမၤသံ ယ့ၣ်ၡူးဒီးစီၤလါစရူး. တၢ်မၢဖိတဂၤ လၢအမ့ၢ် စီၤယူဒၤအံၣ်စကၤရံၤအိာ် လဲၤထံၣ်ခူသူၣ်လိာ်အသးဒီး ပှၤဖၤရံၤၡဲတဖၣ်. ဒီးအသံကွၢ် ပှၤဖၤရံၤၡဲတဖၣ်လၢ ‘ယမ့ၢ်မၤစၢၤနၤဒ်သိး နဖီၣ်ယ့ၣ်ၡူးကန့ၢ်အဂီၢ်န့ၣ်​ နကဟ့ၣ်ယၤစ့ထဲလဲၣ်.’ ပှၤဖၤရံၤၡဲတဖၣ်​ အၢၣ်လီၤဝဲလၢ ကဟ့ၣ်အီၤ စ့အဘ့ၣ်​ ၃၀. အဃိ စီၤယူဒၤအံၣ်စကၤရံၤအိာ် ဃုဝဲတၢ်ခွဲးတၢ်ယာ်လၢ ကဟ့ၣ်လီၤ ယ့ၣ်ၡူး လၢပှၤဖၤရံၤၡဲ အစုပူၤ.