တၢ်မၤလိ ၉၆
ယ့ၣ်ၡူးဃုထၢထီၣ် စီၤစီလူး
စီၤစီလူးမ့ၢ် ရိမ့ၤအထံဖိကီၢ်ဖိ ဒီးအဝဲအိၣ်ဖျဲၣ်ထီၣ်လၢ ဝ့ၢ်တၢ်စူးအပူၤ. အဝဲမ့ၢ်ပှၤဖၤရံၤၡဲတဂၤလၢ အသ့ၣ်ညါပှၤယူဒၤဖိ အတၢ်သိၣ်တၢ်သီဂ့ၤဂ့ၤ ဒီးအဝဲသးဟ့ ခရံာ်ဖိတဖၣ်. စီၤစီလူးလဲၤဝဲလၢ ခရံာ်ဖိတဖၣ်အဟံၣ်, ဖီၣ်န့ၢ်အဝဲသ့ၣ် ဒီးပၢနုာ်ဝဲလၢဃိာ်ပူၤ. ဖဲပှၤဂီၢ်မုၢ်ကွံာ်သံ စီၤစတ့းဖၣ် လၢလၢၢ်အခါ စီၤစီလူးဆၢထၢၣ်ကွၢ်ဝဲစ့ၢ်ကီး.
စီၤစီလူးဟးဖီၣ်ဝဲ ခရံာ်ဖိတဖၣ်လၢ ဝ့ၢ်ယရူၤၡလ့ၣ်အပူၤ ဘၣ်ဆၣ် အသးတမံဒံးဘၣ်. အဃိ အဝဲမၢပှၤလုၢ်တၢ်ခိၣ် အဒိၣ်ကတၢၢ်တဂၤ ဆှၢလီၤအီၤဆူဝ့ၢ်ဒၤမ့ၤစ့း ဒ်သိးကဟးဖီၣ်ဝဲ ခရံာ်ဖိလၢ အအိၣ်ဖဲန့ၣ်တဖၣ်အဂီၢ်. ဖဲစီၤစီလူးလဲၤတၢ် ဘူးကတုၤလၢ ဝ့ၢ်ပူၤအခါ တၢ်ကပီၤလီၤဘၣ်အီၤ သတူၢ်ကလာ် အဃိ အဝဲလီၤဃံၢ်ဝဲလၢ ဟီၣ်ခိၣ်အလိၤ. ဒီးအဝဲနၢ်ဟူ တၢ်ကလုၢ်တခါတဲဘၣ်အီၤလၢ ‘စီၤစီလူးဧၢ, နမၤအၢမၤနးယၤ ဘၣ်လဲၣ်.’ စီၤစီလူးသံကွၢ်ဝဲလၢ ‘နမ့ၢ် မတဂၤလဲၣ်.’ တၢ်ကလုၢ် တဲက့ၤအီၤလၢ ‘ယမ့ၢ် ယ့ၣ်ၡူး. လဲၤနုာ်လီၤလၢ ဝ့ၢ်ဒၤမ့ၤစ့းအပူၤ ဒီးနကဘၣ်မၤ တၢ်မနုၤလဲၣ်န့ၣ် နကသ့ၣ်ညါဘၣ်.’ ဝံၤဒီး စီၤစီလူးအမဲာ်ချံ တထံၣ်တၢ်လၢၤဘၣ်. အဃိ ပှၤဘၣ်လဲၤဆှၢအီၤဆူဝ့ၢ်ပူၤ.
လၢဝ့ၢ်ဒၤမ့ၤစ့းအပူၤန့ၣ် ခရံာ်ဖိလၢအတီအလိၤအိၣ်ဝဲတဂၤ, အမံၤမ့ၢ်ဝဲစီၤအနၤနံ. ယ့ၣ်ၡူးတဲဘၣ်အီၤလၢ ‘လဲၤလၢကျဲတဘိလၢ ပှၤကိးဝဲလၢ ကျဲဘျၢ ဒီးဃုကွၢ်စီၤယူဒၤအဟံၣ် ဒီးနကထံၣ်န့ၢ်စီၤစီလူးဖဲန့ၣ်.’ ဒီးစီၤအနၤနံ တဲဝဲလၢ ‘ကစၢ်ဧၢ, ပိာ်ခွါတဂၤအံၤအဂ့ၢ်န့ၣ် ယနၢ်ဟူဘၣ်ဒီဒူၣ်လံ. အဝဲဟးဖီၣ်ဝဲနပျဲၢ်နဘီၣ် ဒီးပၢနုာ်ဝဲလၢဃိာ်ပူၤ.’ ဘၣ်ဆၣ် ယ့ၣ်ၡူးတဲဝဲလၢ ‘လဲၤလၢအအိၣ်ဟီ. ယဃုထၢထီၣ်အီၤလၢ ကစံၣ်တဲၤတဲလီၤတၢ်သးခုကစီၣ်လၢ ထံကီၢ်အါဘ့ၣ်အပူၤ.’
အဃိ စီၤအနၤနံ လဲၤထံၣ်လိာ်အသးဒီးစီၤစီလူး ဒီးတဲဘၣ်အီၤလၢ ‘ယဒီပုၢ်ဝဲၢ် စီၤစီလူးဧၢ, ယ့ၣ်ၡူးဆှၢလီၤယၤ ဒ်သိးကမၤဘျါက့ၤ နမဲာ်ချံအဂီၢ်.’ တဘျီဃီန့ၣ် စီၤစီလူးအမဲာ်ချံ ထံၣ်ထီၣ်က့ၤတၢ်. စီၤစီလူးမၤလိ ယ့ၣ်ၡူးအဂ့ၢ် ဒီးကဲထီၣ်ဝဲ ယ့ၣ်ၡူးအပျဲၢ်အဘီၣ်တဂၤ. အဝဲဒိးဘျၢထံ ဒီးကဲထီၣ်ခရံာ်ဖိတဂၤ. စီၤစီလူးစးထီၣ် စံၣ်တဲၤတဲလီၤတၢ်လၢ ဘူၣ်ဘျီၣ်တဖၣ်အပူၤ ဃုာ်ဒီးဒီပုၢ်ဝဲၢ်ခရံာ်ဖိတဖၣ်. ဖဲစီၤစီလူးသိၣ်လိပှၤဂၤ ဘၣ်ဃးဒီး ယ့ၣ်ၡူးအဂ့ၢ်အခါ ပှၤယူဒၤဖိတဖၣ် ကမၢကမၣ်ဝဲဖးဒိၣ်ညါ. အဝဲသ့ၣ်တဲဝဲလၢ ‘ပှၤတဂၤအံၤ မ့ၢ်ပှၤလၢ အမၤနးမၤဖှီၣ် ယ့ၣ်ၡူးအပျဲၢ်အဘီၣ်တဖၣ် တမ့ၢ်ဧီၤ.’
လၢသၢနံၣ်အတီၢ်ပူၤန့ၣ် စီၤစီလူးစံၣ်တဲၤတဲလီၤတၢ်လၢ ပှၤအိၣ်လၢ ဝ့ၢ်ဒၤမ့ၤစ့းအပူၤ. ပှၤယူဒၤဖိတဖၣ် သးဟ့စီၤစီလူး ဒီးကူၣ်ထီၣ်ဝဲလၢ ကမၤသံအီၤ. ဘၣ်ဆၣ် ဒီပုၢ်ဝဲၢ်တဖၣ်သ့ၣ်ညါဝဲ ပှၤယူဒၤဖိ အတၢ်ကူၣ်အဃိ မၤစၢၤဝဲစီၤစီလူးလၢ ကဃ့ၢ်ပူၤဖျဲးအသး. အဝဲသ့ၣ်ပာ်လီၤ စီၤစီလူးလၢ ကုတဖျၢၣ်အပူၤဒီး စဲၤလီၤအီၤလၢဝ့ၢ်ခိၣ်ဒူ.
ဖဲစီၤစီလူး က့ၤဝဲဆူဝ့ၢ်ယရူၤၡလ့ၣ်အခါ အဝဲဂုာ်ကျဲးစၢး မၤသကိးတၢ်ဒီး ဒီပုၢ်ဝဲၢ်လၢအအိၣ်ဖဲန့ၣ်တဖၣ်. ဘၣ်ဆၣ် ဒီပုၢ်ဝဲၢ်လၢ ဝ့ၢ်ယရူၤၡလ့ၣ်အပူၤန့ၣ် ပျံၤဝဲစီၤစီလူး. လၢခံ ယ့ၣ်ၡူးအပျဲၢ်အဘီၣ်လၢ အသးဂ့ၤတဂၤ အမံၤလၢစီၤဘၢ်နါဘၤန့ၣ် လဲၤကိးဝဲစီၤစီလူးဆူ တၢ်မၢဖိတဖၣ်အအိၣ် ဒီးတဲဘၣ်အဝဲသ့ၣ်လၢ စီၤစီလူးဆီတလဲ အတၢ်အိၣ်မူ နီၢ်ကီၢ်လံ. စီၤစီလူးစံၣ်တဲၤတဲလီၤ တၢ်သးခုကစီၣ်လၢ တၢ်သူၣ်ဆူၣ်သးဆူၣ်အပူၤ ဃုာ်ဒီးဒီပုၢ်ဝဲၢ်လၢ ဝ့ၢ်ယရူၤၡလ့ၣ်အပူၤ. လၢခံန့ၣ် ပှၤကိးက့ၤအမံၤလၢ စီၤပီလူး.
“ယ့ၣ်ၡူးခရံာ် ဟဲလီၤလၢ ဟီၣ်ခိၣ်ချၢန့ၣ် မ့ၢ်ဒ်သိး ကအုၣ်က့ၤခီၣ်က့ၤ ပှၤတၢ်ဒဲးဘးဖိအဂီၢ်လီၤ. မ့မ့ၢ်ယၤန့ၣ် ယမ့ၢ်ပှၤတၢ်ဒဲးဘးဖိ အဒိၣ်ကတၢၢ်လီၤ.”—၁ တံၤမသ့း ၁:၁၅