စီၤကန့လံး ဒိးန့ၢ်ဘၣ်သးစီဆှံ

လၢဝ့ၢ်ကဲၤစါရံၤအပူၤ ရိမ့ၤအသုးခိၣ်အိၣ်ဝဲတဂၤ လၢအမံၤမ့ၢ်ဝဲ စီၤကန့လံး. စီၤကန့လံးတမ့ၢ် ပှၤယူဒၤဖိဘၣ်​ ဘၣ်ဆၣ်​ ပှၤယူဒၤဖိတဖၣ်​ ပာ်ကဲအီၤ. အဝဲသးအိၣ်မၤစၢၤ ပှၤဖှီၣ်ဖိယာ်ဖိ ဒီးပှၤလၢအလိၣ်ဘၣ်​ တၢ်မၤစၢၤတဖၣ်. စီၤကန့လံး နာ်ယဟိဝၤယွၤ ဒီးဃ့ထုကဖၣ်တၢ်လၢ အအိၣ်ထီဘိ. ဘၣ်တနံၤ မူခိၣ်ကလူးတဂၤ လီၣ်ဖျါထီၣ်အသးလၢ စီၤကန့လံးအမဲာ်ညါ ဒီးတဲဝဲလၢ ‘ကစၢ်ယွၤနၢ်ဟူ နတၢ်ထုကဖၣ်လံ. ဆှၢလီၤပိာ်ခွါတဖၣ်​ ဆူဝ့ၢ်ယၤဖိၤ လၢစီၤပ့းတရူး အိၣ်တၢ်လီၢ် ဒီးမၢအဟဲလၢ နအိၣ်တက့ၢ်.’ တဘျီဃီန့ၣ်​ စီၤကန့လံး ဆှၢလီၤပိာ်ခွါသၢဂၤဆူ ဝ့ၢ်ယၤဖိၤ လၢအယံၤဝဲ အမံးလာ် ၃၀ ဃၣ်ဃၣ်​ လၢကလံၤထံးတပၤ.

ဖဲန့ၣ်အခါ လၢဝ့ၢ်ယၤဖိၤအပူၤန့ၣ်​ စီၤပ့းတရူးထံၣ်ဝဲ တၢ်ထံၣ်လၢညါခီတခါ. စီၤပ့းတရူး ထံၣ်ဘၣ်ဝဲ ဆၣ်ဖိကီၢ်ဖိတဖၣ်လၢ ပှၤယူဒၤဖိ အီၣ်ဝဲတန့ၢ်ဘၣ်​ ဒီးအဝဲနၢ်ဟူ တၢ်ကလုၢ်တဲဘၣ်အီၤလၢ အီၣ်ဆၣ်ဖိကီၢ်ဖိတဖၣ်အံၤ. ဒီးစီၤပ့းတရူး တဲဆၢက့ၤဝဲလၢ ‘လၢယတၢ်အိၣ်မူအပူၤန့ၣ်​ ဆၣ်ဖိကီၢ်ဖိလၢ အတကဆှီဘၣ်တဖၣ်အံၤ ယတအီၣ်နီတဘျီဘၣ်.’ ဝံၤဒီး တၢ်ကလုၢ် တဲဘၣ်အီၤလၢ ‘တဘၣ်တဲဒ်န့ၣ်တဂ့ၤ, ဆၣ်ဖိကီၢ်ဖိတဖၣ်အံၤ ကစၢ်ယွၤ မၤကဆှီထီၣ်ဝဲ ဝံၤလံ.’ ဒီးတဲစ့ၢ်ကီး စီၤပ့းတရူးလၢ ‘ပိာ်ခွါသၢဂၤအိၣ်လၢ နတြဲၤအခီၣ်ထံး. လဲၤဒီးအဝဲသ့ၣ်တက့ၢ်.’ စီၤပ့းတရူး လဲၤလၢ အတြဲၤအခီၣ်ထံး ဒီးသံကွၢ်ပိာ်ခွါတဖၣ်အံၤလၢ ဘၣ်မနုၤအဃိ အဝဲသ့ၣ်ဟဲဖဲအံၤလဲၣ်. အဝဲသ့ၣ်​ စံးဆၢဝဲလၢ ‘ရိမ့ၤအသုးခိၣ်​ စီၤကန့လံး ဆှၢလီၤပှၤလီၤ. နကဘၣ်လဲၤလၢအဟံၣ်​ လၢကဲၤစါရံၤလီၤ.’ စီၤပ့းတရူး ကွဲမုာ်ပိာ်ခွါတဖၣ်အံၤလၢ ကမံတ့ၢ်ဝဲတနၤ. လၢခံတနံၤ စီၤပ့းတရူး ဒီးဒီပုၢ်ဝဲၢ်ခွါတနီၤလၢ ဝ့ၢ်ယၤဖိၤန့ၣ်​ လဲၤပိာ်အဝဲသ့ၣ်အခံ လၢကဲၤစါရံၤ.

ဖဲစီၤကန့လံးထံၣ်ဘၣ်​ စီၤပ့းတရူးအခါ အဝဲချံးလီၤအခီၣ်လၢ စီၤပ့းတရူး အမဲာ်ညါ. ဘၣ်ဆၣ်​ စီၤပ့းတရူး တဲဝဲလၢ ‘ဂဲၤဆၢထၢၣ်သၢၤ. ယမ့ၢ်ဒၣ်​ ပှၤကညီဒ်သိးဒီးနၤလီၤ. ပှၤယူဒၤဖိတဖၣ်​ တလဲၤနုာ်လၢ ပှၤတခီဘီမုၢ်ဖိအဟံၣ်ပူၤဘၣ်. ဘၣ်ဆၣ်​ ကစၢ်ယွၤ မၢယဟဲလၢနဟံၣ်လီၤ. ဝံသးစူၤ တဲဘၣ်ယၤ ဘၣ်မနုၤအဃိ နမၢယဟဲလၢနအိၣ်လဲၣ်.’

စီၤကန့လံးတဲဘၣ်​ စီၤပ့းတရူးလၢ ‘လၢအပူၤကွံာ်လွံၢ်သီန့ၣ်​ ယဃ့ထုကဖၣ်လၢ ကစၢ်ယွၤ အအိၣ်​ ဒီးမူခိၣ်ကလူးတဂၤမၢ ယဆှၢလီၤပိာ်ခွါတဖၣ်လၢ ကလဲၤကိးန့ၢ်နၤ. ဝံသးစူၤ သိၣ်လိပှၤ ဘၣ်ဃးဒီး ယဟိဝၤယွၤ အကလုၢ်ကထါနီၤ.’ စီၤပ့းတရူး တဲဝဲလၢ ‘ခဲအံၤ ယသ့ၣ်ညါလၢ ကစၢ်ယွၤ တကွၢ်ဒိၣ်ဆံးအါစှၤတၢ်ဘၣ်. ကယဲၢ်ပှၤလၢ အအဲၣ်ဒိးဘူၣ်ထီၣ်ဘါထီၣ်အီၤန့ၣ်​ ကစၢ်ယွၤတူၢ်လိာ်ဝဲလီၤ.’ အဃိ စီၤပ့းတရူး သိၣ်လိအဝဲသ့ၣ်​ ဘၣ်ဃးဒီး ယ့ၣ်ၡူးအဂ့ၢ်အါမး. ဝံၤဒီး သးစီဆှံဟဲလီၤလၢ စီၤကန့လံး ဒီးပှၤလၢအအိၣ်ဒီးအီၤတဖၣ်အလိၤ ဒီးအဝဲသ့ၣ်ခဲလၢာ် ဒိးဘျၢထံ.