ပှၤပၢဆှၢတၢ်ကမံးတံာ်အလံာ်ပရၢ

ဆူဒီပုၢ်ဝဲၢ်တဖၣ်–

ဒ်ပမ့ၢ်ပှၤလၢ ဘူၣ်ထီၣ်ဘါထီၣ်​ ယဟိဝၤယွၤအသိး ပပာ်ကဲ အကလုၢ်ကထါ လၢအမ့ၢ်လံာ်စီဆှံ. ပနာ်သပှၢ်တၢၢ်လၢ ကယဲၢ်တၢ်ကွဲးအသးလၢ လံာ်စီဆှံအပူၤန့ၣ်​ မ့ၢ်တၢ်လၢအမ့ၢ်အတီ, ဟံးစုနဲၣ်ကျဲပှၤလၢ ပတၢ်အိၣ်မူအပူၤသ့ ဒီးပာ်ဖျါထီၣ်​ တၢ်အုၣ်အသး လၢလၢပှဲၤပှဲၤလၢ ယဟိဝၤယွၤ အဲၣ်ဝဲပှၤဟီၣ်ခိၣ်ဖိ ဒိၣ်မး. (စံးထီၣ်ပတြၢၤ ၁၁၉:၁၀၅; လူၤကၣ်​ ၁:၃; ၁ ယိၤဟၣ်​ ၄:၁၉) ပသးအိၣ်မၤစၢၤပှၤဂၤ ဒ်သိးအဝဲသ့ၣ်ကနၢ်ပၢၢ်ဝဲ တၢ်မ့ၢ်တၢ်တီ လၢလံာ်စီဆှံအပူၤ. ဒီးခဲအံၤ ပသးအိၣ်​ ဒုးသ့ၣ်ညါသုလၢ ပထုးထီၣ်​ လံာ်လၢအသီတဘ့ၣ်​ လၢအခိၣ်တီမ့ၢ်ဝဲ “တၢ်မၤလိလၢလံာ်စီဆှံအပူၤ.” ပကတဲဘၣ်သု ဘၣ်ဃးဒီး လံာ်တဘ့ၣ်အံၤ အဂ့ၢ်တစဲးဖိ.

လံာ်တဘ့ၣ်အံၤ တၢ်ထုးထီၣ်အီၤ လီၤဆီဒၣ်တၢ်လၢ ဖိသၣ်အဂီၢ်. ဘၣ်ဆၣ်​ ပသူလံာ်တဘ့ၣ်အံၤ ဒ်သိးကမၤစၢၤ ပှၤသးပှၢ်တဖၣ်လၢ အအဲၣ်ဒိး သ့ၣ်ညါအါထီၣ်​ လံာ်စီဆှံအဂ့ၢ်အကျိၤန့ၣ်​ သ့ဝဲစ့ၢ်ကီး. လံာ်စီဆှံ မ့ၢ်လံာ်လၢပှၤကိးဂၤဒဲးအဂီၢ် ဒီးပမ့ၢ်ဃုသ့ၣ်ညါ တၢ်ဂ့ၢ်တၢ်ကျိၤတဖၣ်လၢ လံာ်စီဆှံအပူၤန့ၣ်​ ကကဲဘျုးကဲဖှိၣ်လၢ ပဂီၢ်သပှၢ်ကတၢၢ် ဒီးပကဒိးန့ၢ်ဘၣ်​ တၢ်သးခုနီၢ်နီၢ်.

လံာ်တဘ့ၣ်အံၤ ကပာ်ဖျါထီၣ်န့ၢ်ပှၤ တၢ်ဘၣ်တ့အဂ့ၢ် ဒီးပှၤဟီၣ်ခိၣ်ဖိ အဒူၣ်ဖိထၢဖိအဂ့ၢ် လၢဘၣ်တၢ်ကွဲးနီၣ်ဃာ်အီၤလၢ လံာ်စီဆှံအပူၤ. လၢလံာ်တဘ့ၣ်အံၤအပူၤ ပဂုာ်ကျဲးစၢး ကွဲးဖျါထီၣ်​ လံာ်စီဆှံ အတၢ်ဂ့ၢ်တၢ်ကျိၤ တဆီဘၣ်တဆီ ဒ်သိးပှၤနၢ်ပၢၢ်ဝဲ ကညီအဂီၢ်.

လံာ်တဘ့ၣ်အံၤန့ၣ်​ တမ့ၢ်ထဲ ကမၤစၢၤပှၤလၢ ပကနၢ်ပၢၢ်ထီၣ်​ လံာ်စီဆှံ တၢ်ဂ့ၢ်တၢ်ကျိၤတခါဘၣ်. တၢ်ဂ့ၢ်တၢ်ကျိၤဒီးတၢ်ဂီၤ လၢလံာ်တဘ့ၣ်အံၤအပူၤန့ၣ်​ ဘၣ်တၢ်ကတဲာ်ကတီၤအီၤဂ့ၤဂ့ၤ ဒ်သိးပကနၢ်ပၢၢ်ထီၣ်​ ယွၤအခ့အပှၤ လၢညါတဖၣ်​ အတၢ်တူၢ်ဘၣ်​ ဒီးထံၣ်တမှံကွၢ် အဝဲသ့ၣ်​ အတၢ်အိၣ်သးတဖၣ်အဂီၢ်.

လံာ်တဘ့ၣ်အံၤ ကမၤစၢၤပှၤ ဒ်သိးပကနၢ်ပၢၢ်အါထီၣ်​ ဘၣ်ဃးဒီး ပှၤလၢအဒိကနၣ်​ ယဟိဝၤယွၤအကလုၢ် ဒီးပှၤလၢအတဒိကနၣ်​ အကလုၢ်. တကးဒံးဘၣ်​ လံာ်တဘ့ၣ်အံၤ ကမၤစၢၤပှၤဒ်သိး ပကဟံးန့ၢ် တၢ်မၤလိလၢ အဝဲသ့ၣ်အအိၣ်အဂီၢ်. (ရိမ့ၤ ၁၅:၄; ၁ ကရံၣ်သူး ၁၀:၆) လၢလံာ်တဘ့ၣ်အံၤ အပူၤန့ၣ်​ တၢ်နီၤဖးအိၣ်ဝဲ ၁၄ ခါ. တၢ်နီၤဖးတခါစုာ်စုာ်န့ၣ်​ ကတဲဖျါထီၣ်ဝဲ တၢ်မၤလိလၢ ပကဃုသ့ၣ်ညါအီၤတဖၣ်.

နမ့မ့ၢ်မိပါန့ၣ်​ နဖးသကိးလံာ်တဘ့ၣ်အံၤဒီးနဖိ ဒီးတဲသကိးဘၣ်ဃးဒီး တၢ်ဂီၤတဖၣ်န့ၣ်သ့ဝဲ. ဝံၤဒီးနဖးသကိး လံာ်စီဆှံအဆၢတဖၣ်​ လၢအဘၣ်တၢ်ပာ်ဖျါထီၣ်အီၤလၢ လံာ်အံၤအတၢ်မၤလိ တခါစုာ်စုာ်အပူၤန့ၣ်​ သ့ဝဲစ့ၢ်ကီး. ပဟံးန့ၢ်တၢ်မၤလိလၢ လံာ်စီဆှံအဆၢတဖၣ်အံၤ ကသ့ဒ်လဲၣ်န့ၣ်​ မၤစၢၤနဖိတဖၣ်​ ဒ်သိး အဝဲသ့ၣ်​ ကနၢ်ပၢၢ်အဂီၢ်. တကးဒံးဘၣ်​ ဖဲနသူလံာ်တဘ့ၣ်အံၤ လၢနကမၤလိတၢ်ဒီး ပှၤသးပှၢ်အခါဒၣ်လဲာ် နမၤစၢၤ အဝဲသ့ၣ်ဒ်န့ၣ်​ သ့ဝဲစ့ၢ်ကီး.

ပမုၢ်လၢ်လၢ လံာ်တဘ့ၣ်အံၤ ကကဲထီၣ်​ တၢ်မၤစၢၤလၢ ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ ဒ်သိး အဝဲသ့ၣ်​ ကမၤလိဝဲကစၢ်ယွၤ အကလုၢ်ကထါဒီး အိၣ်မူမၤထွဲဝဲအဂီၢ်. အဝဲသ့ၣ်​ မ့ၢ်မၤဒ်န့ၣ်န့ၣ်​ ယဟိဝၤယွၤ ကတူၢ်လိာ် အဝဲသ့ၣ်လၢ အဒူၣ်ဖိထၢဖိတဖၣ်အပူၤ.