တၢ်ကတိၤအိးထီၣ် အကူာ် ၁၂
ယ့ၣ်ၡူးသိၣ်လိပှၤဂၤ ဘၣ်ဃးဒီး မူခိၣ်ဘီမုၢ်အဂ့ၢ်. ယ့ၣ်ၡူးသိၣ်လိစ့ၢ်ကီး အဝဲသ့ၣ်လၢ ကဃ့ဘါထုကဖၣ်တၢ် ဒ်သိးကစၢ်ယွၤအမံၤ ကဘၣ်တၢ်ပာ်စီဆှံအီၤ, ယွၤအဘီမုၢ်ကဟဲ ဒီးယွၤအတၢ်တိာ်ပာ် ကဟဲလၢပှဲၤထီၣ်လၢ ဟီၣ်ခိၣ်ချၢအဂီၢ်. နမ့မ့ၢ်မိပါန့ၣ် တဲနၢ်ပၢၢ်နဖိ ဘၣ်ဃးဒီး တၢ်ထုကဖၣ်အံၤ အခီပညီ. ယ့ၣ်ၡူး တဟ့ၣ်အခွဲးလၢ မုၣ်ကီၤလံၢ်ကမၤဟးဂီၤ အတၢ်သးတီဘၣ်. ယ့ၣ်ၡူးဃုထၢထီၣ် အတၢ်မၢဖိတဖၣ်လၢ ကမၤလၢပှဲၤမူဒါလၢ အရ့ဒိၣ်လၢ ယွၤအဘီအမုၢ်အပူၤ. ယ့ၣ်ၡူးန့ၣ် အသးဆူၣ်လၢ တၢ်ဘူၣ်တၢ်ဘါ အမ့ၢ်အတီအဂီၢ်. မ့ၢ်လၢယ့ၣ်ၡူးအဲၣ်ဒိး မၤစၢၤပှၤဂၤအဃိ အဝဲမၤဘျါက့ၤ ပှၤဆူးပှၤဆါ, ဒုးအီၣ်ဒုးအီ ပှၤလၢအလီၤဘဲတဖၣ် ဒီးမၤသမူထီၣ်က့ၤ ပှၤသံ. တၢ်လီၤလးလၢ ယ့ၣ်ၡူးမၤဝဲတဖၣ်န့ၣ် ပာ်ဖျါထီၣ်န့ၢ်ပှၤလၢ ယွၤအဘီမုၢ် ကမၤလီၤမၢ်ကွံာ် တၢ်ကီတၢ်ခဲတဖၣ်.