ပှၤဖးလံာ်ဖိ အတၢ်သံကွၢ် . . .
မတဂၤတ့လီၤ ကစၢ်ယွၤလဲၣ်
ဆိကမိၣ်ကွၢ် ပၢ်တဂၤ တဲတၢ်ဒီးအဖိခွါလၢ အအိၣ်နွံနံၣ်တဂၤ. အတဲဝဲလၢ “လၢပျၢၤန့ၣ် ကစၢ်ယွၤတ့လီၤဟီၣ်ခိၣ် ဒီးတၢ်ခဲလၢာ် လၢအပူၤ. အတ့လီၤဝဲ မုၢ်, လါ ဒီးဆၣ်တဖၣ်.” အဖိခွါန့ၣ် ဆိကမိၣ်ထံတၢ် တစိာ်ဖိဒီးသံကွၢ်အပါလၢ “ပါပါ, မတဂၤတ့လီၤ ကစၢ်ယွၤလဲၣ်.”
ဒီးအပၢ်တဲက့ၤအီၤလၢ “ပှၤတတ့လီၤကစၢ်ယွၤ နီတဂၤဘၣ်, ကစၢ်ယွၤန့ၣ် အိၣ်ပာ်စၢၤဒ်န့ၣ်လီၤ.” ဖဲအပၢ်တဲပၠးအီၤဒ်န့ၣ်အခါ အသးမံဝဲ. ဘၣ်ဆၣ် ဖဲအဝဲဒိၣ်ထီၣ်အခါ အဝဲ ဆဲးဆိကမိၣ် တၢ်သံကွၢ်တခါအံၤ ဒီးအသးတမံဘၣ် ဒီးအအဲၣ်ဒိးသ့ၣ်ညါအါထီၣ်ဝဲ. ဒီးအဆိကမိၣ်ဝဲလၢ တၢ်ဘၣ်တ့ခဲလၢာ်မးန့ၣ် အခီၣ်ထံးခီၣ်ဘိအိၣ်ဒံးဒၢး, ပှၤတဂၤ အခီၣ်ထံးခီၣ်ဘိ မ့ၢ်တအိၣ်ဘၣ်န့ၣ် ဟဲကဲထီၣ်အသး ကသ့ဒ်လဲၣ်. ဒီးအဝဲနၢ်ပၢၢ်ဘၣ်ဝဲ ကီဒိၣ်မး. အဃိ အဆိကမိၣ်ဘၣ်ဝဲလၢ “ကစၢ်ယွၤန့ၣ် ဟဲကဲထီၣ်အသးဒ်လဲၣ်.”
လံာ်စီဆှံ တဲဝဲဒ်လဲၣ်. တၢ်လၢလံာ်စီဆှံတဲဝဲန့ၣ် လီၤပလိာ်လိာ်အသးဒီး ပၢ်တဂၤန့ၣ် တဲဝဲလီၤ. ဖဲန့ၣ် စီၤမိၤၡ့ ကွဲးဝဲလၢ “ကစၢ်ဧၢ, . . . ကစၢၢ်ကလိ တချုးအိၣ်ဖျဲၣ်ဒံးဘၣ်, ဒီးနတချုးတ့ဒံးဘၣ် ဟီၣ်ခိၣ်လၢာ်ခိၣ်ဒီး, နဲဒၣ်အံၤ လၢပျၢၤလၢကစၢၤကစၢၤန့ၣ် နမ့ၢ်ယွၤ အစိၤစိၤအဃၣ်ဃၣ်လီၤ.” (စံးထီၣ်ပတြၢၤ ၉၀:၁, ၂) ဒ်န့ၣ်အသိး ဝံယၡါယၤ တဲဝဲလၢ “နတသ့ၣ်ညါဘၣ်ဧါ, နတနၢ်ဟူဘၣ်ဧါ. ယွၤမ့ၢ်ကစၢ်အထူအယိာ်” ဒီး “တ့လီၤဟီၣ်ခိၣ်အကတၢၢ်တဖၣ်” လီၤ. (ယၡါယၤ ၄၀:၂၈) တကးဒံးဘၣ် လံာ်ယူဒၤ ကွဲးဝဲလၢ ကစၢ်ယွၤ အိၣ်ဝဲ “လီၤထူလီၤယိာ်, လၢအပူၤကွံာ်” လီၤ.—ယူဒၤ ၂၅.
လံာ်စီဆှံ အဆၢတဖၣ်န့ၣ် ပာ်ဖျါထီၣ်ဝဲလၢ ကစၢ်ယွၤမ့ၢ် “စီၤပၤအထူအယိာ်” ဒ်တၢ်မၢဖိပီလူး တဲဝဲအသိးလီၤ. (၁ တံၤမသ့း ၁:၁၇) အအဲၣ်ဒိးတဲဝဲ ကစၢ်ယွၤန့ၣ် အိၣ်ပာ်စၢၤဝဲလၢ အနံၣ်လၢပဂံၢ်အီၤ တသ့ဘၣ်. ဒီးခါဆူညါစ့ၢ်ကီး ကအိၣ်ဝဲ လီၤထူလီၤယိာ်လီၤ. (လီၣ်ဖျါ ၁:၈) ကစၢ်ယွၤလၢအမ့ၢ် သ့တၢ်လၢာ်ကစၢ် အိၣ်ဝဲလီၤထူလီၤယိာ်န့ၣ် မ့ၢ်ဝဲတၢ်ဂ့ၢ်အရ့ဒိၣ်တခါလၢ အဘၣ်ဃးဒီးအီၤလီၤ.
ဘၣ်မနုၤအဃိ ကီဒိၣ်မးလၢ ပကနၢ်ပၢၢ်တၢ်ဂ့ၢ်တခါအံၤလဲၣ်. ပှၤဟီၣ်ခိၣ်ဖိတဖၣ်န့ၣ် အသးသမူဖုၣ်ဒီး တအိၣ်မူဘၣ် ယံာ်ယံာ်ဘၣ်. အဃိ အဝဲသ့ၣ် အတၢ်ထံၣ်လၢ ဘၣ်ဃးဒီး တၢ်ဆၢကတီၢ်န့ၣ် လီၤဆီလိာ်အသးဒီး ယဟိဝၤယွၤလီၤ. ကစၢ်ယွၤန့ၣ် အအိၣ်ဝဲ လီၤထူလီၤယိာ်. လၢပှၤဟီၣ်ခိၣ်ဖိအဂီၢ် အနံၣ်တကထိန့ၣ် လၢကစၢ်ယွၤအမဲာ်ညါန့ၣ် လီၤဂာ်ဒ် တသီအသိးလီၤ. (၂ ပ့းတရူး ၃:၈) ဒ်သိး ပကနၢ်ပၢၢ်တၢ်ဂ့ၢ်အံၤအဂီၢ် ပကကွၢ်သကိး တၢ်အဒိတခါ. တၢ်လၢဒွဲၣ်န့ၣ် အအိၣ်မူဘၣ်ထဲ အသီ ၅၀ ဃၣ်ဃၣ်လီၤ. မ့မ့ၢ်ပှၤဟီၣ်ခိၣ်ဖိန့ၣ် အအိၣ်မူဘၣ် အနံၣ် ၇၀, ၈၀ ညါ. အဃိ တမ့ၢ်လၢဒွဲၣ်န့ၣ် နၢ်ပၢၢ်ပှၤဟီၣ်ခိၣ်ဖိ အသးအနံၣ်အလါကသ့ဘၣ်. ဒ်န့ၣ်အသိး လံာ်စီဆှံတဲဝဲလၢ ပှၤမ့ၢ်ထိၣ်သတြီၤပှၤဒီး တၢ်ဘၣ်တ့ကစၢ်န့ၣ်ပလီၤဂာ်ဒ် ဒွဲၣ်အသိး. ဒီးပမ့ၢ်ထိၣ်သတြီၤ ပတၢ်နၢ်ပၢၢ် ဒီးကစၢ်ယွၤ အတၢ်နၢ်ပၢၢ်စ့ၢ်ကီး ဒ်န့ၣ်အသိးလီၤ. (ယၡါယၤ ၄၀:၂၂; ၅၅:၈, ၉) အဃိ ပှၤဟီၣ်ခိၣ်ဖိတဖၣ် တနၢ်ပၢၢ်ကစၢ်ယွၤအဂ့ၢ် လၢလၢပှဲၤပှဲၤဘၣ်န့ၣ် တမ့ၢ်တၢ်လၢ အလီၤကမၢကမၣ်ဘၣ်.
ကစၢ်ယွၤန့ၣ် အအိၣ်ဝဲ လီၤထူလီၤယိာ်အဃိ ပဂံၢ်အနံၣ်အလါ တဘၣ်ဘၣ်န့ၣ် တမ့ၢ်တၢ်လၢ အလီၤဆီဘၣ်. လံာ်စီဆှံတဲဝဲလၢ ယဟိဝၤယွၤ “တ့လီၤတၢ်ခဲလၢာ်” လီၤ. (လီၣ်ဖျါ ၄:၁၁) အဝဲမ့ၢ်တၢ်ဘၣ်တ့ကစၢ်အဃိ ပှၤတ့လီၤအီၤတအိၣ်ဘၣ်. တကးဒံးဘၣ် ပသ့ၣ်ညါဘၣ်လၢ လၢအခီၣ်ထံးခါန့ၣ်မူခိၣ်ဒီးဟီၣ်ခိၣ် တအိၣ်ဝဲဒၣ်ဘၣ်. (၁ မိၤၡ့ ၁:၁, ၂) အဃိ ဒ်သိး တၢ်သ့ၣ်တဖၣ်အံၤ ကအိၣ်ထီၣ်အဂီၢ် တၢ်ဘၣ်တ့ကစၢ်န့ၣ် ကဘၣ်အိၣ်ဆိလၢညါလီၤ. တကးဒံးဘၣ် တၢ်ဘၣ်တ့ကစၢ်န့ၣ် အအိၣ်ပာ်စၢၤ တချုးလၢ ပှၤနီၢ်သးဖိတဖၣ် ဒ်သိးဒီး အဖိခွါဒီး မူခိၣ်ကလူးတဖၣ် အိၣ်ထီၣ်အခါလံၤလံၤလံ. (ယိၤဘး ၃၈:၄, ၇; ကလီးစဲ ၁:၁၅) ဖျါၡဲၡဲလၢ လၢအခီၣ်ထံးန့ၣ် ကစၢ်ယွၤ အိၣ်ဆိပာ်စၢၤဝဲ ထဲတဂၤလီၤ. ဒီးပှၤတတ့လီၤအီၤဘၣ် ဒီးတၢ်လၢ အတ့လီၤကစၢ်ယွၤသ့န့ၣ် တအိၣ်စ့ၢ်ကီးဘၣ်.
ပဟဲကဲထီၣ်ဘၣ် ပှၤကညီ ဒီးတၢ်ဘၣ်တ့လၢ မူခိၣ်ဟီၣ်ခိၣ်ခဲလၢာ်န့ၣ် ပာ်ဖျါထီၣ်ဝဲလၢ တၢ်ဘၣ်တ့ကစၢ်လၢ အအိၣ်ဝဲလီၤထူလီၤယိာ်တဂၤန့ၣ် အိၣ်ဝဲ. ပှၤလၢအတ့လီၤ တၢ်အိၣ်လၢမူခိၣ်ဟီၣ်ခိၣ် ဒီးအဒုးလဲၤတရံးဝဲ တၢ်သ့ၣ်တဖၣ်အံၤ လၢအလီၢ်အကျဲန့ၣ် အိၣ်ဝဲ လီၤထူလီၤယိာ်လီၤ. ခီဖျိလၢ အဝဲ ဟ့ၣ်လီၤပှၤ သးသမူအဃိ ပအိၣ်မူဘၣ် သ့ဝဲလီၤ.—ယိၤဘး ၃၃:၄.