လံာ်စီဆှံတၢ်သံကွၢ်တဖၣ် အတၢ်စံးဆၢ
ပှၤဟီၣ်ခိၣ်ဖိအဂီၢ် ခါဆူညါတၢ်ကမၤအသးဒ်လဲၣ်.
ယ့ၣ်ၡူးအတၢ်သံန့ၣ် ကဒုးအိၣ်ထီၣ် ပှၤတဖုလၢ အကဟုကယာ်လိာ်သးတဂၤဒီးတဂၤဒ်လဲၣ်
ပှၤဟီၣ်ခိၣ်ဖိတဖၣ်န့ၣ် ကဂုာ်ကျဲးစၢးဒီး မၤဂုၤထီၣ်ပသီထီၣ် စဲအ့ၣ်အတၢ်သ့တၢ်ဘၣ်န့ၣ်လီၤ. ဘၣ်ဆၣ် အဝဲသ့ၣ်ကဒုးအိၣ်ထီၣ် ပှၤတဝၢလၢ ကကဟုကယာ်လိာ်အသး တဂၤဒီးတဂၤန့ၣ်ဧါ. တဒုးအိၣ်ထီၣ်ဝဲဘၣ်. မ့ၢ်လၢမုၢ်မဆါတနံၤအံၤ ဟီၣ်ခိၣ်ပှဲၤဝဲဒီးတၢ်အဲၣ်လီၤထဲအသး ဒီးတၢ်သူၣ်လီသးကွံအဃိန့ၣ်လီၤ. ဘၣ်ဆၣ်, ကစၢ်ယွၤအတၢ်တိာ်ပာ်လၢအဂ့ၤ အိၣ်ဝဲလၢပှၤဟီၣ်ခိၣ်ဖိအဂီၢ်န့ၣ်လီၤ.—ဖး ၂ ပ့းတရူး ၃:၁၃ တက့ၢ်.
ယွၤအကလုၢ်ကထါပာ်ဖျါထီၣ်ဝဲလၢ ဟီၣ်ခိၣ်ဒီဘ့ၣ် ကပှဲၤဝဲဒီးပှၤတဖၣ်လၢ ကအဲၣ်လိာ်အသးတဂၤဒီးတဂၤန့ၣ်လီၤ. အဝဲသ့ၣ် တအိၣ်ဒီးတၢ်ပျံၤတၢ်ဖုးလၢၤဘၣ် ဒီးပှၤလၢကမၤဆူးမၤဆါအီၤန့ၣ် တအိၣ်နီတဂၤလၢၤဘၣ်.—ဖး မံကၤ ၄:၃, ၄ တက့ၢ်.
တၢ်အဲၣ်လီၤထဲအသးန့ၣ် ကဘၣ်တၢ်မၤဟါမၢ်ကွံာ်အီၤဒ်လဲၣ်
ဖဲကစၢ်ယွၤတ့လီၤ စီၤအၤဒၣ်အခါ တတ့လီၤဝဲဃုာ်ဒီး တၢ်အဲၣ်လီၤထဲအသးဘၣ်. ဘၣ်ဆၣ် အဝဲဃုထၢဝဲလၢ တဒိကနၣ်ကစၢ်ယွၤအကလုၢ်အဃိ အဝဲတလၢတပှဲၤလၢၤဘၣ်. လၢတၢ်န့ၣ်အဃိ ပဝဲဒၣ်သ့ၣ်တဖၣ် ပန့ၢ်သါဘၣ် တၢ်အဲၣ်လီၤထဲပသး လၢအဝဲအအိၣ်န့ၣ်လီၤ. ဘၣ်ဆၣ် ကစၢ်ယွၤ ကသူဝဲယ့ၣ်ၡူး လၢပှၤဟီၣ်ခိၣ်ဖိတဖၣ် ကကဲထီၣ်က့ၤ ပှၤလၢပှၤပှဲၤအဂီၢ်န့ၣ်လီၤ.—ဖး ရိမ့ၤ ၇:၂၁, ၂၄, ၂၅ တက့ၢ်.
ဒ်ကစၢ်ယွၤအတၢ်ဘၣ်သးအသိး ယ့ၣ်ၡူးတူၢ်သံအသး ဒီးလုၢ်ထီၣ်အသးသမူ ဒ်သိးကမၤကတၢၢ်ကွံာ် တၢ်ဒဲးဘးအဘူးအလဲလၢ ပှၤအဆိကတၢၢ်စီၤအၤဒၣ် အတၢ်တဒိကနၣ်အဃိန့ၣ်လီၤ. (ရိမ့ၤ ၅:၁၉) လၢတၢ်န့ၣ်အဃိ ခါဆူညါ ဖဲယ့ၣ်ၡူးကဒုးအိၣ်ထီၣ် တၢ်အိၣ်အသးလၢအဂ့ၤအခါန့ၣ် တၢ်အဲၣ်လီၤဒၣ်ထဲပသး ကလီၤမၢ်ကွံာ်ဝဲလီၤ.—ဖး စံးထီၣ်ပတြၢၤ ၃၇:၉–၁၁ တက့ၢ်.