တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | ယဟိဝၤ ပှၤအုၣ်အသးန့ၣ် မ့ၢ်မတၤတဖၣ်လဲၣ်
ဘၣ်မနုၤအဃိ ပဘၣ်ဟးစံၣ်တဲၤတဲလီၤတၢ်လဲၣ်
ပဘၣ်တၢ်သ့ၣ်ညါပှၤ ခီဖျိလၢ တၢ်ဟးစံၣ်တဲၤတဲလီၤတၢ်မၤအဃိန့ၣ်လီၤ. ပလဲၤဟံၣ်တဖျၢၣ်ဘၣ်တဖျၢၣ်, တၢ်လီၢ်လၢ ပှၤလဲၤအါအလီၢ် ဒီးတၢ်လီၢ်တပူၤလၢ်လၢ်လၢ ပှၤအိၣ်ဝဲန့ၣ်လီၤ. ဘၣ်မနုၤအဃိ ပဘၣ်မၤဒ်န့ၣ်လဲၣ်.
ယဟိဝၤ ပှၤအုၣ်အသးတဖၣ် ဟးစံၣ်တဲၤတဲလီၤတၢ် ဒ်သိးကမၤလၤကပီၤ ကစၢ်ယွၤ ဒီးဒုးသ့ၣ်ညါပှၤအဂၤလၢ ကစၢ်ယွၤအမံၤန့ၣ်လီၤ. (ဧ့ၤဘြံၤ ၁၃:၁၅) ပဒိကနၣ်စ့ၢ်ကီး ယ့ၣ်ၡူးအကလုၢ်ဖဲအမၤလိာ်ပှၤလၢ– “လဲၤဒုးကဲထီၣ် ပှၤအကလုာ်တဖၣ်ခဲလၢာ်လၢ ယပျဲၢ်ယဘီၣ်တက့ၢ်. . . . ဒီးသိၣ်လိသီလိအီၤ, ဒ်သိးအကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သုခဲလၢာ်တက့ၢ်.”—မးသဲ ၂၈:၁၉, ၂၀.
တကးဒံးဘၣ် ပဝဲဒၣ်သ့ၣ်တဖၣ် ပအဲၣ်ပှၤလၢ ပဃၢၤန့ၣ်လီၤ. (မးသဲ ၂၂:၃၉) ပသ့ၣ်ညါလၢ ပှၤအါဒၣ်တၢ်တက့ၢ်န့ၣ် အိၣ်ဝဲဒီး အနီၢ်ကစၢ် အတၢ်ဘူၣ်တၢ်ဘါအဃိ တမ့ၢ်လၢ ပှၤခဲလၢာ် ကသူၣ်အိၣ်သးအိၣ် တၢ်သးခုကစီၣ်န့ၣ်ဘၣ်. ဘၣ်ဆၣ် ပနာ်လၢ တၢ်သးခုကစီၣ်လၢ လံာ်စီဆှံအပူၤန့ၣ် ကမၤပူၤဖျဲး ပှၤဟီၣ်ခိၣ်ဖိ အသးသမူန့ၣ်လီၤ. လၢတၢ်န့ၣ်အဃိ ပဂုာ်ကျဲးစၢး ဒ်သိးပ “တဆိတ့ၢ်ဘၣ်ဒီး, သိၣ်က့ၤသီက့ၤတၢ်, ဒီးစံၣ်တဲၤတဲလီၤ ယ့ၣ်ၡူးခရံာ်အဂ့ၢ်” ဒ်ခရံာ်ဖိလၢ တၢယၤဖှိၣ် မၤဝဲအသိးန့ၣ်လီၤ. —မၤတၢ် ၅:၄၁, ၄၂.
ပှၤကူၣ်ဘၣ်ကူၣ်သ့ အဲၣ်ထိၣ်နံၣ်ယိၣ် ကိၣ်ဘၣ် ကွဲးဝဲလၢ “ယဟိဝၤပှၤအုၣ်အသးတဖၣ် ထဲးဂံၢ်ထဲးဘါဒီး လၢတၢ်ကီတၢ်ခဲအပူၤဒၣ်လဲာ် အဝဲသ့ၣ် ဂုာ်ကျဲးစၢးဝဲ တုၤလၢအလီၤဘှံးလီၤတီၤ ဒ်သိးကစံၣ်တဲၤတဲလီၤ တၢ်သးခုကစီၣ်ဝးဝးအဂီၢ်န့ၣ်လီၤ.” —El Universal လံာ်တၢ်ကစီၣ်, ကီၢ်ဘဲနံၤစွဲလါ
ပှၤအါတက့ၢ်လၢ အဖးပလံာ်ပလဲၢ်န့ၣ် တမ့ၢ်ယဟိဝၤပှၤအုၣ်အသးဘၣ်. ဒီးပှၤလၢ အကကွဲၢ်တဖၣ်လၢ အမၤလိ လံာ်စီဆှံန့ၣ် အိၣ်ဒီးအနီၢ်ကစၢ် အတၢ်ဘူၣ်တၢ်ဘါလီၤ. ဘၣ်ဆၣ်အဝဲသ့ၣ်တဖၣ်န့ၣ် သူၣ်ခုသးခုဝဲလၢ ယဟိဝၤပှၤအုၣ်အသးတဖၣ် ဟဲစံၣ်တဲၤတဲလီၤတၢ် လၢအဝဲသ့ၣ်အအိၣ်န့ၣ်လီၤ.
ဘၣ်သ့ၣ်သ့ၣ် နတၢ်သံကွၢ် ဘၣ်ဃးဒီး ယဟိဝၤပှၤအုၣ်အသးန့ၣ် ကအိၣ်ဒံးဝဲလီၤ. ပကွဲမုာ်ဘၣ်နၤလၢ နကဃုတၢ်စံးဆၢတဖၣ် ခီဖျိလၢန
သံကွၢ် ယဟိဝၤပှၤအုၣ်အသး တဂၤဂၤ
နုာ်လီၤကွၢ် ပှာ်ယဲၤသန့ www.jw.org/ksw
မ့တမ့ၢ် လဲၤထီၣ်ကွၢ် ပတၢ်အိၣ်ဖှိၣ်ရိဖှိၣ်လၢ တလိၣ်ဟ့ၣ် အဘူးအလဲဘၣ်န့ၣ်တက့ၢ်.