ပျၢ်ကွံာ်ပှၤဂၤအတၢ်ကမၣ်

တက့ၢ်လံာ်စီဆှံ ဟ့ၣ်ကူၣ်ပှၤလၢ– “ဝံသးစူၤလိာ်သုသး, ဒီးပှၤအတၢ်ကမၣ်မ့ၢ်အိၣ်ဒီး, ပျၢ်လိာ်သုသးတက့ၢ်. ဒ်ခရံာ်ပျၢ်သုတၢ်အသိးန့ၣ်, မၤသုဝဲ ဒ်န့ၣ်အသိးစ့ၢ်ကီးတက့ၢ်.”—ကလီးစဲ ၃:၁၃.

တၢ်အံၤ အခီပညီ မ့ၢ်မနုၤလဲၣ်.– လံာ်စီဆှံပာ်ဖျါထီၣ်ဝဲလၢ တၢ်ဒဲးဘးန့ၣ် လီၤဂာ်ဒ်သိးဒီး ဒ့ၣ်ကမၢ်တခါလီၤ. မ့မ့ၢ် တၢ်ပျၢ်ကွံာ်တၢ်ဒဲးဘးန့ၣ် လီၤဂာ်ဒ်သိးဒီး တၢ်တဃ့က့ၤ ဒ့ၣ်ကမၢ်လၢၤဘၣ်. (လူၤကၣ် ၁၁:၄) တၢ်ကွဲးနီၣ်ကွဲးဃါအလံာ်တဘ့ၣ် ပာ်ဖျါထီၣ်ဝဲ လၢလံာ်စီဆှံအပူၤန့ၣ် ကြံးအတၢ်ကတိၤတဖျၢၣ်လၢ ဘၣ်တၢ်ကွဲးကျိာ်ထံက့ၤအီၤလၢ “ပျၢ်ကွံာ်” န့ၣ်အခီပညီမ့ၢ်ဝဲ “ပပျၢ်ကွံာ်တၢ်အကမၢ်တခါ ခီဖျိလၢပတဃ့က့ၤအပှ့ၤလၢၤဘၣ်.” လၢတၢ်န့ၣ်အဃိ, ဖဲပပျၢ်ကွံာ်ပှၤတဂၤဂၤ အတၢ်ကမၣ်အခါ မ့ၢ်ပပျၢ်ကွံာ်အတၢ်ကမၣ် လၢာ်လၢာ်ဆ့ဆ့ ဒီးပတမုၢ်လၢ်တၢ်လၢ ပကဒိးန့ၢ်ဘၣ်တၢ်တမံၤမံၤလၢအအိၣ်ဘၣ်. ဖဲပပျၢ်ကွံာ်ပှၤဂၤဂၤအတၢ်ကမၣ် လၢတၢ်သူၣ်အိၣ်သးအိၣ်အခါန့ၣ် အခီပညီတမ့ၢ်လၢ ပဘၣ်သူၣ်ဘၣ်သးအဝဲသ့ၣ် အတၢ်ကမၣ်ဘၣ်. ဒီးအခီပညီတမ့ၢ်စ့ၢ်ကီးလၢ ပမၤဆံးလီၤစှၤလီၤဒီး တဲပူၤဖျဲးအတၢ်ကမၣ်ဘၣ်. အခီပညီန့ၣ် ပပာ်လီၤပသးလၢ “ပှၤအတၢ်ကမၣ်မ့ၢ်အိၣ်” ဒၣ်လဲာ် ပကဒုးလီၤမၢ်ကွံာ် ပတၢ်သးထီၣ်လၢပသးပူၤလီၤ.

မ့ၢ်အကဲဘျုး လၢပစိၤခဲအံၤဧါ. ပမ့ၢ်ပှၤလၢ အတလၢတပှဲၤဘၣ်အဃိ ပမၤဘၣ်တၢ်ဒဲးဘးလီၤ. (ရိမ့ၤ ၃:၂၃) တၢ်ပျၢ်ပှၤဂၤအတၢ်ကမၣ်န့ၣ် မ့ၢ်ကျဲလၢအဂ့ၤကတၢၢ်လီၤ. ဘၣ်မနုၤအဃိလဲၣ်. မ့ၢ်လၢပသ့ၣ်ညါလၢ မုၢ်ကအိၣ်ဝဲတနံၤန့ၣ် ပကလိၣ်ဘၣ်လၢ ပှၤဂၤကပျၢ်ကွံာ် ပတၢ်ကမၣ် စ့ၢ်ကီးလီၤ. တကးဒံးဘၣ် ဖဲပပျၢ်ပှၤဂၤ အတၢ်ကမၣ်အခါ ပဝဲစ့ၢ်ကီး ပဒိးန့ၢ်ဘၣ် တၢ်အဘျုးအဖှိၣ်န့ၣ်လီၤ. လၢကျဲဒ်လဲၣ်.

ပမ့ၢ်အိၣ်ဒီး တၢ်သူၣ်ဒိၣ်သးဖျိး, တၢ်သူၣ်တမံသးတမံ ဒီးပမ့ၢ်စၢဃာ်ပှၤဂၤ အတၢ်ကမၣ်န့ၣ် မ့ၢ်တၢ်လၢအမၤဘၣ်ဒိပှၤလီၤ. ဖဲပအိၣ်ဒီး ပတၢ်တူၢ်ဘၣ် ဒ်န့ၣ်သ့ၣ်တဖၣ်အခါ ပတၢ်သူၣ်ခုသးခု ဟါမၢ်ကွံာ်သ့ဝဲလီၤ. ဒီးတၢ်သ့ၣ်တဖၣ်အံၤ ကမၤတံာ်တာ်ပတၢ်အိၣ်မူ ဒီးကဒုးအိၣ်ထီၣ်တၢ်သူၣ်တမုာ်သးတမုာ် လၢပဂီၢ်လီၤ. တကးဒံးဘၣ် မၤဘၣ်ဒိ ပတၢ်အိၣ်ဆူၣ်အိၣ်ချ့ သ့ဝဲစ့ၢ်ကီးလီၤ. ကသံၣ်သရၣ် ယိၤခၠံ ခၠံဒၤ ဒီးကသံၣ်ရၣ် အဲတရူး စတဲထိ န့ၣ်ကွဲးဖျါထီၣ်တၢ်ဂ့ၢ်လၢ Journal of the American College of Cardiology အပူၤဒီးစံးဝဲလၢ— “ပတၢ်ဃုသ့ၣ်ညါသ့ၣ်တဖၣ် ပာ်ဖျါထီၣ်ဝဲလၢ တၢ်သူၣ်ဒိၣ်သးဖျိး ဒီးတၢ်သးဟ့န့ၣ် ဒုးအိၣ်ထီၣ်ဝဲ သးအတၢ်ဆါသ့ဝဲလီၤ.”

မ့မ့ၢ် တၢ်ပျၢ်ပှၤဂၤအတၢ်ကမၣ်န့ၣ် တၢ်ကဲဘျုးကဲဖှိၣ် အိၣ်ဝဲလီၤ. ဖဲပပျၢ် ပှၤဂၤအတၢ်ကမၣ်အခါ ပဒုးအိၣ်ထီၣ် တၢ်မုာ်တၢ်ခုၣ် ဒီးတၢ်ဃူတၢ်ဖိးလီၤ. ပမ့ၢ်မၤဒ်န့ၣ်န့ၣ် ပတၢ်ရ့လိာ်သးဒီးပှၤဂၤ တဟးဂီၤဝဲဘၣ်. ဒီးပပာ်ဖျါထီၣ် လၢပကွၢ်လိ ကစၢ်ယွၤလီၤ. အဝဲမ့ၢ် ကစၢ်လၢအပျၢ်ကွံာ်ဝဲ ပှၤလၢ အပီၢ်ယၢ်လီၤက့ၤအသးတဖၣ် အတၢ်ကမၣ်လီၤ. လၢတၢ်န့ၣ်အဃိ ကစၢ်ယွၤမုၢ်လၢ်ဝဲလၢ ပကပျၢ်ကွံာ်ပှၤဂၤအတၢ်ကမၣ် ဒ်သိးဒီးအီၤလီၤ.—မၢ်ကူး ၁၁:၂၅; အ့းဖ့းစူး ၄:၃၂; ၅:၁.