‘မ့ၢ်ယွၤတထံၣ်ဝဲဘၣ်ဧါ’

တဘျီတခီၣ် ဖဲတၢ်ကီတၢ်ခဲအိၣ်ထီၣ်အခါ နကဆိကမိၣ်လၢ ‘မ့ၢ်ယွၤတထံၣ်ဝဲဘၣ်ဧါ.’ မ့တမ့ၢ် လၢနတၢ်အိၣ်မူအပူၤ နထံၣ်ဘၣ်တၢ်ကီတၢ်ခဲအဃိ နကသံကွၢ်ဘၣ်လၢ မ့ၢ်ကစၢ်ယွၤအဲၣ်နၤနီၢ်ကီၢ်ဧါ.

ဒ်ၡံလၢၤ လၢအိၣ်လၢကီၢ်အမဲရကၤအပူၤ တူၢ်ဘၣ်ဝဲအသိး ဘၣ်သ့ၣ်သ့ၣ်​ နကတူၢ်ဘၣ်​ ဒ်သိးဒီးအီၤစ့ၢ်ကီးလီၤ. အဝဲဒိၣ်ထီၣ်လၢ ဟံၣ်ဖိဃီဖိလၢ အအဲၣ်တၢ်ဘူၣ်တၢ်ဘါ ဒီးအဝဲတဲဝဲလၢ “ဖဲယနီၢ်ဆံးခါန့ၣ်​ ယသုးဘူးယသးလၢ ကစၢ်ယွၤအအိၣ်​ မ့ၢ်လၢအဝဲမ့ၢ် တၢ်ဘၣ်တ့ကစၢ်အဃိလီၤ. ဘၣ်ဆၣ်​ ယတတူၢ်ဘၣ်လၢ ယအိၣ်ဘူးဒီးအီၤနီတဘျီဘၣ်. ဒီးယဆိကမိၣ်လၢ ကစၢ်ယွၤကွၢ်စိယၤလၢ တၢ်လီၢ်ဖးယံၤလီၤ. ယတတူၢ်ဘၣ်လၢ ကစၢ်ယွၤန့ၣ်​ သးဟ့ယၤစ့ၢ်ကီးဘၣ်. သနာ်က့ ယတနာ်လၢ အဝဲအဲၣ်ယၤဘၣ်.” ဘၣ်မနုၤအဃိ ၡံလၢၤ တူၢ်ဘၣ်ဝဲဒ်န့ၣ်လဲၣ်. အဝဲတဲဝဲလၢ “ယဟံၣ်ဖိဃီဖိတဖၣ်​ ထံၣ်ဘၣ်တၢ်ကီတၢ်ခဲ တခါဝံၤတခါ ဒီးဖျါလၢကစၢ်ယွၤ တမၤစၢၤပှၤနီတဘျီဘၣ်.”

ဒ်ၡံလၢၤအသိး နကတူၢ်ဘၣ်လၢ သ့တၢ်လၢာ်ကစၢ် အိၣ်ဝဲနီၢ်ကီၢ်လီၤ. ဘၣ်ဆၣ်​ နကသံကွၢ်ဘၣ်လၢ မ့ၢ်ကစၢ်ယွၤအဲၣ်နၤအနီၢ်ကီၢ်ဧါ. ပှၤတီပှၤလိၤစီၤယိၤဘးနာ်ဝဲ တၢ်ဘၣ်တ့ကစၢ်သနာ်က့ အဝဲတူၢ်ဘၣ်ဝဲဒ်န့ၣ်စ့ၢ်ကီးလီၤ. (ယိၤဘး ၂:၃; ၉:၄) ဖဲစီၤယိၤဘးတူၢ်ဘၣ်ဝဲ တၢ်နးတၢ်ဖှီၣ်တခါဘၣ်တခါ ဝံၤအလီၢ်ခံ အဝဲသံကွၢ်ကစၢ်ယွၤလၢ “နပာ်ခူသူၣ်နမဲာ်, ဒီးပာ်ယၤလၢနဒုၣ်နဒါ မ့ၢ်အဘၣ်မနုၤလဲၣ်.”—ယိၤဘး ၁၃:၂၄.

ဘၣ်ဃးဒီးတၢ်ဂ့ၢ်တခါအံၤန့ၣ်​ လံာ်စီဆှံတဲဝဲဒ်လဲၣ်. ဖဲတၢ်ကီတၢ်ခဲ ဟဲအိၣ်ထီၣ်အခါန့ၣ်​ မ့ၢ်ပတဲလၢ ကစၢ်ယွၤစံၣ်ညီၣ်ပှၤသ့ဧါ. ကစၢ်ယွၤအဲၣ်ပှၤဟီၣ်ခိၣ်ဖိ ဒီးသူၣ်အိၣ်သးအိၣ်​ ပဝဲတဂၤစုာ်စုာ်န့ၣ်​ မ့ၢ်တၢ်အုၣ်အသးအိၣ်တမံၤမံၤဧါ. ဖဲပထံၣ်ဘၣ်​ တၢ်ကီတၢ်ခဲအခါ မ့ၢ်ပနာ်သ့သပှၢ်ကတၢၢ်လၢ ကစၢ်ယွၤသးအိၣ်ပှၤ, နၢ်ပၢၢ်စၢၤပှၤ, ဒိသူၣ်ဒိသးပှၤ ဒီးမၤစၢၤပှၤဧါ.

လၢလံာ်တဘ့ၣ်အံၤအပူၤ ပကမၤလိဘၣ်လၢ တၢ်ဘၣ်တ့တဖၣ်ပာ်ဖျါထီၣ်​ ကစၢ်ယွၤအတၢ်အဲၣ်ပှၤ လၢကျဲဒ်လဲၣ်အဂ့ၢ်န့ၣ်လီၤ. (ရိမ့ၤ ၁:၂၀) ဒီးပကထံၣ်ဘၣ်စ့ၢ်ကီး လံာ်စီဆှံအဆၢလၢ အပာ်ဖျါထီၣ်န့ၢ်ပှၤ ကစၢ်ယွၤအတၢ်အဲၣ်လီၤ. နမ့ၢ် “သ့ၣ်ညါ” ထီၣ်ကစၢ်ယွၤခီဖျိလၢ အတၢ်ဘၣ်တ့ ဒီးအကလုၢ်ကထါန့ၣ်​ နကနာ်သပှၢ်ကတၢၢ်လၢ ‘အသးအိၣ်နၤလီၤ.’—၁ ယိၤဟၣ်​ ၂:၃; ၁ ပ့းတရူး ၅:၇.