တၢ်မၤလိ ၇
ဃုတၢ်သူၣ်စူၤသးစူၤ ဒီးမၤတၢ်ဘၣ်ယဟိဝၤယွၤအသး
“ဃုယွၤတက့ၢ်, ကယဲၢ်ပှၤလၢအသးစူၤလၢ ထံဧိၤကီၢ်ဧိၤအပူၤ, . . . ဃုတၢ်သူၣ်စူၤသးစူၤန့ၣ်တက့ၢ်.”—စဖါနယၤ ၂:၃.
တၢ်သးဝံၣ် ၈၀ “လ့ၣ်ကွၢ်, ဒီးထံၣ်လၢယွၤမ့ၢ် တၢ်ဂ့ၤ”
တၢ်မၤလိအံၤ အတၢ်တိာ်ပာ်a
၁-၂. (က) စီၤမိၤၡ့ မ့ၢ်ပှၤဒ်လဲၣ်တဂၤလဲၣ် ဒီးအဝဲမၤဝဲ တၢ်မနုၤလဲၣ်. (ခ) တၢ်မနုၤ ထိၣ်ဟူးထိၣ်ဂဲၤထီၣ်ပှၤလၢ ပကမၤအါထီၣ် တၢ်သူၣ်စူၤသးစူၤလဲၣ်.
လံာ်စီဆှံပာ်ဖျါထီၣ်ဝဲလၢ စီၤမိၤၡ့မ့ၢ်ပှၤလၢ “အသးစူၤန့ၢ်ကယဲၢ် ပှၤလၢဟီၣ်ခိၣ်ချၢခဲလၢာ်တက့ၢ်လီၤ.” (၄ မိၤၡ့ ၁၂:၃) စီၤမိၤၡ့အိၣ်ဒီးတၢ်သးစူၤန့ၣ် အဲၣ်ဒိးစံးဝဲလၢ အဝဲမ့ၢ်ပှၤလၢ အဂံၢ်စၢ်ဘါစၢ်, ဆၢတဲာ်တၢ်ဒူဒူ တဘူၣ်ဘၣ် ဒီးဖဲပှၤဂၤထီဒါအီၤအခါ မ့ၢ်ပှၤလၢအပျံၤတၢ်န့ၣ်ဧါ. ပှၤတနီၤနီၤထံၣ်ဝဲလၢ ပှၤလၢအအိၣ်ဒီး တၢ်သူၣ်စူၤသးစူၤန့ၣ် မ့ၢ်ပှၤဒ်န့ၣ်တဂၤလီၤ. ဘၣ်ဆၣ် နီၢ်နီၢ်န့ၣ် တမ့ၢ်ဒ်န့ၣ်ဘၣ်. စီၤမိၤၡ့မ့ၢ်ဝဲ ကစၢ်ယွၤအခ့အပှၤလၢ အဆူၣ်, ဆၢတဲာ်တၢ်ဒူဒူ ဒီးအအိၣ်ဒီးတၢ်သူၣ်ဒူသးဒူလီၤ. ခီဖျိလၢ ယဟိဝၤယွၤ အတၢ်မၤစၢၤအဃိ အဝဲကွၢ်ဆၢၣ်မဲာ်ဝဲ အဲၤကူပတူးအစီၤပၤလၢ အစိဒိၣ်အကမီၤထီ, တီခိၣ်ရိၤမဲဝဲ ပှၤအံၣ်စရ့လးဖိ ကအိၣ်ဝဲ ၃,၀၀၀,၀၀၀ လၢမဲးမုၢ်ခိၣ်ဒီး မၤစၢၤဝဲ ပှၤအံၣ်စရ့လးဖိတဖၣ်လၢ ကမၤနၢၤဝဲ အဒုၣ်အဒါတဖၣ်အဂီၢ်လီၤ.
၂ ပတထံၣ်ဘၣ်ဒီး တၢ်အိၣ်အသးဒ်သိးဒီး စီၤမိၤၡ့ဘၣ်, ဘၣ်ဆၣ် တနံၤဘၣ်တနံၤန့ၣ် ပထံၣ်ဘၣ်ဒီးတၢ်အိၣ်အသး မ့တမ့ၢ် ပှၤလၢအဒုးကဲထီၣ် တၢ်ကီတၢ်ခဲ လၢပကအိၣ်ဒီး တၢ်သူၣ်စူၤသးစူၤအဂီၢ်လီၤ. ယဟိဝၤယွၤအၢၣ်လီၤဝဲလၢ “ပှၤလၢအသးစူၤ ကန့ၢ်ဘၣ်သါထံဧိၤကီၢ်ဧိၤ” လီၤ. (စံးထီၣ်ပတြၢၤ ၃၇:၁၁) လၢတၢ်န့ၣ်အဃိ ပအိၣ်ဒီးတၢ်ဂံၢ်တၢ်ဘါ လၢပကမၤဒိၣ်ထီၣ်အါထီၣ် တၢ်ဂ့ၤတၢ်ဝါအံၤအဂီၢ်လီၤ. မ့ၢ်နထံၣ်လီၤနသးလၢ နမ့ၢ်ပှၤလၢအအိၣ်ဒီး တၢ်သူၣ်စူၤသးစူၤဧါ. ဒီးမ့ၢ်ပှၤဂၤထံၣ်နၤ ဒ်န့ၣ်စ့ၢ်ကီးဧါ. တချုးပစံးဆၢတၢ်သံကွၢ် လၢအရ့ဒိၣ်တဖၣ်အံၤ ဒံးဘၣ်န့ၣ် ပကဘၣ်သ့ၣ်ညါလၢ တၢ်သူၣ်စူၤသးစူၤန့ၣ် မ့ၢ်တၢ်မနုၤလဲၣ်န့ၣ်လီၤ.
တၢ်သူၣ်စူၤသးစူၤန့ၣ် မ့ၢ်တၢ်မနုၤလဲၣ်
၃-၄. (က) တၢ်သူၣ်စူၤသးစူၤန့ၣ် လီၤဂာ်ဒ်သိး တၢ်မနုၤလဲၣ်. (ခ) ဒ်သိးပကအိၣ်ဒီး တၢ်သူၣ်စူၤသးစူၤအဂီၢ် ပကဘၣ်အိၣ်ဒီး တၢ်ဂ့ၢ်တၢ်ဝါ မနုၤတဖၣ်လဲၣ် ဒီးဘၣ်မနုၤအဃိလဲၣ်.
၃ တၢ်သူၣ်စူၤသးစူၤb န့ၣ်လီၤဂာ်ဒ် တၢ်ဂီၤလၢ ပှၤတ့ဃာ်အီၤ ဃံဃံလၤလၤတဘ့ၣ်န့ၣ်လီၤ. ဒ်ပှၤတ့တၢ်ဂီၤဖိတဂၤ သူဝဲကသံၣ်ထံ အလွဲၢ်တဘျုးခါ လၢကတ့ထီၣ်တၢ်ဂီၤအဂီၢ်အသိး ပဝဲသ့ၣ်စ့ၢ်ကီး ပကဘၣ်အိၣ်ဒီး တၢ်ဂ့ၤတၢ်ဝါတဘျုးခါ ဒ်သိးပကကဲထီၣ် ပှၤလၢအိၣ်ဒီး တၢ်သူၣ်စူၤသးစူၤအဂီၢ်လီၤ. တၢ်ဂ့ၤတၢ်ဝါလၢ ပကဘၣ်ဒုးအိၣ်ထီၣ်အီၤတဖၣ်န့ၣ် မ့ၢ်ဝဲတၢ်ဆီၣ်လီၤသး, တၢ်ဒိကနၣ်, တၢ်သးကညီၤ ဒီးတၢ်သူၣ်ဒူသးဒူလီၤ. ဒ်သိးပကဒိးန့ၢ်ဘၣ် ကစၢ်ယွၤအတၢ်ဘၣ်သးအဂီၢ် ဘၣ်မနုၤအဃိ ပကဘၣ်အိၣ်ဒီး တၢ်ဂ့ၤတၢ်ဝါတဖၣ်အံၤလဲၣ်.
၄ ထဲဒၣ်ပှၤလၢအအိၣ်ဒီး တၢ်ဆီၣ်လီၤသးန့ၣ် ကမၤဝဲ တၢ်ဘၣ်ကစၢ်ယွၤအသး ဒီးအဝဲကအိၣ်ဒီး တၢ်သူၣ်စူၤသးစူၤလီၤ. (မးသဲ ၅:၅; ကလၤတံ ၅:၂၃) ဖဲပမၤ တၢ်ဘၣ်ကစၢ်ယွၤအသးအခါ မုၣ်ကီၤလံၢ် သးထီၣ်ပှၤဒိၣ်မးလီၤ. အဃိ ပမ့ၢ်အိၣ်ဒီး တၢ်ဆီၣ်လီၤသး ဒီးတၢ်သူၣ်စူၤသးစူၤဒၣ်လဲာ် ပှၤလၢအအိၣ်လၢ မုၣ်ကီၤလံၢ်အအိၣ်တခီန့ၣ် ကသးဟ့ပှၤလီၤ. (ယိၤဟၣ် ၁၅:၁၈, ၁၉) လၢတၢ်န့ၣ်အဃိ ဒ်သိးပကတြီဆၢ မုၣ်ကီၤလံၢ်အဂီၢ် ပလိၣ်ဘၣ် တၢ်ဂံၢ်တၢ်ဘါလီၤ.
၅-၆. (က) ဘၣ်မနုၤအဃိ မုၣ်ကီၤလံၢ်သးဟ့ဝဲ ပှၤလၢအအိၣ်ဒီး တၢ်သူၣ်စူၤသးစူၤတဖၣ်လဲၣ်. (ခ) ပကတဲသကိး တၢ်သံကွၢ်မနုၤတဖၣ်လဲၣ်.
၅ ပှၤလၢအတမ့ၢ် ပှၤသူၣ်စူၤသးစူၤတဖၣ်န့ၣ် ပာ်ထီၣ်ထီအသး, တပၢၤအတၢ်သးဒိၣ် ဒီးတဒိကနၣ် ယဟိဝၤယွၤအကလုၢ်ဘၣ်. အဝဲသ့ၣ် ပာ်ဖျါထီၣ် မုၣ်ကီၤလံၢ် အတၢ်ပာ်သူၣ်ပာ်သး လၢလၢပှဲၤပှဲၤလီၤ. လၢတၢ်န့ၣ်အဃိ အဝဲသ့ၣ် သးဟ့ဝဲပှၤလၢ အသူၣ်စူၤသးစူၤတဖၣ်န့ၣ် တမ့ၢ်တၢ်လၢ အလီၤကမၢကမၣ်ဘၣ်. ပှၤလၢအအိၣ်ဒီး တၢ်သူၣ်စူၤသးစူၤတဖၣ် ပာ်ဖျါထီၣ်ဝဲလၢ ပှၤလၢအတအိၣ်ဒီး တၢ်သူၣ်စူၤသးစူၤတဖၣ်န့ၣ် မ့ၢ်ပှၤလၢ အအၢအသီဒိၣ်မးလီၤ. မ့ၢ်လၢ ပှၤလၢအသးတစူၤတဖၣ်န့ၣ် တအိၣ်ဒီးတၢ်ဂ့ၤတၢ်ဝါ ဒ်သိးအဝဲသ့ၣ်အဃိလီၤ. တကးဒံးဘၣ် အဝဲသ့ၣ် ပာ်ဖျါထီၣ်ဝဲလၢ မုၣ်ကီၤလံၢ်မ့ၢ် ပှၤလၢအလီတၢ်လီၤ. လၢကျဲဒ်လဲၣ်. မုၣ်ကီၤလံၢ် မ့ၢ်မၤဝဲဒ်လဲၣ်ဂ့ၤဒ်လဲၣ်ဂ့ၤ အဝဲမၤဝဲဒ်သိး ပှၤလၢအအိၣ်ဒီး တၢ်သူၣ်စူၤသးစူၤတဖၣ် ကပတုာ်မၤ ယဟိဝၤယွၤအတၢ်မၤ တန့ၢ်ဘၣ်အဃိလီၤ.—ယိၤဘး ၂:၃-၅.
၆ ဘၣ်မနုၤအဃိ ကီလၢပကအိၣ်ဒီး တၢ်သူၣ်စူၤသးစူၤအဂီၢ်လဲၣ်. ဒီးဘၣ်မနုၤအဃိ ပကဘၣ်အိၣ်ဒီး တၢ်သူၣ်စူၤသးစူၤထီဘိလဲၣ်. ဒ်သိးပကသ့ၣ်ညါဘၣ် တၢ်စံးဆၢအဂီၢ် ပကသမံသမိးကွၢ် စီၤမိၤၡ့, ပှၤဧ့ၤဘြံၤဖိသၢဂၤလၢ ဘၣ်တၢ်က့ၤကိးအီၤဆူ ဘၤဘူၤလိၣ် ဒီးယ့ၣ်ၡူး အဒိအတဲာ်လီၤ.
ကီလၢပကအိၣ်ဒီး တၢ်သူၣ်စူၤသးစူၤ ဖဲလဲၣ်အဆၢကတီၢ်လဲၣ်
၇-၈. ဖဲပှၤဂၤတပာ်ကဲ စီၤမိၤၡ့အခါ စီၤမိၤၡ့မၤဝဲဒ်လဲၣ်.
၇ ဖဲပအိၣ်ဒီး တၢ်စိတၢ်ကမီၤ လၢပှၤဂၤအဖီခိၣ်အခါ ပအိၣ်ဒီး တၢ်သူၣ်စူၤသးစူၤ ကသ့ဒ်လဲၣ်. တဘျီတခီၣ် ပှၤလၢအအိၣ်ဒီး တၢ်စိတၢ်ကမီၤတဖၣ်န့ၣ် ကကီဝဲလၢ အဝဲသ့ၣ် ကအိၣ်ဒီး တၢ်သူၣ်စူၤသးစူၤအဂီၢ် လီၤဆီဒၣ်တၢ် ဖဲပှၤလၢအဘၣ်တီခိၣ်ရိၤမဲဝဲတဖၣ် တပာ်ကဲအီၤ မ့တမ့ၢ် တတူၢ်လိာ် အတၢ်ဆၢတဲာ်အခါလီၤ. မ့ၢ်နထံၣ်ဘၣ်ဒီး တၢ်အိၣ်အသးဒ်န့ၣ် တဘျီဘျီဧါ, နပှၤဟံၣ်ဖိဃီဖိတဖၣ် မ့ၢ်မၤဝဲဒ်န့ၣ်မီၤ နကမၤဒ်လဲၣ်. ဆိကမိၣ်ကွၢ် ဖဲစီၤမိၤၡ့ ထံၣ်ဘၣ်တၢ်အိၣ်အသးဒ်န့ၣ်အခါ အဝဲမၤဝဲဒ်လဲၣ်န့ၣ်တက့ၢ်.
၈ ယဟိဝၤယွၤ မၢစီၤမိၤၡ့လၢ ကတီခိၣ်ရိၤမဲ ပှၤအံၣ်စရ့လးဖိတဖၣ် ဒီးဟ့ၣ်စီၤမိၤၡ့ တၢ်ခွဲးတၢ်ယာ်လၢ ကကွဲးလီၤဝဲတၢ်သိၣ်တၢ်သီလၢ ပှၤအံၣ်စရ့လးဖိတဖၣ်အဂီၢ်လီၤ. ပနာ်သ့သပှၢ်ကတၢၢ်လၢ ယဟိဝၤယွၤ မၤစၢၤစီၤမိၤၡ့လီၤ. ဘၣ်ဆၣ် စီၤမိၤၡ့အနီ မံးရယၣ် ဒီးအကၠီ အၤဟရိၣ်န့ၣ် ဃုစီၤမိၤၡ့အတၢ်ကမၣ် ဒီးတဲဝဲလၢ စီၤမိၤၡ့ တကြၢးဆီဟံၣ်ဆီဃီဒီး အမါလၢအဃုထၢဝဲန့ၣ်ဘၣ်. ပှၤပိာ်ခွါတနီၤ မ့ၢ်အိၣ်ဒီးတၢ်အလီၢ်အလၤ ဒ်သိးစီၤမိၤၡ့န့ၣ် ဖဲအဝဲသ့ၣ် ထံၣ်ဘၣ်ဒီး တၢ်အိၣ်အသးဒ်အံၤအခါ ဘၣ်သ့ၣ်သ့ၣ် အဝဲသ့ၣ် ကသးထီၣ်တၢ် မ့တမ့ၢ် ကမၤကၣ်တၢ်လီၤ. ဘၣ်ဆၣ် စီၤမိၤၡ့ တမၤဝဲဒ်န့ၣ်ဘၣ်. အဝဲအသးတဟဲထီၣ်တၢ် ညီညီဖိဘၣ်. တကးဒံးဘၣ် အဝဲဃ့ကညး ယဟိဝၤယွၤလၢ ကမၤဘျါက့ၤ နီၢ်မံးရယၣ် လၢတၢ်ဆါအၢလီၤ. (၄ မိၤၡ့ ၁၂:၁-၁၃) ဘၣ်မနုၤအဃိ စီၤမိၤၡ့ မၤဝဲဒ်န့ၣ်လဲၣ်.
စီၤမိၤၡ့ ဃ့ကညးယဟိဝၤယွၤ လၢကမၤဘျါဝဲ နီၢ်မံးရယၣ် (ကွၢ်လံာ်အဆၢ ၈)
၉-၁၀. (က) ယဟိဝၤယွၤ မၤစၢၤဝဲစီၤမိၤၡ့လၢ ကနၢ်ပၢၢ်ထီၣ်ဝဲ တၢ်မနုၤလဲၣ်. (ခ) ဟံၣ်ခိၣ်ဒီး တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်မနုၤလၢ စီၤမိၤၡ့အအိၣ်လဲၣ်.
၉ စီၤမိၤၡ့ပျဲဝဲလၢ ယဟိဝၤယွၤ ကသိၣ်လိအီၤလီၤ. လၢအပူၤကွံာ်န့ၣ် အဝဲကဲဘၣ်ဝဲ အဲၤကူပတူး အစီၤလိၣ်စီၤပၤ အဟံၣ်ဖိဃီဖိ အနံၣ်လွံၢ်ဆံလီၤ. ဖဲန့ၣ်အဆၢကတီၢ် အဝဲတအိၣ်ဒီး တၢ်သူၣ်စူၤသးစူၤဘၣ်. လၢတၢ်န့ၣ်အလီၢ် အဝဲမ့ၢ်ပှၤလၢ အသးချ့ဒိၣ်မး အဃိအဝဲမၤသံဝဲ ပှၤလၢအဝဲ ဆိကမိၣ်ဝဲလၢ အမၤတၢ်တတီတလိၤတဂၤန့ၣ်လီၤ. ဒီးအဝဲဆိကမိၣ်ဝဲလၢ ကစၢ်ယွၤကတူၢ်လိာ် အတၢ်မၤတခါအံၤန့ၣ်လီၤ. လၢခံန့ၣ် ယဟိဝၤယွၤ မၤစၢၤစီၤမိၤၡ့ လၢအနံၣ် ၄၀ အတီၢ်ပူၤ ဒ်သိးစီၤမိၤၡ့ ကနၢ်ပၢၢ်ထီၣ်ဝဲလၢ အဝဲကတီခိၣ်ရိၤမဲ ပှၤအံၣ်စရ့လးဖိတဖၣ်အဂီၢ် အတဘၣ်အိၣ်ဒီး တၢ်သူၣ်ဒူသးဒူ ထဲတခါဧိၤဘၣ်, အကဘၣ်အိၣ်စ့ၢ်ကီးဒီး တၢ်သူၣ်စူၤသးစူၤလီၤ. ဒီးဒ်သိးအဝဲကအိၣ်ဒီး တၢ်သူၣ်စူၤသးစူၤအဂီၢ် အဝဲကဘၣ်အိၣ်ဒီး တၢ်ဆီၣ်လီၤသး, တၢ်ဒိကနၣ် ဒီးတၢ်သးကညီၤလီၤ. အဝဲမၤလိအသးလၢ ကအိၣ်ဒီးတၢ်ဂ့ၤတၢ်ဝါတဖၣ်န့ၣ် ဒီးကဲထီၣ်ဝဲ ပှၤတီခိၣ်ရိၤမဲတၢ်လၢအဂ့ၤတဂၤလီၤ.—၂ မိၤၡ့ ၂:၁၁, ၁၂; မၤတၢ် ၇:၂၁-၃၀, ၃၆.
၁၀ ဆၢကတီၢ်ခဲအံၤစ့ၢ်ကီး ဟံၣ်ခိၣ်တဖၣ် ဒီးတၢ်အိၣ်ဖှိၣ်သးပှၢ်တဖၣ်န့ၣ် ကြၢးကွၢ်လိမၤဒိး စီၤမိၤၡ့လီၤ. နမ့မ့ၢ်ဟံၣ်ခိၣ် ဒီးတၢ်အိၣ်ဖှိၣ်သးပှၢ်န့ၣ် တဘၣ်သးထီၣ်တၢ်ချ့ချ့တဂ့ၤ. အိၣ်ဒီး တၢ်ဆီၣ်လီၤသး ဒီးအၢၣ်လီၤ နတၢ်ကမၣ်တက့ၢ်. (စံၣ်တဲၤတဲလီၤတၢ် ၇:၉, ၂၀) ဖဲနဘၣ်မၤဘၣ်ဂီၢ်က့ၤ တၢ်ကီတၢ်ခဲတဖၣ်အခါ မၤထွဲယဟိဝၤယွၤ အတၢ်ဟံးစုနဲၣ်ကျဲတဖၣ် လၢတၢ်ဆီၣ်လီၤသးအပူၤတက့ၢ်. ဒီးတဲတၢ်မုာ်မုာ် ထီဘိတက့ၢ်. (ကတိၤဒိ ၁၅:၁) ဟံၣ်ခိၣ်တဖၣ် ဒီးပှၤလၢအတီခိၣ်ရိၤမဲတၢ်တဖၣ် မ့ၢ်မၤဝဲဒ်အံၤန့ၣ် မ့ၢ်တၢ်လၢအဘၣ် ယဟိဝၤယွၤအသး ဒီးကဒုးအိၣ်ထီၣ် တၢ်ဃူတၢ်ဖိးလီၤ. တကးဒံးဘၣ် အဝဲသ့ၣ် ကကဲထီၣ် တၢ်ဒိဂ့ၤတဲာ်ဘၣ် ဒ်သိးပှၤကအိၣ်ဒီး တၢ်သူၣ်စူၤသးစူၤအဂီၢ်လီၤ.
၁၁-၁၃. ပန့ၢ်ဘၣ်တၢ်မၤလိလၢ ပှၤဧ့ၤဘြံၤဖိသၢဂၤ အအိၣ်ဒ်လဲၣ်.
၁၁ ဖဲပဘၣ် တၢ်မၤအၢမၤနးပှၤအခါ ပအိၣ်ဒီး တၢ်သူၣ်စူၤသးစူၤ ကသ့ဒ်လဲၣ်. လၢပှၤဟီၣ်ခိၣ်ဖိ အတၢ်စံၣ်စိၤတဲစိၤ ဒီတကတီၢ်န့ၣ် ပှၤလၢအပၢတၢ်တဖၣ် မၤအၢမၤနးဝဲ ယဟိဝၤယွၤ အခ့အပှၤတဖၣ်လီၤ. အဝဲသ့ၣ် ပာ်ဒ့ၣ်ပာ်ကမၣ်ပှၤဒီး စံၣ်ညီၣ်ပှၤလၢတၢ် “ကမၣ်” အါမံၤလီၤ. မ့ၢ်လၢပဃုထၢလၢပ “စူၢ်ယွၤ အါန့ၢ် ပစူၢ်ပှၤကညီ” အဃိ အဝဲသ့ၣ် သးထီၣ်ပှၤလီၤ. (မၤတၢ် ၅:၂၉) ဘၣ်သ့ၣ်သ့ၣ် အဝဲသ့ၣ် ကမၤမဲာ်ဆှးပှၤ, ကထၢနုာ်ပှၤလၢဃိာ်ပူၤ မ့တမ့ၢ် ကဒိပှၤတီၢ်ပှၤလီၤ. ဒ်လဲၣ်ဂ့ၤဒ်လဲၣ်ဂ့ၤ ခီဖျိလၢ ယဟိဝၤယွၤ မၤစၢၤပှၤအဃိ ပပာ်ပသး မုာ်မုာ်ခုၣ်ခုၣ်သ့ဒီး ပတမၤကၣ်က့ၤ အဝဲသ့ၣ်နီတမံၤဘၣ်.
၁၂ ပကဆိကမိၣ်ကွၢ် ပှၤဧ့ၤဘြံၤဖိသၢဂၤ လၢအမံၤမ့ၢ် စီၤဃနၤနယၤ, စီၤမံၡအ့လး ဒီးစီၤဧစၤရယၤ လၢဘၣ်တၢ်က့ၤကိးအီၤဆူ ဘၤဘူၤလိၣ်အဂ့ၢ်န့ၣ်လီၤ.c ဘၤဘူၤလိၣ်အစီၤပၤ မၢအဝဲသ့ၣ်ဘါလီၤဝဲ တၢ်ဂီၤထူဖးဒိၣ်လီၤ. လၢတၢ်သူၣ်စူၤသးစူၤအပူၤ အဝဲသ့ၣ်တဲဘၣ်ဝဲ စီၤပၤလၢ ဘၣ်မနုၤအဃိ အဝဲသ့ၣ် တဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်လဲၣ်န့ၣ်လီၤ. ဖဲစီၤပၤ တဲပျံၤတဲဖုးအဝဲသ့ၣ်လၢ အကထၢနုာ်အီၤဆူ မ့ၣ်အူပူၤအခါဒၣ်လဲာ် အဝဲသ့ၣ် ဆဲးအိၣ်ဒီး တၢ်ဒိကနၣ်လီၤ. အဃိ ယဟိဝၤယွၤ မၤပူၤဖျဲးအဝဲသ့ၣ် တဘျီဃီလီၤ. ဘၣ်ဆၣ် အဝဲသ့ၣ် တသ့ၣ်ညါပာ်စၢၤဝဲလၢ ကစၢ်ယွၤကမၤဝဲဒ်န့ၣ်ဘၣ်. လၢတၢ်န့ၣ်အလီၢ် တၢ်မ့ၢ်ကဲထီၣ်အသးဒီး အဝဲသ့ၣ်ဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ် အသးအိၣ်တူၢ်လိာ်ဝဲ တၢ်လၢယဟိဝၤယွၤပျဲဝဲလၢ အကကဲထီၣ်အသးတဖၣ်န့ၣ်လီၤ. (ဒၤနံးယ့လး ၃:၁, ၈-၂၈) အဝဲသ့ၣ် ပာ်ဖျါထီၣ်ဝဲလၢ ပှၤလၢအအိၣ်ဒီး တၢ်သူၣ်စူၤသးစူၤတဖၣ်န့ၣ် မ့ၢ်ပှၤလၢအအိၣ်ဒီး တၢ်သူၣ်ဒူသးဒူ အနီၢ်ကီၢ်လီၤ. စီၤပၤမ့ၢ်ဂ့ၤ, တၢ်မၤပျံၤမၤဖုးမ့ၢ်ဂ့ၤ, တၢ်စံၣ်ညီၣ်မ့ၢ်ဂ့ၤ မၤဟးဂီၤကွံာ် အဝဲသ့ၣ် အတၢ်ဆၢတဲာ်လၢက ‘ဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤ’ တန့ၢ်ဘၣ်.—၂ မိၤၡ့ ၂၀:၄, ၅, NWT.
၁၃ ဖဲပတၢ်သးတီ ဘၣ်တၢ်မၤကွၢ်အီၤအခါ ပကွၢ်လိမၤဒိး ပှၤဧ့ၤဘြံၤဖိသၢဂၤအံၤ ကသ့ဒ်လဲၣ်. ပကဘၣ်အိၣ်ဒီး တၢ်ဆီၣ်လီၤသး ဒီးနာ်လၢ ယဟိဝၤယွၤ ကကဟုကယာ်ပှၤလီၤ. (စံးထီၣ်ပတြၢၤ ၁၁၈:၆, ၇) ပကဘၣ်စံးဆၢက့ၤ ပှၤလၢအပာ်ဒ့ၣ်ပာ်ကမၣ်ပှၤတဖၣ် ကပုာ်လုးဖိ ဒီးလၢတၢ်ပာ်ကဲအပူၤလီၤ. (၁ ပ့းတရူး ၃:၁၅) ဒီးပဘၣ်ဟးဆှဲး တၢ်ကိးမံၤဒဲးလၢ ကမၤဘၣ်ဒိ ပတၢ်ရ့လိာ်သးဒီးပပၢ်သးဘိ လၢမူခိၣ်န့ၣ်လီၤ.
ဖဲပှၤဂၤ ထီဒါပှၤအခါ ပစံးဆၢက့ၤ အဝဲသ့ၣ်လၢ တၢ်ပာ်ကဲအပူၤ (ကွၢ်လံာ်အဆၢ ၁၃)
၁၄-၁၅. (က) ဖဲပသူၣ်ကိၢ်သးဂီၤအခါ တၢ်မနုၤကဲထီၣ်အသး သ့လဲၣ်. (ခ) ဒ် ယၡါယၤ ၅၃:၇, ၁၀ ပာ်ဖျါထီၣ်ဝဲအသိး ဘၣ်မနုၤအဃိ ပတဲသ့လၢ ယ့ၣ်ၡူးမ့ၢ် ပှၤဒိဂ့ၤတဲာ်ဘၣ်ကတၢၢ် လၢအအိၣ်ဒီး တၢ်သူၣ်စူၤသးစူၤ ဖဲအသူၣ်ကိၢ်သးဂီၤ အခါန့ၣ်လဲၣ်.
၁၄ ဖဲပအိၣ်ဒီး တၢ်သူၣ်ကိၢ်သးဂီၤအခါ ပအိၣ်ဒီး တၢ်သူၣ်စူၤသးစူၤ ကသ့ဒ်လဲၣ်. ပဝဲအါဂၤန့ၣ် ပအိၣ်ဒီးတၢ်သူၣ်ကိၢ်သးဂီၤ ခီဖျိလၢ တၢ်ဂ့ၢ်အါမံၤအဃိလီၤ. တချုးလၢ ပဒိးစဲးလၢကၠိဒံးဘၣ် မ့တမ့ၢ် ပကဘၣ်မၤလၢပှဲၤပမူဒါလီၤဆီ တမံၤမံၤ လၢတၢ်မၤလီၢ်အခါ ပသူၣ်ကိၢ်သးဂီၤလီၤ. မ့တမ့ၢ် ထဲဒၣ်ပဆိကမိၣ်ထီၣ်လၢ ပကဘၣ်ကူစါပသး အကျိၤအကျဲဒ်လဲၣ်အခါ ပသူၣ်ကိၢ်သးဂီၤလီၤ. ဖဲပသူၣ်ကိၢ်သးဂီၤအခါ တၢ်လၢအတညီနုၢ် မၤသးထီၣ်ပှၤတဖၣ်န့ၣ် မၤသးထီၣ်ပှၤသ့လီၤ. ဒီးဖဲန့ၣ်အခါ ပကတဲဘၣ်တၢ်ကတိၤလၢ အဆူၣ်အကိၤ ဒီးပတရ့ဒီးပှၤဂၤလၢ တၢ်သးကညီၤအပူၤလၢၤဘၣ်. နမ့ၢ်အိၣ်ဒီး တၢ်သူၣ်ကိၢ်သးဂီၤထီဘိန့ၣ် ဆိကမိၣ်ကွၢ် ယ့ၣ်ၡူးအဒိအတဲာ်တက့ၢ်.
၁၅ ဖဲယ့ၣ်ၡူးတချုးသံအလါန့ၣ် အဝဲတူၢ်ဘၣ် တၢ်သူၣ်ကိၢ်သးဂီၤ ဒိၣ်မးလီၤ. အဝဲသ့ၣ်ညါဝဲလၢ အကဘၣ်တၢ်မၤသံအီၤ ဒီးကဘၣ်တူၢ်ဘၣ် တၢ်မၤဆါအီၤ နးနးကလဲာ်လီၤ. (ယိၤဟၣ် ၃:၁၄, ၁၅; ကလၤတံ ၃:၁၃) တချုးဖဲအဝဲသံဒံးဘၣ် အလါတဖၣ်န့ၣ် အဝဲတဲဝဲလၢ အသူၣ်ကိၢ်သးဂီၤတၢ်လီၤ. (လူၤကၣ် ၁၂:၅၀) ဖဲအဝဲတချုးသံဒံးဘၣ် အနံၤတဖၣ်န့ၣ် အဝဲတဲဝဲလၢ “ယသူၣ်ကိၢ် ယသးကိၢ်လီၤ.” ဒီးအဝဲဃ့ဘါထုကဖၣ်ဝဲလၢ “မ့ၢ်ယကစံး, ပၢ်ဧၢ, အုၣ်က့ၤခီၣ်က့ၤယၤ လၢနၣ်ရံၣ်အံၤတက့ၢ်ဧါ. မ့မ့ၢ်လၢတၢ်အံၤအဃိ ယဟဲဆူနၣ်ရံၣ်အံၤလီၤ. ပၢ်ဧၢ, ဒုးလၤကပီၤနမံၤတက့ၢ်.” (ယိၤဟၣ် ၁၂:၂၇, ၂၈) ပမ့ၢ်ကွၢ် ယ့ၣ်ၡူးအတၢ်ကတိၤတဖၣ်အံၤန့ၣ် ပသ့ၣ်ညါဘၣ်လၢ အဝဲမ့ၢ်ပှၤလၢ အဆီၣ်လီၤသး ဒီးဒိကနၣ် ကစၢ်ယွၤအကလုၢ်လီၤ. ဖဲတၢ်ဆၢကတီၢ် ဟဲတုၤအိၣ်အီၤအခါ လၢတၢ်သူၣ်ဒူသးဒူအပူၤ ယ့ၣ်ၡူးဟ့ၣ်လီၤအသးလၢ ကစၢ်ယွၤအဒုၣ်အဒါလၢ ကမၤအၢမၤနးအီၤ နးနးကလဲာ် ဒီးကမၤမဲာ်ဆှးအီၤ အစုပူၤလီၤ. ယ့ၣ်ၡူးအိၣ်ဒီး တၢ်သူၣ်ကိၢ်သးဂီၤ ဒီးတူၢ်ဘၣ်တၢ်မၤဆါအီၤ နးနးကလဲာ်ဘၣ်ဆၣ် အဝဲဆဲးမၤ ကစၢ်ယွၤအတၢ်ဘၣ်သး လၢတၢ်သူၣ်စူၤသးစူၤအပူၤလီၤ. ယ့ၣ်ၡူးမ့ၢ် ပှၤဒိဂ့ၤတဲာ်ဘၣ်ကတၢၢ် လၢအအိၣ်ဒီး တၢ်သူၣ်စူၤသးစူၤ ဖဲအသူၣ်ကိၢ်သးဂီၤတၢ် အခါဒၣ်လဲာ်န့ၣ်လီၤ.—ဖး ယၡါယၤ ၅၃:၇, ၁၀ တက့ၢ်.
ယ့ၣ်ၡူးမ့ၢ် ပှၤဒိဂ့ၤတဲာ်ဘၣ်ကတၢၢ် လၢအအိၣ်ဒီး တၢ်သူၣ်စူၤသးစူၤ (ကွၢ်လံာ်အဆၢ ၁၆-၁၇)e
၁၆-၁၇. (က) ယ့ၣ်ၡူးအတၢ်သူၣ်စူၤသးစူၤ ဘၣ်တၢ်မၤကွၢ်အီၤဒ်လဲၣ်. (ခ) ပကွၢ်လိမၤဒိး ယ့ၣ်ၡူးကသ့ဒ်လဲၣ်.
၁၆ ဖဲယ့ၣ်ၡူးတချုးသံအနၤန့ၣ် ခီဖျိလၢအတံၤသကိးတဖၣ်အဃိ ကီလၢအဝဲကအိၣ်ဒီး တၢ်သူၣ်စူၤသးစူၤအဂီၢ်လီၤ. ဆိကမိၣ်ကွၢ် တၢ်သူၣ်ကိၢ်သးဂီၤလၢ ယ့ၣ်ၡူးတူၢ်ဘၣ်ဝဲ ဖဲနၤအဝဲန့ၣ်တက့ၢ်. မ့ၢ်အဝဲကအိၣ်ဒီးတၢ်သးတီ လၢလၢပှဲၤပှဲၤ တုၤလၢအသံန့ၣ်ဧါ. အဝဲမ့ၢ်တအိၣ်ဒီး တၢ်သးတီဘၣ်န့ၣ် ပှၤဟီၣ်ခိၣ်ဖိတဖၣ် တအိၣ်ဒီး တၢ်မုၢ်လၢ်လၢ ကဒိးန့ၢ်ဘၣ် တၢ်မူအထူအယိာ်လၢၤဘၣ်. (ရိမ့ၤ ၅:၁၈, ၁၉) တၢ်လၢအရ့ဒိၣ်န့ၢ် အန့ၣ်န့ၣ် အဝဲအတၢ်မၤတဖၣ်န့ၣ် မၤဘၣ်ဒိ မ့တမ့ၢ် မၤလၤကပီၤ အပၢ်အမံၤသ့လီၤ. (ယိၤဘး ၂:၄) ဖဲယ့ၣ်ၡူးအီၣ်ဟါအတၢ်အီၣ်ဒီး အတၢ်မၢဖိတဖၣ် အလီၢ်ခံကတၢၢ်အဆၢကတီၢ် အတၢ်မၢဖိတဖၣ် တဲအါလိာ်အသးလၢ “မတၤမတၤ လၢအကျါ ကဘၣ်တၢ်ပာ်အီၤ လၢအဒိၣ်ကတၢၢ်” လဲၣ်န့ၣ်လီၤ. ဘၣ်ဃးဒီး တၢ်ဂ့ၢ်တခါအံၤန့ၣ် ယ့ၣ်ၡူးဘှီဘၣ်ထီၣ်က့ၤဝဲ အဝဲသ့ၣ် တဘျုးဘျီလံ. တကးဒံးဘၣ် ဖဲနံၤအဝဲန့ၣ် ဟါခီလီၤသီသီအခါ ယ့ၣ်ၡူးဘှီဘၣ်ထီၣ်က့ၤ အဝဲသ့ၣ် ခီဖျိလၢအသ့န့ၢ် အဝဲသ့ၣ်အခီၣ်လီၤ. ဘၣ်ဆၣ် ဖဲအဝဲသ့ၣ် တဲအါလိာ်အသး လၢနၤဝဲန့ၣ်အခါ ယ့ၣ်ၡူးတသးထီၣ်တၢ်ဘၣ်. ယ့ၣ်ၡူးတဲတၢ်ဒီးအဝဲသ့ၣ် မုာ်မုာ်ခုၣ်ခုၣ်လီၤ. ဘၣ်ဆၣ် အလီၢ်မ့ၢ်အိၣ်လၢ ကဘၣ်သိၣ်ဝဲသီဝဲ အပျဲၢ်အဘီၣ်န့ၣ် မၤဝဲလီၤတံၢ်လီၤဆဲး ဒီးလၢတၢ်သးကညီၤအပူၤလီၤ. အဃိ ဟ့ၣ်ဝဲတၢ်အဒိ ဒီးတဲနၢ်ပၢၢ်ကဒီးအပျဲၢ်အဘီၣ်တဖၣ်လၢ အဝဲသ့ၣ်ကြၢးအိၣ်ဒီး တၢ်ပာ်သူၣ်ပာ်သး ဒ်လဲၣ်န့ၣ်လီၤ. ဒီးယ့ၣ်ၡူးပတြၢၤ အတံၤသကိးတဖၣ်အံၤ ခီဖျိလၢ အဝဲသ့ၣ်ဆီၣ်ထွဲမၤစၢၤအီၤ လၢတၢ်သးတီအပူၤအဃိလီၤ.—လူၤကၣ် ၂၂:၂၄-၂၈; ယိၤဟၣ် ၁၃:၁-၅, ၁၂-၁၅.
၁၇ နမ့ၢ်ထံၣ်ဘၣ်ဒီး တၢ်အိၣ်အသးဒ်န့ၣ်န့ၣ် နကမၤဒ်လဲၣ်. ပမ့ၢ်အိၣ်ဒီး တၢ်သူၣ်ကိၢ်သးဂီၤဒၣ်လဲာ် ပကဘၣ်ကွၢ်လိမၤဒိး ယ့ၣ်ၡူးဒီး အိၣ်ဒီးတၢ်သးကညီၤ ဒ်သိးဒီးအီၤလီၤ. ပကဘၣ်သးအိၣ် ဒိကနၣ် ယဟိဝၤယွၤ အတၢ်မၤလိာ် လၢအမ့ၢ် “ဝံသးစူၤလိာ်သုသး” တက့ၢ်န့ၣ်လီၤ. (ကလီးစဲ ၃:၁၃) ပမ့ၢ်သ့ၣ်နီၣ်ထီၣ်လၢ ပဝဲခဲလၢာ် ပမၤသးထီၣ်ဘၣ်ပှၤဂၤ ခီဖျိလၢပတၢ်ကတိၤ ဒီးပတၢ်မၤန့ၣ် ပကအဲၣ်ဒိးဒိကနၣ် ကစၢ်ယွၤ အတၢ်သိၣ်တၢ်သီအံၤလီၤ. (ကတိၤဒိ ၁၂:၁၈; ယၤကိာ် ၃:၂, ၅) ဒီးဖဲနထံၣ် ပှၤဂၤအတၢ်ဂ့ၤတၢ်ဝါအခါ ဂုာ်ကျဲးစၢး ပတြၢၤအီၤတက့ၢ်.—အ့းဖ့းစူး ၄:၂၉.
ဘၣ်မနုၤအဃိ ပကဘၣ်အိၣ်ဒီး တၢ်သူၣ်စူၤသးစူၤ ထီဘိလဲၣ်
၁၈. ဒ်သိးပှၤလၢအအိၣ်ဒီး တၢ်သူၣ်စူၤသးစူၤတဖၣ် ဆၢတဲာ်တၢ်လၢအဘၣ် ကသ့အဂီၢ် ယဟိဝၤယွၤ မၤစၢၤအဝဲသ့ၣ်ဒ်လဲၣ်, ဘၣ်ဆၣ် အဝဲသ့ၣ် ကဘၣ်မၤဝဲ မနုၤလဲၣ်.
၁၈ ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ပဆၢတဲာ်တၢ်လၢအဘၣ် ကသ့အါထီၣ်ဝဲလီၤ. ဖဲပကဘၣ်ဆၢတဲာ်တၢ် ကီကီခဲခဲအခါ ပမ့ၢ်အိၣ်ဒီးတၢ်သူၣ်စူၤသးစူၤမး ယဟိဝၤယွၤ ကမၤစၢၤပှၤ ဒ်သိးပဆၢတဲာ်တၢ်လၢအဘၣ် ကသ့အဂီၢ်လီၤ. အဝဲအၢၣ်လီၤဝဲလၢ ကဒိကနၣ်ဝဲ “ပှၤလၢအဘၣ်နးဘၣ်ဖှီၣ် [“အသူၣ်စူၤသးစူၤ” NWT] အဆၢတၢ်” လီၤ. (စံးထီၣ်ပတြၢၤ ၁၀:၁၇) တမ့ၢ်ထဲ အဝဲကဒိကနၣ်ဝဲ တခါဧိၤဘၣ်. လံာ်စီဆှံ အၢၣ်လီၤဝဲလၢ ကစၢ်ယွၤ “ဒုးနဲၣ်ပှၤအသးစူၤတဖၣ် လၢအကျဲလီၤ.” (စံးထီၣ်ပတြၢၤ ၂၅:၉) ယဟိဝၤယွၤသူဝဲ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” ဒီးကတဲာ်ကတီၤန့ၢ်ပှၤ တၢ်ဟံးစုနဲၣ်ကျဲလၢ လံာ်စီဆှံပူၤ, လံာ်လဲၢ်တဖၣ်,d တၢ်ဂီၤမူတဖၣ် ဒီးတၢ်အိၣ်ဖှိၣ်တဖၣ်န့ၣ်လီၤ. (မးသဲ ၂၄:၄၅-၄၇) ဘၣ်ဆၣ် ပကဘၣ်တူၢ်လိာ် ယဟိဝၤယွၤအတၢ်မၤစၢၤ လၢတၢ်ဆီၣ်လီၤသးအပူၤ ဒီးပကဘၣ်အၢၣ်လီၤတူၢ်လိာ်လၢ ပလိၣ်ဘၣ်တၢ်မၤစၢၤ ခီဖျိပဃုသ့ၣ်ညါ တၢ်ဂ့ၢ်တၢ်ကျိၤတဖၣ်လၢ ယဟိဝၤယွၤ ကတဲာ်ကတီၤန့ၢ်ပှၤတဖၣ် ဒီးမၤထွဲအီၤလၢ တၢ်သူၣ်အိၣ်သးအိၣ်အပူၤလီၤ.
၁၉-၂၁ လၢကၤဒ့ၣ်န့ၣ် စီၤမိၤၡ့မၤဘၣ် တၢ်ကမၣ်မနုၤလဲၣ် ဒီးပန့ၢ်ဘၣ် တၢ်မၤလိမနုၤလဲၣ်.
၁၉ ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ကမၤစၢၤပှၤလၢ ပကဟးဆှဲး တၢ်မၤကမၣ်တၢ်လီၤ. ဆိကမိၣ်ကွၢ်ကဒီး စီၤမိၤၡ့အဂ့ၢ်တက့ၢ်. ပှၤအံၣ်စရ့လးဖိတဖၣ် လဲၤတၢ်လၢ ပှၢ်မုၢ်ကနၢအပူၤကီကီခဲခဲ ဒီးဖဲအနံၣ် ၄၀ ဘူးကပှဲၤထီၣ်အခါ စီၤမိၤၡ့ အတၢ်သူၣ်စူၤသးစူၤ လီၤမၢ်ကွံာ်ဝဲလီၤ. ဖျါလၢအဒီပုၢ်ဝဲၢ်မုၣ်လၢ အမၤပူၤဖျဲး အသးသမူလၢ ကီၢ်အဲၤကူပတူးအပူၤန့ၣ် သံသဒၣ်ကွံာ်အီၤဒီး ဘၣ်တၢ်ခူၣ်လီၤအီၤလၢ ကၤဒ့ၣ်လီၤ. တကးဒံးဘၣ် ပှၤအံၣ်စရ့လးဖိတဖၣ် ကဒူးကဒ့ၣ်တၢ်လၢ ပှၤတကွၢ်ထွဲအီၤဂ့ၤဂ့ၤဘၣ်. ဖဲန့ၣ်အဆၢကတီၢ် အဝဲသ့ၣ် “ထိၣ်အ့ၣ်လိာ်ဆိးက့လိာ်အသးဒီး စီၤမိၤၡ့” လၢထံတအိၣ်ဘၣ်အဃိလီၤ. ယဟိဝၤယွၤဟ့ၣ် စီၤမိၤၡ့တၢ်စိတၢ်ကမီၤလၢ ကမၤတၢ်လီၤလးအါမံၤ ဘၣ်ဆၣ်စီၤမိၤၡ့ တကွၢ်လီၤထဲ အနီၢ်ကစၢ်အဘျုးဘၣ်ဒီး တီခိၣ်ရိၤမဲအဝဲသ့ၣ် သနာ်က့ အဝဲသ့ၣ် ကဒူးကဒ့ၣ်တၢ်ဒံးလီၤ. အဝဲသ့ၣ် ကဒူးကဒ့ၣ်တၢ်လၢ ထံတအိၣ်အဃိ တကးဒံးဘၣ် ကဒူးကဒ့ၣ်တၢ်လၢ စီၤမိၤၡ့အလိၤလီၤ. အဝဲသ့ၣ်တဲဝဲလၢ ခီဖျိစီၤမိၤၡ့အတၢ်ကမၣ်အဃိ အဝဲသ့ၣ် ဘၣ်လီၤဒိထံလီၤ.—၄ မိၤၡ့ ၂၀:၁-၅, ၉-၁၁.
၂၀ မ့ၢ်လၢ စီၤမိၤၡ့သးထီၣ်တၢ် ဒိၣ်ဒိၣ်ကလဲာ်အဃိ အဝဲတအိၣ်ဒီး တၢ်သူၣ်စူၤသးစူၤလၢၤဘၣ်. ယဟိဝၤယွၤမၢ စီၤမိၤၡ့တဲတၢ်ဒီးလၢၢ်ဘၣ်ဆၣ် စီၤမိၤၡ့ တဲတၢ်ဒီးပှၢ်ဂီၢ်မုၢ်တဖၣ် ဆူၣ်ဆူၣ်ကိၤကိၤ ဒီးတဲဝဲလၢ အကမၤတၢ်လီၤလးလီၤ. ဝံၤဒီးအဝဲတီၢ်ဝဲလၢၢ်ခံထံၣ် ဒီးထံဟဲဟးထီၣ်ဝဲလီၤ. ခီဖျိလၢ အဝဲပာ်ထီၣ်ထီအသး ဒီးသးထီၣ်တၢ်ဒိၣ်မးအဃိ အဝဲမၤဘၣ် တၢ်ကမၣ်ဖးဒိၣ်လီၤ. (စံးထီၣ်ပတြၢၤ ၁၀၆:၃၂, ၃၃) စီၤမိၤၡ့အတၢ်သူၣ်စူၤသးစူၤ လီၤမၢ်ထဲတစိၢ်တလီၢ်ဖိ သနာ်က့ အဝဲတလဲၤနုာ်ဘၣ်ဆူ ကီၢ်တၢ်စံးပာ်အပူၤလၢၤဘၣ်.—၄ မိၤၡ့ ၂၀:၁၂.
၂၁ ပမ့ၢ်ကွၢ် တၢ်အဒိအတဲာ်အံၤန့ၣ် ပန့ၢ်ဘၣ် တၢ်မၤလိလၢ အလုၢ်ဒိၣ်ပှ့ၤဒိၣ်တဖၣ်လီၤ. အဆိကတၢၢ်န့ၣ် ပန့ၢ်ဘၣ်တၢ်မၤလိလၢ ပကဘၣ်ဂုာ်ကျဲးစၢးဒ်သိး ပကအိၣ်ဒီး တၢ်သူၣ်စူၤသးစူၤထီဘိလီၤ. ပမ့ၢ်တမၤဒ်န့ၣ်ထီဘိဘၣ်န့ၣ် လၢတၢ်တပာ်သူၣ်ပာ်သးအပူၤ ပကကဲထီၣ် ပှၤလၢအပာ်ထီၣ်ထီအသး ဒီးပကတဲကမၣ်ဘၣ်တၢ် ဒီးမၤကမၣ်ဘၣ်တၢ်လီၤ. ဒီးအဂၤတမံၤန့ၣ် ဖဲပသူၣ်ကိၢ်သးဂီၤအခါ ပကအိၣ်ဒီးတၢ်သူၣ်စူၤသးစူၤအဂီၢ် တညီဘၣ်. လၢတၢ်န့ၣ်အဃိ ဖဲပအိၣ်ဒီး တၢ်ကိၢ်တၢ်ဂီၢ်အခါ ပကဘၣ်ဂုာ်ကျဲးစၢးဒ်သိး ပကအိၣ်ဒီး တၢ်သူၣ်စူၤသးစူၤအဂီၢ်လီၤ.
၂၂-၂၃. (က) ဘၣ်မနုၤအဃိ ပကဘၣ်အိၣ်ဒီး တၢ်သူၣ်စူၤသးစူၤ ထီဘိလဲၣ်. (ခ) တၢ်ကတိၤလၢ စဖါနယၤ ၂:၃ အပူၤန့ၣ် အခီပညီအိၣ်ဒ်လဲၣ်.
၂၂ ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ပကဒိးန့ၢ်ဘၣ် တၢ်ဒီသဒၢလီၤ. တယံာ်လၢၤဘၣ်န့ၣ် ယဟိဝၤယွၤ ကမၤလီၤမၢ်ကွံာ် ပှၤအၢပှၤသီလၢ ဟီၣ်ခိၣ်ချၢလီၤ. ထဲဒၣ်ပှၤလၢ အအိၣ်ဒီး တၢ်သူၣ်စူၤသးစူၤတဖၣ်န့ၣ် ကပူၤဖျဲးဝဲလီၤ. ဖဲန့ၣ်အဆၢကတီၢ် ဟီၣ်ခိၣ်ဒီဘ့ၣ် ကပှဲၤဝဲဒီး တၢ်ဃူတၢ်ဖိးလီၤ. (စံးထီၣ်ပတြၢၤ ၃၇:၁၀, ၁၁) မ့ၢ်နကပၣ်ဃုာ်လၢ ပှၤလၢအအိၣ်ဒီး တၢ်သူၣ်စူၤသးစူၤတဖၣ်အံၤ အကျါဧါ. နမ့ၢ်မၤထွဲ ကစၢ်ယွၤအတၢ်ကတိၤဖဲ စဖါနယၤ ၂:၃ (ဖးတက့ၢ်.) အပူၤန့ၣ် နပၣ်ဃုာ်သ့ဝဲလီၤ.
၂၃ ဘၣ်မနုၤအဃိ စဖါနယၤ ၂:၃ တဲဝဲလၢ “ဘၣ်တဘၣ် သုကအိၣ်တဒၢ” လဲၣ်. တၢ်ကတိၤအံၤ အဲၣ်ဒိးတဲဝဲ ပှၤလၢအအဲၣ်ဒိးမၤ ကစၢ်ယွၤအတၢ်ဘၣ်သး ဒီးပှၤလၢအအဲၣ်အီၤတဖၣ်န့ၣ် ယဟိဝၤယွၤ ဒီသဒၢအီၤတန့ၢ်ဘၣ်န့ၣ်ဧါ. တမ့ၢ်ဒ်န့ၣ်ဘၣ်. လၢတၢ်န့ၣ်အလီၢ် အဲၣ်ဒိးတဲဝဲ ဒ်သိးပကဒိးန့ၢ်ဘၣ် တၢ်ဒီသဒၢအဂီၢ် ပကဘၣ်မၤတၢ်တမံၤမံၤလီၤ. ဆၢကတီၢ်ခဲအံၤ ပမ့ၢ်ဂုာ်ကျဲးစၢးလၢ ပကအိၣ်ဒီး တၢ်သူၣ်စူၤသးစူၤ ဒီးမၤယဟိဝၤယွၤ အတၢ်ဘၣ်သးန့ၣ်ဖဲ “ယွၤအသးထီၣ်အမုၢ်တနံၤ” ဟဲတုၤအခါ ပဒိးန့ၢ်ဘၣ် တၢ်ဒီသဒၢသ့ ဒီးပအိၣ်မူဘၣ် လီၤထူလီၤယိာ်သ့လီၤ.
တၢ်သးဝံၣ် ၁၂၀ ကွၢ်လိမၤဒိး ယ့ၣ်ၡူးအတၢ်သးစူၤ
a ပဝဲခဲလၢာ် ပတအိၣ်ဖျဲၣ်ထီၣ်ဃုာ်ဒီး တၢ်သူၣ်စူၤသးစူၤဘၣ်. ပကဘၣ်မၤအါထီၣ် တၢ်သူၣ်စူၤသးစူၤလီၤ. ဖဲပရ့ဒီး ပှၤလၢအသးဂ့ၤအခါ ပကပာ်ဖျါထီၣ် တၢ်သူၣ်စူၤသးစူၤန့ၣ်ညီဝဲလီၤ. ဘၣ်ဆၣ် ဖဲပရ့ဒီး ပှၤလၢအပာ်ထီၣ်ထီအသးအခါ ပကအိၣ်ဒီး တၢ်သူၣ်စူၤသးစူၤအဂီၢ် တညီဘၣ်. လၢတၢ်မၤလိတခါအံၤအပူၤ ပကမၤလိဘၣ်ဃးဒီ ဒ်သိးပမၤအါထီၣ် တၢ်သူၣ်စူၤသးစူၤကန့ၢ်အဂီၢ် ပကဘၣ်မၤနၢၤကွံာ် တၢ်ဂ့ၢ်ကီတနီၤလီၤ.
b တၢ်ကတိၤ အခီပညီ– တၢ်သူၣ်စူၤသးစူၤ. ပှၤလၢအအိၣ်ဒီး တၢ်သူၣ်စူၤသးစူၤန့ၣ် ရ့ဒီးပှၤဂၤလၢ တၢ်သးကညီၤအပူၤ ဒီးဖဲပှၤဂၤ ဂုာ်ကျဲးစၢး မၤအ့န့အသးအခါဒၣ်လဲာ် တသးထီၣ်တၢ်ဘၣ်. တၢ်ဆီၣ်လီၤသး. ပှၤလၢအအိၣ်ဒီး တၢ်ဆီၣ်လီၤသးန့ၣ် တပာ်ထီၣ်ထီအသး မ့တမ့ၢ် တပာ်ဒိၣ်အသးဘၣ်. အဝဲထံၣ်ဝဲလၢ ပှၤဂၤန့ၣ် ဂ့ၤဒိၣ်န့ၢ်ဒံးအီၤလီၤ. ဘၣ်ဆၣ် ဖဲပတဲလၢ ယဟိဝၤယွၤအိၣ်ဒီး တၢ်ဆီၣ်လီၤသးန့ၣ် အခီပညီမ့ၢ်ဝဲ အဝဲရ့ဒီး ပှၤလၢအပတီၢ်ဖုၣ်န့ၢ်အီၤတဖၣ် လၢတၢ်အဲၣ်တၢ်ကွံ ဒီးတၢ်သူၣ်ကညီၤသးကညီၤအပူၤလီၤ.
c ပှၤဘၤဘူၤလိၣ်ဖိတဖၣ် ယုၢ်န့ၢ်ဝဲ ပှၤဧ့ၤဘြံၤဖိသၢဂၤအံၤ အမံၤလၢ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤလီၤ.—ဒၤနံးယ့လး ၁:၇.
d အဒိ ကွၢ်တၢးထီခိးတၢ် အတၢ်မၤလိလၢအမ့ၢ် “Make Decisions That Honor God,” published in the April 15, 2011, issue of The Watchtower တက့ၢ်.
e တၢ်တဲဖျါထီၣ် တၢ်ဂီၤအခီပညီ– ယ့ၣ်ၡူးအိၣ်ဒီး တၢ်သးကညီၤ ဒီးဖဲအပျဲၢ်အဘီၣ်တဖၣ် တဲအါလိာ်အသးဝံၤအလီၢ်ခံ အဝဲဘှီဘၣ်ထီၣ်က့ၤ အဝဲသ့ၣ် လၢတၢ်သူၣ်စူၤသးစူၤအပူၤလီၤ.