“တၢ်အခ့အခါအိၣ်ဝဲလၢ” ပကဘၣ်ဖံးတၢ်မၤတၢ် ဒီးအိၣ်ဘှံးအိၣ်သါအဂီၢ်

၁. ဘၣ်ဃးဒီး တၢ်ဖံးတၢ်မၤန့ၣ်​ ပှၤအါဂၤ အတၢ်ထံၣ်အိၣ်ဒ်လဲၣ်.

ဘၣ်ဃးဒီး တၢ်ဖံးတၢ်မၤန့ၣ်​ ပှၤလၢနခိၣ်နဃၢၤတဖၣ်​ အတၢ်ထံၣ်အိၣ်ဒ်လဲၣ်. လၢထံကီၢ်အါမးန့ၣ်​ ပှၤအါဂၤမၤတၢ်မၤ ဆူၣ်န့ၢ်ဒံး အါန့ၢ်ဒံးလၢညါန့ၣ်လီၤ. ပှၤလၢအမၤတၢ် အါတလၢတဖၣ်န့ၣ်​ ညီနုၢ်အဝဲသ့ၣ်​ အတၢ်ဆၢကတီၢ်တအိၣ်လၢ ကအိၣ်ဘှံးအိၣ်သါ, ကရ့လိာ်အသးဒီး အဟံၣ်ဖိဃီဖိတဖၣ်​ ဒီးကမၤလိအါထီၣ်​ ကစၢ်ယွၤအဂ့ၢ်ဘၣ်. (စံၣ်တဲၤတဲလီၤတၢ် ၂:၂၃) ဘၣ်ဆၣ်​ ပမ့ၢ်ကွၢ်လၢအဂၤတခီန့ၣ်​ ပှၤတနီၤန့ၣ်​ ကၢၣ်ဖံးကၢၣ်မၤတၢ်အဃိ တဲပူၤဖျဲးအသးလီၤ.—ကတိၤဒိ ၂၆:၁၃, ၁၄.

၂-၃. ဘၣ်ဃးဒီး တၢ်ဖံးတၢ်မၤန့ၣ်​ ယဟိဝၤယွၤ ဒီးယ့ၣ်ၡူး ပာ်လီၤဒိဂ့ၤတဲာ်ဘၣ်​ ဒ်လဲၣ်.

^၂ လၢဟီၣ်ခိၣ်ချၢအံၤအပူၤ ပှၤတနီၤန့ၣ်​ မၤတၢ်အါတလၢ ဘၣ်ဆၣ်အဂၤတနီၤန့ၣ်​ တမၤတၢ်အါအါဘၣ်. အဃိ ဆိကမိၣ်ကွၢ်လၢ ဘၣ်ဃးဒီး တၢ်ဖံးတၢ်မၤန့ၣ်​ ယဟိဝၤယွၤ ဒီးယ့ၣ်ၡူးအတၢ်ထံၣ်​ အိၣ်ဒ်လဲၣ်န့ၣ်တက့ၢ်. ယဟိဝၤယွၤ ဖံးတၢ်မၤတၢ်မုာ် ဒိၣ်မးလီၤ. အဃိယ့ၣ်ၡူးတဲဝဲလၢ “ယပၢ်မၤတၢ်တုၤခဲကနံၣ်အံၤ, ဒီးယမၤစ့ၢ်ကီးယဲဒၣ်လီၤ.” (ယိၤဟၣ်​ ၅:၁၇) ဆိကမိၣ်ကွၢ် တၢ်ကိးမံၤဒဲးလၢ ကစၢ်ယွၤ မၤတ့ၢ်ဝဲန့ၣ်တက့ၢ်. အဝဲတ့လီၤဝဲ မူခိၣ်ကလူးတဖၣ်, ဆၣ်တဖၣ်​ ဒီးတၢ်မုၢ်တၢ်ဘိတဖၣ်​ အါအါဂီၢ်ဂီၢ်လီၤ. ဒီးလၢဟီၣ်ခိၣ်ချၢစ့ၢ်ကီး ပထံၣ်ဘၣ်​ ကစၢ်ယွၤအတၢ်ဘၣ်တ့ လၢအဃံအလၤ အါမးလီၤ. ပှၤကွဲးထါစံးထီၣ်ပတြၢၤတဲဝဲလၢ “နမၤတၢ်ဆံးအါလဲၣ်, ယွၤဧၢ. နမၤအီၤခဲလၢာ်လၢ တၢ်ကူၣ်သ့လီၤ. ဟီၣ်ခိၣ်ပှဲၤဝဲဒီး နတၢ်ဖိတၢ်လံၤလီၤ.”—စံးထီၣ်ပတြၢၤ ၁၀၄:၂၄.

^၃ ယ့ၣ်ၡူးကွၢ်လိမၤဒိးဝဲ အပၢ်လီၤ. အဝဲမၤစၢၤတၢ် ဖဲကစၢ်ယွၤ “ကတဲာ်ကတီၤမူခိၣ်” အခါလီၤ. ဒီးအဝဲအိၣ်ဒီးယဟိဝၤယွၤ “ဒ်ပှၤမၤတၢ်သ့တဂၤအသိး” လီၤ. (ကတိၤဒိ ၈:၂၇-၃၁) လၢခံဖဲယ့ၣ်ၡူး ဟဲလီၤလၢ ဟီၣ်ခိၣ်ချၢအဆၢကတီၢ် အဝဲမၤဝဲ တၢ်မၤလၢ အလီၤကမၢကမၣ်တဖၣ်လီၤ. ယ့ၣ်ၡူးတဲဝဲလၢ တၢ်မၤလၢယဟိဝၤယွၤ ဟ့ၣ်လီၤအီၤန့ၣ်​ လီၤဂာ်ဒ်သိး တၢ်အီၣ်လၢအဂီၢ် ဒီးတၢ်လၢအမၤဝဲ ကိးမံၤဒဲးန့ၣ်​ ပာ်ဖျါထီၣ်ဝဲလၢ ကစၢ်ယွၤ ဆှၢလီၤအီၤလီၤ.—ယိၤဟၣ်​ ၄:၃၄; ၅:၃၆; ၁၄:၁၀.

၄. ဘၣ်ဃးဒီး တၢ်အိၣ်ဘှံးအိၣ်သါန့ၣ်​ ပမၤလိန့ၢ် တၢ်မနုၤလၢ ယဟိဝၤယွၤ ဒီးယ့ၣ်ၡူးအအိၣ်လဲၣ်.

^၄ ယဟိဝၤယွၤ ဒီးယ့ၣ်ၡူးအဒိအတဲာ်န့ၣ်​ အဲၣ်ဒိးပာ်ဖျါဝဲလၢ ပကဘၣ်မၤတၢ် ဒီးပတဘၣ်အိၣ်ဘှံးအိၣ်သါဘၣ်န့ၣ်ဧါ. တမ့ၢ်ဒ်န့ၣ်ဘၣ်. ယဟိဝၤယွၤန့ၣ်​ တလီၤဘှံးနီတဘျီဘၣ်​ ဒီးဖဲအဝဲမၤတၢ်တမံၤမံၤ ဝံၤအခါ တလိၣ်အိၣ်ဘှံးအိၣ်သါဘၣ်. ဘၣ်ဆၣ်လံာ်စီဆှံတဲဝဲလၢ ဖဲယဟိဝၤယွၤတ့လီၤ မူခိၣ်ဒီးဟီၣ်ခိၣ်​ ဝံၤအခါ “အိၣ်ဘှံးဝဲ, ဒီးသါထီၣ်​ [“သူၣ်ဖှံသးညီ,” NWT] ဝဲလီၤ.” (၂ မိၤၡ့ ၃၁:၁၇) အဃိ ပသ့ၣ်ညါဘၣ်လၢ ယဟိဝၤယွၤ တ့လီၤတၢ်ဝံၤ အိၣ်ဘှံးအိၣ်သါ ဒီးဟံးန့ၢ်တၢ်ဆၢကတီၢ်လၢ အကသးခုလၢ တၢ်လၢအတ့လီၤဝဲတဖၣ်အဃိလီၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအဆၢကတီၢ် အဝဲမၤတၢ်ဆူၣ်ဆူၣ်​ သနာ်က့ အဝဲဟံးန့ၢ် တၢ်ဆၢကတီၢ်လၢ ကအိၣ်ဘှံးအိၣ်သါ ဒီးကအီၣ်သကိးတၢ်ဒီး အသကိးတဖၣ်လီၤ.—မးသဲ ၁၄:၁၃; လူၤကၣ်​ ၇:၃၄.

၅. ကစၢ်ယွၤ အခ့အပှၤအါဂၤ အိၣ်ဒီးတၢ်ကီတၢ်ခဲ ဒ်လဲၣ်.

^၅ လံာ်စီဆှံ ဟ့ၣ်ဂံၢ်ဟ့ၣ်ဘါဝဲ ကစၢ်ယွၤအခ့အပှၤတဖၣ်​ လၢကခုဖံးခုမၤတၢ်လီၤ. အဃိ ကစၢ်ယွၤအခ့အပှၤတဖၣ်န့ၣ်​ တဘၣ်မ့ၢ် ပှၤလၢအကၢၣ်သံကျူသံဘၣ်. လၢတၢ်န့ၣ်အလီၢ် ကဘၣ်မ့ၢ်ပှၤလၢ အမၤတၢ်ဆူၣ်ဆူၣ်လီၤ. (ကတိၤဒိ ၁၅:၁၉) ဘၣ်သ့ၣ်သ့ၣ်​ နကမၤတၢ်မၤ လၢနကလုၢ်အီၣ်လုၢ်အီ နဟံၣ်ဖိဃီဖိအဂီၢ်လီၤ. ဒီးဒ်နမ့ၢ်ခရံာ်ဖိတဂၤအသိး နအိၣ်ဒီးမူဒါလၢ နကဘၣ်စံၣ်တဲၤတဲလီၤ တၢ်သးခုကစီၣ်န့ၣ်လီၤ. ဘၣ်ဆၣ်​ နကဘၣ်ဟံးန့ၢ် တၢ်အိၣ်ဘှံးအိၣ်သါ လၢလၢပှဲၤပှဲၤလီၤ. မ့ၢ်အကီလၢ နကအိၣ်ဒီး တၢ်ဆၢကတီၢ်လၢလၢပှဲၤပှဲၤ လၢနကမၤတၢ်မၤ, ဟးစံၣ်တဲၤတဲလီၤတၢ် ဒီးအိၣ်ဘှံးအိၣ်သါအဂီၢ်ဧါ. ပကဘၣ်မၤတၢ်မၤ ထဲလဲၣ်​ ဒီးပကဘၣ်​ အိၣ်ဘှံးအိၣ်သါထဲလဲၣ်န့ၣ်​ ပသ့ၣ်ညါအီၤ ကသ့ဒ်လဲၣ်.

ဘၣ်ဃးဒီး တၢ်ဖံးတၢ်မၤတၢ် ဒီးတၢ်အိၣ်ဘှံးအိၣ်သါန့ၣ်​ ပအိၣ်ဒီးတၢ်ထံၣ်လၢ အကြၢးအဘၣ်​ ကသ့ဒ်လဲၣ်

၆. ဒ် မၢ်ကူး ၆:၃၀-၃၄ ပာ်ဖျါထီၣ်ဝဲအသိး ဘၣ်ဃးဒီး တၢ်ဖံးတၢ်မၤ ဒီးတၢ်အိၣ်ဘှံးအိၣ်သါန့ၣ်​ ယ့ၣ်ၡူးအိၣ်ဒီး တၢ်ထံၣ်လၢ အကြၢးအဘၣ်ဒ်လဲၣ်.

^၆ ဘၣ်ဃးဒီး တၢ်ဖံးတၢ်မၤန့ၣ်​ အရ့ဒိၣ်လၢ ပကအိၣ်ဒီး တၢ်ထံၣ်လၢအကြၢးအဘၣ်လီၤ. စီၤပၤၡလိၤမိၤ ကွဲးဝဲလၢ “တၢ်အခ့အခါအိၣ်ဝဲလၢ ကယဲၢ်တၢ်တမံၤလၢ်လၢ်အဂီၢ်” လီၤ. အဝဲပာ်ဖျါထီၣ်​ တၢ်ဖံးတၢ်မၤတနီၤ ဒ်သိးဒီးတၢ်သူၣ်လီၤတၢ်မုၢ်တၢ်ဘိ, တၢ်သူၣ်ထီၣ်ဘှီထီၣ်တၢ်, တၢ်ဟီၣ်, တၢ်နံၤ, တၢ်ဂဲၤကလံၣ်​ ဒီးတၢ်ဖံးတၢ်မၤအဂၤတဖၣ်လီၤ. (စံၣ်တဲၤတဲလီၤတၢ် ၃:၁-၈) တၢ်ဖံးတၢ်မၤတၢ် ဒီးတၢ်အိၣ်ဘှံးအိၣ်သါန့ၣ်​ မ့ၢ်တၢ်အရ့ဒိၣ်​ လၢပတၢ်အိၣ်မူအပူၤလီၤ. ဘၣ်ဃးဒီး တၢ်ဂ့ၢ်အံၤန့ၣ်​ ယ့ၣ်ၡူးအိၣ်ဒီး တၢ်ထံၣ်လၢအကြၢးအဘၣ်လီၤ. ဘၣ်တဘျီ တၢ်မၢဖိတဖၣ်​ ဟးစံၣ်တဲၤတဲလီၤတၢ်တုၤဒၣ်လဲာ် “အီၣ်တၢ်အဆၢကတီၢ်တအိၣ်ဘၣ်.” ဒီးဖဲအဝဲသ့ၣ်​ စံၣ်တဲၤတဲလီၤတၢ်ဝံၤ ဒီးဟဲက့ၤဝဲအခါ ယ့ၣ်ၡူးတဲဝဲလၢ “ဟဲသုကစၢ်ဒၣ်သုဝဲဆူ တၢ်တဒၢလၢ ပှၢ်မုၢ်ကနၢအလီၢ်, ဒီးအိၣ်ဘှံး တစိၢ်တလီၢ်တက့ၢ်.” (ဖး မၢ်ကူး ၆:၃၀-၃၄ တက့ၢ်.) ယ့ၣ်ၡူးဒီးအပျဲၢ်အဘီၣ်တဖၣ်​ အိၣ်ဘှံးအိၣ်သါဝဲ တချုးထီဘိဘၣ်သနာ်က့ ယ့ၣ်ၡူးသ့ၣ်ညါဝဲလၢ အဝဲသ့ၣ်​ လိၣ်ဘၣ်တၢ်အိၣ်ဘှံးအိၣ်သါလီၤ.

၇. ပမ့ၢ်ဆိကမိၣ်ထံ မုၢ်အိၣ်ဘှံးနံၤ အတၢ်သိၣ်တၢ်သီန့ၣ်​ ကမၤစၢၤပှၤဒ်လဲၣ်.

^၇ တဘျီတခီၣ်​ ပဝဲကိးဂၤဒဲးန့ၣ်​ ပကဘၣ်အိၣ်ဘှံး မ့တမ့ၢ် ပကဘၣ်​ ဆီတလဲ တၢ်လၢပမၤအီၤ လၢမုၢ်ဆ့ၣ်မုၢ်ဂီၤတနီၤလီၤ. ကစၢ်ယွၤ ပာ်လီၤန့ၢ်ပှၤ အဒိအတဲာ်ခီဖျိ အဝဲရဲၣ်လီၤကျဲၤလီၤဝဲ တၢ်တခါ လၢအခ့အပှၤ လၢပျၢၤတဖၣ်အဂီၢ်လီၤ. တၢ်ရဲၣ်တၢ်ကျဲၤအံၤမ့ၢ်ဝဲ ပှၤကဘၣ်မၤထွဲ မုၢ်အိၣ်ဘှံးနံၤ ကိးနွံဒဲးလီၤ. ပဝဲသ့ၣ်တဖၣ်န့ၣ်​ ပတအိၣ်လၢ စီၤမိၤၡ့ အတၢ်သိၣ်တၢ်သီ အဖီလာ်ဘၣ်​ ဘၣ်ဆၣ်​ ပမ့ၢ်မၤလိ တၢ်ဂ့ၢ်လၢ ဘၣ်ဃးဒီး မုၢ်အိၣ်ဘှံးနံၤန့ၣ်​ ပဒိးန့ၢ်ဘၣ်အဘျုးသ့လီၤ. ဒီးပမ့ၢ်မၤဒ်န့ၣ်န့ၣ်​ ကမၤစၢၤပှၤဒ်သိး ဘၣ်ဃးဒီး တၢ်ဖံးတၢ်မၤ ဒီးတၢ်အိၣ်ဘှံးအိၣ်သါန့ၣ်​ ပကအိၣ်ဒီး တၢ်ထံၣ်လၢအကြၢးအဘၣ်အဂီၢ်လီၤ.

မုၢ်အိၣ်ဘှံးနံၤ မ့ၢ်တၢ်ဆၢကတီၢ်လၢ ပှၤကအိၣ်ဘှံး ဒီးဘူၣ်ထီၣ်ဘါထီၣ်တၢ်အဂီၢ်

၈. ဒ် ၂ မိၤၡ့ ၃၁:၁၂-၁၅ ပာ်ဖျါထီၣ်ဝဲအသိး မုၢ်အိၣ်ဘှံးနံၤန့ၣ်​ မ့ၢ်မုၢ်နံၤလၢ ပှၤကမၤမနုၤအဂီၢ်လဲၣ်.

^၈ လံာ်စီဆှံပာ်ဖျါထီၣ်ဝဲလၢ ဖဲကစၢ်ယွၤတ့လီၤတၢ်ဃု “နံၤ” ဝံၤအလီၢ်ခံ အဝဲပာ်ပတုာ်ဝဲ အတၢ်ဘၣ်တ့ အတၢ်ဖံးတၢ်မၤ လၢဟီၣ်ခိၣ်ချၢလီၤ. (၁ မိၤၡ့ ၂:၂) ဘၣ်ဆၣ်​ ယဟိဝၤယွၤ မၤတၢ်မုာ်ဒိၣ်မးအဃိ လံာ်စီဆှံတဲဝဲလၢ အဝဲ “မၤတၢ်တုၤခဲကနံၣ်အံၤ” လီၤ. (ယိၤဟၣ်​ ၅:၁၇) ယဟိဝၤယွၤ တ့လီၤတၢ်ဃု “နံၤ” ဒီးအဝဲအိၣ်ဘှံးဝဲဖဲ နွံ “နံၤ” တနံၤ ဒီးအဝဲမၢ ပှၤအံၣ်စရ့လးဖိတဖၣ်​ အိၣ်ဘှံးလၢ မုၢ်နွံနံၤ ကိးနွံဒဲးလီၤ. ကစၢ်ယွၤတဲဝဲလၢ မုၢ်အိၣ်ဘှံးနံၤန့ၣ်​ မ့ၢ်တၢ်ပနီၣ်လၢ အဝဲဒီးပှၤအံၣ်စရ့လးဖိတဖၣ်​ အဘၢၣ်စၢၤလီၤ. မုၢ်နံၤအံၤ မ့ၢ်ဝဲ “တၢ်အိၣ်ဘှံးစီဆှံ လၢယွၤအဂီၢ်” လီၤ. (ဖး ၂ မိၤၡ့ ၃၁:၁၂-၁၅ တက့ၢ်.) ဖဲမုၢ်နံၤအဝဲန့ၣ်န့ၣ်​ ပှၤတဂၤဂ့ၤတဂၤဂ့ၤ, ဖိသၣ်မ့ၢ်ဂ့ၤ, ကုၢ်မ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တဘၣ်မၤတၢ်ဘၣ်. (၂ မိၤၡ့ ၂၀:၁၀) အဃိ ပှၤသးစၢၢ်ဆၢအါထီၣ်​ နီၢ်သးအတၢ်ဖံးတၢ်မၤတဖၣ်​ န့ၢ်ဝဲလီၤ.

၉. ဘၣ်ဃးဒီး မုၢ်အိၣ်ဘှံးနံၤန့ၣ်​ ပှၤတနီၤလၢ ယ့ၣ်ၡူးအစိၤ အိၣ်ဒီးတၢ်ထံၣ်လၢအကမၣ်​ ဒ်လဲၣ်.

^၉ မုၢ်အိၣ်ဘှံးနံၤန့ၣ်​ မ့ၢ်မုၢ်နံၤလၢအဂ့ၤ လၢကစၢ်ယွၤ အခ့အပှၤတဖၣ်အဂီၢ်လီၤ. ဖဲယ့ၣ်ၡူးအစိၤန့ၣ်​ တၢ်သိၣ်တၢ်သီလၢ တၢ်ဘူၣ်တၢ်ဘါခိၣ်နၢ်တဖၣ်​ ထုးထီၣ်ဝဲ လၢပှၤကဘၣ်မၤထွဲအီၤ လၢမုၢ်အိၣ်ဘှံးနံၤန့ၣ်​ မ့ၢ်တၢ်လၢ အဃံးဒိၣ်မးလီၤ. အဝဲသ့ၣ်​ တဲဝဲလၢ ပှၤမ့ၢ်ဒဲးအီၣ်ဘုသၣ်​ မ့တမ့ၢ် မၤဘျါပှၤဆါ ဖဲမုၢ်အိၣ်ဘှံးနံၤန့ၣ်​ မ့ၢ်တၢ်လၢအကမၣ်လီၤ. (မၢ်ကူး ၂:၂၃-၂၇; ၃:၂-၅) တၢ်သိၣ်တၢ်သီဒ်အံၤတဖၣ်န့ၣ်​ တဘၣ်ကစၢ်ယွၤအသးဘၣ်. ဒီးယ့ၣ်ၡူးတဲနၢ်ပၢၢ် ပှၤဒိကနၣ်တၢ်ဖိတဖၣ်​ လၢတၢ်ဂ့ၢ်အံၤၡဲၡဲလီၤ.

၁၀. ဒ် မးသဲ ၁၂:၉-၁၂ ပာ်ဖျါထီၣ်ဝဲအသိး ဘၣ်ဃးဒီး မုၢ်အိၣ်ဘှံးနံၤန့ၣ်​ ယ့ၣ်ၡူးအတၢ်ထံၣ်​ အိၣ်ဒ်လဲၣ်.

^၁၀ မ့ၢ်လၢယ့ၣ်ၡူး ဒီးအပျဲၢ်အဘီၣ်လၢ အမ့ၢ်ပှၤယူဒၤဖိတဖၣ်န့ၣ်​ အိၣ်လၢစီၤမိၤၡ့ အတၢ်သိၣ်တၢ်သီ အဖီလာ်အဃိ အဝဲသ့ၣ်​ မၤထွဲဝဲ မုၢ်အိၣ်ဘှံးနံၤ အတၢ်သိၣ်တၢ်သီလီၤ.b ဘၣ်ဆၣ်​ ယ့ၣ်ၡူးအတၢ်ကတိၤ ဒီးအတၢ်မၤအါမးန့ၣ်​ ပာ်ဖျါထီၣ်ဝဲလၢ ပှၤမ့ၢ်မၤတၢ်လၢအဂ့ၤ ဒီးတၢ်လၢအကဲဘျုးလၢ ပှၤဂၤအဂီၢ် ဖဲမုၢ်အိၣ်ဘှံးနံၤန့ၣ်​ တမ့ၢ်တၢ်လၢ အကမၣ်ဘၣ်. အဝဲတဲဝဲပျီပျီလၢ “မုၢ်အိၣ်ဘှံးအနံၤန့ၣ်, ပှၤဂ့ၤမၤတၢ်ဂ့ၤလီၤ.” (ဖး မးသဲ ၁၂:၉-၁၂ တက့ၢ်.) ပှၤမ့ၢ်ပာ်ဖျါထီၣ်​ တၢ်အဲၣ်ဒီးမၤစၢၤပှၤဂၤ ဖဲမုၢ်အိၣ်ဘှံးနံၤန့ၣ်​ အဝဲတထံၣ်ဝဲလၢ အမ့ၢ်တၢ်လၢအကမၣ်ဘၣ်. တၢ်လၢယ့ၣ်ၡူး မၤဝဲတဖၣ်န့ၣ်​ ပာ်ဖျါထီၣ်ဝဲလၢ ယ့ၣ်ၡူးသ့ၣ်ညါဝဲလၢ ဘၣ်မနုၤအဃိ ယဟိဝၤယွၤမၢ အခ့အပှၤတဖၣ်​ အိၣ်ဘှံးဖဲ မုၢ်အိၣ်ဘှံးနံၤလဲၣ်န့ၣ်လီၤ. ဖဲမုၢ်အိၣ်ဘှံးနံၤန့ၣ်​ ကစၢ်ယွၤအခ့အပှၤတဖၣ်​ အိၣ်ဘှံးလၢ အတၢ်ဖံးတၢ်မၤအဃိ အဝဲသ့ၣ်​ သးစၢၢ်ဆၢတၢ်လၢ နီၢ်သးတခီ သ့ဝဲလီၤ. ယ့ၣ်ၡူးဒိၣ်ထီၣ်ဘၣ်လၢ ဟံၣ်ဖိဃီဖိလၢ အဘူၣ်ထီၣ်ဘါထီၣ်တၢ် ဖဲမုၢ်အိၣ်ဘှံးနံၤန့ၣ်လီၤ. လံာ်စီဆှံ ပာ်ဖျါထီၣ်ဝဲလၢ ဖဲယ့ၣ်ၡူးအိၣ်လၢ လၢဝ့ၢ်နစၤရ့းအခါ “ဒ်အလုၢ်အလၢ်အသိးန့ၣ်, ဘၣ်အိၣ်ဘှံးအနံၤဒီး, လဲၤနုာ်ဆူဘူၣ်ဘျီၣ်ပူၤ, ဒီးဂဲၤဆၢထၢၣ်ဝဲဒ်သိး အကဖးလံာ်လီၤ.”—လူၤကၣ်​ ၄:၁၅-၁၉.

ဘၣ်ဃးဒီး တၢ်ဖံးတၢ်မၤန့ၣ်​ နအိၣ်ဒီး တၢ်ပာ်သူၣ်ပာ်သးဒ်လဲၣ်

၁၁. ဘၣ်ဃးဒီး တၢ်ဖံးတၢ်မၤန့ၣ်​ ယ့ၣ်ၡူးထံၣ်ဘၣ်​ မတၤအဒိအတဲာ် လၢအဂ့ၤလဲၣ်.

^၁၁ စီၤယိၤသး ကသိၣ်လိဝဲယ့ၣ်ၡူးလၢ လဲးသမါ အတၢ်ဖံးတၢ်မၤ ဒီးကစၢ်ယွၤ အတၢ်ထံၣ်လၢ ဘၣ်ဃးဒီး တၢ်ဖံးတၢ်မၤန့ၣ်လီၤ. (မးသဲ ၁၃:၅၅, ၅၆) ဒီးတနံၤဘၣ်တနံၤန့ၣ်​ ယ့ၣ်ၡူးကထံၣ်ဘၣ်လၢ စီၤယိၤသး မၤတၢ်ဆူၣ်ဆူၣ်​ လၢကလုၢ်အီၣ်လုၢ်အီ အဟံၣ်ဖိဃီဖိ ဖးဒိၣ်တဒူၣ်အဂီၢ်လီၤ. လၢခံန့ၣ်​ ယ့ၣ်ၡူးတဲ အပျဲၢ်အဘီၣ်တဖၣ်လၢ “ပှၤမၤတၢ်ဖိန့ၣ်​ ဂ့ၤန့ၢ်ဘၣ်အဘူးအလဲ” လီၤ. (လူၤကၣ်​ ၁၀:၇) အဃိ ပှၤကဘၣ်မၤတၢ်ဆူၣ်ဆူၣ်​ ဒ်လဲၣ်န့ၣ်​ ယ့ၣ်ၡူးသ့ၣ်ညါဝဲလီၤ.

၁၂. လံာ်စီဆှံအဆၢမနုၤတဖၣ်​ ပာ်ဖျါထီၣ်ဝဲ ပှၤဘၣ်မၤတၢ်ဆူၣ်ဆူၣ်​ အဂ့ၢ်န့ၣ်လဲၣ်.

^၁၂ တၢ်မၢဖိပီလူးစ့ၢ်ကီး သ့ၣ်ညါဝဲလၢ အကဘၣ်မၤတၢ်ဆူၣ်ဆူၣ်​ ဒ်လဲၣ်န့ၣ်လီၤ. အတၢ်မၤ လၢအရ့ဒိၣ်ကတၢၢ်န့ၣ်မ့ၢ်ဝဲ အကတဲဘၣ်ပှၤဂၤလၢ ယ့ၣ်ၡူးအဂ့ၢ် ဒီးတၢ်လၢယ့ၣ်ၡူး သိၣ်လိဝဲတဖၣ်အဂ့ၢ်လီၤ. ဘၣ်ဆၣ်​ အဝဲမၤတၢ်မၤလၢ ကလုၢ်အီၣ်လုၢ်အီ အသးသမူအဂီၢ်စ့ၢ်ကီးလီၤ. အဃိ ပှၤသ့းစၤလနံဖိတဖၣ်​ သ့ၣ်ညါဝဲလၢ စီၤပီလူး မၤတၢ်လၢ “မုၢ်ဆါဒီးလၢမုၢ်နၤ” ‘တုၤတၢ်ဘှံးအသး’ ဒ်သိးအတကဲထီၣ်​ “တၢ်ဃၢ” လၢအဝဲသ့ၣ်အဂီၢ် နီတဂၤတဂ့ၤအဂီၢ်လီၤ. (၂ သ့းစၤလနံ ၃:၈; မၤတၢ် ၂၀:၃၄, ၃၅) ဖဲစီၤပီလူး ကွဲးဝဲဘၣ်ဃးဒီး အတၢ်ဖံးတၢ်မၤအခါ ဘၣ်သ့ၣ်သ့ၣ်​ အဝဲကအဲၣ်ဒိးတဲဝဲ ပှၤဆးဒဲအတၢ်မၤ လၢအမၤဝဲန့ၣ်လီၤ. ဖဲစီၤပီလူးအိၣ်လၢ ဝ့ၢ်ကရံၣ်သူးအပူၤအခါ အဝဲအိၣ်ဒီး နီၢ်ပြံစကံးလၤ ဒီးစီၤအကူလၤဒီး “မၤတၢ်” ဒီးအဝဲသ့ၣ်​ မ့ၢ်လၢ အဝဲသ့ၣ်​ “မ့ၢ်ပှၤမၤတၢ်ဖိလၢအဆးဒဲ” အဃိလီၤ. စီၤပီလူး မၤတၢ်လၢ “မုၢ်ဆါဒီးလၢမုၢ်နၤ” န့ၣ်အခီပညီတမ့ၢ်လၢ အဝဲမၤတၢ်ဒီး တအိၣ်ဘှံးအိၣ်သါဘၣ်န့ၣ်ဘၣ်. အဒိ ဖဲမုၢ်အိၣ်ဘှံးနံၤန့ၣ်​ အဝဲတဆးဒဲဘၣ်​ ဒီးဖဲမုၢ်နံၤအဝဲန့ၣ်န့ၣ်​ ပှၤယူၤဒၤဖိတဖၣ်စ့ၢ်ကီး တမၤတၢ်မၤဘၣ်အဃိ အဝဲသူဝဲ တၢ်ခွဲးတၢ်ယာ်အံၤလၢ ကစံၣ်တဲၤတဲလီၤ အဝဲသ့ၣ်အဂီၢ်လီၤ.—မၤတၢ် ၁၃:၁၄-၁၆, ၄၂-၄၄; ၁၆:၁၃; ၁၈:၁-၄.

၁၃. ပမၤလိန့ၢ်တၢ်မနုၤလၢ စီၤပီလူး အအိၣ်လဲၣ်.

^၁၃ တၢ်မၢဖိပီလူး ပာ်လီၤဝဲ ဒိဂ့ၤတဲာ်ဘၣ်​ လၢပဂီၢ်လီၤ. အဝဲဘၣ်မၤဝဲ နီၢ်ခိအတၢ်ဖံးတၢ်မၤ ဘၣ်ဆၣ်​ အဝဲပၣ်ဃုာ်လၢ “ယွၤအတၢ်သးခုအကစီၣ်” အတၢ်မၤပူၤ ထီဘိလီၤ. (ရိမ့ၤ ၁၅:၁၆; ၂ ကရံၣ်သူး ၁၁:၂၃) ဒီးအဝဲ ဟ့ၣ်ဂံၢ်ဟ့ၣ်ဘါပှၤဂၤ လၢကစံၣ်တဲၤတဲလီၤတၢ် ထီဘိလီၤ. အဃိ နီၢ်ပြံစကံးလၤ ဒီးစီၤအကူလၤ ‘မၤဃုာ်တၢ်ဒီးအီၤ လၢယ့ၣ်ၡူးခရံာ်အပူၤ’ လီၤ. (ရိမ့ၤ ၁၂:၁၁; ၁၆:၃) စီၤပီလူးဟ့ၣ်ဂံၢ်ဟ့ၣ်ဘါ ပှၤကရံၣ်သူးဖိတဖၣ်လၢက “မၤတၢ်အါအါဂီၢ်ဂီၢ် လၢကစၢ်အတၢ်မၤ” အပူၤလီၤ. (၁ ကရံၣ်သူး ၁၅:၅၈; ၂ ကရံၣ်သူး ၉:၈) ယဟိဝၤယွၤ ထိၣ်ဟူးထိၣ်ဂဲၤထီၣ်​ တၢ်မၢဖိပီလူး ဒ်သိးကကွဲးလီၤဝဲလၢ “ပှၤလၢအတမၤဘၣ်တၢ်တဂၤဂၤန့ၣ်, မ်အသုတအီၣ်စ့ၢ်ကီးတၢ်တဂ့ၤလီၤ.”—၂ သ့းစၤလနံ ၃:၁၀.

၁၄. ယ့ၣ်ၡူးအတၢ်ကတိၤဖဲ ယိၤဟၣ်​ ၁၄:၁၂ န့ၣ်အဲၣ်ဒိးတဲဝဲ တၢ်မနုၤလဲၣ်.

^၁၄ ဆၢကတီၢ်ခဲအံၤ တၢ်မၤလၢအရ့ဒိၣ်ကတၢၢ်န့ၣ်မ့ၢ်ဝဲ ပစံၣ်တဲၤတဲလီၤတၢ် ဒီးဒုးကဲထီၣ်ပှၤဂၤ လၢခရံာ်အပျဲၢ်အဘီၣ်လီၤ. ယ့ၣ်ၡူးတဲဆိပာ်စၢၤဝဲလၢ အပျဲၢ်အဘီၣ်တဖၣ်​ ကမၤတၢ်အါန့ၢ်ဒံးအီၤလီၤ. (ဖး ယိၤဟၣ်​ ၁၄:၁၂ တက့ၢ်.) အဝဲတအဲၣ်ဒိးတဲဝဲလၢ ပကမၤတၢ်လီၤလး ဒ်သိးဒီးအီၤန့ၣ်ဘၣ်. လၢတၢ်န့ၣ်အလီၢ် အဝဲအဲၣ်ဒိးတဲဝဲလၢ အပျဲၢ်အဘီၣ်တဖၣ်​ ကစံၣ်တဲၤတဲလီၤတၢ် ဒီးသိၣ်လိပှၤအါဂၤ လၢတၢ်လီၢ်အါတီၤ အါန့ၢ်ဒံးအီၤ ဒီးအဝဲသ့ၣ်​ ကမၤဘၣ်ဝဲ တၢ်မၤအံၤ ယံာ်န့ၢ်ဒံးအီၤလီၤ.

၁၅. ပကြၢးသံကွၢ်လီၤပသး လၢတၢ်သံကွၢ် မနုၤတဖၣ်လဲၣ်​ ဒီးဘၣ်မနုၤအဃိလဲၣ်.

^၁၅ နမ့ၢ်မၤတၢ်မၤ တခါခါန့ၣ်​ သံကွၢ်လီၤနသးလၢ ‘လၢယတၢ်မၤလီၢ်န့ၣ်​ ပှၤထံၣ်ယၤဒ် ပှၤလၢအမၤတၢ်ဆူၣ်တဂၤဧါ. မ့ၢ်ယမၤဝံၤတၢ်မၤ ဘၣ်ဆၢဘၣ်ကတီၢ် ဒီးမၤအီၤလၢ အဂ့ၤကတၢၢ်ဧါ.’ နမ့မ့ၢ်ပှၤလၢ အဂုာ်ကျဲးစၢးမၤတၢ် ဒီးမၤဝံၤတၢ်မၤ ဘၣ်ဆၢဘၣ်ကတီၢ်န့ၣ်​ နတၢ်မၤခိၣ်​ ကနာ်န့ၢ်နၤလီၤ. ဒီးပှၤလၢနတၢ်မၤလီၢ်တဖၣ်​ ကအဲၣ်ဒိး ဒိကနၣ်အါထီၣ်​ တၢ်သးခုကစီၣ်လီၤ. ဘၣ်ဃးဒီး တၢ်စံၣ်တဲၤတဲလီၤတၢ်မၤ ဒီးတၢ်သိၣ်လိနဲၣ်လိတၢ်စ့ၢ်ကီး နကြၢးသံကွၢ်လီၤနသးလၢ ‘မ့ၢ်ပှၤထံၣ်ယၤဒ် ယမ့ၢ်ပှၤလၢ အသးဆူၣ်လၢ ကစၢ်ယွၤ အတၢ်ဖံးတၢ်မၤ အပူၤဧါ, ဖဲယထံၣ်လိာ်သးဒီးပှၤဂၤ အဆိကတၢၢ်တဘျီအခါ ယကဘၣ်စံၣ်တဲၤတဲလီၤအီၤ ဒ်လဲၣ်န့ၣ်​ မ့ၢ်ယကတဲာ်ကတီၤယသး ဂ့ၤဂ့ၤဧါ, မ့ၢ်ယက့ၤကဒါက့ၤဆူ ပှၤလၢအသးအိၣ်​ တၢ်မ့ၢ်တၢ်တီတဖၣ်အအိၣ်​ လၢအဆိချ့ဧါ ဒီးမ့ၢ်ယပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ လၢကျဲအါဘိဧါ.’ နမ့ၢ်မၤ တၢ်သ့ၣ်တဖၣ်အံၤန့ၣ်​ နကဒိးန့ၢ်ဘၣ်အါထီၣ်​ တၢ်သးခုလီၤ.

ဘၣ်ဃးဒီး တၢ်အိၣ်ဘှံးအိၣ်သါန့ၣ်​ နအိၣ်ဒီး တၢ်ပာ်သူၣ်ပာ်သးဒ်လဲၣ်

၁၆. ဘၣ်ဃးဒီး တၢ်အိၣ်ဘှံးအိၣ်သါန့ၣ်​ ယ့ၣ်ၡူးဒီး အတၢ်မၢဖိတဖၣ်​ အိၣ်ဒီးတၢ်ထံၣ်ဒ်လဲၣ်​ ဒီးအဝဲသ့ၣ်​ အတၢ်ထံၣ်န့ၣ်​ လီၤဆီလိာ်အသးဒီး ပှၤအါဂၤလၢ မုၢ်မဆါတနံၤအံၤ ဒ်လဲၣ်.

^၁၆ ယ့ၣ်ၡူးသ့ၣ်ညါဝဲလၢ တဘျီတခီၣ်​ အဝဲဒီးအတၢ်မၢဖိတဖၣ်န့ၣ်​ ကဘၣ်အိၣ်ဘှံးအိၣ်သါလီၤ. ဘၣ်ဆၣ်​ ပှၤအါဂၤဖဲယ့ၣ်ၡူးအစိၤ ဒီးလၢပစိၤခဲအံၤန့ၣ်​ လီၤဂာ်ဒ် ပှၤကဲဒိၣ်တဂၤလၢ ယ့ၣ်ၡူးဟ့ၣ်တၢ်အဒိ အပူၤလီၤ. ပှၤတဂၤအံၤ တဲလီၤအသးလၢ “အိၣ်ဘှံးဒီးအီၣ်တၢ်အီတၢ်, ဒီးမုာ်လၤတၢ်တက့ၢ်.” (လူၤကၣ်​ ၁၂:၁၉; ၂ တံၤမသ့း ၃:၄) အဝဲဆိကမိၣ်ဝဲလၢ တၢ်အရ့ဒိၣ်ကတၢၢ် လၢအတၢ်အိၣ်မူပူၤန့ၣ်​ မ့ၢ်ဝဲတၢ်အိၣ်ဘှံးအိၣ်သါ ဒီးတၢ်သူၣ်ဖှံသးညီလီၤ. မ့မ့ၢ်ယ့ၣ်ၡူး ဒီးအတၢ်မၢဖိတဖၣ်န့ၣ်​ တပာ်ဝဲ တၢ်မၤမုာ်မၤဖှံသး ဒ်တၢ်လၢအရ့ဒိၣ်ကတၢၢ် လၢအတၢ်အိၣ်မူပူၤဘၣ်.

၁၇. ဖဲပအိၣ်ဘှံးလၢတၢ်မၤ အဆၢကတီၢ် ပအဲၣ်ဒိးသူ ပတၢ်ဆၢကတီၢ် ဒ်လဲၣ်.

^၁၇ မုၢ်မဆါတနံၤအံၤ ပကွၢ်လိမၤဒိးယ့ၣ်ၡူးခီဖျိ ဖဲပတမၤတၢ်မၤ အဆၢကတီၢ်န့ၣ်​ ပကအိၣ်ဘှံးအိၣ်သါ တကးဒံးဘၣ်​ ပကစံၣ်တဲၤတဲလီၤပှၤဂၤ ဒီးထီၣ်ခရံာ်ဖိ အတၢ်အိၣ်ဖှိၣ်တဖၣ်န့ၣ်လီၤ. တကးဒံးဘၣ်​ တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်​ ဒီးတၢ်ထီၣ်တၢ်အိၣ်ဖှိၣ်န့ၣ်​ ပထံၣ်အီၤဒ် တၢ်လၢအရ့ဒိၣ်အဃိ တသ့ဖဲအသ့ ပဆဲးမၤတၢ်သ့ၣ်တဖၣ်အံၤ လၢယဟိဝၤယွၤအဂီၢ်လီၤ. (ဧ့ၤဘြံၤ ၁၀:၂၄, ၂၅) ဖဲပဟးကသုၣ်ကသီအခါဒၣ်လဲာ် ပမ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤန့ၣ်​ ပဆဲးမၤ နီၢ်သးအတၢ်ဖံးတၢ်မၤ ဒ်သိးဒီး တၢ်ထီၣ်တၢ်အိၣ်ဖှိၣ်​ ဒီးပဃုတၢ်ခွဲးတၢ်ယာ် လၢပကတဲဘၣ်ပှၤဂၤလၢ လံာ်စီဆှံအတၢ်မ့ၢ်တၢ်တီအဂ့ၢ်လီၤ.—၂ တံၤမသ့း ၄:၂.

၁၈. ပစီၤပၤယ့ၣ်ၡူး အဲၣ်ဒိးလၢ ပကမၤတၢ်မနုၤလဲၣ်.

^၁၈ ပစီၤပၤယ့ၣ်ၡူးန့ၣ်​ တဃ့ပှၤလၢ ပကမၤတၢ်အါန့ၢ်ဒံး ပမၤအီၤသ့ဘၣ်. တကးဒံးဘၣ်​ ဘၣ်ဃးဒီး တၢ်ဖံးတၢ်မၤ ဒီးတၢ်အိၣ်ဘှံးအိၣ်သါန့ၣ်​ အဝဲမၤစၢၤပှၤ ဒ်သိးပကအိၣ်ဒီး တၢ်ထံၣ်လၢအကြၢးအဘၣ်အဃိ ပသးခုဒိၣ်မးလီၤ. (ဧ့ၤဘြံၤ ၄:၁၅) အဝဲအဲၣ်ဒိးလၢ ပကအိၣ်ဘှံးအိၣ်သါလီၤ. ဘၣ်ဆၣ်​ အဝဲအဲၣ်ဒိးစ့ၢ်ကီးဝဲလၢ ပကမၤတၢ်မၤလၢ နီၢ်ခိအတၢ်လိၣ်ဘၣ်အဂီၢ် ဒီးပကလဲၤဒုးကဲထီၣ်​ ပှၤဂၤလၢအပျဲၢ်အဘီၣ်လီၤ. လၢတၢ်မၤလိ လၢခံတခါန့ၣ်​ ပကမၤလိဘၣ်​ တၢ်ဂ့ၢ်လၢ ဘၣ်ဃးဒီး ယ့ၣ်ၡူးမၤထူၣ်ဖျဲးထီၣ်ပှၤလၢ ကုၢ်အလီၢ် ဒ်လဲၣ်န့ၣ်လီၤ.