တၢ်မၤလိ ၅၁
မ့ၢ်နသ့ၣ်ညါ ယဟိဝၤယွၤ ဂ့ၤဂ့ၤဧါ
“ပှၤလၢအသ့ၣ်ညါနမံၤတဖၣ်န့ၣ် ကသန့ၤအသးလၢနၤလီၤ. အဂ့ၢ်ဒ်အံၤ, နတလဲၤသဒၣ်ဘၣ် ပှၤလၢအဃုနၤဘၣ်, ယွၤဧၢ.”—စံးထီၣ်ပတြၢၤ ၉:၁၀.
တၢ်သးဝံၣ် ၅၆ နာ်တၢ်မ့ၢ်တၢ်တီ
တၢ်မၤလိအံၤ အတၢ်တိာ်ပာ်a
၁-၂. အဲကၠလံတိး အဒိအတဲာ် သိၣ်လိပှၤလၢ ပကဘၣ်မၤတၢ်မနုၤလဲၣ်.
မ့ၢ်နဒိၣ်ထီၣ်ဘၣ်ဒီး မိၢ်ပၢ်လၢ အကဲယဟိဝၤပှၤအုၣ်အသးဧါ. မ့မ့ၢ်ဒ်န့ၣ်န့ၣ် တဘၣ်ဆိကမိၣ်လၢ ခီဖျိလၢ နမိနပါကဲ ယဟိဝၤယွၤ အတံၤသကိးအဃိ နကဲထီၣ် ကစၢ်ယွၤ အတံၤသကိးလံန့ၣ်တဂ့ၤ. ပမိပပါ မ့မ့ၢ်ပှၤလၢ အဘူၣ်ထီၣ်ဘါထီၣ် ကစၢ်ယွၤမ့ၢ်ဂ့ၤ, တဘူၣ်ထီၣ်ဘါထီၣ်ဘၣ်မ့ၢ်ဂ့ၤ ပကဘၣ်မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤလၢ ပနီၢ်ကစၢ်လီၤ.
၂ ဆိကမိၣ်ကွၢ် ဒီပုၢ်ဝဲၢ်ခွါ အဲကၠလံတိး အဒိအတဲာ်တက့ၢ်. အဝဲ ဒိၣ်ထီၣ်ဘၣ်ဒီး အမိၢ်အပၢ် လၢအမ့ၢ် ယဟိဝၤပှၤအုၣ်အသးလီၤ. ဘၣ်ဆၣ် ဖဲအနီၢ်ဆံးခါန့ၣ် အတတူၢ်ဘၣ်ဝဲလၢ အအိၣ်ဘူးဒီး ကစၢ်ယွၤဘၣ်. အဝဲတဲဝဲလၢ “မ့ၢ်လၢ ယအဲၣ်ဒိးမၤဒ်သိး ယဟံၣ်ဖိဃီဖိတဖၣ် မၤဝဲအဃိ ယဘူၣ်ထီၣ်ဘါထီၣ် ယဟိဝၤယွၤလီၤ.” အဲကၠလံတိး ဟံးန့ၢ်အါထီၣ် တၢ်ဆၢကတီၢ် လၢကဖးလံာ်စီဆှံ ဒီးဆိကမိၣ်ထံအီၤအဂီၢ် ဒီးဃ့ဘါထုကဖၣ်တၢ် အါထီၣ်လီၤ. လၢခံအဝဲတဲဝဲလၢ “ယသ့ၣ်ညါထီၣ်လၢ ကျဲထဲတဘိလၢ ယဘူးထီၣ်ဒီး ပပၢ်ယဟိဝၤယွၤသ့န့ၣ် မ့ၢ်ဝဲယကဘၣ်ဃုသ့ၣ်ညါ အါထီၣ်အဂ့ၢ် လၢယနီၢ်ကစၢ်လီၤ.” အဲကၠလံတိး အတၢ်လဲၤခီဖျိအံၤ ဒုးဆိကမိၣ်ဘၣ်ပှၤ တၢ်သံကွၢ် လၢအမ့ၢ် တၢ်သ့ၣ်ညါယဟိဝၤယွၤအဂ့ၢ် ထဲတစဲး ဒီးတၢ်သ့ၣ်ညါအဂ့ၢ် ဂ့ၤဂ့ၤန့ၣ် လီၤဆီလိာ်အသး ဒ်လဲၣ်န့ၣ်လီၤ. အဃိ ဒ်သိးပကသ့ၣ်ညါ ယဟိဝၤယွၤအဂ့ၢ် ဂ့ၤဂ့ၤအဂီၢ် ပကဘၣ်မၤ တၢ်မနုၤလဲၣ်.
၃. တၢ်သ့ၣ်ညါ ယဟိဝၤယွၤ ဒီးတၢ်သ့ၣ်ညါအီၤ ဂ့ၤဂ့ၤန့ၣ် လီၤဆီလိာ်အသး ဒ်လဲၣ်.
၃ မ့ၢ်လၢပသ့ၣ်ညါ ယဟိဝၤယွၤအမံၤ မ့တမ့ၢ် ပသ့ၣ်ညါ တၢ်ဂ့ၢ်တနီၤလၢ အတဲဝဲ ဒီးမၤဝဲအဃိ ဘၣ်သ့ၣ်သ့ၣ် ပကဆိကမိၣ်လၢ ပသ့ၣ်ညါအီၤလီၤ. ဘၣ်ဆၣ် ထဲဒၣ်ပသ့ၣ်ညါ တၢ်သ့ၣ်တဖၣ်အံၤန့ၣ် ပတဲလၢ ပသ့ၣ်ညါ ယဟိဝၤယွၤဂ့ၤဂ့ၤ တသ့ဘၣ်. တၢ်သ့ၣ်ညါ ယဟိဝၤယွၤဂ့ၤဂ့ၤန့ၣ် ပၣ်ဃုာ်အါန့ၢ်အန့ၣ်ဒံးလီၤ. အဆိကတၢၢ်န့ၣ် ပကဘၣ် ဟံးန့ၢ်တၢ်ဆၢကတီၢ်လၢ ပကမၤလိယဟိဝၤယွၤ ဒီးအတၢ်ဂ့ၤတၢ်ဝါ လၢအလီၤကမၢကမၣ်တဖၣ်အဂ့ၢ်လီၤ. ပမ့ၢ်မၤဒ်န့ၣ်မး ပကနၢ်ပၢၢ်ထီၣ် ဘၣ်ဃးဒီး တၢ်လၢအတဲဝဲ ဒီးမၤဝဲန့ၣ် ဘၣ်မနုၤအဃိ အတဲဝဲဒီးမၤဝဲလဲၣ်န့ၣ်လီၤ. ဒီးပမ့ၢ်နၢ်ပၢၢ် တၢ်ဂ့ၢ်အံၤန့ၣ် ပကသ့ၣ်ညါထီၣ်လၢ ပတၢ်ဆိကမိၣ်ဒီး ပတၢ်မၤတဖၣ် ဘၣ်ယဟိဝၤယွၤအသးဧါ တဘၣ်ဘၣ်ဧါန့ၣ်လီၤ. ဒီးဖဲပသ့ၣ်ညါထီၣ် ယဟိဝၤယွၤ အတၢ်ဘၣ်သးအခါ ပကဘၣ်မၤထွဲအီၤလီၤ.
၄. ပမ့ၢ်မၤလိ ပှၤဒိဂ့ၤတဲာ်ဘၣ် လၢလံာ်စီဆှံအပူၤအဂ့ၢ်န့ၣ် ကကဲဘျုးလၢပဂီၢ် ဒ်လဲၣ်.
၄ မ့ၢ်လၢပအဲၣ်ဒိးမၤ ယဟိဝၤယွၤ အတၢ်မၤအဃိ ပှၤတနီၤန့ၣ် ကအဲၣ်ဒိးမၤမဲာ်ဆှးပှၤ ဒီးဖဲပစးထီၣ်လဲၤထီၣ် တၢ်အိၣ်ဖှိၣ်အခါ ဘၣ်သ့ၣ်သ့ၣ် အဝဲသ့ၣ် ကထီဒုၣ်ထီဒါပှၤ အါန့ၢ်အလီၢ်လီၤ. ဘၣ်ဆၣ် ပမ့ၢ်သန့ၤပသး လၢယဟိဝၤယွၤန့ၣ် အဝဲတပာ်တ့ၢ်ကွံာ်ပှၤ နီတဘျီဘၣ်. ဒီးပကစးထီၣ်အိၣ်ဒီး တၢ်ရ့လိာ်သးဒီးကစၢ်ယွၤ လၢပတၢ်အိၣ်မူ ဒီတစိၤအဂီၢ်လီၤ. မ့ၢ်ပသ့ၣ်ညါ ယဟိဝၤယွၤဂ့ၤဂ့ၤ ကသ့သပှၢ်ကတၢၢ်ဧါ. စီၤမိၤၡ့ ဒီးစီၤဒၤဝံးလၢအမ့ၢ် ပှၤဟီၣ်ခိၣ်ဖိလၢ အတလၢတပှဲၤတဖၣ် အဒိအတဲာ်န့ၣ် ပာ်ဖျါထီၣ်ဝဲလၢ ပသ့ၣ်ညါထီၣ် ကစၢ်ယွၤ ဂ့ၤဂ့ၤသ့လီၤ. အဝဲသ့ၣ် သ့ၣ်ညါထီၣ် ယဟိဝၤယွၤ ဒ်လဲၣ်. ဒီးပမၤလိန့ၢ် တၢ်မနုၤလၢ အဝဲသ့ၣ် အအိၣ်လဲၣ်. ဖဲပမၤလိ အဝဲသ့ၣ်အဂ့ၢ်အခါ ပကသ့ၣ်ညါဘၣ် တၢ်သံကွၢ်ခံဖျၢၣ်အံၤ အတၢ်စံးဆၢလီၤ.
စီၤမိၤၡ့ထံၣ် “ပှၤလၢ အတအိၣ်ဖျါဘၣ် တဂၤ”
၅. စီၤမိၤၡ့ ဃုထၢဝဲလၢ ကမၤတၢ်မနုၤလဲၣ်.
၅ စီၤမိၤၡ့ ဃုထၢဝဲလၢ ကဘူၣ်ထီၣ်ဘါထီၣ် ကစၢ်ယွၤလီၤ. ဖဲစီၤမိၤၡ့ အသးအိၣ်အနံၣ် ၄၀ ဃၣ်ဃၣ်အခါ အဝဲမ့ၢ်အဲၣ်ဒိးလၢ ပှၤကသ့ၣ်ညါအီၤလၢ “စီၤပၤဖၤရိၤ အဖိမုၣ်န့ၣ် အဖိခွါ” သ့ဘၣ်ဆၣ် အဝဲဃုထၢဝဲလၢ အကအိၣ်လၢ ကစၢ်ယွၤအပှၤကလုာ်, ပှၤအံၣ်စရ့လးဖိတဖၣ် အအိၣ်တခီလီၤ. (ဧ့ၤဘြံၤ ၁၁:၂၄) စီၤမိၤၡ့ ပာ်တ့ၢ်ကွံာ် အလီၢ်အလၤ လၢအပတီၢ်ထီလီၤ. ဖဲအဝဲမၤစၢၤ ပှၤအံၣ်စရ့လးဖိတဖၣ်အခါ အဝဲသ့ၣ်ညါဝဲလၢ စီၤပၤဖၤရိၤ ကသးဒိၣ်ထီၣ်တၢ် ဒိၣ်မးလီၤ. ဒီးစီၤပၤဖၤရိၤ မ့ၢ်စီၤပၤလၢ အစိဒိၣ်အကမီၤထီ ဒီးပှၤအဲၤကူပတူးဖိတဖၣ် ပာ်အီၤဒ် ကစၢ်ယွၤတဂၤအသိးလီၤ. အဃိ စီၤမိၤၡ့ အတၢ်မၤတဖၣ်န့ၣ် ပာ်ဖျါထီၣ်ဝဲလၢ အအိၣ်ဒီးတၢ်နာ်လီၤ. မ့ၢ်လၢစီၤမိၤၡ့ သန့ၤအသးလၢ ယဟိဝၤယွၤအဃိ အဝဲအိၣ်ဒီး တၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ် လၢအတၢ်အိၣ်မူ ဒီတစိၤလီၤ.—ကတိၤဒိ ၃:၅.
၆. ပမၤလိန့ၢ် တၢ်မနုၤလၢ စီၤမိၤၡ့ အဒိအတဲာ်လဲၣ်.
၆ ပမၤလိန့ၢ်ဘၣ် တၢ်မနုၤလၢ စီၤမိၤၡ့အအိၣ်လဲၣ်. ဒ်စီၤမိၤၡ့အသိး ပဝဲခဲလၢာ်န့ၣ် ပဘၣ်ဆၢတဲာ်တၢ် ဘၣ်ဃးဒီး မ့ၢ်ပကဘူၣ်ထီၣ်ဘါထီၣ် ကစၢ်ယွၤ ဒီးမၤသကိးတၢ်ဒီး ကစၢ်ယွၤ အပှၤဂီၢ်မုၢ်တဖၣ်ဧါ ပတမၤဘၣ်ဧါန့ၣ်လီၤ. ဒ်သိးပကမၤ ကစၢ်ယွၤအတၢ်မၤအဂီၢ် ဘၣ်သ့ၣ်သ့ၣ် ပကဘၣ် တူၢ်ၡူကွံာ်တၢ်တနီၤ ဒီးဘၣ်သ့ၣ်သ့ၣ် ပှၤလၢအတသ့ၣ်ညါ ယဟိဝၤယွၤတဖၣ်န့ၣ် ကထီဒါပှၤလီၤ. ဘၣ်ဆၣ် ပမ့ၢ်သန့ၤပသးလၢ ကစၢ်ယွၤန့ၣ် ပနာ်သ့လၢ အဝဲကမၤစၢၤပှၤလီၤ.
၇-၈. စီၤမိၤၡ့ ဆဲးမၤလိဝဲ တၢ်မနုၤလဲၣ်.
၇ စီၤမိၤၡ့ ဆဲးမၤလိဝဲ ယဟိဝၤယွၤ အတၢ်ဂ့ၤတၢ်ဝါတဖၣ်အဂ့ၢ် ဒီးဆဲးမၤကစၢ်ယွၤ အတၢ်ဘၣ်သးလီၤ. အဒိ ဖဲယဟိဝၤယွၤ မၢအလဲၤကိးထုးထီၣ် ပှၤအံၣ်စရ့လးဖိတဖၣ် လၢကီၢ်အဲၤကူပတူးအခါ အတၢ်နာ်န့ၢ်လီၤသး တအိၣ်ဘၣ် ဒီးအဝဲတဲဘၣ် ယဟိဝၤယွၤအါဘျီလၢ အမၤဝဲတသ့ဘၣ်. ဖဲန့ၣ်န့ၣ် ကစၢ်ယွၤ ပာ်ဖျါထီၣ် တၢ်ဒိသူၣ်ဒိသးလၢ စီၤမိၤၡ့အဖီခိၣ် ဒီးမၤစၢၤအီၤလီၤ. (၂ မိၤၡ့ ၄:၁၀-၁၆) အဃိ စီၤမိၤၡ့ လဲၤတဲဘၣ် စီၤပၤဖၤရိၤ လၢတၢ်စံၣ်ညီၣ်အကစီၣ် ဘူၣ်ဝဲလီၤ. တကးဒံးဘၣ် ဖဲကစၢ်ယွၤ မၤဟးဂီၤကွံာ် စီၤပၤဖၤရိၤ ဒီးအသုးမုၢ်သံၣ်ဘိတဖၣ်လၢ ပီၣ်လဲၣ်ဂီၤအပူၤ ဒီးအုၣ်က့ၤခီၣ်က့ၤ အပှၤအံၣ်စရ့လးဖိတဖၣ်အခါ စီၤမိၤၡ့ ထံၣ်ဘၣ်ဝဲ ယဟိဝၤယွၤသူဝဲ အစိအကမီၤလီၤ.—၂ မိၤၡ့ ၁၄:၂၆-၃၁; စံးထီၣ်ပတြၢၤ ၁၃၆:၁၅.
၈ ဖဲစီၤမိၤၡ့ လဲၤထုးထီၣ် ပှၤအံၣ်စရ့လးဖိတဖၣ်လၢ ကီၢ်အဲၤကူပတူး ဝံၤအလီၢ်ခံ ပှၤအံၣ်စရ့လးဖိတဖၣ်န့ၣ် ကဒူးကဒ့ၣ်တၢ် တလီၢ်လီၢ်လီၤ. ဖဲန့ၣ်အဆၢကတီၢ် စီၤမိၤၡ့ ထံၣ်ဘၣ်ဝဲလၢ ယဟိဝၤယွၤ အသးစူၤ လၢပှၤဂီၢ်မုၢ် လၢအမၤပူၤဖျဲးထီၣ်ဝဲလၢ ကုၢ်အလီၢ်တဖၣ်အံၤ အဖီခိၣ် ထဲလဲၣ်န့ၣ်လီၤ. (စံးထီၣ်ပတြၢၤ ၇၈:၄၀-၄၃) တကးဒံးဘၣ် ဘၣ်တဘျီန့ၣ် စီၤမိၤၡ့ ဃ့ကညးကစၢ်ယွၤ ဒ်သိးအသုတမၤဟးဂီၤ ပှၤဂီၢ်မုၢ်တဖၣ်တဂ့ၤအဂီၢ်လီၤ. ဖဲန့ၣ်န့ၣ် ကစၢ်ယွၤ တမၤဟးဂီၤ ပှၤဂီၢ်မုၢ်တဖၣ်လၢၤဘၣ်အဃိ စီၤမိၤၡ့ ကထံၣ်ဘၣ်ဝဲလၢ ယဟိဝၤယွၤအိၣ်ဒီး တၢ်ဆီၣ်လီၤသး ဒိၣ်မးလီၤ.—၂ မိၤၡ့ ၃၂:၉-၁၄.
၉. ဒ် ဧ့ၤဘြံၤ ၁၁:၂၇ ပာ်ဖျါထီၣ်ဝဲအသိး စီၤမိၤၡ့ အတၢ်ရ့လိာ်သးဒီး ယဟိဝၤယွၤ ဘူးထဲလဲၣ်.
၉ ဖဲပှၤအံၣ်စရ့လးဖိတဖၣ် ဟးထီၣ်လၢကီၢ်အဲၤကူပတူး ဝံၤအလီၢ်ခံ စီၤမိၤၡ့ အတၢ်ရ့လိာ်သးဒီး ယဟိဝၤယွၤ ဂၢၢ်ကျၢၤထီၣ် တုၤဒၣ်လဲာ် လီၤဂာ်ဒ် အထံၣ်ကစၢ်ယွၤလီၤ. (ဖး ဧ့ၤဘြံၤ ၁၁:၂၇ တက့ၢ်.) စီၤမိၤၡ့ အတၢ်ရ့လိာ်သးဒီးကစၢ်ယွၤ ဘူးထဲလဲၣ်န့ၣ် လံာ်စီဆှံ တဲဝဲလၢ “ယွၤကတိၤတၢ်ဒီးစီၤမိၤၡ့ မဲာ်သကိးမဲာ်, ဒ်ပှၤကညီကတိၤတၢ်ဒီး အတံၤအသကိးအသိးန့ၣ်လီၤ.”—၂ မိၤၡ့ ၃၃:၁၁.
၁၀. ဒ်သိး ပကသ့ၣ်ညါ ယဟိဝၤယွၤဂ့ၤဂ့ၤအဂီၢ် ပကဘၣ်မၤ တၢ်မနုၤလဲၣ်.
၁၀ ပမၤလိန့ၢ်ဘၣ် တၢ်မနုၤလၢ စီၤမိၤၡ့အအိၣ်လဲၣ်. ဒ်သိး ပကသ့ၣ်ညါ ယဟိဝၤယွၤဂ့ၤဂ့ၤအဂီၢ် ပကဘၣ်မၤလိ အတၢ်ဂ့ၤတၢ်ဝါတဖၣ် တကးဒံးဘၣ် ပကဘၣ်မၤ အတၢ်ဘၣ်သးစ့ၢ်ကီးလီၤ. ဆၢကတီၢ်ခဲအံၤ ယဟိဝၤယွၤ အတၢ်ဘၣ်သးန့ၣ်မ့ၢ်ဝဲ “ပှၤကညီခဲလၢာ် ကတုၤလၢ တၢ်အုၣ်က့ၤခီၣ်က့ၤအီၤ, ဒီးကသ့ၣ်ညါထီၣ် တၢ်မ့ၢ်တၢ်တီ” လီၤ. (၁ တံၤမသ့း ၂:၃, ၄) အဃိ ပမၤကစၢ်ယွၤ အတၢ်ဘၣ်သး သ့ခီဖျိ ပသိၣ်လိပှၤဂၤ လၢယဟိဝၤယွၤအဂ့ၢ်လီၤ.
၁၁. ဖဲပသိၣ်လိပှၤဂၤလၢ ယဟိဝၤယွၤအဂ့ၢ်အခါ ပနီၢ်ကစၢ်ဒၣ်ဝဲ ပသ့ၣ်ညါအါထီၣ် အဂ့ၢ်လၢကျဲ ဒ်လဲၣ်.
၁၁ ဖဲပသိၣ်လိပှၤဂၤလၢ ယဟိဝၤယွၤအဂ့ၢ်အခါ အါဘျီန့ၣ် ပနီၢ်ကစၢ်ဒၣ်ဝဲ ပသ့ၣ်ညါအါထီၣ် ကစၢ်ယွၤအဂ့ၢ်လီၤ. အဒိ ဖဲကစၢ်ယွၤ မၤစၢၤပှၤဒ်သိး ပကထံၣ်လိာ်ပသးဒီး ပှၤလၢအအဲၣ်ဒိးကဲထီၣ် အတံၤသကိးအခါ ပထံၣ်ဘၣ် တၢ်အုၣ်အသး လီၤတံၢ်လီၤဆဲးလၢ ယဟိဝၤယွၤအိၣ်ဒီး တၢ်ဒိသူၣ်ဒိသး လၢပှၤဂၤအဖီခိၣ်လီၤ. (ယိၤဟၣ် ၆:၄၄; မၤတၢ် ၁၃:၄၈) ဒီးခီဖျိလၢ ကစၢ်ယွၤ အကလုၢ်ကထါ လံာ်စီဆှံ မၤစၢၤပပှၤမၤလိ လံာ်စီဆှံဖိတဖၣ် လၢကပာ်ပတုာ် အလုၢ်လၢ်သကဲာ်ပဝး လၢအတဂ့ၤ ဒီးဆီတလဲအသးအဃိ ပထံၣ်ဘၣ်လၢ ကစၢ်ယွၤ အကလုၢ်ကထါန့ၣ်အိၣ်ဒီး အစိအကမီၤလီၤ. (ကလီးစဲ ၃:၉, ၁၀) တကးဒံးဘၣ် ကစၢ်ယွၤဆှၢလီၤပှၤဆူ ပှၤလၢပလီၢ်ကဝီၤတဖၣ် အအိၣ်အါဘျီ ဒ်သိးအဝဲသ့ၣ် ကမၤလိဘၣ် ကစၢ်ယွၤအဂ့ၢ် ဒီးကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ်အဃိ ပထံၣ်ဘၣ် ကစၢ်ယွၤ အတၢ်သူၣ်စူၤသးစူၤ စ့ၢ်ကီးလီၤ.—ရိမ့ၤ ၁၀:၁၃-၁၅.
၁၂. ဒ် ၂ မိၤၡ့ ၃၃:၁၃ ပာ်ဖျါထီၣ်ဝဲအသိး စီၤမိၤၡ့ ဃ့ဘါထုကဖၣ် လၢတၢ်မနုၤအဂီၢ်လဲၣ် ဒီးဘၣ်မနုၤအဃိလဲၣ်.
၁၂ စီၤမိၤၡ့ ပာ်လုၢ်ပာ်ပှ့ၤ အတၢ်ရ့လိာ်သးဒီးယဟိဝၤယွၤလီၤ. စီၤမိၤၡ့ မၤတၢ်လီၤလး အါမံၤလၢ ကစၢ်ယွၤအမံၤဘၣ်ဆၣ် အဝဲဃ့ဒံး ယဟိဝၤယွၤလၢ ကမၤစၢၤအီၤဒ်သိး အကသ့ၣ်ညါအါထီၣ်အီၤအဂီၢ်လီၤ. (ဖး ၂ မိၤၡ့ ၃၃:၁၃ တက့ၢ်.) ဖဲန့ၣ်အခါ စီၤမိၤၡ့ အသးနံၣ်အိၣ် ၈၀ ဘျဲၣ်လံဘၣ်ဆၣ် အဝဲသ့ၣ်ညါဝဲလၢ အကဘၣ်ဆဲးမၤလိ ကစၢ်ယွၤအဂ့ၢ် အိၣ်ဒံးဝဲအါမးလီၤ.
၁၃. ပပာ်ဖျါထီၣ်လၢ ပပာ်လုၢ်ပာ်ပှ့ၤ ပတၢ်ရ့လိာ်သးဒီး ကစၢ်ယွၤသ့ လၢကျဲဒ်လဲၣ်.
၁၃ ပမၤလိန့ၢ်ဘၣ် တၢ်မနုၤလၢ စီၤမိၤၡ့အအိၣ်လဲၣ်. ပမၤယဟိဝၤယွၤအတၢ်မၤ မ့ၢ်ယံာ်ထဲလဲၣ်ဂ့ၤ ထဲလဲၣ်ဂ့ၤ ပကဘၣ် ပာ်လုၢ်ပာ်ပှ့ၤ ပတၢ်ရ့လိာ်သးဒီး ကစၢ်ယွၤ ထီဘိလီၤ. ပပာ်ဖျါထီၣ်လၢ ပပာ်လုၢ်ပာ်ပှ့ၤ ပတၢ်ရ့လိာ်သးဒီး ကစၢ်ယွၤ သ့ခီဖျိလၢ ပတဲတၢ်ဒီးအီၤလၢ တၢ်ထုကဖၣ်အပူၤလီၤ.
၁၄. ဒ်သိးပကသ့ၣ်ညါအါထီၣ် ကစၢ်ယွၤအဂီၢ် တၢ်ထုကဖၣ် ကမၤစၢၤပှၤလၢ ကျဲဒ်လဲၣ်.
၁၄ နမ့ၢ်အဲၣ်ဒိးလၢ နကအိၣ်ဒီးတၢ်ရ့လိာ်သးဒီးပှၤတဂၤ ဘူးဘူးတံၢ်တံၢ်န့ၣ် နကဘၣ်တဲတၢ်ဒီးအီၤ ထီဘိလီၤ. ဒ်န့ၣ်အသိး နမ့ၢ်အဲၣ်ဒိးအိၣ်ဒီး တၢ်ရ့လိာ်သးဒီးကစၢ်ယွၤ ဘူးဘူးတံၢ်တံၢ်န့ၣ် တဲတၢ်ဒီးအီၤ လၢတၢ်ထုကဖၣ်အပူၤထီဘိ ဒီးတဘၣ်ပျံၤလၢ နကတဲဘၣ်အီၤ နတၢ်တူၢ်ဘၣ် ဒီးနတၢ်ဆိကမိၣ်တဖၣ်တဂ့ၤ. (အ့းဖ့းစူး ၆:၁၈) ခြံစတၤ လၢအအိၣ်လၢ ကီၢ်ထၢးကံၣ်တဂၤန့ၣ် တဲဝဲလၢ “ဖဲယဃ့ဘါထုကဖၣ် ဒီးတဲဘၣ် ယဟိဝၤယွၤလၢ ယတၢ်တူၢ်ဘၣ်တဖၣ် ဒီးဖဲယထံၣ်ဘၣ်လၢ အဝဲမၤစၢၤယၤ တဘျီလၢ်လၢ်န့ၣ် ယတၢ်အဲၣ်အီၤ ဒီးယတၢ်နာ်န့ၢ်အီၤ ဒိၣ်ထီၣ်လီၤ. ဒီးမ့ၢ်လၢယထံၣ်ဘၣ်လၢ ယဟိဝၤယွၤစံးဆၢ ယတၢ်ထုကဖၣ်အဃိ အမၤစၢၤယၤဒ်သိး ယကထံၣ်အီၤ ဒ်ယပၢ်ဒီးယတံၤသကိး” လီၤ.
ပှၤတဂၤလၢယဟိဝၤယွၤ ဘၣ်သူၣ်ဘၣ်သးအီၤ
၁၅. ဘၣ်ဃးဒီး စီၤဒၤဝံးန့ၣ် ယဟိဝၤယွၤ တဲဝဲဒ်လဲၣ်.
၁၅ လၢစီၤဒၤဝံး အိၣ်ဖျဲၣ်ထီၣ်လံၤလံၤန့ၣ် အမိၢ်အပၢ် ဒီးပှၤလၢအကပိာ်ကပၤတဖၣ် မ့ၢ်ပှၤလၢ အဘူၣ်ထီၣ်ဘါထီၣ် ယဟိဝၤယွၤလီၤ. ဘၣ်ဆၣ် စီၤဒၤဝံး ဘူၣ်ထီၣ်ဘါထီၣ် ယဟိဝၤယွၤန့ၣ် တမ့ၢ်ထဲလၢ အဟံၣ်ဖိဃီဖိတဖၣ် မၤဝဲဒ်န့ၣ်အဃိဘၣ်. အဝဲမၤဂ့ၤထီၣ် အတၢ်ရ့လိာ်သးဒီးကစၢ်ယွၤ လၢအနီၢ်ကစၢ် ဒီးယဟိဝၤယွၤ အဲၣ်အီၤဒိၣ်မးလီၤ. ဘၣ်ဃးဒီး စီၤဒၤဝံးန့ၣ် ယဟိဝၤယွၤ တဲဝဲလၢအမ့ၢ် “ပှၤလၢအဘၣ်ယသးတဂၤ” လီၤ. (မၤတၢ် ၁၃:၂၂) စီၤဒၤဝံး မၤဂ့ၤထီၣ် အတၢ်ရ့လိာ်သးဒီးယဟိဝၤယွၤ လၢကျဲဒ်လဲၣ်.
၁၆. ဖဲစီၤဒၤဝံးကွၢ်ဝဲ တၢ်ဘၣ်တ့တဖၣ်အခါ အဝဲသ့ၣ်ညါဘၣ် ယဟိဝၤယွၤအဂ့ၢ်ဒ်လဲၣ်.
၁၆ စီၤဒၤဝံး မၤလိယဟိဝၤယွၤအဂ့ၢ် လၢတၢ်ဘၣ်တ့တဖၣ် အအိၣ်လီၤ. ဖဲစီၤဒၤဝံး အနီၢ်ဆံးအခါ အဝဲဘၣ်ကွၢ်ထွဲ အပၢ်အသိတဖၣ် လၢတၢ်ပျီပူၤအဃိ ဘၣ်သ့ၣ်သ့ၣ် အဝဲကစးထီၣ် ဆိကမိၣ်ထံ ဘၣ်ဃးဒီး တၢ်ဘၣ်တ့တဖၣ်အဂ့ၢ်လီၤ. အဒိ ဖဲမုၢ်နၤခီအဆၢကတီၢ် စီၤဒၤဝံး ကွၢ်ထီၣ်တၢ်လၢ မူခိၣ်အခါ အဝဲကထံၣ်ဘၣ်ဝဲ ဆၣ်လၢအကထိတဖၣ် တကးဒံးဘၣ် ဖဲန့ၣ်အဆၢကတီၢ် အဝဲကဆိကမိၣ်ဘၣ်ဝဲ ပှၤလၢအတ့လီၤ ဆၣ်တဖၣ်အံၤ အတၢ်ဂ့ၤတၢ်ဝါတဖၣ်လီၤ. လၢတၢ်န့ၣ်အဃိ အဝဲကွဲးဝဲလၢ “မူခိၣ်လီၣ်ဖျါထီၣ် ယွၤအလၤကပီၤ, ဒီးတၢ်လၢအမၤဝဲလၢအစုန့ၣ် မူကပိာ်လိၤ ဒုးနဲၣ်ဝဲလီၤ.” (စံးထီၣ်ပတြၢၤ ၁၉:၁, ၂) ဒီးဖဲအဝဲဆိကမိၣ်ဝဲ ဘၣ်ဃးဒီး ယဟိဝၤယွၤ တ့လီၤဃာ် ပှၤဟီၣ်ခိၣ်ဖိတဖၣ် ဒ်လဲၣ်ဒ်လဲၣ်အခါ အဝဲသ့ၣ်ညါဘၣ်ဝဲလၢ ယဟိဝၤယွၤ အိၣ်ဒီးတၢ်ကူၣ်သ့ ထဲလဲၣ်န့ၣ်လီၤ. (စံးထီၣ်ပတြၢၤ ၁၃၉:၁၄) ဖဲစီၤဒၤဝံး ဆိကမိၣ်ထံ ယဟိဝၤယွၤ အတၢ်ဘၣ်တ့တဖၣ်အခါ အဝဲသ့ၣ်ညါဝဲလၢ အမ့ၢ်ထိၣ်သတြီၤအသးဒီး ကစၢ်ယွၤန့ၣ် အဝဲတမ့ၢ် တၢ်နီတမံၤဘၣ်.—စံးထီၣ်ပတြၢၤ ၁၃၉:၆.
၁၇. ပမ့ၢ်ဆိကမိၣ်ထံ တၢ်ဘၣ်တ့တဖၣ်အဂ့ၢ်န့ၣ် ကကဲဘျုး လၢပဂီၢ်ဒ်လဲၣ်.
၁၇ ပမၤလိန့ၢ်ဘၣ် တၢ်မနုၤလၢ စီၤဒၤဝံးအအိၣ်လဲၣ်. ပကဘၣ် သးစၢၢ်ဆၢ ကစၢ်ယွၤ အတၢ်ဘၣ်တ့တဖၣ် ဒီးဟံးန့ၢ်တၢ်ဆၢကတီၢ်လၢ ပကကွၢ်ထံကွၢ်ဆး ကစၢ်ယွၤအတၢ်ဘၣ်တ့ အဃံအလၤ လၢဟီၣ်ခိၣ်ချၢတဖၣ်လီၤ. ဆိကမိၣ်ကွၢ်လၢ တၢ်သ့ၣ်တဖၣ်အံၤ မ့ၢ်တၢ်လၢ အလီၤကမၢကမၣ် ထဲလဲၣ်န့ၣ်တက့ၢ်. ကိးနံၤဒဲးန့ၣ် ဆိကမိၣ်ထံ ဘၣ်ဃးဒီး ကစၢ်ယွၤ အတၢ်ဘၣ်တ့လၢ နခိၣ်နဃၢၤတဖၣ်အဂ့ၢ်တက့ၢ်. အဒိ ဆိကမိၣ်ကွၢ် ဘၣ်ဃးဒီး ပှၤဟီၣ်ခိၣ်ဖိတဖၣ်, တၢ်မုၢ်တၢ်ဘိ, ဆၣ်ဖိကီၢ်ဖိ လၢအအိၣ်လၢ နကပိာ်ကပၤတဖၣ်န့ၣ် သိၣ်လိနၤ ဘၣ်ဃးဒီး ယဟိဝၤယွၤအဂ့ၢ် ဒ်လဲၣ်န့ၣ်တက့ၢ်. ပမ့ၢ်မၤဒ်န့ၣ်န့ၣ် ပကသ့ၣ်ညါအါထီၣ်ဘၣ် ကစၢ်ယွၤအဂ့ၢ် ကိးနံၤဒဲးလီၤ. (ရိမ့ၤ ၁:၂၀) အဃိ နတၢ်အဲၣ်အီၤ ကဒိၣ်ထီၣ် ကိးနံၤဒဲးလီၤ.
၁၈. စံးထီၣ်ပတြၢၤ ၁၈ ပာ်ဖျါထီၣ်ဝဲလၢ စီၤဒၤဝံး သ့ၣ်ညါဝဲတၢ်မနုၤလဲၣ်.
၁၈ စီၤဒၤဝံး သ့ၣ်ညါဝဲလၢ ယဟိဝၤယွၤ မၤစၢၤအီၤလီၤ. အဒိ ဖဲစီၤဒၤဝံး မၤပူၤဖျဲး အပၢ်အသိလၢ ခ့ယုၢ်ဒီးတၤသူ အစုပူၤအခါ အဝဲသ့ၣ်ညါဝဲလၢ ယဟိဝၤယွၤမ့ၢ် ပှၤလၢအမၤစၢၤအီၤ ဒ်သိးအကမၤသံ ဆၣ်ဖိကီၢ်ဖိလၢ အအၢအသီတဖၣ်အံၤလီၤ. ဒီးဖဲအဝဲမၤနၢၤကွံာ် ပှၤနီၢ်ဒိၣ်ဖိ စီၤကၤလယးအခါ အဝဲသ့ၣ်ညါဝဲလၢ ယဟိဝၤယွၤ မၤစၢၤအီၤလီၤ. (၁ ၡမူၤအ့လး ၁၇:၃၇) တကးဒံးဘၣ် ဖဲစီၤဒၤဝံး ပူၤဖျဲးထီၣ်လၢ စီၤပၤစီလူးလၢ အသူၣ်က့ၣ်သးက့ၣ်အီၤတဂၤ အစုပူၤအခါ အဝဲသ့ၣ်ညါဝဲလၢ ယဟိဝၤယွၤမ့ၢ် ပှၤလၢအမၤပူၤဖျဲးအီၤ စ့ၢ်ကီးလီၤ. (စံးထီၣ်ပတြၢၤ ၁၈, အခိၣ်တီ) စီၤဒၤဝံး မ့မ့ၢ်ပှၤလၢ အပာ်ထီၣ်ထီအသးန့ၣ် အဝဲကဆိကမိၣ်ဝဲလၢ အမၤတၢ်သ့ၣ်တဖၣ်အံၤ လၢအနီၢ်ကစၢ်လီၤ. ဘၣ်ဆၣ် စီၤဒၤဝံးအိၣ်ဒီး တၢ်ဆီၣ်လီၤသးအဃိ အဝဲထံၣ်ဘၣ် ယဟိဝၤယွၤ အစုအတၢ်မၤစၢၤ လၢအတၢ်အိၣ်မူအပူၤလီၤ.—စံးထီၣ်ပတြၢၤ ၁၃၈:၆.
၁၉. ပမၤလိန့ၢ်ဘၣ် တၢ်မနုၤလၢ စီၤဒၤဝံးအအိၣ်လဲၣ်.
၁၉ ပမၤလိန့ၢ်ဘၣ် တၢ်မနုၤလၢ စီၤဒၤဝံးအအိၣ်လဲၣ်. ပကဘၣ်ဃ့ ယဟိဝၤယွၤ အတၢ်မၤစၢၤ တကးဒံးဘၣ် ပကဘၣ်ပာ်သူၣ်ပာ်သး ဘၣ်ဃးဒီး ကစၢ်ယွၤ မၤစၢၤပှၤ ဖဲလဲၣ်အဆၢကတီၢ်လဲၣ် ဒီးမၤစၢၤပှၤ ဒ်လဲၣ်န့ၣ်လီၤ. ပမ့ၢ်အိၣ်ဒီး တၢ်ဆီၣ်လီၤသးန့ၣ် ပကအၢၣ်လီၤတူၢ်လိာ်လၢ ပမၤတၢ်တသ့ ကိးမံၤဒဲးဘၣ် ဒီးပကနၢ်ပၢၢ်ထီၣ်လၢ တၢ်လၢပမၤအီၤတဖၣ်န့ၣ် ပမၤအီၤသ့ခီဖျိလၢ ယဟိဝၤယွၤ မၤစၢၤပှၤအဃိလီၤ. ဒီးဖဲပထံၣ်ဘၣ်လၢ ယဟိဝၤယွၤ မၤစၢၤပှၤ တဘျီလၢ်လၢ်န့ၣ် ပတၢ်ရ့လိာ်သးဒီးအီၤ ကဂၢၢ်ကျၢၤ ဒိၣ်ထီၣ်လီၤ. ဒီပုၢ်ဝဲၢ်ခွါ အါစဲးလၢအိၣ်လၢ ကီၢ်ဖံၣ်ကၠံၣ် ဒီးအမၤယဟိဝၤယွၤ အတၢ်မၤ အိၣ်လံအနံၣ်အါမးတဂၤန့ၣ် လဲၤခီဖျိဘၣ်ဝဲ ဒ်န့ၣ်လီၤ. အဝဲတဲဝဲလၢ “ယမ့ၢ်ဆိကမိၣ်ကွၢ် တၢ်လၢအပူၤကွံာ်တဖၣ်န့ၣ် စးထီၣ်လၢယမၤလိ လံာ်စီဆှံ တုၤလၢခဲအံၤန့ၣ် ယထံၣ်ဘၣ်လၢ ယဟိဝၤယွၤ မၤစၢၤယၤလီၤ. လၢတၢ်န့ၣ်အဃိ ယထံၣ်ယဟိဝၤယွၤ ဒ်ပှၤနီၢ်နီၢ်တဂၤအသိးလီၤ.”
၂၀. ဘၣ်ဃးဒီး စီၤဒၤဝံး အတၢ်ရ့လိာ်သးဒီး ယဟိဝၤယွၤန့ၣ် ပမၤလိန့ၢ်ဘၣ် တၢ်မနုၤလဲၣ်.
၂၀ စီၤဒၤဝံး ကွၢ်လိမၤဒိး ယဟိဝၤယွၤ အတၢ်ဂ့ၤတၢ်ဝါတဖၣ်လီၤ. ဖဲယဟိဝၤယွၤ တ့လီၤပှၤအခါ တ့လီၤဃုာ်ဝဲဒီး တၢ်သ့တၢ်ဘၣ်လၢ ပကကွၢ်လိမၤဒိး အတၢ်ဂ့ၤတၢ်ဝါတဖၣ်လီၤ. (၁ မိၤၡ့ ၁:၂၆) ပမ့ၢ်မၤလိ ယဟိဝၤယွၤအဂ့ၢ်ဒံးအါန့ၣ် ပကွၢ်လိမၤဒိးအီၤကသ့ ဒံးအါလီၤ. စီၤဒၤဝံး သ့ၣ်ညါကစၢ်ယွၤအဂ့ၢ် ဂ့ၤဂ့ၤအဃိ ဖဲအဝဲရ့ဒီးပှၤဂၤအခါ အဝဲပာ်ဖျါထီၣ် ယဟိဝၤယွၤ အတၢ်ဂ့ၤတၢ်ဝါတဖၣ်သ့လီၤ. ဆိကမိၣ်ကွၢ် တၢ်အဒိတခါတက့ၢ်. စီၤဒၤဝံး မၤကမၣ်ကစၢ်ယွၤ ခီဖျိမၤကမၣ်မုၣ်ကမၣ်ခွါဒီး နီၢ်ဘၤသၡ့ဘၤ ဒီးကူၣ်သံပှၤဝၤလီၤ. (၂ ၡမူၤအ့လး ၁၁:၁-၄, ၁၅) ဘၣ်ဆၣ် မ့ၢ်လၢစီၤဒၤဝံး ပာ်ဖျါထီၣ် တၢ်သးကညီၤ လၢပှၤဂၤအဖီခိၣ်အဃိ ယဟိဝၤယွၤ ပာ်ဖျါထီၣ် တၢ်သးကညီၤလၢ အဖီခိၣ်လီၤ. ခီဖျိလၢ စီၤဒၤဝံး အိၣ်ဒီးတၢ်ရ့လိာ်သးဒီးယဟိဝၤယွၤ ဂ့ၤဂ့ၤဒ်အံၤအဃိ အဝဲကဲထီၣ်ဘၣ် စီၤပၤလၢ ပှၤအံၣ်စရ့လးဖိတဖၣ် အဲၣ်အီၤဒိၣ်မး ဒီးယဟိဝၤယွၤသူဝဲ စီၤဒၤဝံးအဒိအတဲာ် လၢကသိၣ်လိဝဲ အံၣ်စရ့လး အစီၤပၤအဂၤတဖၣ်အဂီၢ်လီၤ.—၁ စီၤပၤ ၁၅:၁၁; ၂ စီၤပၤ ၁၄:၁-၃.
၂၁. ဒ် အ့းဖ့းစူး ၄:၂၄ ဒီး ၅:၁ ပာ်ဖျါထီၣ်ဝဲအသိး ပမ့ၢ် “ကွၢ်လိယွၤ” န့ၣ်ပကဒိးန့ၢ်ဘၣ် အဘျုးဒ်လဲၣ်.
၂၁ ပမၤလိန့ၢ်ဘၣ် တၢ်မနုၤလၢ စီၤဒၤဝံးအအိၣ်လဲၣ်. ပကဘၣ်မ့ၢ်ပှၤလၢအ “ကွၢ်လိယွၤ” လီၤ. ပမ့ၢ်မၤဒ်န့ၣ်န့ၣ် ကကဲဘျုးလၢပဂီၢ် တကးဒံးဘၣ် ပကသ့ၣ်ညါအါထီၣ် ကစၢ်ယွၤအဂ့ၢ်လီၤ. ဒီးပမ့ၢ်ကွၢ်လိမၤဒိး ကစၢ်ယွၤ အတၢ်ဂ့ၤတၢ်ဝါတဖၣ်န့ၣ် ပပာ်ဖျါထီၣ်လၢ ပမ့ၢ်ကစၢ်ယွၤ အဖိလီၤ.—ဖး အ့းဖ့းစူး ၄:၂၄; ၅:၁ တက့ၢ်.
မၤလိအါထီၣ် ယဟိဝၤယွၤအဂ့ၢ်
၂၂-၂၃. ပမ့ၢ်မၤထွဲ တၢ်လၢပမၤလိဘၣ်အီၤ လၢအဘၣ်ဃးဒီး ယဟိဝၤယွၤအဂ့ၢ်န့ၣ် ကကဲဘျုးဒ်လဲၣ်.
၂၂ ဒ်တၢ်မၤလိတခါအံၤ ပာ်ဖျါထီၣ်ဝဲအသိး ပသ့ၣ်ညါဘၣ်လၢ ပမၤလိ ယဟိဝၤယွၤအဂ့ၢ် သ့ခီဖျိလၢ အတၢ်ဘၣ်တ့တဖၣ် ဒီးအကလုၢ်ကထါ လံာ်စီဆှံလီၤ. လံာ်စီဆှံ ပာ်ဖျါထီၣ်ဝဲ ကစၢ်ယွၤအခ့အပှၤ လၢအအိၣ်ဒီးတၢ်သးတီ ဒီးအဒိဂ့ၤတဲာ်ဘၣ်တဖၣ် အဂ့ၢ်အါမး ဒ်သိးဒီး စီၤမိၤၡ့ ဒီးစီၤဒၤဝံးန့ၣ်လီၤ. ယဟိဝၤယွၤ ဟ့ၣ်ပှၤတၢ်လၢ ပလိၣ်ဘၣ်တဖၣ်လီၤ. ပဝဲသ့ၣ်တဖၣ်စ့ၢ်ကီး ပကဘၣ်မၤတၢ်လၢ ပကဘၣ်မၤအီၤတဖၣ် ဒီးတသ့ဖဲအသ့ ပကဘၣ်မၤလိအဂ့ၢ်လီၤ.
၂၃ ပကဘၣ်မၤလိ ယဟိဝၤယွၤအဂ့ၢ် ထီဘိလီၤ. (စံၣ်တဲၤတဲလီၤတၢ် ၃:၁၁) ပကဘၣ်မၤထွဲ တၢ်လၢပသ့ၣ်ညါအီၤတဖၣ်န့ၣ် မ့ၢ်တၢ်လၢအရ့ဒိၣ်န့ၢ်ဒံး ပသ့ၣ်ညါအဂ့ၢ်ထဲလဲၣ်ဒံးလီၤ. ပမ့ၢ်မၤထွဲ တၢ်လၢပမၤလိဘၣ်အီၤတဖၣ် ဒီးဂုာ်ကျဲးစၢး ကွၢ်လိမၤဒိး ကစၢ်ယွၤန့ၣ် ကစၢ်ယွၤ ကဆဲးသုးဘူးအသးဆူ ပအိၣ်စ့ၢ်ကီးလီၤ. (ယၤကိာ် ၄:၈) ကစၢ်ယွၤ အကလုၢ်ကထါ တဲဝဲလၢ ကစၢ်ယွၤ တပာ်တ့ၢ်ကွံာ် ပှၤလၢအဃုအီၤ နီတဘျီဘၣ်.
တၢ်သးဝံၣ် ၈၀ “လ့ၣ်ကွၢ်, ဒီးထံၣ်လၢယွၤမ့ၢ် တၢ်ဂ့ၤ”
a ပှၤအါဂၤ နာ်ဝဲလၢ ကစၢ်ယွၤအိၣ် ဘၣ်ဆၣ် အဝဲသ့ၣ် တသ့ၣ်ညါ ကစၢ်ယွၤအဂ့ၢ် ဂ့ၤဂ့ၤဘၣ်. တၢ်သ့ၣ်ညါ ယဟိဝၤယွၤန့ၣ် အခီပညီ မ့ၢ်မနုၤလဲၣ်. ဒ်သိးပကအိၣ်ဒီး တၢ်ရ့လိာ်သးဒီး ကစၢ်ယွၤ ဘူးဘူးတံၢ်တံၢ်အဂီၢ် ပဟံးန့ၢ်တၢ်မၤလိလၢ စီၤမိၤၡ့ ဒီးစီၤဒၤဝံးအအိၣ် ကသ့ဒ်လဲၣ်. တၢ်မၤလိတခါအံၤ ကပာ်ဖျါထီၣ်န့ၢ်ပှၤ တၢ်သံကွၢ်တဖၣ်အံၤ အတၢ်စံးဆၢလီၤ.