ဖဲတၢ်သ့ၣ်နီၣ်ထီၣ် ယ့ၣ်ၡူးအတၢ်သံအဆၢကတီၢ်, မ့ၢ်နကကွၢ်လိမၤဒိး ယဟိဝၤယွၤ ဒီးယ့ၣ်ၡူးအတၢ်သးဆူၣ်န့ၣ်ဧါ

၁. ဖဲတၢ်သ့ၣ်နီၣ်ထီၣ် ယ့ၣ်ၡူးအတၢ်သံအဆၢကတီၢ်န့ၣ် ယဟိဝၤပှၤအုၣ်အသးတဖၣ် ဂုာ်ကျဲးစၢးမၤဝဲတၢ်မနုၤလဲၣ်.

^၁ ကစၢ်ယဟိဝၤယွၤန့ၣ် မၤလၢပှဲၤထီၣ်ဝဲ အတၢ်တိာ်ပာ်လၢ တၢ်သးဆူၣ်အပူၤလီၤ. ဘၣ်ဃးဒီးတၢ်ဆိၣ်ဂ့ၤတနီၤလၢ ယွၤအဘီအမုၢ်အတၢ်ပၢအဖီလာ်န့ၣ် ယၡါယၤ ၉:၇ စံးဝဲလၢ “တၢ်သုးမုၢ်ဂီၢ်မုၢ်အယွၤ အသးဆူၣ်လၢကမၤတၢ်န့ၣ်လီၤ.” ဒ်န့ၣ်အသိး, ဖဲယွၤအဖိခွါယ့ၣ်ၡူးမၤတၢ်သးခုကစီၣ်တၢ်မၤလၢ ဟီၣ်ခိၣ်အဆၢကတီၢ်န့ၣ် ပာ်ဖျါထီၣ်ဝဲ တၢ်သးဆူၣ်ဒိၣ်ဒိၣ်ကလဲာ်လၢ တၢ်ဘူၣ်တၢ်ဘါအမ့ၢ်အတီအဂီၢ်လီၤ. (ယိၤဟၣ် ၂:၁၃-၁၇; ၄:၃၄) ကိးနံၣ်ဒဲး ဖဲတၢ်သ့ၣ်နီၣ်ထီၣ် ယ့ၣ်ၡူးအတၢ်သံအဆၢကတီၢ် ပှၤစံၣ်တဲၤတဲလီၤတၢ်ဖိလၢ အကကွဲၢ်တဖၣ် လၢအိၣ်လၢဟီၣ်ခိၣ်ဒီဘ့ၣ်န့ၣ် ဂုာ်ကျဲးစၢးဝဲလၢအဂ့ၤကတၢၢ်လီၤ. အဝဲသ့ၣ်ကွၢ်လိမၤဒိး ယဟိဝၤယွၤ ဒီးယ့ၣ်ၡူးအတၢ်သးဆူၣ် ခီဖျိမၤအါထီၣ်ဝဲအတၢ်မၤလၢ တၢ်သးခုကစီၣ်တၢ်မၤအပူၤန့ၣ်လီၤ. မ့ၢ်နအဲၣ်ဒိးပၣ်ဃုာ်လၢ အဝဲသ့ၣ်အကျါစ့ၢ်ကီးဧါ.

၂. စးထီၣ်ဖဲ လါမၢ်ၡး ၁၄ သီန့ၣ် ပတၢ်သးဆူၣ် ကထိၣ်ဂဲၤထီၣ်ပှၤလၢ ပကမၤတၢ်မနုၤလဲၣ်.

^၂ တၢ်သ့ၣ်နီၣ်ထီၣ် ခဲၣ်ဖ့– တနံၣ်အံၤ တၢ်သ့ၣ်နီၣ်ထီၣ်အမူးခဲၣ်ဖ့န့ၣ် ကဘၣ်တၢ်စးထီၣ်မၤအီၤဖဲမုၢ်ဃုနံၤ, လါမၢ်ၡး ၁၄ သီန့ၣ်လီၤ. ကတဲာ်ကတီၤပာ်စၢၤနသးလၢ နကအိၣ်ဒီးတၢ်သးဆူၣ်လၢ တၢ်သးခုကစီၣ်တၢ်မၤအပူၤတက့ၢ်. ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်န့ၣ် ကဂုာ်ကျဲးစၢးဝဲ တသ့ဖဲအသ့လၢ ကနီၤလီၤဝဲလံာ်ကွဲမုာ်အံၤဆူ ပှၤကိးဂၤဒဲးလၢအိၣ်လၢအဝဲသ့ၣ် တၢ်စံၣ်တဲၤတဲလီၤတၢ်ဟီၣ်ကဝီၤပူၤအဃိ အဝဲသ့ၣ်အသးပူၤ ကပှဲၤဝဲဒီးတၢ်သူၣ်ပိၢ်သးဝးလီၤ. ဂုာ်ကျဲးစၢးလၢ နကကွဲမုာ်နပှၤမၤလိလံာ်စီဆှံ, ပှၤလၢနက့ၤအိၣ်သကိးအီၤ ဘၣ်ဆၢဘၣ်ကတီၢ်, ပှၤမၤသကိးတၢ်ဒီးနၤ, နဘူးနတံၢ် ဒီးပှၤအိၣ်ကၠိတတီၤဃီဒီးနၤတဖၣ် ခီဖျိလၢဟ့ၣ်အဝဲသ့ၣ် လံာ်ကွဲမုာ် မ့တမ့ၢ် ဒုးနဲၣ်အဝဲသ့ၣ်လၢ jw.org/ksw န့ၣ်တက့ၢ်.

၃. ပမၤလဲၢ်ထီၣ် ပတၢ်သးခုကစီၣ်တၢ်မၤဖဲ လါမၢ်ၡးဒီးလါအ့ဖြ့ၣ် အတီၢ်ပူၤကသ့ဒ်လဲၣ်.

^၃ ပှၤလဲၤလၢညါ မၤစၢၤတၢ်– တၢ်သးဆူၣ် ကထိၣ်ဂဲၤထီၣ်ပှၤလၢ ပကမၤလဲၢ်ထီၣ် ပတၢ်သးခုကစီၣ်တၢ်မၤန့ၣ်လီၤ. ပှၤအါဂၤ မၤဝဲ ပှၤလဲၤလၢညါမၤစၢၤတၢ်ကန့ၢ်ဖဲ လါမၢ်ၡးဒီးလါအ့ဖြ့ၣ် အတီၢ်ပူၤ, မ့ၢ်လၢပအိၣ်ဒီးတၢ်ခွဲးတၢ်ယာ် လၢပတီၣ်ထီၣ်နၣ်ရံၣ် ၃၀ သ့ဝဲအဃိန့ၣ်လီၤ. ဖဲနမၤဟံၣ်ဖိဃီဖိ တၢ်မၤလိလံာ်စီဆှံ မ့တမ့ၢ် နနီၢ်ကစၢ်တၢ်မၤလိလံာ်စီဆှံအခါ ဃ့ဘါထုကဖၣ် ဒီးဆိကမိၣ်ထံလၢနမၤ ပှၤလဲၤလၢညါမၤစၢၤတၢ် ကသ့ဒ်လဲၣ်န့ၣ်တက့ၢ်. (ကတိၤ. ၁၅:၂၂) ခီဖျိနသးဆူၣ်လၢ ခဲၣ်ဖ့တၢ်မၤပူၤအဃိ ကကဲထီၣ်တၢ်ဂံၢ်တၢ်ဘါလၢ ပှၤအါဂၤအဂီၢ် ဒ်သိးအဝဲသ့ၣ်စ့ၢ်ကီး ကစံၣ်တဲၤတဲလီၤတၢ်လၢ တၢ်သးဆူၣ်အပူၤန့ၣ်လီၤ. နမ့ၢ်ဆီတလဲနတၢ်အိၣ်သး ဒ်သိးနမၤအါထီၣ် တၢ်သးခုကစီၣ်တၢ်မၤကသ့အဂီၢ်န့ၣ် မ့ၢ်နကွၢ်လိမၤဒိး ယ့ၣ်ၡူးအတၢ်သးဆူၣ်န့ၣ်လီၤ.—မၢ်ကူး ၆:၃၁-၃၄.

၄. ပမ့ၢ်ကွၢ်လိမၤဒိး ယဟိဝၤယွၤ ဒီးယ့ၣ်ၡူးအတၢ်သးဆူၣ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်.

^၄ ပမ့ၢ်ကွၢ်လိမၤဒိး ယဟိဝၤယွၤ ဒီးယ့ၣ်ၡူးအတၢ်သးဆူၣ် ဖဲတၢ်သ့ၣ်နီၣ်ထီၣ် ယ့ၣ်ၡူးအတၢ်သံအဆၢကတီၢ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤအါမးန့ၣ်လီၤ. အဒိ လၢပတၢ်စံၣ်တဲၤတဲလီၤတၢ်ဟီၣ်ကဝီၤပူၤ ပှၤအါဂၤကနၢ်ဟူဘၣ် တၢ်သးခုကစီၣ်န့ၣ်လီၤ. အဂၤတမံၤန့ၣ် ခီဖျိလၢ ပမၤယဟိဝၤယွၤ အတၢ်မၤ ဒီးဟ့ၣ်တၢ်ဆူပှၤဂၤအဃိ ပကဒိးန့ၢ်ဘၣ် တၢ်သူၣ်ခုသးခု ဒီးတၢ်သူၣ်မံသးမံန့ၣ်လီၤ. (မၤတၢ် ၂၀:၃၅) တၢ်ဆိၣ်ဂ့ၤလၢအဒိၣ်ကတၢၢ်တမံၤန့ၣ် မ့ၢ်ဒၣ်ပကဒိးန့ၢ်ဘၣ်ပကစၢ်ယွၤဒီး အဖိခွါအတၢ်ဘၣ်သးန့ၣ်လီၤ.