နကစးထီၣ်ကတိၤတၢ်ဒီး ပှၤဂၤအဂီၢ် သူလံာ်လၢအမ့ၢ် “ပမၤလိန့ၢ်တၢ်မနုၤလၢ ယွၤအကလုၢ်ကထါအပူၤလဲၣ်” န့ၣ်တက့ၢ်

၁. လၢတၢ်စံၣ်တဲၤတဲလီၤ ဘီမုၢ်တၢ်သးခုကစီၣ်တၢ်မၤအဂီၢ် ပဒိးန့ၢ်ဘၣ်လံာ်အသီမနုၤတဘ့ၣ်လဲၣ်.

^၁ ဖဲ၂၀၁၄ ဃုဆိယွၤအဘီအမုၢ်တက့ၢ် တၢ်အိၣ်ဖှိၣ်ဖးဒိၣ်န့ၣ် ပဒိးန့ၢ်ဘၣ်လံာ်လၢအမ့ၢ် “ပမၤလိန့ၢ်တၢ်မနုၤလၢ ယွၤအကလုၢ်ကထါအပူၤလဲၣ်” န့ၣ်လီၤ. ဖဲပကတဲာ်ကတီၤပသးလၢ တၢ်စံၣ်တဲၤတဲလီၤတၢ်မၤအဂီၢ်အခါ ပကတဲတၢ်ဂ့ၢ်မနုၤလဲၣ်န့ၣ် ပသူလံာ်ဘူဖိတဘ့ၣ်အံၤသ့ဒ်လဲၣ်. လံာ်ဘူဖိတဘ့ၣ်အံၤ ပာ်ဖျါထီၣ်ဝဲလံာ်စီဆှံအဆၢလၢ အဘၣ်ထွဲလိာ်အသးဒီး တၢ်ဂ့ၢ်တၢ်ကျိၤတခါဘၣ်တခါအဃိ လီၤဂာ်လိာ်အသးဒီး (ကျိုးကြောင်းဆင်ခြင်) လံာ်န့ၣ်လီၤ. လၢတၢ်န့ၣ်အဃိ လံာ်ဘူဖိတဘ့ၣ်အံၤ ကဲထီၣ်တၢ်မၤစၢၤလၢ နကစးထီၣ်ကတိၤတၢ်ဒီးပှၤဂၤန့ၣ်လီၤ.

၂. လၢဘီမုၢ်တၢ်သးခုကစီၣ်တၢ်မၤအပူၤ လံာ်လၢအမ့ၢ် “ပမၤလိန့ၢ်တၢ်မနုၤလၢ ယွၤအကလုၢ်ကထါအပူၤလဲၣ်” အံၤမ့ၢ်နကသူအီၤဒ်လဲၣ်.

^၂ သူတၢ်သံကွၢ်နီၣ်ဂံၢ် ၈ ဒီး သံကွၢ်အီၤလၢ- တၢ်နးတၢ်ဖှီၣ်လၢ ပှၤကညီတူၢ်ဘၣ်ဝဲန့ၣ် ပပာ်တၢ်ကမၣ်လၢ ကစၢ်ယွၤအလိၤကသ့ဧါ. မုၢ်မဆါတနံၤအံၤ ပှၤအါဂၤန့ၣ် အဲၣ်ဒိးသ့ၣ်ညါဝဲတၢ်သံကွၢ်အံၤန့ၣ်လီၤ. [လၢတၢ်စံၣ်တဲၤတဲလီၤတၢ်ဟီၣ်ကဝီၤတနီၤနီၤအပူၤန့ၣ် နမ့ၢ်ဒုးနဲၣ်ဟံၣ်ကစၢ်လၢ တၢ်သံကွၢ်လၢအိၣ်လၢ လံာ်ဘူဖိအံၤအပူၤန့ၣ် ကကဲဘျုးဒိၣ်န့ၢ်ဒံး နတဲပၠးအီၤန့ၣ်လီၤ] နဆိကမိၣ်ဒ်လဲၣ်. [အိၣ်ခိးတၢ်စံးဆၢ] ဘၣ်ဃးဒီးတၢ်သံကွၢ်အံၤန့ၣ် လံာ်စီဆှံပာ်ဖျါထီၣ်ဝဲတၢ်စံးဆၢ လၢအလီၤသူၣ်မံသးမုာ်လီၤ. လံာ်စီဆှံအဆၢလၢဘၣ်တၢ်ပာ်ဖျါထီၣ်အီၤန့ၣ် ဖးအီၤတဆၢခံဆၢဒီး တဲသကိးဒီးအီၤတက့ၢ်. မ့ၢ်ဖျါလၢဟံၣ်ကစၢ်အိၣ်ဒီးတၢ်သးစဲန့ၣ် ဒုးနဲၣ်အီၤ တၢ်သံကွၢ်အခါ ၂၀ လၢအိၣ်လၢလံာ်ဘူဖိအံၤအပူၤဒီး မၢအဃုထၢတၢ်သံကွၢ်တခါဒ်သိး နကဟဲက့ၤဟးအိၣ်သကိးအီၤ လၢခံတဘျီအဂီၢ်တက့ၢ်. မ့တမ့ၢ်ဟ့ၣ်အီၤ တၢ်မၤလိအလံာ်တဘ့ၣ်ဘ့ၣ်လၢ ဘၣ်ထွဲလိာ်အသးဒီး တၢ်ဂ့ၢ်လၢနကတိၤသကိးဒီးအီၤတက့ၢ်.

၃. ဖဲပလဲၤစံၣ်တဲၤတဲလီၤတၢ်လၢ ပှၤလၢအတမ့ၢ်ခရံာ်ဖိတဖၣ်အကျါန့ၣ် ပသူလံာ်လၢအမ့ၢ် “ပမၤလိန့ၢ်တၢ်မနုၤလၢ ယွၤအကလုၢ်ကထါအပူၤလဲၣ်” အံၤကသ့ဒ်လဲၣ်.

^၃ တၢ်သံကွၢ် ၄ ဒီး ၁၃ တုၤလၢ ၁၇ န့ၣ်ကကဲထီၣ်တၢ်မၤစၢၤလီၤဆီဖဲ ပလဲၤစံၣ်တဲၤတဲလီၤတၢ် လၢ ပှၤလၢအတမ့ၢ်ခရံာ်ဖိတဖၣ်အကျါန့ၣ်လီၤ. အဒိ သူလံာ်စီဆှံအဆၢလၢ အိၣ်လၢတၢ်သံကွၢ် ၁၇ အဖီလာ်ဒီး တဲအီၤဒ်အံၤတက့ၢ်– “မုၢ်မဆါတနံၤအံၤ ဟံၣ်ဖိဃီဖိတဖၣ် ကွၢ်ဆၢၣ်မဲာ်ဘၣ် တၢ်ကီတၢ်ခဲအါမးတမ့ၢ်ဧါ. [အိၣ်ခိးတၢ်စံးဆၢ] “ပိာ်မုၣ်န့ၣ်မ်အယူးယီၣ် အဝၤတက့ၢ်.” [တလိၣ်တဲဖျါထီၣ်လၢ တၢ်ကတိၤတဖၣ်အံၤ ဟဲလၢ အ့းဖ့းစူး ၅:၃၃ န့ၣ်ဘၣ်. နမ့ၢ်တဲသကိးတၢ်ဒီး ပိာ်မုၣ်န့ၣ်တဲပၠးအီၤ တၢ်ကတိၤလၢအအိၣ်လၢ အ့းဖ့းစူး ၅:၂၈ အပူၤန့ၣ်တက့ၢ်. တလိၣ်လၢနဘၣ်အိးထီၣ်ဖးလံာ်စီဆှံဘၣ်] ပှၤနီၢ်ဒီမါဝၤအါမး ဒိးန့ၢ်ဘၣ်ဝဲတၢ်အဘျုးလၢ တၢ်ကတိၤတဖၣ်လၢအပှဲၤဒီး တၢ်ကူၣ်သ့အံၤလီၤ. ပှၤမ့ၢ်မၤထွဲတၢ်ဟ့ၣ်ကူၣ်တဖၣ်အံၤန့ၣ် အဝဲသ့ၣ်ကအိၣ်ဒီးဟံၣ်မုာ်ဃီပၢၤတမ့ၢ်ဧါ.”

၄. နတဲသကိးတၢ်ဒီး ပှၤလၢအတမ့ၢ်ခရံာ်ဖိတဖၣ်မ့ၢ်ဝံၤန့ၣ် နမၤတၢ်မနုၤသ့ဝဲလဲၣ်.

^၄ နတဲသကိးတၢ်မ့ၢ်ဝံၤန့ၣ် ရဲၣ်လီၤကျဲၤလီၤလၢ နကဟဲက့ၤတဲသကိးဒီးအီၤလၢခံတဘျီအဂီၢ်တက့ၢ်. ဘၣ်သ့ၣ်သ့ၣ်နကရဲၣ်လီၤကျဲၤလီၤလၢ နကတဲသကိးလံာ်စီဆှံအဂၤတဆၢလၢ အိၣ်လၢတၢ်သံကွၢ်လၢနသူတ့ၢ်အီၤ အဖီလာ်သ့ဝဲလီၤ. ကွၢ်ဟံၣ်ကစၢ်အတၢ်အိၣ်သးဒီး လၢခံန့ၣ်ဒုးသ့ၣ်ညါအီၤလၢ တၢ်ဟ့ၣ်ကူၣ်လၢနတဲအီၤတဖၣ်အံၤ အိၣ်လၢလံာ်စီဆှံအပူၤန့ၣ်တက့ၢ်. ဆိကမိၣ်ကွၢ်တၢ်ဂ့ၢ်လၢနကတိၤသကိးဒီးအီၤ ဒီးအတၢ်ထံၣ်အိၣ်လၢ လံာ်စီဆှံအဖီခိၣ်ဒ်လဲၣ်န့ၣ်တက့ၢ်. ဒီးဟ့ၣ်အီၤလံာ်တဘ့ၣ်ဘ့ၣ်လၢ နဆိကမိၣ်လၢ အဝဲကဘၣ်သူၣ်ဘၣ်သးဝဲန့ၣ်တက့ၢ်.—ကွၢ် ၂၀၁၃ လါဒံၣ်စ့ဘၢၣ် (ကျွန်ုပ်တို့၏နိုင်ငံတော်ဓမ္မအမှု ကြားညှပ်စာရွက်) န့ၣ်တက့ၢ်.