လၢတၢ်သးခုကစီၣ်တၢ်မၤအပူၤ သူနတၢ်ဆၢကတီၢ်လၢ အဂ့ၤကတၢၢ်တက့ၢ်
၂၀၁၄ ဘီမုၢ်အတၢ်မၤလၢတနံၣ်အတီၢ်ပူၤ (လုပ်ငန်းတော်နှစ်) ယဟိဝၤပှၤအုၣ်အသးတဖၣ် စံၣ်တဲၤတဲလီၤတၢ်အနၣ်ရံၣ်အိၣ်ဝဲ ၁,၉၄၅,၄၈၇,၆၀၄ န့ၣ်လီၤ. ဖျါတြၢၢ်ကလာ်လၢ ပဝဲသ့ၣ်တဖၣ် ပတၢ်မၤအါလၢ ယဟိဝၤယွၤ အတၢ်မၤအပူၤလီၤ. (စံး. ၁၁၀:၃; ၁ ကရံၣ်. ၁၅:၅၈) တၢ်ဆၢကတီၢ်အိၣ်တ့ၢ်ဒၣ်ထဲတစဲးဖိအဃိ ပတၢ်ခွဲးတၢ်ယာ်လၢ အလုၢ်ဒိၣ်ပှ့ၤဒိၣ်ဖဲ ပဟးစံၣ်တဲၤတဲလီၤတၢ်အခါန့ၣ် မ့ၢ်ပသူအီၤလၢ ပကတဲသကိးတၢ်ဒီး ပှၤအါဂၤအါန့ၢ်ဒံးလၢညါကသ့ဧါ.— ၁ ကရံၣ်. ၇:၂၉.
လၢတၢ်သးခုကစီၣ်တၢ်မၤအပူၤ ဒ်သိးပသူပတၢ်ဆၢကတီၢ်လၢ အဂ့ၤကတၢၢ်ကသ့အဂီၢ် ပကဘၣ်သးအိၣ်ဆီတလဲ ပတၢ်စံၣ်တဲၤတဲလီၤတၢ် တၢ်ရဲၣ်တၢ်ကျဲၤန့ၣ်လီၤ. အဒိ ဖဲပလဲၤစံၣ်တဲၤတဲလီၤတၢ်လၢ တနၣ်ရံၣ် ခံနၣ်ရံၣ်အတီၢ်ပူၤ ပမ့ၢ်တစံၣ်တဲၤတဲလီၤဘၣ်ပှၤနီတဂၤန့ၣ် ပမၤတၢ်ဆီတလဲဒ်သိး ပကစံၣ်တဲၤတဲလီၤဘၣ်တၢ်ဆူ ပှၤအါဂၤအအိၣ် အါန့ၢ်ဒံးလၢညါကသ့ဧါ. တၢ်လီၢ်တတီၤဒီးတတီၤန့ၣ် တၢ်အိၣ်သးတဒ်သိးလိာ်အသးဘၣ်. လၢတၢ်န့ၣ်အဃိ ပမ့ၢ်မၤပိာ်ထွဲ တၢ်ဟ့ၣ်ကူၣ်လၢလာ်အံၤန့ၣ် ကမၤစၢၤပှၤလၢ ပသူပတၢ်ဆၢကတီၢ်လၢအဂ့ၤကတၢၢ်ကသ့ ဒ်သိးပသုတကဲထီၣ် “ဒ်ပှၤတီၢ်ကလံၤအသိး” တဂ့ၤအဂီၢ်န့ၣ်လီၤ.—၁ ကရံၣ်. ၉:၂၆.
တၢ်စံၣ်တဲၤတဲလီၤတၢ်လၢ တဟံၣ်ဘၣ်တဟံၣ်– ပစးထီၣ်ပတၢ်စံၣ်တဲၤတဲလီၤတၢ်မၤလၢ တၢ်လဲၤတဟံၣ်ဘၣ်တဟံၣ်န့ၣ် အိၣ်လံဖးယံာ်လံ. ဘၣ်ဆၣ် ပှၤအါဂၤန့ၣ် မၤတၢ်လၢမုၢ်ဆါခီလီၤ. လၢတၢ်န့ၣ်အဃိ နဂုာ်ကျဲးစၢးလဲၤစံၣ်တဲၤတဲလီၤတၢ် တဟံၣ်ဘၣ်တဟံၣ် ဖဲအဝဲသ့ၣ်ဟဲက့ၤတုၤလၢအဟံၣ်ဒီးဟံးန့ၢ်တၢ်အိၣ်ဘှံးလၢ ဟါခီအဆၢကတီၢ်ကသ့ဧါ. လၢမုၢ်ဆါခီအဆၢကတီၢ် နမ့ၢ်လဲၤစံၣ်တဲၤတဲလီၤတၢ်လၢ ကျဲခိၣ် မ့တမ့ၢ် လၢတၢ်ဆါတၢ်ပှ့ၤအလီၢ်န့ၣ် ဘၣ်သ့ၣ်သ့ၣ်အဘျုးကအိၣ်ဒိၣ်န့ၢ်အလီၢ်လီၤ.
တၢ်စံၣ်တဲၤတဲလီၤတၢ်လၢ ကမျၢၢ်မဲာ်ညါ– ဖဲပှၤလ့ၢ်ထီၣ်လ့ၢ်လိၤအါအလီၢ်လၢ နတၢ်အိၣ်ဖှိၣ်တၢ်စံၣ်တဲၤတဲလီၤတၢ်ဟီၣ်ကဝီၤအပူၤန့ၣ် ကြၢးနပာ်လီၤ စီၢ်နီၤခိၣ်ဒီး လ့ၣ်ဆီၣ်လၢတၢ်စံၣ်တဲၤတဲလီၤတၢ်အဂီၢ်လီၤ. (၂၀၁၃၊ ဇူလိုင်လထုတ် ကျွန်ုပ်တို့၏နိုင်ငံတော်ဓမ္မအမှု စာမျက်နှာ ၅ ကိုကြည့်ပါ။) တၢ်လီၢ်လၢ တၢ်စံၣ်တဲၤတဲလီၤတၢ်လၢ ကမျၢၢ်မဲာ်ညါအံၤ ပှၤလ့ၢ်ထီၣ်လ့ၢ်လိၤမ့ၢ်စှၤလီၤန့ၣ် တၢ်အိၣ်ဖှိၣ်ကမံးတံာ် ဆၢတဲာ်ဝဲလၢ ကသုးဝဲစီၢ်နီၤခိၣ်ဒီး လ့ၣ်ဆီၣ်ဆူတၢ်လီၢ်အဂၤတတီၤသ့ဝဲလီၤ.
တၢ်က့ၤအိၣ်သကိးဟံၣ်ကစၢ်ဒီး တၢ်မၤလိလံာ်စီဆှံဒီးပှၤဂၤ– နတၢ်စံၣ်တဲၤတဲလီၤတၢ်မၤလၢ ကျဲအဂၤတဖၣ် မ့ၢ်တကဲထီၣ်လိၣ်ထီၣ်အဆၢကတီၢ်န့ၣ် နမၤတၢ်က့ၤအိၣ်သကိးဟံၣ်ကစၢ် ဒီးတၢ်မၤလိလံာ်စီဆှံဒီးပှၤဂၤကသ့ဧါ. အဒိ လၢမုၢ်ဃုနံၤဂီၤခီ နလဲၤတဟံၣ်ဘၣ်တဟံၣ်အဘျုးမ့ၢ်အိၣ်န့ၣ် လဲၤတဟံၣ်ဘၣ်တဟံၣ်တက့ၢ်. ဝံၤဒီးမုၢ်ဆါခီ မ့တမ့ၢ်ဟါခီန့ၣ် နလဲၤမၤတၢ်မၤလိလံာ်စီဆှံဒီး ပှၤဂၤကသ့ဧါ. ဒ်သိးတၢ်စံၣ်တဲၤတဲလီၤတၢ်မၤ ကကဲထီၣ်လိၣ်ထီၣ်အါထီၣ်အဂီၢ် နရဲၣ်ကျဲၤလၢ နကမၤတၢ်က့ၤအိၣ်သကိးဟံၣ်ကစၢ်တဖၣ်လၢ အအိၣ်လၢတၢ်လီၢ်တတီၤဃီအပူၤကသ့ဧါ.
ဖဲပဟးစံၣ်တဲၤတဲလီၤတၢ်တဘျီလၢ်လၢ်န့ၣ် ပကွဲးနီၣ်ဃာ်နၣ်ရံၣ်သ့သနာ်က့ ဖဲပထံၣ်ဘၣ်တၢ်ကဲထီၣ်လိၣ်ထီၣ်အခါ ပသးခုဒိၣ်မးလီၤ. တၢ်ဆၢကတီၢ်လၢ နတၢ်စံၣ်တဲၤတဲလီၤတၢ်မၤလၢ ကျဲတမံၤမံၤ မ့ၢ်တကဲထီၣ်လိၣ်ထီၣ်ဘၣ်န့ၣ် ဂုာ်ကျဲးစၢးမၤကွၢ်လၢ ကျဲအဂၤတမံၤတက့ၢ်. ဃ့ဘါထုကဖၣ်လၢ ယဟိဝၤယွၤ “ကူးတၢ်အလီၢ်အကစၢ်” လၢကနဲၣ်လိနၤ ဒ်သိးနသူနတၢ်ဆၢကတီၢ် လၢအဂ့ၤကတၢၢ်ကသ့အဂီၢ်န့ၣ်တက့ၢ်.—မး. ၉:၃၈.