တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—သူဘရိၣ်ခၠၣ်လၢအမ့ၢ် တၢ်သးခုကစီၣ်လၢ ယွၤအအိၣ် ဒီးစးထီၣ်မၤလိလံာ်စီဆှံဒီးဟံၣ်ကစၢ်လၢ ပဲတြီအခီၣ်ထံးတက့ၢ်

ဘၣ်မနုၤအဃိအရ့ဒိၣ်လဲၣ်– ဒ်သိးပကဒုးကဲထီၣ်ပှၤဂၤလၢ ယ့ၣ်ၡူးအပျဲၢ်အဘီၣ်အဂီၢ် ပကဘၣ်မ့ၢ်ပှၤလၢအသိၣ်လိ ကစၢ်ယွၤအကလုၢ်ကထါသ့တဂၤန့ၣ်လီၤ. (မး. ၂၈:၁၉, ၂၀) ပဝဲကိးဂၤဒဲးပမ့ၢ်သူ လံာ်လဲၢ်တဖၣ်လၢ ပတၢ်ကရၢကရိထုးထီၣ်န့ၢ်ပှၤန့ၣ် ပသိၣ်လိတၢ်မ့ၢ်တၢ်တီဂ့ၤဂ့ၤဘၣ်ဘၣ် သ့ဝဲလီၤ. ဘရိၣ်ခၠၣ် တၢ်သးခုကစီၣ်လၢ ယွၤအအိၣ် ဘၣ်တၢ်ကတဲာ်ကတီၤအီၤ ဒ်သိးပကသိၣ်လိပှၤဂၤလၢတၢ်မ့ၢ်တၢ်တီအဂီၢ်န့ၣ်လီၤ. တကးဒံးဘၣ် ပသူလံာ်တဘ့ၣ်အံၤ ဒ်သိးပကစးထီၣ်မၤလိ လံာ်စီဆှံဒီးဟံၣ်ကစၢ် ဖဲပတဲသကိးတၢ်ဒီးအီၤ အဆိကတၢၢ်တဘျီလၢ အပဲတြီအခီၣ်ထံးအဆၢကတီၢ်သ့ဝဲလီၤ.

ပမၤကသ့ဒ်လဲၣ်–

ကွၢ်တၢ်အဒိလၢ တၢ်နီၤလီၤဘရိၣ်ခၠၣ်အံၤအဂီၢ်လၢတၢ်လွံၢ်နၢၣ်အပူၤတက့ၢ်.—ကွၢ်စ့ၢ်ကီး ၂၀၁၃၊ မတ်လထုတ် ကျွန်ုပ်တို့၏နိုင်ငံတော်ဓမ္မအမှု.
ဖၢနုာ်နဘရိၣ်ခၠၣ်လၢ နတၢ်စံၣ်တဲၤတဲလီၤတၢ်အထၢၣ်ပူၤ. ဒီးကတဲာ်ကတီၤဘရိၣ်ခၠၣ်တဖၣ် လၢနကနီၤလီၤပှၤဂၤအဂီၢ်တက့ၢ်.
သူဘရိၣ်ခၠၣ်အံၤဒ်သိး နကမၤလိသကိးဒီးဟံၣ်ကစၢ်ထဲတဆၢခံဆၢလၢ အမံးနံးတဆံ မ့တမ့ၢ် စှၤန့ၢ်အန့ၣ်တက့ၢ်.

မၤကွၢ်တၢ်အံၤ လၢတလါညါအံၤအတီၢ်ပူၤတက့ၢ်–

ဃ့ထုကဖၣ်လၢ ယဟိဝၤယွၤကအိးထီၣ်နသး ဒ်သိးနကသးအိၣ်စးထီၣ်မၤလိလံာ်စီဆှံ ဒီးပှၤတဂၤဂၤအဂီၢ်တက့ၢ်. တကးဒံးဘၣ် ဃ့ကညးအီၤလၢ ကမၤစၢၤနၤဒ်သိး နကစးထီၣ်တၢ်မၤလိလံာ်စီဆှံဒီးပှၤတဂၤဂၤ ဒီးလၢနသိၣ်လိတၢ်မ့ၢ်တၢ်တီသ့သ့ဘၣ်ဘၣ် ကသ့အဂီၢ်တက့ၢ်.—ဖံလံး. ၂:၁၃.
ဖဲနမၤဟံၣ်ဖိဃီဖိတၢ်မၤလိလံာ်စီဆှံ မ့တမ့ၢ် နီၢ်ကစၢ်တၢ်မၤလိလံာ်စီဆှံအခါန့ၣ် ဟံးန့ၢ်တၢ်ဆၢကတီၢ်ဒ်သိး နကတိၢ်န့ၢ်တၢ်အဒိလၢ တၢ်နီၤလီၤဘရိၣ်ခၠၣ်အံၤအဂီၢ်တက့ၢ်. နမ့ၢ်မၤဒ်န့ၣ်န့ၣ် နကအိၣ်ဒီးတၢ်သူၣ်ဒူသးဒူ ဖဲနစးထီၣ် မၤလိလံာ်စီဆှံဒီးဟံၣ်ကစၢ်လၢပဲတြီအခီၣ်ထံးအဆၢကတီၢ်န့ၣ်လီၤ.

ဖဲပလဲၤလၢ ဟံၣ်တဖျၢၣ်ဘၣ်တဖျၢၣ်–

“တနံၤအံၤယဟဲလၢနအိၣ်လၢယကတဲဘၣ်နၤဘၣ်ဃး ခါဆူညါတၢ်ကမၤအသးတဖၣ်အဂ့ၢ်န့ၣ်လီၤ. မ့ၢ်နဆိကမိၣ်လၢဟီၣ်ခိၣ် အတၢ်အိၣ်သးတဖၣ်ကဟဲဂ့ၤထီၣ်က့ၤတဘျီဘျီဧါ. [အိၣ်ခိးကွၢ်တၢ်စံးဆၢတက့ၢ်.] ဖဲပှၤနၢ်ဟူဘၣ် လံာ်စီဆှံအတၢ်သးခုကစီၣ်လၢအဟ့ၣ်ထီၣ်ဝဲတၢ်မုၢ်လၢ်အဆၢကတီၢ်န့ၣ် အဝဲသ့ၣ်အါဂၤကမၢကမၣ်ဝဲလီၤ. လံာ်စီဆှံစံးဆၢက့ၤဝဲတၢ်သံကွၢ်တဖၣ်အံၤလီၤ.” ဟ့ၣ်လီၤဟံၣ်ကစၢ်လၢဘရိၣ်ခၠၣ်တဘ့ၣ် ဒီးမၢအဃုထၢတၢ်သံကွၢ်လၢအဘၣ်အသးဒိၣ်ကတၢၢ်တခါလၢ ဘရိၣ်ခၠၣ်အံၤအလီၢ်ခံတက့ၢ်. ဝံၤဒီး အိးထီၣ်တၢ်မၤလိအခိၣ်တီလၢ ဟံၣ်ကစၢ်ဃုထၢဝဲ ဒီးစးထီၣ်မၤလိလံာ်စီဆှံဒီးအီၤတက့ၢ်. ရဲၣ်လီၤကျဲၤလီၤလၢ နကဟဲက့ၤမၤလိသကိး တၢ်သံကွၢ်လၢခံတဖျၢၣ်လၢ တၢ်မၤလိအံၤအပူၤတက့ၢ်.