တၢ်ပီးတၢ်လီတလါလၢ ပတၢ်သိၣ်လိအဂီၢ်

၁. ခရံာ်ဖိလၢ အစိာ်တၢ်သးခုကစီၣ်တဖၣ် လီၤဂာ်ဒ်ပှၤစုသ့လၢ ကျဲဒ်လဲၣ်.

^၁ ပှၤစုသ့သူဝဲ တၢ်ပီးတၢ်လီအကလုာ်ကလုာ်လီၤ. တဘျီတခီၣ် တၢ်ပီးတၢ်လီတနီၤန့ၣ် ဘၣ်တၢ်သူအီၤလၢ တၢ်မၤလီၤလီၤဆီဆီတခါအဃိ ပှၤသူအီၤထဲတဘျီတခီၣ်လီၤ. ဘၣ်ဆၣ်တၢ်ပီးတၢ်လီအဂၤတဖၣ် တၢ်သူအီၤထီဘိလီၤ. တၢ်ပီးတၢ်လီလၢပှၤသူဝဲထီဘိန့ၣ် ပှၤစုသ့တဖၣ်စိာ်ဝဲလၢ အတၢ်ပီးတၢ်လီအတလါပူၤထီဘိလီၤ. ဒီးအဝဲသ့ၣ်သူဝဲတၢ်ပီးတၢ်လီတဖၣ်အံၤ သ့သ့ဘၣ်ဘၣ်လီၤ. လံာ်စီဆှံဟ့ၣ်ဂံၢ်ဟ့ၣ်ဘါ ပှၤခရံာ်ဖိတဖၣ်လၢ ကဂုာ်ကျဲးစၢးလၢ တၢ်စံၣ်တဲၤတဲလီၤတၢ်မၤအပူၤ ဒ်သိးကကဲထီၣ် “ပှၤမၤတၢ်ဖိလၢ အမဲာ်ဆှးအလီၢ်တအိၣ်ဘၣ်” အဂီၢ်လီၤ. (၂ တံၤ. ၂:၁၅) လၢပတၢ်ပီးတၢ်လီတလါအပူၤ တၢ်ပီးတၢ်လီလၢအရ့ဒိၣ်ကတၢၢ်န့ၣ် မ့ၢ်မနုၤလဲၣ်. မ့ၢ်ဝဲယွၤအကလုၢ်ကထါလီၤ.— တၢ်အံၤမ့ၢ် တၢ်ပီးတၢ်လီလၢ အရ့ဒိၣ်ကတၢၢ်တခါ ဒ်သိးပကဒုးကဲထီၣ်ပှၤလၢ ယ့ၣ်ၡူးအပျဲၢ်အဘီၣ်အဂီၢ်လီၤ. (မး. ၂၈:၁၉, ၂၀) လၢတၢ်န့ၣ်အဃိ ပကြၢးဂုာ်ကျဲးစၢးဆူၣ်ဆူၣ်ဒ်သိး ပကကဲထီၣ် “ပှၤနီၤဖး တၢ်မ့ၢ်တၢ်တီအကလုၢ်ကထါအဆၢ တီတီလိၤလိၤ” လီၤ. ဘၣ်ဆၣ်လၢပတၢ်ပီးတၢ်လီတလါအပူၤ တၢ်ပီးတၢ်လီတဖၣ်လၢ ပသူအီၤထီဘိန့ၣ်အိၣ်ဒံးဝဲလီၤ. ဒီးပှၤခရံာ်ဖိတဖၣ် ကြၢးဂုာ်ကျဲးစၢးသူ တၢ်ပီးတၢ်လီတဖၣ်အံၤ သ့သ့ဘၣ်ဘၣ် ဒ်သိးကသိၣ်လိပှၤဂၤ လံာ်စီဆှံတၢ်မ့ၢ်တၢ်တီန့ၣ်လီၤ.—ကတိၤ. ၂၂:၂၉.

၂. ပတၢ်ပီးတၢ်လီတဖၣ်လၢ ပသူအီၤထီဘိန့ၣ်မ့ၢ်မနုၤလဲၣ်.

^၂ ပတၢ်ပီးတၢ်လီတဖၣ်လၢ ပသူအီၤထီဘိ– ပသူလံာ်စီဆှံ, တကးဒံးဘၣ် ပကြၢးသူတၢ်ပီးတၢ်လီအဂၤ မနုၤတဖၣ်လဲၣ်. တၢ်ပီးတၢ်လီအရ့ဒိၣ်လၢ ပသူအီၤလၢကသိၣ်လိပှၤဂၤ လံာ်စီဆှံတၢ်မ့ၢ်တၢ်တီတဖၣ်န့ၣ်မ့ၢ်ဝဲ လံာ်စီဆှံသိၣ်လိတၢ် နီၢ်နီၢ်မ့ၢ်မနုၤလဲၣ်. နမၤလိအီၤလံာ်တဘ့ၣ်အံၤမ့ၢ်ဝံၤဒီး ဒ်သိးလံာ်စီဆှံအတၢ်သိၣ်တၢ်သီမိၢ်ပှၢ် ကမၤစၢၤအီၤလၢအတၢ်အိၣ်မူ ကိးနံၤဒဲးအဂီၢ် ဆဲးမၤလိကဒီးအီၤလံာ်လၢအမ့ၢ် “အိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံပူၤတက့ၢ်.” လၢတၢ်န့ၣ်အဃိ ပကြၢးကဲထီၣ်ပှၤလၢ အသူလံာ်ခံဘ့ၣ်အံၤသ့ ဂ့ၤဂ့ၤဘၣ်ဘၣ်လီၤ. ဘရိၣ်ခၠၣ်တနီၤစ့ၢ်ကီး ကြၢးပၣ်ဃုာ်လၢ ပတၢ်ပီးတၢ်လီ တလါပူၤန့ၣ်လီၤ. တၢ်သးခုကစီၣ်လၢ ယွၤအိၣ် ဘရိၣ်ခၠၣ်အံၤစ့ၢ်ကီး မ့ၢ်တၢ်ပီးတၢ်လီလၢ အရ့ဒိၣ်တခါလၢ ပကစးထီၣ်မၤလိ ပှၤဂၤလံာ်စီဆှံန့ၣ်လီၤ. လၢပတၢ်စံၣ်တဲၤတဲလီၤတၢ်ဟီၣ်ကဝီၤပူၤ ပှၤလၢအဖးလံာ်တသ့အါအါဘၣ် မ့တမ့ၢ် လံာ်လဲၢ်လၢအဝဲသ့ၣ်အကျိာ် မ့ၢ်တအိၣ်အါဒံးဘၣ် မ့တမ့ၢ် တအိၣ်ဒံးဘၣ်န့ၣ် ပသူဘရိၣ်ခၠၣ်လၢအမ့ၢ် စူၢ်ယွၤအကလုၢ်တက့ၢ် မ့တမ့ၢ် စူၢ်ယွၤအကလုၢ်ဒီးအိၣ်မူလီၤထူလီၤယိာ်တက့ၢ် သ့ဝဲန့ၣ်လီၤ. တၢ်ပီးတၢ်လီလၢ ပသူအီၤထီဘိဒ်သိး ပှၤလၢပမၤလိအီၤတဖၣ် ကနၢ်ပၢၢ်ထီၣ်ပတၢ်ကရၢကရိအဂ့ၢ်န့ၣ် မ့ၢ်ဝဲ မုၢ်မဆါတနံၤအံၤ မတၤတဖၣ်မၤ ယဟိဝၤယွၤအတၢ်ဘၣ်သးလဲၣ် န့ၣ်လီၤ. တၢ်ဂီၤမူလၢအမ့ၢ် ဘၣ်မနုၤအဃိ ဘၣ်မၤလိလံာ်စီဆှံလဲၣ်, ဖဲဘီမုၢ်ဘျီၣ်ဒိၣ်န့ၣ် ပှၤမၤတၢ်မနုၤလဲၣ်ဒီး (ဘုရားသခင်မှာ နာမည်ၡိသလား) တဖၣ်အံၤစ့ၢ်ကီး ကကဲထီၣ်တၢ်မၤစၢၤဒ်သိး ပကဒုးကဲထီၣ်ပှၤလၢ ယ့ၣ်ၡူးအပျဲၢ်အဘီၣ်အဃိ မ့ၢ်ဝဲတၢ်ပီးတၢ်လီလၢ ပကြၢးသူအီၤန့ၣ်လီၤ.

၃. ဘီမုၢ်အတၢ်မၤ လံာ်လၢကဟဲထီၣ်လၢခံတဖၣ်န့ၣ် ကမၤစၢၤပှၤလၢ ပကမၤတၢ်မနုၤလဲၣ်.

^၃ ဘီမုၢ်အတၢ်မၤ လံာ်လၢကဟဲထီၣ်လၢခံတဖၣ်န့ၣ် ကမၤစၢၤပှၤဒ်သိး ပကသူလံာ်လဲၢ်တဖၣ် လၢအိၣ်ဝဲလၢ ပတၢ်ပီးတၢ်လီတလါအပူၤ ကသ့ဂ့ၤဂ့ၤအဂီၢ်လီၤ. ပမ့ၢ်ဂုာ်ကျဲးစၢးသူ တၢ်ပီးတၢ်လီတဖၣ်အံၤ ဂ့ၤဂ့ၤဘၣ်ဘၣ်န့ၣ် မ့ၢ်ဒၣ်ပမၤထွဲ တၢ်ဟ့ၣ်ကူၣ်လၢ “ပလီၢ်နသးလၢနကစၢ်ဒၣ်နဲအဂ့ၢ်, ဒီးလၢတၢ်သိၣ်တၢ်သီအဂ့ၢ်တက့ၢ်. အိၣ်လၢအပူၤဆိးလၢအပူၤတက့ၢ်. အဂ့ၢ်ဒ်အံၤ, နမ့ၢ်မၤဒ်န့ၣ်ဒီး, နကအုၣ်က့ၤခီၣ်က့ၤနသးဒၣ်နဲ, ဒီးပှၤလၢအနၢ်ဟူတၢ်လၢနၤတဖၣ်လီၤ.”—၁ တံၤ. ၄:၁၆.