တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—သိၣ်လိနဲၣ်လိပှၤအသီတဖၣ်

ဘၣ်မနုၤအဃိအရ့ဒိၣ်လဲၣ်– ယ့ၣ်ၡူးအပျဲၢ်အဘီၣ်လၢအသီတဖၣ် ကဘၣ်မၤလိ “ကယဲၢ်တၢ်. . . ခဲလၢာ်” လၢယ့ၣ်ၡူးမၤလိာ်တ့ၢ်ဝဲ, ပၣ်ဃုာ်ဒီးတၢ်သိၣ်လိပှၤဂၤလၢ တၢ်မ့ၢ်တၢ်တီန့ၣ်လီၤ. (မး. ၂၈:၁၉, ၂၀) ပှၤအသီအါဂၤန့ၣ် တုၤထီၣ်ထီၣ်ဘးလၢ ကပၣ်ဃုာ်လၢတၢ်စံၣ်တဲၤတဲလီၤတၢ်ကၠိလီၤ. တကးဒံးဘၣ် အဝဲသ့ၣ်တဲဘၣ်အဟံၣ်ဖိဃီဖိ မ့တမ့ၢ် အတံၤသကိးတဖၣ် ဘၣ်ဃးဒီးတၢ်မ့ၢ်တၢ်တီလီၤ. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်ဝဲအသိး အဝဲသ့ၣ်အတၢ်အဲၣ်တၢ်မ့ၢ်တၢ်တီန့ၣ် ကဒိၣ်ထီၣ်ဝဲလီၤ. ဒီးဖဲအဝဲသ့ၣ်နၢ်ပၢၢ်ထီၣ်ဝဲလၢ ယဟိဝၤယွၤအဲၣ်ဒိးလၢ ပှၤခဲလၢာ်ကနၢ်ဟူဘၣ်ဝဲတၢ်သးခုကစီၣ်အခါ ဘၣ်သ့ၣ်သ့ၣ် အဝဲသ့ၣ်ကအဲၣ်ဒိးပၣ်ဃုာ်လၢ ဘီမုၢ်တၢ်သးခုကစီၣ်တၢ်မၤအပူၤလီၤ. (ရိ. ၁၀:၁၃, ၁၄) ဖဲပှၤတဂၤကဲထီၣ် ပှၤစံၣ်တဲၤတဲလီၤတၢ်ဖိအသီလၢ အတဒိးဘျၢဘၣ်ထံဒံးဘၣ်အခါန့ၣ် တၢ်သိၣ်လိနဲၣ်လိလၢအဂ့ၤ ကမၤစၢၤအဝဲသ့ၣ်လၢကနာ်န့ၢ်လီၤအသးအဂီၢ်န့ၣ်လီၤ.—လူၤ. ၆:၄၀