တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—တၢ်နီၤလီၤ လံာ်စီဆှံသိၣ်လိတၢ် နီၢ်နီၢ်မ့ၢ်မနုၤလဲၣ်

ဘၣ်မနုၤအဃိအရ့ဒိၣ်လဲၣ်– လံာ်စီဆှံသိၣ်လိတၢ်နီၢ်နီၢ်မ့ၢ်မနုၤလဲၣ်န့ၣ် မ့ၢ်တၢ်ပီးတၢ်လီလၢအရ့ဒိၣ်တခါ လၢအိၣ်လၢပတၢ်ပီးတၢ်လီတလါအပူၤ လၢပတၢ်သိၣ်လိအဂီၢ်န့ၣ်လီၤ. ဘၣ်ဆၣ် တချုးလၢပသူလံာ်အံၤလၢ ပကသိၣ်လိပှၤတဂၤဂၤဒံးဘၣ်န့ၣ် ပကဘၣ်နီၤလီၤဆိအီၤန့ၣ်လီၤ. လၢတၢ်န့ၣ်အဃိ လၢပတၢ်စံၣ်တဲၤတဲလီၤတၢ်မၤအပူၤ ပကြၢးဂုာ်ကျဲးစၢး မၤအါထီၣ်ပတၢ်သ့တၢ်ဘၣ် လၢပကနီၤလီၤ လံာ်စီဆှံသိၣ်လိတၢ်နီၢ်နီၢ်မ့ၢ်မနုၤလဲၣ် န့ၣ်လီၤ. (ကတိၤ. ၂၂:၂၉) တၢ်ဟ့ၣ်ကူၣ်အိၣ်ဝဲအါမး ဘၣ်ဆၣ်ပှၤစံၣ်တဲၤတဲလီၤတၢ်ဖိတဖၣ် ကြၢးသူဝဲတၢ်ဟ့ၣ်ကူၣ်လၢ ကကဲဘျုးလၢအဂီၢ်လီၤ.

ပမၤကသ့ဒ်လဲၣ်–

သူတၢ်သံကွၢ်လၢ ကထိၣ်ဟူးထိၣ်ဂဲၤထီၣ် ဟံၣ်ကစၢ်အသး ဒ်သိးအသးကစၢၢ်ဆၢဝဲ တၢ်ဂ့ၢ်မိၢ်ပှၢ်တခါခါလၢ လံာ်အံၤအပူၤန့ၣ်တက့ၢ်. မ့တမ့ၢ် နသံကွၢ်တၢ်သံကွၢ်တခါခါ လၢဘၣ်တၢ်ပာ်ဖျါအီၤလၢ တၢ်နီၤဖးတခါစုာ်စုာ်အခီၣ်ထံး သ့ဝဲလီၤ. ဖဲဟံၣ်ကစၢ်စံးဆၢက့ၤနၤဝံၤအလီၢ်ခံ ဖးလံာ်စီဆှံတဆၢလၢအကြၢးဝဲဘၣ်ဝဲ ဒီးဒုးနဲၣ်အီၤလံာ်အဆၢလၢ ဘၣ်ထွဲလိာ်အသး ဒီးတဲသကိးတၢ်ဂ့ၢ်ဖုၣ်ကိာ်ဒီးအီၤတက့ၢ်.
ကျဲအဂၤတဘိန့ၣ် သူတၢ်သံကွၢ်တဖၣ်လၢ ဘၣ်တၢ်ပာ်ဖျါအီၤလၢလံာ်ကဘျံးပၤ ၃ ဒီး ၆ ဒီးဒုးနဲၣ်အီၤတၢ်စံးဆၢတက့ၢ်. အဒိ, နကဒုးနဲၣ်အီၤတၢ်ဂ့ၢ်လၢလံာ်ကဘျံးပၤ ၃ အပူၤ ဒီးနကတဲဘၣ်အီၤလၢ ဘၣ်ဃးဒီးတၢ်သံကွၢ်တဖၣ်အံၤန့ၣ် ပှၤအါဂၤအဲၣ်ဒိးသ့ၣ်ညါဝဲအတၢ်စံးဆၢလီၤ. မ့တမ့ၢ် နတဲသ့လၢ ပဟဲဟးအိၣ်သကိးနၤ ဒီးပှၤလၢနခိၣ်နဃၢၤ ခီဖျိပအဲၣ်ဒိးဒုးသ့ၣ်ညါနၤဘၣ်ဃးဒီး ခါဆူညါတၢ်ကဟဲကဲထီၣ်အသး လၢအဂ့ၤတဖၣ်န့ၣ်လီၤ. ဝံၤဒီးဒုးနဲၣ်အီၤ တၢ်ဂီၤတဖၣ်လၢ လံာ်ကဘျံးပၤ ၄-၅ ဒီးသံကွၢ်အီၤ “မ့ၢ်နအဲၣ်ဒိးထံၣ်ဘၣ် ယွၤအတၢ်အၢၣ်လီၤအီလီၤတဖၣ်အံၤ ဟဲလၢပှဲၤထီၣ် ဖဲလဲၣ်တခါလဲၣ်.” မ့တမ့ၢ် တဲဘၣ်ဟံၣ်ကစၢ်လၢ နဟဲဟးဒ်သိး နကမၤစၢၤပှၤဂၤလၢ ကထံၣ်န့ၢ် တၢ်သံကွၢ်တဖၣ်လၢဘၣ်ဃးဒီး ပတၢ်အိၣ်မူ အတၢ်စံးဆၢန့ၣ်လီၤ. ဝံၤဒီးဒုးနဲၣ်ဟံၣ်ကစၢ် တၢ်သံကွၢ်တဖၣ်ဖဲလံာ်ကဘျံးပၤ ၆ ဒီးသံကွၢ်အီၤလၢ မ့ၢ်နအဲၣ်ဒိးသ့ၣ်ညါတၢ်စံးဆၢ ဖဲလဲၣ်တခါလဲၣ်န့ၣ်တက့ၢ်.
ဂုာ်ကျဲးစၢးဒ်သိး နကစးထီၣ်တၢ်မၤလိလံာ်စီဆှံဒီးပှၤဂၤ တဘျီဃီန့ၣ်တက့ၢ်. နတဲအီၤဒ်အံၤသ့—“ပမၤလိလံာ်စီဆှံဒီးပှၤဂၤဒ်လဲၣ်ဒ်လဲၣ်န့ၣ် ယအဲၣ်ဒိးဒုးနဲၣ်နၤ. လၢညါန့ၣ် မ့ၢ်နထံၣ်ဘၣ်လံာ်တဘ့ၣ်အံၤ တဘျီဘျီဧါ [အိၣ်ခိးတၢ်စံးဆၢ] နတၢ်ဆၢကတီၢ်မ့ၢ်အိၣ်တစိၢ်ဖိန့ၣ် ယအဲၣ်ဒိးဒုးနဲၣ်နၤလၢ လံာ်တဘ့ၣ်အံၤ မၤစၢၤနၤလၢနမၤလိ လံာ်စီဆှံကသ့ဒ်လဲၣ်န့ၣ်လီၤ.”

မၤကွၢ်တၢ်အံၤလၢ တလါညါအံၤအတီၢ်ပူၤတက့ၢ်–

ကၠီးလိသုသးလၢ သုဟံၣ်ဖိဃီဖိတၢ်မၤလိလံာ်စီဆှံ အပူၤတက့ၢ်.
ဖဲနလဲၤစံၣ်တဲၤတဲလီၤတၢ်အခါ, တဲဘၣ်ပှၤစံၣ်တဲၤတဲလီၤတၢ်ဖိအဂၤလၢ တၢ်ဂ့ၢ်လၢနကတဲာ်ကတီၤပာ်န့ၣ်တက့ၢ်. (ကတိၤ. ၂၇:၁၇) တၢ်ဂ့ၢ်လၢနကတဲာ်ကတီၤပာ်တဖၣ် အဘျုးမ့ၢ်တအိၣ်လၢဟံၣ်ကစၢ်အဂီၢ်န့ၣ် ဆီတလဲတၢ်ဂ့ၢ်လၢ အဂၤတခါန့ၣ်တက့ၢ်.