တဲာ်ကတီၤနသး ဒ်သိးနကသိၣ်လိတၢ် သ့သ့ဘၣ်ဘၣ်အဂီၢ်တက့ၢ်

ဘၣ်ဃးဒီး တၢ်မူအထူအယိာ်န့ၣ် ပှၤသံကွၢ်ယ့ၣ်ၡူးအစှၤကတၢၢ် ခံဘျီလီၤ. ဘၣ်ဆၣ် ဖဲအဝဲစံးဆၢက့ၤတၢ်သံကွၢ် ခံဘျီအံၤအခါန့ၣ် အတၢ်စံးဆၢတဒ်သိးလိာ်သးဘၣ်. အတၢ်စံးဆၢန့ၣ် ဒိးသန့ၤထီၣ်အသးလၢ ပှၤသံကွၢ်တၢ်ဖိ အတၢ်အိၣ်သးအဖီခိၣ်န့ၣ်လီၤ. (လူၤကၣ် ၁၀:၂၅-၂၈; ၁၈:၁၈-၂၀) တၢ်ဂ့ၢ်လၢ ပကသိၣ်လိပပှၤမၤလိလံာ်စီဆှံဖိန့ၣ် ပမ့ၢ်သ့ၣ်ညါနၢ်ပၢၢ် လီၤတံၢ်လီၤဆဲးသနာ်က့ ပကြၢးကတဲာ်ကတီၤပာ်ပသး တချုးလၢပတဲသကိးတၢ်ဒီးအီၤအခါန့ၣ်လီၤ. ပကဘၣ်ဆိကမိၣ်ပာ်စၢၤတၢ်ဂ့ၢ်လၢ အဝဲနၢ်ပၢၢ်ဝဲကကီ မ့တမ့ၢ် တူၢ်လိာ်ဝဲကကီန့ၣ် ကမ့ၢ်မနုၤလဲၣ်. ပကဘၣ်ဆိကမိၣ်ပာ်စၢၤလၢ ပကဖးန့ၢ်အီၤလံာ်စီဆှံ ဖဲလဲၣ်တဆၢလဲၣ်. ဒီးပကြၢးတဲသကိးတၢ်ဂ့ၢ်တၢ်ကျိၤဆံးအါလဲၣ်န့ၣ်လီၤ. ဒ်သိးအဝဲကနၢ်ပၢၢ်ဝဲ တၢ်ဂ့ၢ်တၢ်ကျိၤလီၤတံၢ်လီၤဆဲးအဂီၢ် ပကြၢးကတဲာ်ကတီၤဆိပာ်စၢၤ တၢ်အဒိ, တၢ်ဂ့ၢ်လၢနကတဲနၢ်ပၢၢ်အီၤတဖၣ် မ့တမ့ၢ် တၢ်သံကွၢ်တဖၣ်လၢ ကမၤစၢၤအီၤန့ၣ်လီၤ. တကးဒံးဘၣ် ယဟိဝၤယွၤမ့ၢ်ပှၤလၢ အဒုးဒိၣ်ထီၣ်တၢ်မ့ၢ်တၢ်တီအချံလၢ ပှၤသးပူၤအဃိ ပကြၢးဃ့ယဟိဝၤယွၤ အတၢ်ဆိၣ်ဂ့ၤ ဖဲပကတဲာ်ကတီၤတၢ်လၢ ပတၢ်မၤလိအဂီၢ်လီၤ. တကးဒံးဘၣ် ပကြၢးဃ့ယဟိဝၤယွၤ အတၢ်ဆိၣ်ဂ့ၤလၢ ပပှၤမၤလိလံာ်စီဆှံဖိတဖၣ်အဂီၢ် ဒီးဒ်သိးအဝဲသ့ၣ် ကလဲၤထီၣ်လဲၤထီလၢ နီၢ်သးတခီအဂီၢ်န့ၣ်လီၤ. —၁ ကရံၣ်. ၃:၆; ယူ. ၁:၅.