ကွၢ်လိမၤဒိး ဝံတဖၣ်တက့ၢ်—ဝံဃဘးကူာ်

၁. ဘၣ်မနုၤအဃိ ပကတူၢ်ဘၣ်တၢ်ဒ် ဝံဃဘးကူာ်အသိးလဲၣ်.

^၁ ပထံၣ်ဘၣ်လၢ တၢ်အၢတၢ်သီ အါထီၣ်လၢ ဟီၣ်ခိၣ်ဒီဘ့ၣ်ညါအဃိ ပကတူၢ်ဘၣ်တၢ်ဒ် ဝံဃဘးကူာ်အသိးန့ၣ်လီၤ. အဝဲသံကွၢ်ဝဲ ယဟိဝၤယွၤလၢ “နဒုးထံၣ်ဘၣ်ယၤလၢ တၢ်အၢတၢ်သီဘၣ်မနုၤလဲၣ်. ဒီးနဒုးကွၢ်ယၤလၢ တၢ်နးတၢ်ဖှီၣ်မ့ၢ်အဘၣ်မနုၤလဲၣ်.” (ဃဘး. ၁:၃; ၂ တံၤ. ၃:၁, ၁၃) ပမ့ၢ်ဆိကမိၣ်ထံ ဝံဃဘးကူာ် အတၢ်ကစီၣ်ဒီး အဒိအတဲာ်န့ၣ် ကမၤစၢၤပှၤလၢပကအိၣ်ဒီး တၢ်တူၢ်န့ၢ်ခီၣ်ကဲ ဖဲပအိၣ်ခိးယဟိဝၤယွၤ အမုၢ်စံၣ်ညီၣ်အနံၤန့ၣ်လီၤ.—၂ ပ့း. ၃:၇.

၂. မုၢ်မဆါတနံၤအံၤ ပအိၣ်မူလၢတၢ်နာ်န့ၣ် ပပာ်ဖျါထီၣ်အီၤကသ့ဒ်လဲၣ်.

^၂ အိၣ်မူဝဲလၢ တၢ်နာ်အပူၤ– ဝံဃဘးကူာ်ထံၣ်ဘၣ်ဝဲ တၢ်မၤအသး အၢအၢသီသီဘၣ်ဆၣ် အဝဲတတူၢ်ဃၣ်အသးဘၣ်. လၢတၢ်န့ၣ်အလီၢ် အဝဲဆိးသီ ဒီးမၤဝဲနီၢ်သးတၢ်ဖံးတၢ်မၤတဖၣ်လၢ တၢ်သူၣ်ဆူၣ်သးဆူၣ်အပူၤန့ၣ်လီၤ. (ဃဘး. ၂:၁) ယဟိဝၤယွၤဒုးနာ်န့ၢ်အီၤလၢ အတၢ်ကတိၤတဖၣ် ကဟဲလၢပှဲၤထီၣ်ဝဲ ဖဲတၢ်ဆၢကတီၢ်လၢ အပာ်ပနီၣ်ဝဲဒီး “ပှၤအတီအလိၤန့ၣ် ကမူဝဲလၢ အတၢ်နာ်လီၤ.” (ဃဘး. ၂:၂-၄) မ့မ့ၢ်ခရံာ်ဖိတဖၣ်လၢ အအိၣ်မူဘၣ်လၢ မုၢ်နံၤခံကတၢၢ်အတီၢ်ပူၤန့ၣ် အခီပညီအိၣ်လၢ အဝဲသ့ၣ်အဂီၢ်ဒ်လဲၣ်. တၢ်လၢအရ့ဒိၣ်ကတၢၢ်န့ၣ် တမ့ၢ်ထဲ ပကသ့ၣ်ညါတၢ်အကတၢၢ်ကဟဲဝဲ အဆၢကတီၢ်ဘၣ်. မ့ၢ်ဒ်သိး ပကနာ်နီၢ်နီၢ်လၢ တၢ်အကတၢၢ်အံၤကဟဲဝဲသပှၢ်ကတၢၢ်လီၤ. တၢ်နာ်န့ၣ် ထိၣ်ဟူးထိၣ်ဂဲၤထီၣ်ပှၤလၢ ပကဆိးသီဒီး ပာ်ဆိတၢ်စံၣ်တဲၤတဲလီၤတၢ်မၤလၢ နီၣ်ဂံၢ်တၢန့ၣ်လီၤ.—ဧ့ၤ. ၁၀:၃၈, ၃၉.

၃. ဘၣ်မနုၤအဃိ ပကဘၣ်ဆဲးမၤယဟိဝၤယွၤအတၢ်မၤလၢ တၢ်သးခုအပူၤလဲၣ်.

^၃ သးခုလၢ ယဟိဝၤယွၤအဃိ– ဖဲစီၤကိးလၢ အိၣ်လၢကီၢ်မါကူး ဒုးဝဲယဟိဝၤယွၤအပှၤဂီၢ်မုၢ်အခါ ပတၢ်နာ်ကဘၣ်တၢ်မၤကွၢ်အီၤလီၤ. (ဃ့း. ၃၈:၂, ၁၀-၁၂) တၢ်ဒုးတၢ်ယၤအဃိ တၢ်ကီတၢ်ခဲတဖၣ်ကအိၣ်ထီၣ်ဝဲ ဒီးပှၤလၢအမၤနၢၤတၢ်တဖၣ်ဒၣ်လဲာ် ကကွၢ်ဆၢၣ်မဲာ်ဘၣ်ဒီး တၢ်ကီတၢ်ခဲလီၤ. ဘၣ်သ့ၣ်သ့ၣ်တၢ်အီၣ်တၢ်အီကကၤဝဲ, တၢ်စုလီၢ်ခီၣ်ခိၣ်ကလီၤမၢ်ကွံာ်ဝဲ ဒီးပှၤဟီၣ်ခိၣ်ဖိအတၢ်အိၣ်တၢ်ဆိးအပတီၢ်ကစှၤလီၤဝဲလီၤ. ဖဲပကွၢ်ဆၢၣ်မဲာ်ဘၣ် တၢ်ကီတၢ်ခဲအခါ ပကမၤဒ်လဲၣ်. ဝံဃဘးကူာ်သ့ၣ်ညါဆိပာ်စၢၤဝဲလၢ အဝဲဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲတဖၣ်လီၤ. လၢတၢ်န့ၣ်အဃိ အဝဲပာ်လီၤအသးလၢ ကဆဲးမၤယဟိဝၤယွၤအတၢ်မၤလၢ တၢ်သးခုအပူၤလီၤ. (ဃဘး. ၃:၁၆-၁၉) “ယွၤအတၢ်သူၣ်ခုသးခု” န့ၣ် ကမၤစၢၤစ့ၢ်ကီးပှၤလၢ ပတူၢ်တၢ်မၤကွၢ်လၢ ခါဆူညါကန့ၢ်အဂီၢ်န့ၣ်လီၤ.—ဃ့. ၈:၁၀; ဧ့ၤ. ၁၂:၂.

၄. ခဲအံၤမ့ၢ်ဂ့ၤ, ခါဆူညါမ့ၢ်ဂ့ၤ ပဒိးန့ၢ်ဘၣ် တၢ်သးခုကသ့ဒ်လဲၣ်.

^၄ ပှၤလၢအပူၤဖျဲးထီၣ်လၢ ယဟိဝၤယွၤအမုၢ်စံၣ်ညီၣ်အနံၤန့ၣ် ကဆဲးဒိးန့ၢ်ဘၣ်ဝဲ ကစၢ်အတၢ်ဟံးစုနဲၣ်ကျဲလၢ ဘၣ်ဃးဒီးတၢ်မူအကျဲန့ၣ်လီၤ. (ဃဘး. ၂:၁၄) ပှၤလၢအဂဲၤဆၢထၢၣ် သမူထီၣ်က့ၤတဖၣ်စ့ၢ်ကီး ကမၤလိဘၣ်ယဟိဝၤယွၤအဂ့ၢ်လီၤ. လၢတၢ်န့ၣ်အဃိ စးထီၣ်ခဲအံၤ မ်ပကသူတၢ်ခွဲးတၢ်ယာ်ကိးဆၢကတီၢ်ဒဲး လၢပကတဲယဟိဝၤယွၤအဂ့ၢ်ဒီး အတၢ်မၤလီၤလးတဖၣ်အဂ့ၢ် န့ၣ်တက့ၢ်.—စံး. ၃၄:၁; ၇၁:၁၇.