အိၣ်မူဒ် ခရံာ်ဖိအသိး
ယဟိဝၤယွၤအတၢ်ဘျၢလၢ ဘၣ်ဃးဒီးတၢ်သကဲာ်ပဝးန့ၣ် ဟံးဃာ်အီၤဂၢၢ်ဂၢၢ်ကျၢၤကျၢၤတက့ၢ်
ယဟိဝၤယွၤ ပာ်လီၤဝဲတၢ်ဘျၢလၢ ဘၣ်ဃးဒီးသကဲာ်ပဝး လၢပှၤဟီၣ်ခိၣ်ဖိတဖၣ်အဂီၢ်လီၤ. အဝဲပာ်လီၤဝဲတၢ်ဘျၢလၢ တၢ်ဆီဟံၣ်ဆီဃီန့ၣ် မ့ၢ်ဝဲပိာ်မုၣ်ဒီး ပိာ်ခွါခံဂၤ ကဘၣ်ဖျီအသးဒီး အိၣ်ဒ်သိးသိး တစိၤသးလီၤ. (မး. ၁၉:၄-၆, ၉) ယဟိဝၤယွၤ သးဟ့ဝဲ တၢ်မၤကမၣ်မုၣ်ကမၣ်ခွါ ကိးမံၤဒဲးလီၤ. (၁ ကရံၣ်. ၆:၉, ၁၀) အဝဲပာ်လီၤဝဲ တၢ်ဘျၢလၢဘၣ်ဃးဒီး တၢ်ကူတၢ်သိးဒီး တၢ်ခွံခိၣ်ခွံနၢ်လၢ အပှၤဂီၢ်မုၢ်တဖၣ် အဂီၢ်စ့ၢ်ကီးလီၤ.—၅ မိၤ. ၂၂:၅; ၁ တံၤ. ၂:၉, ၁၀.
မုၢ်မဆါတနံၤအံၤ ပှၤဟီၣ်ခိၣ်ဖိအါဂၤ တတူၢ်လိာ်ဝဲ ယဟိဝၤယွၤ အတၢ်ဘျၢဘၣ်. (ရိ. ၁:၁၈-၃၂) အဝဲသ့ၣ် ကူသိးဝဲ, အိၣ်ဆိးဝဲ ဒီးခွံခိၣ်ခွံနၢ် ဒ်ဆၢကတီၢ်ခဲအံၤ ပှၤညီနုၢ်မၤဝဲအသိးလီၤ. ပှၤအါဂၤ ပာ်ဒိၣ်ဝဲ အတၢ်သကဲာ်ပဝးလၢ အလီၤရၢၢ် ဒီးစံးအၢစံးသီဝဲ ပှၤလၢအတအိၣ်မူ ဒ်သိးဒီးအီၤဘၣ်လီၤ.—၁ ပ့း. ၄:၃, ၄.
ဒ်ပမ့ၢ် ယဟိဝၤပှၤအုၣ်အသးတဖၣ်အသိး ပကြၢးအိၣ်မူမၤထွဲ ကစၢ်ယွၤ အတၢ်ဘျၢလၢ ဘၣ်ဃးဒီးတၢ်သကဲာ်ပဝးလီၤ. (ရိ. ၁၂:၉) ပမၤကသ့ဒ်လဲၣ်. ပကဘၣ်ဃုသ့ၣ်ညါ တၢ်လၢအဝဲ ဘၣ်သူၣ်ဘၣ်သးဝဲတဖၣ်လီၤ. ဘၣ်ဆၣ် ပကဘၣ်အိၣ်မူဒ် အတၢ်ဘျၢစီဆှံအသိးစ့ၢ်ကီးလီၤ. ဖဲပဃုထၢ တၢ်ကူတၢ်သိးဒီး ပကခွံခိၣ်ခွံနၢ်ဒ်လဲၣ်အခါ ပကဘၣ်သံကွၢ်လီၤပသးလၢ ‘မ့ၢ်ယတၢ်ဃုထၢအံၤ ပာ်ဖျါထီၣ်လၢ ယမၤလၤကပီၤ ယဟိဝၤယွၤဧါ, မ့တမ့ၢ် ဟီၣ်ခိၣ်ဧါ, မ့ၢ်ယတၢ်ကူတၢ်သိးဒီး တၢ်ခွံခိၣ်ခွံနၣ်န့ၣ် ပာ်ဖျါထီၣ်ဝဲလၢ ယမ့ၢ်ခရံာ်ဖိလၢ အပျံၤယွၤဧါ.’ ဖဲပဃုထၢတၢ်ဂီၤမူအခါ ပကဘၣ်သံကွၢ်လီၤပသးလၢ ‘မ့ၢ်ယဟိဝၤယွၤ ကဘၣ်သူၣ်ဘၣ်သးဝဲ တၢ်ဂီၤမူအံၤဧါ. မ့ၢ်တၢ်ဂီၤမူအံၤ ဟ့ၣ်ဂံၢ်ဟ့ၣ်ဘါဝဲ တၢ်သကဲာ်ပဝးဒ်လဲၣ် တမံၤလဲၣ်. မ့ၢ်တၢ်မၤမုာ်မၤဖှံသးလၢ ယဃုထၢအီၤအံၤ ကမၤဘၣ်ဒိ ယသကဲာ်ပဝးဧါ. (စံး. ၁၀၁:၃) မ့ၢ်ကကဲထီၣ်တၢ်လီၤဃံၢ်လၢ ယဟံၣ်ဖိဃီဖိ မ့တမ့ၢ် ပှၤအဂၤတဖၣ်အဂီၢ်ဧါ.’—၁ ကရံၣ်. ၁၀:၃၁-၃၃.
ဘၣ်မနုၤအဃိ အရ့ဒိၣ်လၢ ပကဘၣ်အိၣ်မူဒ် ယဟိဝၤယွၤ အတၢ်ဘျၢလၢ ဘၣ်ဃးဒီး တၢ်သကဲာ်ပဝးန့ၣ်လဲၣ်. တယံာ်လၢၤဘၣ် ယ့ၣ်ၡူးခရံာ် ကမၤဟးဂီၤကွံာ် ပှၤကလုာ်တဖၣ်ဒီး တၢ်အၢတၢ်သီခဲလၢာ်လီၤ. (ဃ့း. ၉:၄-၇) ထဲဒၣ်ပှၤလၢအမၤ ကစၢ်ယွၤအတၢ်ဘၣ်သးန့ၣ် ကပူၤဖျဲးဝဲလီၤ. (၁ ယိၤ. ၂:၁၅-၁၇) မ်ပကအိၣ်မူဒ် ယဟိဝၤယွၤအတၢ်ဘျၢအသိးတက့ၢ်. ပမ့ၢ်မၤဒ်န့ၣ်န့ၣ် ပှၤလၢအထံၣ်ဘၣ်ဝဲ ပတၢ်အိၣ်မူသကဲာ်ပဝးလၢအဂ့ၤတဖၣ် ကမၤလၤကပီၤယွၤလီၤ.—၁ ပ့း. ၂:၁၁, ၁၂.
ယတၢ်ကူတၢ်သိးဒီး ယတၢ်ခွံခိၣ်ခွံနၢ်န့ၣ် ပာ်ဖျါထီၣ်ဝဲ ယတၢ်သကဲာ်ပဝးဒ်လဲၣ်.
ကွၢ်တၢ်ဂီၤမူလၢအမ့ၢ် ကဲထီၣ်ယဟိဝၤယွၤ အတံၤသကိး—ပိာ်မုၣ်တဂၤဒီး ပိာ်ခွါတဂၤ ဝံၤဒီးတဲသကိးက့ၤ တၢ်သံကွၢ်လၢလာ်အံၤတက့ၢ်–
တၢ်အိၣ်မူဒ် ယဟိဝၤယွၤ အတၢ်ဘျၢအသိးန့ၣ် ဘၣ်မနုၤအဃိ မ့ၢ်တၢ်လၢအပှဲၤဒီး တၢ်ကူၣ်သ့လဲၣ်.
ဘၣ်မနုၤဃိ မိၢ်ပၢ်တဖၣ် ကြၢးသိၣ်လိအဖိလၢ ယဟိဝၤယွၤအတၢ်ဘျၢလၢ ဘၣ်ဃးဒီးတၢ်သကဲာ်ပဝး ဖဲအဝဲသ့ၣ် အနီၣ်ဆံးလံၤလံၤန့ၣ်လဲၣ်.
ပှၤသးစၢ်မ့ၢ်ဂ့ၤ သးပှၢ်မ့ၢ်ဂ့ၤ မၤစၢၤပှၤဂၤလၢ ကဒိးန့ၢ်ဘၣ်တၢ်အဘျုးလၢ ကစၢ်ယွၤအတၢ်ဂ့ၤတၢ်ဝါတဖၣ် ကသ့ဒ်လဲၣ်.