အိၣ်မူဒ် ခရံာ်ဖိအသိ
နကဲထီၣ်ပှၤလၢအဂုာ်ကျဲးစၢး ဃုသ့ၣ်ညါအါထီၣ် လံာ်စီဆှံကသ့ဒ်လဲၣ်
ဖဲနထံၣ်ဘၣ်တၢ်မၤကွၢ်အခါ မ့ၢ်နအဲၣ်ဒိးအိၣ်ဒီးတၢ်သးတီ ဒ်စီၤဒၤနံးယ့လး အသိးဧါ. စီၤဒၤနံးယ့လး သူၣ်ဆူၣ်သးဆူၣ်လၢ ကဃုသ့ၣ်ညါ ယွၤအကလုၢ်ကထါ ဃုာ်ဒီးဝံအတၢ်စံးပာ်လၢ အဒိၣ်အယိာ်သ့ၣ်တဖၣ်လီၤ. (ဒၤ. ၉:၂) တၢ်ဃုသ့ၣ်ညါ ယွၤအကလုၢ်ကထါ လီၤတံၢ်လီၤဆဲးန့ၣ် မၤစၢၤနၤသ့လၢ နကပၢၤဃာ်နတၢ်သးတီအဂီၢ်လီၤ. ကမၤစၢၤနၤဒ်လဲၣ်. ကဒုးဂၢၢ်ကျၢၤထီၣ်နတၢ်နာ်လၢ ကစၢ်ယွၤအတၢ်အၢၣ်လီၤန့ၣ် ကဟဲလၢပှဲၤထီၣ်ဝဲဒၣ်နီၢ်ကီၢ်လီၤ. (ၡူ. ၂၃:၁၄) ဒီးကမၤစၢၤစ့ၢ်ကီးနၤလၢ နတၢ်အဲၣ်ယွၤကအါထီၣ် ဒီးကထိၣ်ဟူးထိၣ်ဂဲၤထီၣ်နၤလၢ နကမၤတၢ်လၢအဘၣ်လီၤ. (စံး. ၉၇:၁၀) ဘၣ်ဆၣ် နကစးထီၣ်မၤအီၤဒ်လဲၣ်. ဆိကမိၣ်ကွၢ် တၢ်ဟ့ၣ်ကူၣ်လၢလာ်သ့ၣ်တဖၣ်အံၤတက့ၢ်.
နကြၢးမၤလိ တၢ်မနုၤတဖၣ်လဲၣ်. တၢတမံၤန့ၣ် နကဘၣ်ကတဲာ်ကတီၤတၢ်လၢ တၢ်အိၣ်ဖှိၣ်ရိဖှိၣ်အဂီၢ်လီၤ. ဒ်သိးနကဒိးန့ၢ်ဘၣ်အါထီၣ်အဘျုးလၢ တၢ်ဖးလံာ်စီဆှံကိးနွံဒဲးအဂီၢ် ဟံးန့ၢ်တၢ်ဆၢကတီၢ်ဒီး ဃုသ့ၣ်ညါတၢ်လၢနတနၢ်ပၢၢ်အီၤတက့ၢ်. ပှၤတနီၤနီၤန့ၣ် အဲၣ်ဒိးမၤလိအါထီၣ်ဝဲဒၣ် ဝံအတၢ်စံးပာ်, သးအတၤသၣ်, တၢ်မၢဖိပီလူး မံးၡ့ၣ်နရ့ၣ် အတၢ်လဲၤ, မ့တမ့ၢ် ကစၢ်ယွၤအတၢ်ဘၣ်တ့ လၢပထံၣ်အီၤသ့သ့ၣ်တဖၣ်လီၤ. နတၢ်သံကွၢ်လၢ ဘၣ်ဃးဒီးလံာ်စီဆှံ မ့ၢ်အိၣ်ထီၣ်န့ၣ် ကွဲးနီၣ်ဃာ် ဒ်သိးလၢနကမၤလိ လၢခံတဘျီအဂီၢ်တက့ၢ်.
ယဃုသ့ၣ်ညါအါထီၣ် တၢ်ဂ့ၢ်တၢ်ကျိၤကသ့ဖဲလဲၣ်. ဒ်သိးနကသ့ၣ်ညါအဂီၢ် ကွၢ်တၢ်ဂီၤမူလၢအမ့ၢ် တၢ်ပီးတၢ်လီလၢ ပကဃုသ့ၣ်ညါအါထီၣ် နီၢ်သးတၢ်လုၢ်ဒိၣ်ပှ့ၤဒိၣ်တဖၣ်အဂီၢ် တက့ၢ်. အဒိ ဃုသ့ၣ်ညါကွၢ် တၢ်ဒူတၢ်ဃိၤတဖၣ်လၢ ဒၤနံးယ့လး အခိၣ် ၇ အပူၤန့ၣ် ဒိလီၤဝဲတၢ်ပၢတၢ်ပြးမနုၤတဖၣ်လဲၣ်.
ယကဘၣ်မၤလိအီၤ ယံာ်ထဲလဲၣ်. တၢ်မၤလိလံာ်စီဆှံထီဘိန့ၣ် ကဲဘျုးဝဲလၢ နီၢ်သးအတၢ်အိၣ်ဆူၣ်အိၣ်ချ့အဂီၢ်လီၤ. အဆိကတၢၢ်န့ၣ် နစးထီၣ်မၤလိတစိၢ်ဖိ ဒီးလၢခံ နမ့ၢ်အဲၣ်ဒိးမၤလိယံာ်ထီၣ်န့ၣ် နမၤလိသ့ဝဲလီၤ. တၢ်မၤလိယွၤအကလုၢ်ကထါန့ၣ် လီၤဂာ်ဒ်သိးဒီး တၢ်ခူၣ်တၢ်လုၢ်ဒိၣ်ပှ့ၤဒိၣ်လၢဟီၣ်ခိၣ်လာ်လီၤ. ဒ်နထံၣ်အါထီၣ်တၢ်လုၢ်ဒိၣ်ပှ့ၤဒိၣ်အသိး နအဲၣ်ဒိးခူၣ်ဒံးယံာ်ဒံးယိာ်ထီၣ်လီၤ. (ကတိၤ. ၂:၃-၆) နကအဲၣ်ဒိး မၤလိအါထီၣ် ယွၤအကလုၢ်ကထါ တကးဘၣ်အမဲာ်ညါ နကအဲၣ်ဒိးမၤအီၤထီဘိလီၤ.—၁ ပ့း. ၂:၂, ၃.
တၢ်ဒူတၢ်ဃိၤတဖၣ်လၢ ဒၤနံးယ့လး အဆၢဒိၣ် ၇ အပူၤန့ၣ် ဒိလီၤဝဲတၢ်မနုၤလဲၣ်
တၢ်သံကွၢ်လၢအဂၤတဖၣ်–
ဒၤနံးယ့လး ၇:၈, ၂၄ ဟဲလၢထီၣ်ပှဲၤထီၣ်ဝဲဒ်လဲၣ်.
တၢ်ဂ့ၢ်လၢ နကမၤလိလၢခံတခါ–
တၢ်ဒူတၢ်ဃိၤလၢ လီၣ်ဖျါ အဆၢဒိၣ် ၁၃ အပူၤန့ၣ် ဒိလီၤဝဲတၢ်မနုၤလဲၣ်.