နမၤဒိၣ်ထီၣ် တၢ်အဲၣ်ယွၤဒီးပှၤလၢနဃၢၤ ကသ့ဒ်လဲၣ်

ခရံာ်ဖိသ့ၣ်တဖၣ်​ တလိၣ်လၢ ကမၤထွဲစီၤမိၤၡ့ အတၢ်သိၣ်တၢ်သီလၢၤဘၣ်. ဘၣ်ဆၣ်တၢ်မၤလိာ်အဒိၣ်ကတၢၢ်ခံထံၣ်လၢအမ့ၢ် အဲၣ်ကစၢ်ယွၤဒီးအဲၣ်ပှၤလၢနဃၢၤန့ၣ်​ ယဟိဝၤယွၤအဲၣ်ဒိးလၢ ပကမၤထွဲအီၤဒံးလီၤ. (မး. ၂၂:၃၇-၃၉) ပတဟဲအိၣ်ဖျဲၣ်ထီၣ်ဃုာ်ဒီး တၢ်အဲၣ်ဒ်အံၤ တဘျီဃီဘၣ်. ပဘၣ်ဒုးအိၣ်ထီၣ်လၢ ပနီၢ်ကစၢ်ဒၣ်ဝဲလီၤ. ပမၤကသ့ဒ်လဲၣ်. ကျဲလၢအရ့ဒိၣ်တဘိန့ၣ်မ့ၢ်ဝဲ တၢ်ဖးလံာ်စီဆှံကိးနံၤဒဲးလီၤ. ပမ့ၢ်ဆိကမိၣ်ထံ ကစၢ်ယွၤအတၢ်ဂ့ၤတၢ်ဝါတဖၣ်လၢ လံာ်စီဆှံပူၤန့ၣ်​ ပကထံၣ်​ “တၢ်ဃံတၢ်လၤဘၣ်ဃးဒီးယွၤ” လီၤ. (စံး. ၂၇:၄) ပမ့ၢ်မၤဒ်န့ၣ်န့ၣ်​ ပတၢ်အဲၣ်အီၤကဒိၣ်ထီၣ်ဒီး ပတၢ်ဆိကမိၣ်တဖၣ်​ ကလီၤဂာ်ဒီးယွၤ အါန့ၢ်အလီၢ်လီၤ. တကးဒံးဘၣ်​ ကထိၣ်ဟူးထိၣ်ဂဲၤထီၣ်ပှၤလၢ ပကအဲၣ်ပှၤဂၤစ့ၢ်ကီးလီၤ. (ယိၤ. ၁၃:၃၄, ၃၅; ၁ ယိၤ. ၅:၃) ဒ်သိးပဖးလံာ်စီဆှံကမုာ်အဂီၢ် တၢ်ဟ့ၣ်ကူၣ်သၢမံၤအံၤ ကမၤစၢၤပှၤလီၤ–

• ထံၣ်တမှံကွၢ်လၢ နအိၣ်ဘၣ်လၢအဝဲသ့ၣ်အကျါ. ဖဲနဖးလံာ်စီဆှံအခါ ဆိကမိၣ်လၢနအိၣ်ဖဲန့ၣ်​ ဒီးနထံၣ်ဘၣ်တၢ်မနုၤလဲၣ်, နနၢ်ဟူဘၣ်မနုၤလဲၣ်​ ဒီးနၢဘၣ်​ တၢ်မနုၤလဲၣ်. ဒီးပှၤအိၣ်ဖဲန့ၣ်တဖၣ်န့ၣ်​ ကတူၢ်ဘၣ်ဝဲဒ်လဲၣ်.

  

• ဖးအီၤလၢကျဲအဘိဘိ. ပအဲၣ်ဒိးဟ့ၣ်ကူၣ်နၤလၢ နကဖးသီၣ်လံာ်စီဆှံ လၢနကလုၢ်ဒိၣ်ဒိၣ်​ မ့တမ့ၢ် နမ့ၢ်ဒိကနၣ်အီၤလၢ ပှၤဖီၣ်ဃာ်တၢ်ကလုၢ်န့ၣ်​ ဖးပိာ်အခံတက့ၢ်. လၢနကဖးလံာ်စီဆှံ တကတြူၢ်ဘၣ်တကတြူၢ်အလီၢ် ဖးပှၤတဂၤစုာ်စုာ်အဂ့ၢ် မ့တမ့ၢ် တၢ်ဂ့ၢ်တခါစုာ်စုာ်တက့ၢ်. အဒိ, သူ တၢ်ဂ့ၢ်ဘၣ်ထွဲလိာ်အသး A7 မ့တမ့ၢ် B12 လၢဟီၣ်ခီၣ်သီ တၢ်ကွဲးကျိာ်ထံလံာ်စီဆှံ အပူၤဒီး ဖးကွၢ်ယ့ၣ်ၡူးအဂ့ၢ်တက့ၢ်. ဖးလံာ်စီဆှံအဆၢဒိၣ်ဒီတဆၢလၢ တၢ်သမံသမိးလံာ်စီဆှံအဆၢကိးနံၤဒဲး ဘၣ်တၢ်ဟံးန့ၢ်အီၤလၢအပူၤန့ၣ်တက့ၢ်. မ့တမ့ၢ် ဖးလံာ်စီဆှံ အကတြူၢ်တဖၣ်​ တကတြူၢ်ဝံၤ တကတြူၢ်တက့ၢ်.

  

• ဖးအီၤဒ်သိး နနၢ်ကပၢၢ်အဂီၢ်. နမ့ၢ်ဖးလံာ်စီဆှံ တနံၤအဆၢဒိၣ်တဆၢ ဒီးနမ့ၢ်နၢ်ပၢၢ်အီၤ ဒီးဆိကမိၣ်ထံအီၤန့ၣ်​ ဂ့ၤဒိၣ်န့ၢ်နဖးအီၤအါဆၢ ဒီးနဖးဝံၤတၢ်မံၤဒံးလီၤ. ဆိကမိၣ်တၢ်အိၣ်အသးတဖၣ်ဒီး ပဲာ်ထံနီၤဖး တၢ်ဂ့ၢ်တၢ်ကျိၤဒီး သူဃုာ်ဒီးတၢ်ဂီၤဒီးတၢ်ဂ့ၢ်ဘျးစဲတက့ၢ်. ဃုသ့ၣ်ညါတၢ်ဂ့ၢ်တၢ်ကျိၤ အစှၤကတၢၢ်တခါလၢ နတနၢ်ပၢၢ်အီၤန့ၣ်တက့ၢ်. မ့ၢ်သ့န့ၣ်​ ဟံးန့ၢ်တၢ်ဆၢကတီၢ်လၢ နကဃုသ့ၣ်ညါတၢ်အဂီၢ် ထဲသိးဒီး တၢ်ဆၢကတီၢ်လၢ နဖးလံာ်စီဆှံန့ၣ်တက့ၢ်.