အိၣ်မူဒ် ခရံာ်ဖိအသိး
“စီၤပီလူးစံးဘျုး ကစၢ်ယွၤ ဒီးအိၣ်ဒီးတၢ်သူၣ်ဒူသးဒူ”
ဖဲတၢ်အိၣ်ဖှိၣ်လၢဝ့ၢ်ရိမ့ၤအပူၤ နၢ်ဟူဝဲလၢ စီၤပီလူးဟဲဝဲအခါ ဒီပုၢ်ဝဲၢ်တဖု လဲၤအိၣ်ခိးအခိၣ် ဒီးဘၣ်လဲၤတၢ်အမံးလာ် ၄၀ (၆၄ ကံလိမံထၢၣ်) လီၤ. အဝဲသ့ၣ်ပာ်ဖျါထီၣ်ဝဲ တၢ်အဲၣ်လၢတကွၢ်ထဲ အနီၢ်ကစၢ်အဘျုးအဃိ စီၤပီလူးတူၢ်ဘၣ်ဝဲဒ်လဲၣ်. “အဝဲသ့ၣ်န့ၣ်, စီၤပီလူးထံၣ်ဝဲဒီး, စံးထီၣ်ပတြၢၤယွၤအဘျုးအဖှိၣ်” လီၤ. (မၤတၢ်. ၂၈:၁၅) စီၤပီလူးန့ၣ် ဖဲအလဲၤတုၤလၢ တၢ်အိၣ်ဖှိၣ်တဖၣ်အခါ အဝဲဟ့ၣ်ဂံၢ်ဟ့ၣ်ဘါဝဲဒီပုၢ်ဝဲၢ်သနာ်က့ ခဲအံၤအနီၢ်ကစၢ်ဒၣ်ဝဲ မ့ၢ်ပှၤဃိာ်ဖိအဃိ ဒိးန့ၢ်ဘၣ်ဝဲ တၢ်ဂံၢ်တၢ်ဘါလၢ ဒီပုၢ်ဝဲၢ်တဖၣ်အအိၣ်လီၤ.—၂ ကရံၣ်. ၁၃:၁၀.
မုၢ်မဆါတနံၤအံၤစ့ၢ်ကီး ကဝီၤအပှၤကွၢ်တၢ်တဖၣ် လဲၤဝဲလၢတၢ်အိၣ်ဖှိၣ်တဖၣ် ဒီးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါတဖၣ်လီၤ. ဒ်ယွၤအပှၤဂီၢ်မုၢ်တဖၣ်အသိး အဝဲသ့ၣ်စ့ၢ်ကီး လီၤဘှံးလီၤတီၤ, အိၣ်ဒီးတၢ်သူၣ်ကိၢ်သးဂီၤ ဒီးတၢ်သူၣ်ဟးဂီၤသးဟးဂီၤလီၤ. လၢခံတဘျီ ကဝီၤအပှၤကွၢ်တၢ်ဒီးအမါ မ့ၢ်ဟဲလၢနတၢ်အိၣ်ဖှိၣ်န့ၣ် နမၤစၢၤအဝဲသ့ၣ် ဒ်သိးကအိၣ်ဒီးတၢ်သးဒူ ဒီးဟ့ၣ်ဂံၢ်ဟ့ၣ်ဘါလိာ်သး “ယၢ်ခီယၢ်ခီ” ကသ့ဒ်လဲၣ်.—ရိ. ၁:၁၁, ၁၂.
ပၣ်ဃုာ်လၢ တၢ်အိၣ်ဖှိၣ်ရိဖှိၣ်လၢ တၢ်စံၣ်တဲၤတဲလီၤတၢ်အဂီၢ်. ဖဲကဝီၤအပှၤကွၢ်တၢ် ဟဲအဆၢကတီၢ် ပှၤစံၣ်တဲၤတဲလီၤတၢ်ဖိတဖၣ် မ့ၢ်ဟ့ၣ်လီၤအသးလၢ တၢ်သးခုကစီၣ်တၢ်မၤအပူၤ လၢလၢပှဲၤပှဲၤန့ၣ် အဝဲသ့ၣ်န့ၢ်ဂံၢ်န့ၢ်ဘါဒိၣ်မးလီၤ. (၁ သ့း. ၁:၂, ၃; ၂:၂၀) လၢတၢ်န့ၣ်အဃိ ဆိကမိၣ်ပာ်လၢ ကဝီၤအပှၤကွၢ်တၢ်မ့ၢ်ဟဲအနွံန့ၣ် မ့ၢ်နမၤပှၤလဲၤလၢညါမၤစၢၤတၢ်ကသ့ဧါ. နမၤသကိးတၢ်ဒီး အဝဲဒီးအမါလၢ တၢ်သးခုကစီၣ်တၢ်မၤအပူၤ မ့တမ့ၢ် နလဲၤကိးအဝဲသ့ၣ်လၢ နပှၤမၤလိလံာ်စီဆှံဖိအအိၣ်ကသ့ဧါ. အဝဲသ့ၣ်သူၣ်ခုသးခုလၢ အမၤသကိးဘၣ်တၢ်ဒီး ပှၤစံၣ်တဲၤတဲလီၤတၢ်ဖိ အါဂၤလၢအပၣ်ဃုာ်ဒီး ပှၤအသီ မ့တမ့ၢ် ပှၤလၢအတၢ်သ့တၢ်ဘၣ်တအိၣ်အါအါလၢ တၢ်စံၣ်တဲၤတဲလီၤတၢ်မၤအပူၤတဖၣ်န့ၣ်လီၤ.
တူၢ်လိာ်မုာ်အဝဲသ့ၣ်. နတူၢ်လိာ်မုာ်အဝဲသ့ၣ်လၢ ကဟဲအိၣ်လၢနဟံၣ် မ့တမ့ၢ် နကွဲမုာ်အဝဲသ့ၣ်လၢ ကဟဲအီၣ်မ့ၤလၢနဟံၣ်ကသ့ဧါ. နမ့ၢ်မၤဒ်အံၤန့ၣ် မ့ၢ်ဒၣ်နပာ်ဖျါထီၣ် နတၢ်အဲၣ်လၢ ကဝီၤအပှၤကွၢ်တၢ် ဒီးအမါအဖီခိၣ်လီၤ. တလိၣ်လၢနကဘၣ် ကတဲာ်ကတီၤန့ၢ်တၢ်လၢ အဝဲသ့ၣ်အဂီၢ် အါအါဂီၢ်ဂီၢ်ဘၣ်. —လူၤ. ၁၀:၃၈-၄၂.
ဒိကနၣ် ဒီးမၤထွဲအတၢ်ဟံးစုနဲၣ်ကျဲ ဒီးအတၢ်သိၣ်ဃီၣ်တက့ၢ်. ကဝီၤအပှၤကွၢ်တၢ်တဖၣ် မၤစၢၤပှၤလၢတၢ်အဲၣ်တၢ်ကွံအပူၤ ဒ်သိးပကသ့ၣ်ညါလၢ ပလဲၤထီၣ်လဲၤထီလၢ ယဟိဝၤယွၤအတၢ်ဖံးတၢ်မၤအပူၤ ကသ့ဒ်လဲၣ်န့ၣ်လီၤ. တဘျီတခီၣ် အဝဲကသိၣ်ဃီၣ်ပှၤ ဆူၣ်ဆူၣ်စ့ၢ်ကီးလီၤ. (၁ ကရံၣ်. ၅:၁-၅) ဖဲပဒိကနၣ် ဒီးတူၢ်လိာ်အတၢ်သိၣ်ဃီၣ်န့ၣ် အဝဲသ့ၣ်သးခုဝဲဒိၣ်မးလီၤ.—ဧ့ၤ. ၁၃:၁၇.
ပာ်ဖျါထီၣ်တၢ်စံးဘျုးစံးဖှိၣ်. တဲဘၣ်ကဝီၤအပှၤကွၢ်တၢ် ဒီးအမါလၢ အဝဲသ့ၣ်အတၢ်ဂုာ်ကျဲးစၢးန့ၣ် ကဲဘျုးလၢနဂီၢ်ဒ်လဲၣ်န့ၣ်တက့ၢ်. ဖဲနထံၣ်ဒီးအဝဲသ့ၣ်အခါ နတဲအီၤသ့ မ့တမ့ၢ် နကွဲးန့ၢ်အီၤလၢလံာ်သ့စ့ၢ်ကီးလီၤ.—ကလီး. ၃:၁၅.