အိၣ်မူဒ် ခရံာ်ဖိအသိး
တဘၣ်ရၤလီၤ တၢ်ကတိၤလၢ အတမ့ၢ်တတီတဖၣ်တဂ့ၤ
မုၢ်မဆါတနံၤအံၤ ခီဖျိလၢ ကွဲၤလ့လိၤ, ကွဲၤဟူဖျါ ဒီးအ့ထၢၣ်နဲး တဖၣ်အဃိ တၢ်ကစီၣ်တဖၣ် လဲၤတုၤလၢ ပှၤလၢအကကွဲၢ်တဖၣ်အအိၣ်ချ့မးလီၤ. ပှၤလၢအဘူၣ်ထီၣ်ဘါထီၣ် “ကစၢ်ယွၤလၢအမ့ၢ်အတီ” တဖၣ်န့ၣ် လၢတၢ်တပာ်သူၣ်ပာ်သးအပူၤဒၣ်လဲာ် အဝဲသ့ၣ် တအဲၣ်ဒိးရၤလီၤဝဲ တၢ်ကစီၣ်လၢအတမ့ၢ်တတီတဖၣ်ဘၣ်. (စံး. ၃၁:၅, ခ့ခါစှီၤကျိာ်; ၂ မိၤ. ၂၃:၁) တၢ်ကတိၤကဘျံးကဘျၣ်တဖၣ်န့ၣ် မၤဘၣ်ဒိပှၤဂၤသ့ ဒိၣ်မးလီၤ. ဖဲနကဆၢတဲာ်လၢ တၢ်ဂ့ၢ်တခါအံၤ မ့ၢ်အမ့ၢ်အတီဧါ တမ့ၢ်ဧါန့ၣ် သံကွၢ်လီၤနသးဒ်အံၤတက့ၢ်
‘ဟဲလၢပှၤလၢပနာ်န့ၢ်အီၤသ့အအိၣ်ဧါ’ ပှၤလၢအတဲတၢ်ကစီၣ်တဂၤအံၤ ဘၣ်သ့ၣ်သ့ၣ် တမ့ၢ်လၢအဝဲကသ့ၣ်ညါ တၢ်ဂ့ၢ်ခဲလၢာ်ဘၣ်. တၢ်ဂ့ၢ်တခါ ပှၤမ့ၢ်တဲက့ၤအီၤလၢ ပှၤတဂၤဝံၤတဂၤ ဒီးတဆီဘၣ်တဆီန့ၣ် တၢ်ကတိၤတဖၣ် ဆီတလဲသ့လီၤ. အဃိ မ့ၢ်တဟဲလၢ ပှၤလၢပနာ်န့ၢ်အီၤသ့အအိၣ်ဘၣ်န့ၣ် ပာ်သူၣ်ပာ်သးတက့ၢ်. လီၤဆီဒၣ်တၢ် ပှၤလၢအိၣ်ဒီးမူဒါလၢ တၢ်အိၣ်ဖှိၣ်ပူၤတဖၣ်န့ၣ် ဘၣ်တၢ်သ့ၣ်ညါအဝဲသ့ၣ်လၢ ပှၤလၢပှၤနာ်န့ၢ်အီၤသ့အဃိ ကြၢးပလီၢ်အသးလၢ အသုတတဲဘၣ် တၢ်ကစီၣ်လၢ အတမ့ၢ်တတီတဖၣ်ဘၣ်န့ၣ်လီၤ.
‘တၢ်ကစီၣ်လၢ မၤဟးဂီၤပှၤမံၤဂ့ၤသၣ်ဂ့ၤဧါ.’ တၢ်ဂ့ၢ်တခါ မ့ၢ်မၤဘၣ်ဒိ ပှၤတဂၤ မ့တမ့ၢ် ပှၤတဖု အမံၤလၤသၣ်ကပီၤန့ၣ် တဘၣ်ဆဲးရၤလီၤအီၤတဂ့ၤ.—ကတိၤ. ၁၈:၈; ဖံလံး. ၄:၈
‘မ့ၢ်တၢ်ဂ့ၢ်လၢ ပနာ်အီၤသ့ဧါ.’ ဖဲနနၢ်ဟူဘၣ် တၢ်ဂ့ၢ် မ့တမ့ၢ် တၢ်မၤအသးလၢ အလီၤသူၣ်အိၣ်သးအိၣ်အခါ ပလီၢ်နသးတက့ၢ်.
ကွၢ်တၢ်ဂီၤမူလၢ အခိၣ်တီမ့ၢ်ဝဲ ယဟးဆှဲးတၢ်တဲအီၣ်ပှၤဂ့ၢ်ကသ့ဒ်လဲၣ် ဒီးစံးဆၢတၢ်သံကွၢ်လၢ လာ်တဖၣ်အံၤတက့ၢ်
ဒ်တၢ်ကွဲးနီၣ်လၢ ကတိၤဒိ ၁၂:၁၈ ပာ်ဖျါထီၣ်ဝဲအသိး တၢ်ကတိၤတဖၣ် မၤဘၣ်ဒိပှၤသ့ဒ်လဲၣ်.
ဘၣ်ဃးဒီး တၢ်တဲသကိးပှၤဂၤအဂ့ၢ်န့ၣ် ဒ်သိးပကအိၣ်ဒီး တၢ်ထံၣ်လၢအကြၢးအဘၣ်အဂီၢ် ဖံလံးပံၤ ၂:၄ မၤစၢၤပှၤဒ်လဲၣ်.
ဖဲပတဲသကိးတၢ်အခါ တၢ်တဲဆဲးအဲးပှၤဂၤ မ့တမ့ၢ် တၢ်တဲဟးဂီၤပှၤဂၤမ့ၢ်အိၣ်ထီၣ်န့ၣ် ပကြၢးမၤဒ်လဲၣ်.
ပတချုးတဲ ပှၤဂၤအဂ့ၢ်ဒံးဘၣ်န့ၣ် ပကြၢးသံကွၢ်လီၤပသးဒ်လဲၣ်.