နကတဲာ်ကတီၤနသးလၢ တၢ်သ့ၣ်နီၣ်ထီၣ်က့ၤအမူးအဂီၢ်လံဧါ

ဘူၣ်လဲၤကပာ် အလီၢ်ခံကတၢၢ်တခါလၢ ယ့ၣ်ၡူးမၤဝဲန့ၣ်​ လီၤဆီဝဲလီၤ. တယံာ်လၢၤဘၣ်​ အဝဲကဘၣ်တူၢ်သံအသးအဃိ အဝဲရဲၣ်ကျဲၤဝဲလၢ ကအီၣ်ဝဲ ဘူၣ်လဲၤကပာ်ဒီး အတၢ်မၢဖိတဖၣ်​ ဒီးစးထီၣ်မၤဝဲ ကစၢ်အတၢ်အီၣ်လၢဟါအီၣ်​ လၢကဘၣ်တၢ်မၤအီၤ ကိးနံၣ်ဒဲးန့ၣ်လီၤ. လၢတၢ်န့ၣ်အဃိ အဝဲမၢလီၤဝဲ စီၤပ့းတရူးဒီး စီၤယိၤဟၣ်လၢ ကကတဲာ်ကတီၤဝဲ ဒၢးတဖျၢၣ်န့ၣ်လီၤ. (လူၤ. ၂၂:၇-၁၃; ကွၢ်တၢ်ဂီၤလၢ လံာ်ကုခိၣ်) တၢ်ဂ့ၢ်အံၤ ဒုးသ့ၣ်နီၣ်ထီၣ်ပှၤလၢ လိၣ်လၢပကဘၣ်​ ကတဲာ်ကတီၤပသးလၢ တၢ်သ့ၣ်နီၣ်ထီၣ်က့ၤအမူး လၢကဘၣ်တၢ်မၤအီၤလၢ လါမၢ်ၡး ၂၇ သီအဂီၢ်န့ၣ်လီၤ. တၢ်အိၣ်ဖှိၣ်တဖၣ်န့ၣ်​ ကကတဲာ်ကတီၤဝဲ ပှၤလၢကဟ့ၣ်တၢ်စံၣ်တဲၤတဲလီၤ, ကိၣ်ဒီးစပံးထံ တၢ်အဂၤတဖၣ်န့ၣ်လီၤ. ဘၣ်ဆၣ်​ ပဝဲတဂၤစုာ်စုာ် ပအိၣ်ကတဲာ်ကတီၤပသးလၢ တၢ်သ့ၣ်နီၣ်ထီၣ်က့ၤအမူးအံၤအဂီၢ် ကသ့ဒ်လဲၣ်.

မၤအါထီၣ်​ နတၢ်စံးဘျုးစံးဖှိၣ်ယ့ၣ်ၡူး. ဖးဒီးဆိကမိၣ်ထံ လံာ်စီဆှံအဆၢလၢ ဘၣ်ဃးဒီး တၢ်သ့ၣ်နီၣ်ထီၣ်က့ၤအမူးအဂီၢ်တက့ၢ်. လံာ်စီဆှံ အဆၢတဖၣ်န့ၣ်​ နဃုထံၣ်န့ၢ်အီၤလၢ လံာ်လၢအမ့ၢ် တၢ်သမံသမိး လံာ်စီဆှံအဆၢ ကိးနံၤဒဲး အပူၤသ့လီၤ. လံာ်လၢအမ့ၢ် တၢ်မၤစၢၤလၢ နကမၤလိ ယွၤအကလုၢ်ကထါအဂီၢ် တၢ်မၤလိ ၁၆ အပူၤစ့ၢ်ကီး နဃုထံၣ်န့ၢ် တၢ်ဂ့ၢ်လီၤတံၢ်လီၤဆဲးသ့လီၤ. (ကွၢ်စ့ၢ်ကီး ၂၀၂၀ လါအ့ဖြ့ၣ် ခရံာ်ဖိအတၢ်အိၣ်မူ ဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ တက့ၢ်.) လၢဟံၣ်ဖိဃီဖိ တၢ်မၤလိလံာ်စီဆှံ အဆၢကတီၢ် ဒ်သိးနကမၤလိ တၢ်ပှ့ၤက့ၤ မ့ၢ်တၢ်လၢအရ့ဒိၣ်ထဲလဲၣ်အဂီၢ် နဃုကွၢ်တၢ်ဂ့ၢ်တဖၣ်လၢ လံာ်လၢအမ့ၢ် လံာ်နဲၣ်ကျဲလၢ ယဟိဝၤပှၤအုၣ်အသးတဖၣ်​ ကဃုသ့ၣ်ညါတၢ်အဂီၢ် အပူၤသ့လီၤ

ကွဲမုာ်ပှၤဂၤလၢ ကဟဲထီၣ်ဝဲအဂီၢ်. ပၣ်ဃုာ်လၢ တၢ်ကွဲမုာ် ခဲၣ်ဖ့အပူၤ လၢလၢပှဲၤပှဲၤတက့ၢ်. ကွဲမုာ် ပှၤလၢနက့ၤအိၣ်သကိးအီၤ, ပှၤလၢအမၤလိလံာ်စီဆှံဒီးနၤလၢ အပူၤကွံာ်, ပှၤလၢနသ့ၣ်ညါသ့ၣ်ခိး ဒီးနဘူးနတံၢ်တဖၣ်တက့ၢ်. တၢ်အိၣ်ဖှိၣ်သးပှၢ်တဖၣ်​ ကဘၣ်ကတဲာ်ကတီၤဝဲလၢ ကကွဲမုာ်ဝဲ ပှၤလၢအပတုာ်တၢ်ဟးစံၣ်တဲၤတဲလီၤတဖၣ်လီၤ. နမ့ၢ်အဲၣ်ဒိး ကွဲမုာ်ပှၤလၢ တအိၣ်လၢ နလီၢ်ကဝီၤပူၤတဖၣ်န့ၣ်​ နနုာ်လီၤလၢ jw.org, ဘၣ်ဃးဒီးပှၤ, “တၢ်သ့ၣ်နီၣ်ထီၣ်က့ၤအမူး” ဒီးနဃုကွၢ် တၢ်လီၢ်ဒီး တၢ်ဆၢကတီၢ်လၢ ပှၤကမၤတၢ်သ့ၣ်နီၣ်ထီၣ်က့ၤအမူး လၢအဝဲအိၣ်တၢ်အလီၢ်သ့န့ၣ်လီၤ.

ပကတဲာ်ကတီၤ တၢ်အဂၤမနုၤတဖၣ်သ့ဒံးလဲၣ်.