အိၣ်မူဒ် ခရံာ်ဖိအသိး
လါစဲးပတ့ဘၢၣ် ခဲၣ်ဖ့လီၤဆီလၢ နကစးထီၣ် တၢ်မၤလိလံာ်စီဆှံအဂီၢ်
ဖဲလါစဲးပတ့ဘၢၣ်န့ၣ် ပကဂုာ်ကျဲးစၢး စံၣ်တဲၤတဲလီၤတၢ်လၢ ပှၤကိးဂၤဒဲးဒီး ပကသူ အိၣ်မူလီၤထူလီၤယိာ် ပှဲၤဒီးတၢ်သးခု ဒ်သိးပကစးထီၣ်တၢ်မၤလိလံာ်စီဆှံဒီး အဝဲသ့ၣ်. ပှၤစံၣ်တဲၤတဲလီၤတၢ်ဖိတဖၣ် ဃုထၢဝဲလၢကမၤဝဲ ပှၤလဲၤလၢညါ မၤစၢၤတၢ် အနၣ်ရံၣ် ၃၀ သ့ဝဲလီၤ. ပပၣ်ဃုာ်လၢ ခဲၣ်ဖ့အံၤ ကသ့ဒ်လဲၣ်.
ဖဲနထံၣ်လိာ်သးဒီး ဟံၣ်ကစၢ် အဆိကတၢၢ်တဘျီအခါ– ဒ်သိးပှၤကသးအိၣ် ဒိကနၣ်တၢ်အဂီၢ် သူလံာ်ကုခိၣ်လၢအလီၢ်ခံတကပၤ ဒီးဂုာ်ကျဲးစၢးတဲဘၣ်ပှၤဂၤလၢ တၢ်မၤလိလံာ်စီဆှံအဂ့ၢ်. ဆိကမိၣ်ထီၣ်က့ၤ ပှၤလၢအဖျါလၢ အသးအိၣ်တၢ်မ့ၢ်တၢ်တီ ဒီးပှၤလၢနက့ၤအိၣ်သကိးအီၤတဖၣ်. လၢအပူၤကွံာ် အဝဲသ့ၣ် မ့ၢ်တတူၢ်လိာ် တၢ်မၤလိလံာ်စီဆှံ သနာ်က့ တဘျီအံၤန့ၣ် ဘၣ်သ့ၣ်သ့ၣ် အဝဲသ့ၣ် ကသးအိၣ်ဝဲ ပလံာ်တဘ့ၣ်အံၤ ဒီးပတၢ်မၤလိလံာ်စီဆှံ အကျိၤအကျဲအသီအံၤလီၤ. ပှၤမ့ၢ်တအိၣ်လၢဟံၣ်န့ၣ် ပတကြၢးပာ်တ့ၢ်လံာ်ဘၣ်. မ့တမ့ၢ် ပှၤမ့ၢ်တသးအိၣ် တၢ်မ့ၢ်တၢ်တီန့ၣ် ပတကြၢးဆှၢန့ၢ် အဝဲသ့ၣ်လၢ လံာ်အံၤဘၣ်. ဘၣ်သ့ၣ်သ့ၣ် တၢ်အိၣ်ဖှိၣ် ကမံးတံာ် ကရဲၣ်ကျဲၤအါထီၣ်ဝဲ တၢ်အိၣ်ဖှိၣ်ရိဖှိၣ်လၢ တၢ်စံၣ်တဲၤတဲလီၤတၢ်အဂီၢ် လၢလါအံၤအတီၢ်ပူၤလီၤ.
တၢ်ခွဲးတၢ်ယာ်အဂၤတဖၣ်– နတၢ်အိၣ်ဖှိၣ် မ့ၢ်သူဝဲ လ့ၣ်ဆီၣ်န့ၣ် ပာ်ထီၣ် အိၣ်မူလီၤထူလီၤယိာ် ပှဲၤဒီးတၢ်သးခု လၢလ့ၣ်ဆီၣ်လိၤ. ပှၤလၢအသးအိၣ်ဒိကနၣ်တၢ် ဒီးတူၢ်လိာ်လံာ်တဖၣ်န့ၣ် တဲဘၣ်အီၤလၢ ပအိၣ်ဒီးတၢ်မၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်စ့ဘၣ်. ဖဲနတဲသကိးတၢ်အခါ နတဲဘၣ်အီၤ ပမၤတၢ်မၤလိလံာ်စီဆှံ ဒ်လဲၣ်အဂ့ၢ်သ့ မ့တမ့ၢ် နတဲသကိးလၢခံတဘျီသ့. ပှၤလၢအကွၢ်ထွဲ တၢ်စံၣ်တဲၤတဲလီၤတၢ်မၤတဂၤ ကရဲၣ်ကျဲၤဝဲလၢ ပှၤစံၣ်တဲၤတဲလီၤတၢ်ဖိလၢ အတုၤထီၣ်ထီၣ်ဘးတဖၣ် ကလဲၤစံၣ်တဲၤတဲလီၤတၢ်လၢ ပှၤဆါတၢ်ပှ့ၤတၢ်အလီၢ် ဒီးတဲဘၣ်ဝဲ တၢ်မၤလိလံာ်စီဆှံ အတၢ်ရဲၣ်တၢ်ကျဲၤ. ပှၤလၢနတၢ်မၤလီၢ်မ့ၢ်ဂ့ၤ, ပှၤလၢနထံၣ်အီၤလၢ နစံၣ်တဲၤတဲလီၤတၢ်တပူၤလၢ်လၢ်မ့ၢ်ဂ့ၤ တဲဘၣ်အီၤ တၢ်မၤလိလံာ်စီဆှံ အတၢ်ရဲၣ်တၢ်ကျဲၤတက့ၢ်.
ယ့ၣ်ၡူး မၤလိာ်တ့ၢ်ပှၤလၢ “လဲၤဒီးဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ်” ဒီး “သိၣ်လိအဝဲသ့ၣ်” (မး ၂၈:၁၉, ၂၀) အဃိပကသူ လံာ်လၢအမ့ၢ် အိၣ်မူလီၤထူလီၤယိာ် ပှဲၤဒီးတၢ်သးခု လၢခဲၣ်ဖ့လီၤဆီအံၤ ဒီးမၤလၢပှဲၤပမူဒါ.