အိၣ်မူဒ် ခရံာ်ဖိအသိး
ဒ်သိး နဟံၣ်ဖိဃီဖိ ကအိၣ်ဒီး တၢ်သးခုအဂီၢ် နမၤစၢၤသ့
ယဟိဝၤယွၤ အဲၣ်ဒိးဝဲလၢ ဟံၣ်ဖိဃီဖိတဖၣ် ကအိၣ်ဒီးတၢ်သးခု. (စံး ၁၂၇:၃-၅; စံၣ် ၉:၉; ၁၁:၉) ဘၣ်ဆၣ် ဟီၣ်ခိၣ်တဘ့ၣ်အံၤ အိၣ်ထဲတၢ်ကီတၢ်ခဲ ဒီးပဟံၣ်ဖိဃီဖိတဖၣ် မၤကမၣ်ဘၣ်တၢ်သ့အဃိ ပကသးခုအဂီၢ် တညီထီဘိဘၣ်. အဃိ ဒ်သိး ပဟံၣ်ဖိဃီဖိ ကအိၣ်ဒီး တၢ်သးခုအဂီၢ် ပဝဲတဂၤဘၣ်တဂၤန့ၣ် ပကဘၣ်မၤဒ်လဲၣ်.
ဝၤန့ၣ် ကဆိကမိၣ်န့ၢ်တၢ်လၢ အမါအဂီၢ်. (၁ ပ့း ၃:၇) အဝဲကသူ အတၢ်ဆၢကတီၢ် လၢကရ့ဒီးအမါ. ဒီးအဝဲ တမုၢ်လၢ်တၢ်လၢ အမါအအိၣ် အါတလၢဘၣ် ဒီးကပာ်ဖျါထီၣ်ဝဲလၢ အပာ်လုၢ်ပာ်ပှ့ၤဝဲ တၢ်လၢအမါမၤန့ၢ်ဝဲလၢ အီၤဒီးအဟံၣ်ဖိဃီဖိအဂီၢ်. (ကလီး ၃:၁၅) ဒီးအကပာ်ဖျါထီၣ်လၢ အအဲၣ်အမါ ဒီးကပတြၢၤအမါ.—ကတိၤ ၃၁:၂၈, ၃၁.
မါတဂၤ ကဃုကျဲလၢ ကမၤစၢၤအဝၤ ထီဘိ. (ကတိၤ ၃၁:၁၂) ကဒိးပၢအသးလၢ အဝၤအဖီလာ် ဒီးကဆီၣ်ထွဲမၤစၢၤအဝၤ. (ကလီး ၃:၁၈) ကတဲတၢ်ဒီးအဝၤမုာ်မုာ် ဒီးကတဲအဝၤအဂ့ၢ် လၢအဂ့ၤ.—ကတိၤ ၃၁:၂၆.
မိပါတဖၣ်န့ၣ် ကဟ့ၣ်ဝဲအဖိတၢ်ဆၢကတီၢ်. (၅ မိၤ ၆:၆, ၇) ဒီးအဝဲသ့ၣ် ကတဲဘၣ် အဖိတဖၣ်လၢ အအဲၣ်အဝဲသ့ၣ်. (မး ၃:၁၇) အဝဲသ့ၣ် ကသိၣ်အဖိ, ကပာ်ဖျါထီၣ်တၢ်အဲၣ် ဒီးကအိၣ်ဒီး တၢ်သ့ပဲာ်ထံနီၤဖးတၢ်.—အ့း ၆:၄.
ဖိတဖၣ် ပာ်ကဲအမိအပါ ဒီးဒိကနၣ် အဝဲသ့ၣ် အကလုၢ်. (ကတိၤ ၂၃:၂၂) အဝဲသ့ၣ် ကတဲဘၣ်အမိအပါလၢ အတၢ်ဆိကမိၣ် ဒီးအတၢ်တူၢ်ဘၣ်တဖၣ်. အမိအပါ မ့ၢ်သိၣ်အဝဲသ့ၣ်န့ၣ် အဝဲသ့ၣ် ကဒိကနၣ် ဒီးကပာ်ဖျါထီၣ် တၢ်ပာ်ကဲ.—ကတိၤ ၁၉:၂၀.
ကွၢ်တၢ်ဂီၤမူ လၢအမ့ၢ် ဒုးအိၣ်ထီၣ် တၢ်သူၣ်ခုသးခုလၢ နဟံၣ်ဃီပူၤ, ဒီးစံးဆၢ တၢ်သံကွၢ်လၢ တၢ်ဖီလာ်တဖၣ်အံၤ–
ဒ်သိး ဟံၣ်ဖိဃီဖိ ကအိၣ်ဒီး တၢ်သးခုအဂီၢ် အဝဲသ့ၣ်တဂၤဘၣ်တဂၤ မၤဝဲဒ်လဲၣ်.