တၢ်မၤလိ ၃၅
ပာ်ဖျါထီၣ် တၢ်ပာ်ကဲလိာ်သး တဂၤဒီး တဂၤလၢ ယဟိဝၤယွၤအတၢ်အိၣ်ဖှိၣ်အပူၤ
“လၢတၢ်န့ၣ်အဃိ, မဲာ်ချံစံးဘၣ်စု, ‘ယတလိၣ်ဘၣ် နၤဘၣ်’ န့ၣ်တသ့ဘၣ်. ဒ်န့ၣ်အသိးခိၣ်စံးဘၣ်ခီၣ်, ‘ခဲကနံၣ်အံၤ, ယတလိၣ်ဘၣ်နၤဘၣ်’ န့ၣ်တသ့ဘၣ်.”—၁ ကရံၣ်သူး ၁၂:၂၁, ခ့ခါစှီၤကျိာ်.
တၢ်သးဝံၣ် ၁၂၄ တီထီဘိ
တၢ်မၤလိအံၤ အတၢ်တိာ်ပာ်a
၁. ယဟိဝၤယွၤဟ့ၣ်လီၤ အခ့အပှၤလၢ အအိၣ်ဒီးတၢ်သးတီ တဂၤစုာ်စုာ် လၢတၢ်မနုၤလဲၣ်.
ယဟိဝၤယွၤအဲၣ်ဒိးဝဲလၢ အခ့အပှၤလၢအိၣ်ဒီး တၢ်သးတီတဂၤစုာ်စုာ်န့ၣ် ကအိၣ်ဒီးမူဒါလၢ အတၢ်အိၣ်ဖှိၣ်အပူၤလီၤ. လၢတၢ်အိၣ်ဖှိၣ်အပူၤ ပဝဲတဂၤစုာ်စုာ် ပအိၣ်ဒီးမူဒါလၢ အလီၤဆီလိာ်သး သနာ်က့ ပဝဲခဲလၢာ် ပမ့ၢ်ပှၤလုၢ်ဒိၣ်ပှ့ၤဒိၣ် ဒီးပကဘၣ် မၤစၢၤလိာ်ပသး တဂၤဒီးတဂၤလီၤ. တၢ်မၢဖိပီလူး မၤစၢၤပှၤဒ်သိး ပကနၢ်ပၢၢ်ထီၣ် တၢ်မၤလိလၢအရ့ဒိၣ်အံၤလီၤ. ဒီးပကနၢ်ပၢၢ်ထီၣ်အီၤ လၢကျဲဒ်လဲၣ်.
၂. ဒ် အ့းဖ့းစူး ၄:၁၆ ပာ်ဖျါထီၣ်ဝဲအသိး ဘၣ်မနုၤအဃိ ပကဘၣ်ပာ်ကဲလိာ်သး တဂၤဒီးတဂၤ ဒီးမၤသကိးတၢ် တပူၤဃီလဲၣ်.
၂ ဒ်လံာ်စီဆှံအဆၢလၢ တၢ်မၤလိအခီၣ်ထံး ပာ်ဖျါထီၣ်ဝဲအသိး စီၤပီလူးတဲဝဲၡဲၡဲလၢ ပတကြၢးတဲ ယဟိဝၤယွၤအခ့အပှၤ တဂၤလၢ်လၢ်လၢ “ယတလိၣ်ဘၣ်နၤဘၣ်” န့ၣ်ဘၣ်. (၁ ကရံၣ်သူး ၁၂:၂၁) ပမ့ၢ်အဲၣ်ဒိးတၢ်ဃူတၢ်ဖိး ကအိၣ်လၢတၢ်အိၣ်ဖှိၣ်အပူၤန့ၣ် ပကဘၣ်ပာ်ကဲလိာ်သး တဂၤဒီးတဂၤ ဒီးမၤသကိးတၢ်တပူၤဃီလီၤ. (ဖး အ့းဖ့းစူး ၄:၁၆ တက့ၢ်.) ဖဲပမၤသကိးတၢ်ဃူဃူဖိးဖိးအခါ ပတၢ်အိၣ်ဖှိၣ်ကဒိၣ်ထီၣ်ထီထီၣ် ဒီးကပှဲၤဒီး တၢ်အဲၣ်တၢ်ကွံလီၤ.
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤတဖၣ်လဲၣ်.
၃ ကျဲတနီၤလၢ ပကပာ်ဖျါထီၣ်တၢ်ပာ်ကဲလၢ ပဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်အပူၤန့ၣ် မ့ၢ်မနုၤလဲၣ်. လၢတၢ်မၤလိအံၤအပူၤ ပကတဲသကိး တၢ်အိၣ်ဖှိၣ်သးပှၢ်ကဒဲကဒဲ ပာ်ဖျါထီၣ်တၢ်ပာ်ကဲလိာ်သး ကသ့ဒ်လဲၣ်. ပဝဲခဲလၢာ် ပပာ်ဖျါထီၣ်လၢ ပပာ်လုၢ်ပာ်ပှ့ၤ ဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ် ကသ့ဒ်လဲၣ်. ဝံၤဒီး ပှၤလၢအကတိၤ ပကျိာ်တသ့ဂ့ၤဂ့ၤဘၣ်တဖၣ် ပနၢ်ပၢၢ်စၢၤအဝဲသ့ၣ် ကသ့ဒ်လဲၣ်န့ၣ်လီၤ.
တၢ်အိၣ်ဖှိၣ်သးပှၢ် ကဒဲကဒဲ ပာ်ဖျါထီၣ် တၢ်ပာ်ကဲလိာ်သး
၄. စီၤပီလူးအတၢ်ဟံးစုနဲၣ်ကျဲ ဖဲ ရိမ့ၤ ၁၂:၁၀ န့ၣ် တၢ်အိၣ်ဖှိၣ်သးပှၢ်တဖၣ် ကြၢးမၤထွဲဝဲ တၢ်မနုၤလဲၣ်.
၄ တၢ်အိၣ်ဖှိၣ်သးပှၢ်ခဲလၢာ် လၢတၢ်အိၣ်ဖှိၣ်အပူၤန့ၣ် ဘၣ်တၢ်ဃုထၢထီၣ်အဝဲသ့ၣ်လၢ ယဟိဝၤယွၤအသးစီဆှံလီၤ. အဝဲသ့ၣ်တဂၤစုာ်စုာ် အိၣ်ဒီးတၢ်သ့တၢ်ဘၣ်ဒီး ဒိးန့ၢ်ဘၣ်တၢ်ဟ့ၣ်လၢ အလီၤဆီလိာ်အသးလီၤ. (၁ ကရံၣ်သူး ၁၂:၁၇, ၁၈) အဝဲသ့ၣ်တနီၤန့ၣ် ကဲထီၣ်တၢ်အိၣ်ဖှိၣ်သးပှၢ်သီသီ ဒီးအတၢ်လဲၤခီဖျိ တအိၣ်အါအါဒံးဘၣ်. အဂၤတနီၤန့ၣ် ခီဖျိလၢ တၢ်အိၣ်ဆူၣ်အိၣ်ချ့တဂ့ၤ ဒီးသးပှၢ်ထီၣ်အဃိ မၤစၢၤတၢ်လၢ တၢ်အိၣ်ဖှိၣ်အပူၤ တကဲအါအါလၢၤဘၣ်. တၢ်အိၣ်ဖှိၣ်သးပှၢ်ကဒဲကဒဲ တကြၢးတဲလိာ်အသးလၢ “ယတလိၣ်ဘၣ်နၤဘၣ်” န့ၣ်ဘၣ်. လၢတၢ်န့ၣ်အလီၢ် အဝဲသ့ၣ်တဂၤစုာ်စုာ် ကဘၣ်မၤထွဲဝဲ စီၤပီလူးအတၢ်ဟံးစုနဲၣ်ကျဲ ဖဲ ရိမ့ၤ ၁၂:၁၀ အပူၤန့ၣ်လီၤ.—ဖးတက့ၢ်.
တၢ်အိၣ်ဖှိၣ်သးပှၢ်ကဒဲကဒဲ ပာ်ဖျါထီၣ်တၢ်ပာ်ကဲလိာ်သး ခီဖျိဒိကနၣ်န့ၢ်လိာ်သးလီၤ (ကွၢ်လံာ်အဆၢ ၅-၆)
၅. တၢ်အိၣ်ဖှိၣ်သးပှၢ် ကဒဲကဒဲ ပာ်ဖျါထီၣ်တၢ်ပာ်ကဲလိာ်သး ကသ့ဒ်လဲၣ် ဒီးဘၣ်မနုၤအဃိ အရ့ဒိၣ်လၢအဝဲသ့ၣ် ကဘၣ်မၤဝဲလဲၣ်.
၅ တၢ်အိၣ်ဖှိၣ်သးပှၢ် ကဒဲကဒဲ ပာ်ဖျါထီၣ်တၢ်ပာ်ကဲလိာ်သး ခီဖျိ ဒိကနၣ်န့ၢ်လိာ်သးလီၤ. လီၤဆီဒၣ်တၢ် ဖဲတၢ်အိၣ်ဖှိၣ်သးပှၢ်ကရူၢ် အိၣ်ဖှိၣ်လၢကမၤဝဲ တၢ်ဆၢတဲာ်လၢ အရ့ဒိၣ်တဖၣ်အခါလီၤ. ဘၣ်မနုၤအဃိ အဝဲသ့ၣ်ကဘၣ်ပာ်ဖျါထီၣ် တၢ်ပာ်ကဲလိာ်သး ကဒဲကဒဲလဲၣ်. ဖဲ တၢးထီခိးတၢ် ၁၉၈၈ လါအီးကထိဘၢၣ် ၁ တဲဝဲလၢ “တၢ်အိၣ်ဖှိၣ်သးပှၢ်တဖၣ် ကဘၣ်သ့ၣ်ညါလၢ ယ့ၣ်ၡူးသူဝဲသးစီဆှံ ဒ်သိးကဟံးစုနဲၣ်ကျဲဝဲ တၢ်အိၣ်ဖှိၣ်သးပှၢ်တဂၤဂ့ၤတဂၤဂ့ၤ လၢကပာ်ဖျါထီၣ် လံာ်စီဆှံတၢ်ဟံးစုနဲၣ်ကျဲ ဒ်သိးကမၤဘၣ်ဂီၢ်က့ၤ တၢ်ဂ့ၢ်ကီတခါခါ မ့တမ့ၢ် ကဆၢတဲာ်တၢ်လၢအရ့ဒိၣ်တဖၣ် ကသ့ဂ့ၤဂ့ၤအဂီၢ်လီၤ. (မၤတၢ် ၁၅:၆-၁၅) သးစီဆှံတမၤစၢၤထဲ တၢ်အိၣ်ဖှိၣ်သးပှၢ်တဂၤဘၣ် လၢတၢ်န့ၣ်အလီၢ် မၤစၢၤဝဲတၢ်အိၣ်ဖှိၣ်သးပှၢ်လၢ တၢ်အိၣ်ဖှိၣ်အပူၤခဲလၢာ်လီၤ.”
၆. တၢ်အိၣ်ဖှိၣ်သးပှၢ်တဖၣ် မၤသကိးတၢ်လၢ တၢ်ဃူတၢ်ဖိးအပူၤ ကသ့ဒ်လဲၣ် ဒီးဖဲအဝဲသ့ၣ်မၤဝဲဒ်န့ၣ်အခါ ကဲဘျုးကဲဖှိၣ်လၢ တၢ်အိၣ်ဖှိၣ်အဂီၢ်ဒ်လဲၣ်.
၆ တၢ်အိၣ်ဖှိၣ်သးပှၢ်လၢ အပာ်ကဲဝဲ တၢ်အိၣ်ဖှိၣ်သးပှၢ်အဂၤတဖၣ်န့ၣ် အဝဲတပာ်ဖျါထီၣ်ဆိ အတၢ်ထံၣ်တဖၣ် လၢညါဘၣ်. ဒီးတမ့ၢ်ထဲ အကဘၣ်တဲတၢ်လဲလဲဘၣ် ဒီးအဝဲတဆိကမိၣ်လၢ အတၢ်ထံၣ်န့ၣ် ဘၣ်ထီဘိဘၣ်. လၢတၢ်န့ၣ်အလီၢ် အဝဲကတဲဖျါထီၣ် အတၢ်ထံၣ်လၢ တၢ်ဆီၣ်လီၤသး ဒီးတၢ်ပာ်ကဲအပူၤလီၤ. ဖဲတၢ်အိၣ်ဖှိၣ်သးပှၢ်အဂၤတဖၣ် ဟ့ၣ်ထီၣ်တၢ်ထံၣ်အခါ အဝဲဒိကနၣ်န့ၢ်ဝဲ လီၤတံၢ်လီၤဆဲးလီၤ. တၢ်လၢအရ့ဒိၣ်ကတၢၢ်န့ၣ် အဝဲသးအိၣ်မၤထွဲဝဲ လံာ်စီဆှံတၢ်ဟံးစုနဲၣ်ကျဲ ဒီးဒိကနၣ်ဝဲ တၢ်ဟံးစုနဲၣ်ကျဲ ဟဲလၢ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” တဖၣ်အအိၣ်လီၤ. (မးသဲ ၂၄:၄၅-၄၇) ဖဲတၢ်အိၣ်ဖှိၣ်သးပှၢ်ကရူၢ်အိၣ်ဖှိၣ်အခါ အဝဲသ့ၣ်ကဒဲကဒဲ တဲသကိးတၢ်လၢ တၢ်အဲၣ်တၢ်ကွံ ဒီးတၢ်ပာ်ကဲလိာ်သးအပူၤလီၤ. ကစၢ်ယွၤအသးစီဆှံ အိၣ်ဒီးအဝဲသ့ၣ် ဒီးဟံးစုနဲၣ်ကျဲအဝဲသ့ၣ် ဒ်သိးကမၤဝဲ တၢ်ဆၢတဲာ်လၢအဘၣ် ဒီးကမၤဂၢၢ်ကျၢၤထီၣ် တၢ်အိၣ်ဖှိၣ်အဂီၢ်လီၤ.—ယၤကိာ် ၃:၁၇, ၁၈.
ပာ်ဖျါထီၣ်လၢ ပပာ်လုၢ်ပာ်ပှ့ၤ ဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ်
၇. ယ့ၣ်ၡူးထံၣ်ဝဲ ပှၤလၢအအိၣ်သဘျ့တဖၣ်ဒ်လဲၣ်.
၇ မုၢ်မဆါတနံၤအံၤ လၢပတၢ်အိၣ်ဖှိၣ်အပူၤန့ၣ် အိၣ်ဒီးပှၤဒီမါဝၤ ဒီးဟံၣ်ဖိဃီဖိတဖၣ်လီၤ. တကးဒံးဘၣ် အိၣ်စ့ၢ်ကီးဒီး ဒီပုၢ်ဝဲၢ်မုၣ်ခွါလၢ အသဘျ့တဖၣ်လီၤ. ပှၤလၢအအိၣ်သဘျ့တဖၣ်န့ၣ် ပကြၢးထံၣ်အဝဲသ့ၣ်ဒ်လဲၣ်. ယ့ၣ်ၡူးထံၣ်ပှၤလၢ အအိၣ်သဘျ့တဖၣ်ဒ်လဲၣ်န့ၣ် ပကြၢးကွၢ်လိမၤဒိးအီၤလီၤ. ဖဲယ့ၣ်ၡူးမၤတၢ်သးခုကစီၣ်လၢ ဟီၣ်ခိၣ်အံၤအခါ အဝဲတဆီဟံၣ်ဆီဃီဘၣ်. အဝဲအိၣ်သဘျ့ဒ်သိး ကသူဝဲအတၢ်ဆၢကတီၢ်လၢ ကမၤလၢပှဲၤအမူဒါအဂီၢ်လီၤ. ယ့ၣ်ၡူးတသိၣ်လိပှၤဂၤလၢ ကဘၣ်ဆီဟံၣ်ဆီဃီ မ့တမ့ၢ် ကဘၣ်အိၣ်သဘျ့န့ၣ်ဘၣ်. ဘၣ်ဆၣ် အဝဲတဲဝဲလၢ ခရံာ်ဖိတနီၤ ကဃုထၢဝဲလၢ ကအိၣ်သဘျ့လီၤ. (မးသဲ ၁၉:၁၁, ၁၂) အဃိ ယ့ၣ်ၡူးပာ်လုၢ်ပာ်ပှ့ၤဝဲ ပှၤလၢအအိၣ်သဘျ့တဖၣ်လီၤ. အဝဲတဆိကမိၣ်ဆံးဝဲ ပှၤလၢအအိၣ်သဘျ့တဖၣ်ဘၣ်. ဒီးတထံၣ်အဝဲသ့ၣ်ဒ် ပှၤလၢအလိၣ်ဘၣ်တၢ်တမံၤမံၤဘၣ်.
၈. ဒ် ၁ ကရံၣ်သူး ၇:၇-၉ ပာ်ဖျါထီၣ်ဝဲအသိး စီၤပီလူးဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ ကဆိကမိၣ်ထံဝဲ တၢ်မနုၤလဲၣ်.
၈ ဒ်ယ့ၣ်ၡူးအသိး တၢ်မၢဖိပီလူးစ့ၢ်ကီး မၤဝဲတၢ်စံၣ်တဲၤတဲလီၤတၢ်မၤ ဒ်ပှၤလၢအအိၣ်သဘျ့တဂၤအသိးလီၤ. ခရံာ်ဖိတဂၤ တကြၢးဆီဟံၣ်ဆီဃီဘၣ်န့ၣ် စီၤပီလူးတသိၣ်လိဝဲဒ်န့ၣ် နီတဘျီဘၣ်. အဝဲထံၣ်ဝဲလၢ တၢ်ဆီဟံၣ်ဆီဃီန့ၣ် မ့ၢ်ဝဲပှၤတဂၤစုာ်စုာ် အတၢ်ဆၢတဲာ်လီၤ. ဘၣ်ဆၣ် စီၤပီလူးဟ့ၣ်ဂံၢ်ဟ့ၣ်ဘါဝဲ ခရံာ်ဖိတဖၣ်လၢ အဝဲသ့ၣ်ကအိၣ်သဘျ့ ဒ်သိးကမၤ ယဟိဝၤယွၤအတၢ်မၤအဂီၢ်လီၤ. (ဖး ၁ ကရံၣ်သူး ၇:၇-၉ တက့ၢ်.) ပသ့ၣ်ညါသပှၢ်ကတၢၢ်လၢ စီၤပီလူးတဆိကမိၣ်ဆံးဝဲ ပှၤလၢအအိၣ်သဘျ့တဖၣ်ဘၣ်. အဃိ အဝဲဃုထၢထီၣ် ဒီပုၢ်ဝဲၢ်ခွါသးစၢ်တဂၤလၢ အမ့ၢ်စီၤတံၤမသ့း ဒ်သိးကဟံးထီၣ်ဖီၣ်ထီၣ် မူဒါအရ့ဒိၣ်တဖၣ်လၢ ယဟိဝၤယွၤအတၢ်မၤအဂီၢ်လီၤ.b (ဖံလံးပံၤ ၂:၁၉-၂၂) ဒီပုၢ်ဝဲၢ်ခွါတဂၤ ဟံးထီၣ်ဖီၣ်ထီၣ်မူဒါ န့ၢ်တန့ၢ်န့ၣ် တဒိးသန့ၤထီၣ်အသးလၢ အဆီဟံၣ်ဆီဃီဧါ မ့တမ့ၢ် အတဆီဟံၣ်ဆီဃီဧါန့ၣ်ဘၣ်.—၁ ကရံၣ်သူး ၇:၃၂-၃၅, ၃၈.
၉. ဘၣ်ဃးဒီး ပှၤလၢအဆီဟံၣ်ဆီဃီဒီး ပှၤလၢအအိၣ်သဘျ့တဖၣ်န့ၣ် ပကဘၣ်ထံၣ် အဝဲသ့ၣ်ဒ်လဲၣ်.
၉ ယ့ၣ်ၡူးမ့ၢ်ဂ့ၤ, စီၤပီလူးမ့ၢ်ဂ့ၤ တသိၣ်လိခရံာ်ဖိတဖၣ်လၢ ကဘၣ်ဆီဟံၣ်ဆီဃီ မ့တမ့ၢ် ကဘၣ်အိၣ်သဘျ့ဘၣ်. လၢတၢ်န့ၣ်အဃိ ဘၣ်ဃးဒီးတၢ်ဆီဟံၣ်ဆီဃီ ဒီးတၢ်အိၣ်သဘျ့န့ၣ် ပကြၢးထံၣ်အီၤဒ်လဲၣ်. တၢးထီခိးတၢ် ၂၀၁၂ လါအီးကထိဘၢၣ် ၁ ပာ်ဖျါထီၣ်ဝဲ ၡဲၡဲလၢ “ပှၤလၢအဆီဟံၣ်ဆီဃီမ့ၢ်ဂ့ၤ, ပှၤလၢအအိၣ်သဘျ့မ့ၢ်ဂ့ၤ မ့ၢ်တၢ်ဟ့ၣ်တခါလၢ ကစၢ်ယွၤအအိၣ်လီၤ. . . . ပှၤလၢအအိၣ်သဘျ့တဖၣ် ယဟိဝၤယွၤတဆိကမိၣ်ဆံး ဒီးသးကညီၤအဝဲသ့ၣ် ခီဖျိလၢအတဆီဟံၣ်ဆီဃီ အဃိန့ၣ်ဘၣ်.” လၢတၢ်န့ၣ်အလီၢ် ပကဘၣ်ပာ်ကဲ ပဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ် လၢတၢ်အိၣ်ဖှိၣ်အပူၤလီၤ.
ဒ်သိးပကပာ်ကဲ ပှၤလၢအအိၣ်သဘျ့ တဖၣ် အတၢ်တူၢ်ဘၣ်ကသ့အဂီၢ် ပကဘၣ်ဟးဆှဲးတၢ်မနုၤလဲၣ် (ကွၢ်လံာ်အဆၢ ၁၀)
၁၀. ပပာ်ဖျါထီၣ်လၢ ပပာ်လုၢ်ပာ်ပှ့ၤ ပဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ် ကသ့ဒ်လဲၣ်.
၁၀ ပဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ်န့ၣ် ပပာ်ဖျါထီၣ်လၢ ပပာ်ကဲအဝဲသ့ၣ် အတၢ်တူၢ်ဘၣ် ဒီးအတၢ်အိၣ်သးတဖၣ် ကသ့ဒ်လဲၣ်. ပကဘၣ်သ့ၣ်ညါလၢ ပဒီပုၢ်ဝဲၢ်သဘျ့တနီၤန့ၣ် ပာ်လီၤဖီတၢၣ်လၢ အတဆီဟံၣ်ဆီဃီဘၣ်. မ့မ့ၢ်အဂၤတနီၤ အဲၣ်ဒိးဆီဟံၣ်ဆီဃီ ဘၣ်ဆၣ် အဝဲသ့ၣ်တထံၣ် ပှၤလၢကြၢးဝဲဘၣ်ဝဲ ဒီးအီၤဒံးဘၣ်. ဘၣ်ဆၣ် မ့မ့ၢ်လၢ ဒီပုၢ်ဝဲၢ်အဂၤတနီၤ ခီဖျိလၢ အသးသမူတံၤသကိး သံသဒၣ်အီၤအဃိ အဝဲသ့ၣ်ကဲထီၣ်က့ၤဝဲ ပှၤအိၣ်သဘျ့လီၤ. ဒ်လဲၣ်ဂ့ၤဒ်လဲၣ်ဂ့ၤ ပှၤအိၣ်လၢတၢ်အိၣ်ဖှိၣ်အပူၤတဖၣ် တကြၢးသံကွၢ်လၢ ဘၣ်မနုၤအဃိ အဝဲသ့ၣ်အိၣ်သဘျ့လဲၣ် ဒီးကဘၣ်ဃုစၢၤန့ၢ် အဝဲသ့ၣ်အသးသမူတံၤသကိး အဂီၢ်စ့ၢ်ကီးဧါန့ၣ်ဘၣ်. ဘၣ်သ့ၣ်သ့ၣ် ပှၤလၢအအိၣ်သဘျ့တနီၤန့ၣ် အဲၣ်ဒိးလၢပှၤဂၤ ကဃုစၢၤန့ၢ်အီၤ အသးသမူတံၤသကိးလီၤ. ဘၣ်ဆၣ် ပှၤလၢအတလိၣ်ဘၣ် တၢ်မၤစၢၤဒ်န့ၣ်တဖၣ် ပမ့ၢ်သံကွၢ်ဘၣ် အဝဲသ့ၣ်ဒ်န့ၣ်န့ၣ် အကတူၢ်ဘၣ်ဝဲဒ်လဲၣ်. (၁ သ့းစၤလနံ ၄:၁၁; ၁ တံၤမသ့း ၅:၁၃) ခဲအံၤ ပကတဲသကိး ဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ် အတၢ်ထံၣ်တနီၤလီၤ.
၁၁-၁၂. ပမၤဘၣ်ဒိဘၣ်ပှၤလၢ အအိၣ်သဘျ့တဖၣ်အသး သ့လၢကျဲဒ်လဲၣ်.
၁၁ ကဝီၤအပှၤကွၢ်တၢ်လၢ အအိၣ်သဘျ့တဂၤ မၤလၢပှဲၤအမူဒါဂ့ၤမး ဒီးထံၣ်ဝဲလၢတၢ်အိၣ်သဘျ့န့ၣ် ကဲဘျုးဝဲလၢကျဲအါဘိလီၤ. ဘၣ်ဆၣ် အတဲဝဲလၢ ဖဲဒီပုၢ်ဝဲၢ်မုၣ်ခွါတဖၣ် သံကွၢ်အီၤလၢ “ဘၣ်မနုၤအဃိ နတဟံးမါဒံးလဲၣ်” အခါ အသးလီၤစၢ်ဝဲလီၤ. ဒီပုၢ်ဝဲၢ်ခွါသဘျ့တဂၤလၢ အမၤတၢ်လၢဝဲၤတြၢ်န့ၣ် တဲဝဲလၢ “ဒီပုၢ်ဝဲၢ်မုၣ်ခွါတနီၤ ထံၣ်ဝဲလၢ ပှၤလၢအအိၣ်သဘျ့န့ၣ် အတၢ်အိၣ်မူလီၤသးကညီၤဒိၣ်မး. အဃိ ယတူၢ်ဘၣ်လၢ တၢ်အိၣ်သဘျ့န့ၣ် တမ့ၢ်တၢ်ဟ့ၣ်လၢ ကစၢ်ယွၤအအိၣ်လၢၤဘၣ်, ကဲထီၣ်က့ၤ တၢ်ဝံဃၢတခါ လၢယဂီၢ်တခီန့ၣ်လီၤ.”
၁၂ ဒီပုၢ်ဝဲၢ်မုၣ်သဘျ့တဂၤ လၢအမၤတၢ်လၢ ဘ့ၤသ့လးန့ၣ် တဲဝဲလၢ “ဒီပုၢ်ဝဲၢ်မုၣ်ခွါတနီၤ ဆိကမိၣ်ဝဲလၢ ကယဲၢ်ပှၤလၢအသဘျ့တဖၣ်န့ၣ် အဲၣ်ဒိးန့ၢ်ဘၣ်ဝဲ အသးသမူတံၤသကိး ဒီးဖဲပှၤထံၣ်ဖှိၣ်လိာ်သးအါမးအခါ မ့ၢ်ဝဲတၢ်ခွဲးတၢ်ယာ်လၢ ကထံၣ်န့ၢ်ဝဲ အသးသမူတံၤသကိးအဂီၢ်လီၤ. ဘၣ်တဘျီ ယလီၤဘၣ်မူဒါလၢ တၢ်လီၢ်အဂၤတတီၤ ဒီးဒီပုၢ်ဝဲၢ်မုၣ်လၢ ယလဲၤအိၣ်ဒီးအီၤတဂၤ တဲဘၣ်ယၤလၢ ဒီပုၢ်ဝဲၢ်ခွါလၢ အသးနံၣ်တဖးဃီဒီးယၤန့ၣ် အိၣ်ဝဲခံဂၤလၢ တၢ်အိၣ်ဖှိၣ်အပူၤလီၤ. ဒီးအဝဲတဲယၤလၢ အတဃုန့ၢ် ယသးသမူတံၤသကိးဘၣ်. ဘၣ်ဆၣ် ဖဲပလဲၤတုၤလၢ ဘီမုၢ်ဘျီၣ်ဒိၣ်အခါ အဝဲလဲၤတွံၢ်ဃီၤယၤ လၢဒီပုၢ်ဝဲၢ်ခွါခံဂၤန့ၣ်အအိၣ် ဒီးဖဲန့ၣ် ကဲထီၣ်တၢ်မဲာ်ဆှးဒိၣ်မးလၢ ပဝဲသၢဂၤလၢာ်အဂီၢ်လီၤ.”
၁၃. တၢ်အဒိမနုၤတဖၣ် ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်လၢ အအိၣ်သဘျ့တဂၤန့ၣ်လဲၣ်.
၁၃ ဒီပုၢ်ဝဲၢ်မုၣ်သဘျ့အဂၤတဂၤ လၢအမၤတၢ်လၢ ဘ့ၤသ့လးန့ၣ် တဲဝဲလၢ “ယသ့ၣ်ညါ ပှၤသးပှၢ်လၢ အအိၣ်သဘျ့လၢ အမၤဝဲပှၤလဲၤလၢညါတၢ်မၤန့ၣ် အိၣ်ဒီးတၢ်ထံၣ်လၢအဂ့ၤ, သးစၢၢ်ဆၢအဖီတၢၣ်, သးအိၣ်မၤစၢၤပှၤဂၤ, သးခုလၢအတၢ်မၤအပူၤ ဒီးကဲထီၣ်တၢ်မၤစၢၤလၢ တၢ်အိၣ်ဖှိၣ်အဂီၢ်ဒိၣ်မးလီၤ. အဝဲသ့ၣ်အိၣ်ဒီး တၢ်ပာ်သူၣ်ပာ်သးလၢအဂ့ၤ ဘၣ်ဃးဒီးတၢ်အိၣ်သဘျ့လီၤ. ခီဖျိလၢ အဝဲသ့ၣ်အိၣ်သဘျ့အဃိ အတဆိကမိၣ်လၢ အဂ့ၤန့ၢ်ဒံးပှၤဂၤဘၣ်. ဒီးခီဖျိလၢ အသးသမူတံၤသကိး ဒီးအဖိတအိၣ်ဘၣ်အဃိ အတသးခုလၢၤဘၣ်န့ၣ် တမ့ၢ်စ့ၢ်ကီးဘၣ်.” ပအိၣ်ဘၣ်လၢ တၢ်အိၣ်ဖှိၣ်လၢ ပှၤပာ်ကဲလိာ်သး ဒီးပာ်လုၢ်ပာ်ပှ့ၤလိာ်သး တဂၤဒီးတဂၤအဃိ မုာ်ဒိၣ်မးလီၤ. တကးဒံးဘၣ် ပသ့ၣ်ညါလၢ ဒီပုၢ်ဝဲၢ်မုၣ်ခွါတဖၣ် တပာ်ဆံး, တသးက့ၣ်, တပာ်တ့ၢ် ဒီးတဆိကမိၣ်ဒိၣ်ပှၤဘၣ်. လၢတၢ်န့ၣ်အလီၢ် ပသ့ၣ်ညါလၢ အဝဲသ့ၣ်အဲၣ်ပှၤလီၤ.
၁၄. ပပာ်ဖျါထီၣ်လၢ ပပာ်ကဲပှၤလၢအအိၣ်သဘျ့တဖၣ် ကသ့ဒ်လဲၣ်.
၁၄ ဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ် အဝဲသ့ၣ်တၢ်အိၣ်မူန့ၣ် တမ့ၢ်တၢ်လၢ အလီၤသးကညီၤဘၣ်. လၢတၢ်န့ၣ်အလီၢ် ပမ့ၢ်ပာ်လုၢ်ပာ်ပှ့ၤအဝဲသ့ၣ် အတၢ်ဂ့ၤတၢ်ဝါတဖၣ်န့ၣ် အဝဲသ့ၣ်ကသးခုဝဲ ဒိၣ်မးလီၤ. လၢပကသးကညီၤ အဝဲသ့ၣ်အလီၢ် ပကဘၣ်ပာ်လုၢ်ပာ်ပှ့ၤ အဝဲသ့ၣ်အတၢ်သးတီလီၤ. ပမ့ၢ်မၤဒ်န့ၣ်န့ၣ် ပဒီပုၢ်ဝဲၢ်မုၣ်ခွါလၢ အအိၣ်သဘျ့တဖၣ် တတူၢ်ဘၣ်လၢ ပတဲအဝဲသ့ၣ်လၢ “ယတလိၣ်ဘၣ်နၤဘၣ်” န့ၣ် နီတဘျီဘၣ်. (၁ ကရံၣ်သူး ၁၂:၂၁) လၢတၢ်န့ၣ်အလီၢ် အဝဲသ့ၣ်ကတူၢ်ဘၣ်လၢ ပပာ်ကဲအဝဲသ့ၣ် ဒီးအဝဲသ့ၣ် ကသးခုလၢ အအိၣ်ဘၣ်လၢ ပတၢ်အိၣ်ဖှိၣ်အပူၤအဃိလီၤ.
နၢ်ပၢၢ်စၢၤ ပှၤလၢအကတိၤ ပကျိာ်တသ့ ဂ့ၤဂ့ၤဘၣ်တဖၣ်
၁၅. ဒီပုၢ်ဝဲၢ်မုၣ်ခွါတဖၣ် ဒ်သိးအဝဲသ့ၣ်ကမၤအါထီၣ် တၢ်စံၣ်တဲၤတဲလီၤတၢ်မၤအဂီၢ် အဝဲသ့ၣ်ဘၣ်ဆီတလဲဝဲ တၢ်မနုၤလဲၣ်.
၁၅ ဖဲစှၤကိာ်နံၣ်အတီၢ်ပူၤ ဒီပုၢ်ဝဲၢ်မုၣ်ခွါအါဂၤ ပာ်လီၤဖီတၢၣ်လၢ ကမၤလိကျိာ်အဂၤ ဒ်သိးကမၤအါထီၣ် တၢ်စံၣ်တဲၤတဲလီၤတၢ်မၤအဂီၢ်လီၤ. ဒ်သိးအဝဲသ့ၣ်မၤဝဲဒ်န့ၣ် ကသ့အဂီၢ် ဘၣ်ဆီတလဲဝဲ တၢ်အိၣ်အါမး လၢအတၢ်အိၣ်မူပူၤလီၤ. ဒီပုၢ်ဝဲၢ်မုၣ်ခွါတဖၣ်အံၤ ဒ်သိးကမၤစၢၤဘၣ်တၢ်လၢ ကျိာ်အဂၤကသ့အဂီၢ် အဝဲသ့ၣ်ဆီတလဲ အတၢ်အိၣ်ဖှိၣ် ဒီးလဲၤမၤစၢၤတၢ်လၢ တၢ်လီၢ်လၢအလိၣ်ဘၣ် တၢ်မၤစၢၤန့ၣ်လီၤ. (မၤတၢ် ၁၆:၉) ဒ်သိးအဝဲသ့ၣ် ကမၤအါထီၣ် ယဟိဝၤယွၤတၢ်မၤအဂီၢ် အဝဲသ့ၣ်ကဘၣ် ဆၢတဲာ်တၢ်လၢ အနီၣ်ကစၢ်လီၤ. ဒ်သိးအဝဲသ့ၣ် တဲကျိာ်အသီကဘၣ်ဂ့ၤဂ့ၤအဂီၢ် တၢ်ဆၢကတီၢ်ကလၢာ် တဘျုးနံၣ်ညါ. ဘၣ်ဆၣ် အဝဲသ့ၣ်မၤစၢၤဘၣ်တၢ်လၢ တၢ်အိၣ်ဖှိၣ်အပူၤအါမးလီၤ. အဝဲသ့ၣ်အတၢ်ဂ့ၤတၢ်ဝါ ဒီးအတၢ်လဲၤခီဖျိန့ၣ် ဟ့ၣ်ဂံၢ်ဟ့ၣ်ဘါဝဲ ပဒီပုၢ်ဝဲၢ်မုၣ်ခွါတဖၣ်လီၤ. အဃိ ပပာ်လုၢ်ပာ်ပှ့ၤ ဒီပုၢ်ဝဲၢ်မုၣ်ခွါလၢ အဟ့ၣ်လီၤသး ဒ်အံၤတဖၣ်န့ၣ်လီၤ.
၁၆. ဒီပုၢ်ဝဲၢ်ခွါတဖၣ် ကကဲထီၣ်တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ်အဂီၢ် တၢ်အိၣ်ဖှိၣ်သးပှၢ်ကရူၢ် ကဘၣ်သမံသမိးဝဲ တၢ်ဂ့ၢ်မနုၤလဲၣ်.
၁၆ တၢ်အိၣ်ဖှိၣ်သးပှၢ်ကရူၢ်န့ၣ် တကြၢးဆၢတဲာ်ဝဲလၢ ဒီပုၢ်ဝဲၢ်ခွါတဂၤအံၤ မ့ၢ်လၢအကတိၤ လီၢ်ကဝီၤအကျိာ် တသ့ဂ့ၤဂ့ၤဘၣ်အဃိ အဝဲကဲထီၣ်တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ် တသ့ဘၣ်န့ၣ်ဘၣ်. လၢတၢ်န့ၣ်အလီၢ် တၢ်အိၣ်ဖှိၣ်သးပှၢ်ကရူၢ်န့ၣ် ကဘၣ်သမံသမိးဝဲ ဒီပုၢ်ဝဲၢ်ခွါတဂၤအံၤ ဒ်လံာ်စီဆှံပာ်ဖျါထီၣ်ဝဲအသိး မ့ၢ်အတုၤထီၣ်ထီၣ်ဘးလၢ ကကဲထီၣ်ဘၣ် တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဂၤ သ့လံဧါန့ၣ်လီၤ. ဒီးတဒိးသန့ၤထီၣ်အသးလၢ အဝဲကဘၣ်ကတိၤ လီၢ်ကဝီၤအကျိာ် သ့ဂ့ၤဂ့ၤန့ၣ်ဘၣ်.—၁ တံၤမသ့း ၃:၁-၁၀, ၁၂, ၁၃; တံတူး ၁:၅-၉.
၁၇. ဖဲဟံၣ်ဖိဃီဖိတဖၣ် လဲၤသုးလီၢ်သုးကျဲလၢ ထံကီၢ်အဂၤအခါ မိၢ်ပၢ်သ့ၣ်တဖၣ် ကဘၣ်ဆိကမိၣ်ထံဝဲ တၢ်ဂ့ၢ်မနုၤလဲၣ်.
၁၇ ခရံာ်ဖိဟံၣ်ဖိဃီဖိတနီၤ ထံၣ်ဘၣ်တၢ်ကီတၢ်ခဲလၢ အထံလီၢ်ကီၢ်ပူၤအဃိ လဲၤသုးလီၢ်သုးကျဲလၢ ထံကီၢ်အဂၤလီၤ. မ့မ့ၢ်အဂၤတနီၤန့ၣ် ခီဖျိလၢ တၢ်ဖံးတၢ်မၤအဃိ ဘၣ်လဲၤသုးလီၢ်သုးကျဲဝဲလီၤ. ဒ်လဲၣ်ဂ့ၤဒ်လဲၣ်ဂ့ၤ အဖိသ့ၣ်တဖၣ် ကတဲဝဲကျိာ်လၢ ထံကီၢ်လၢအဝဲသ့ၣ် လဲၤအိၣ်ဝဲတဘ့ၣ်န့ၣ်လီၤ. မ့မ့ၢ်လၢ မိၢ်ပၢ်တဖၣ် ကဘၣ်မၤလိဝဲ ကျိာ်အသီဒ်သိး အဝဲသ့ၣ်ဃုဖံးဃုမၤတၢ် ကသ့အဂီၢ်လီၤ. ဘၣ်ဆၣ် တၢ်အိၣ်ဖှိၣ် မ့တမ့ၢ် ကရူၢ်လၢအဝဲသ့ၣ် နီၢ်ကစၢ်အကျိာ် မ့ၢ်အိၣ်ဟီမီၤ. မ့ၢ်အဝဲသ့ၣ်ကြၢးလဲၤထီၣ် တၢ်အိၣ်ဖှိၣ်လၢ အနီၢ်ကစၢ်အကျိာ်ဧါ မ့တမ့ၢ် လၢအလီၢ်ကဝီၤအကျိာ်ဧါန့ၣ် ကဘၣ်ဆိကမိၣ်ထံဝဲလီၤ.
၁၈. ဒ် ကလၤတံ ၆:၅ ပာ်ဖျါထီၣ်ဝဲအသိး ပပာ်ဖျါထီၣ်လၢ ပပာ်ကဲဟံၣ်ခိၣ်တဖၣ် အတၢ်ဆၢတဲာ်ကသ့ဒ်လဲၣ်.
၁၈ ဟံၣ်ဖိဃီဖိကလဲၤထီၣ် တၢ်အိၣ်ဖှိၣ်ဖဲလဲၣ် တဖျၢၣ်လဲၣ်န့ၣ် ဟံၣ်ခိၣ်တဖၣ် ကဘၣ်ဆၢတဲာ်ဝဲလီၤ. မ့ၢ်လၢအဝဲသ့ၣ်နီၢ်ကစၢ် တၢ်ဂ့ၢ်တၢ်ကျိၤအဃိ ဟံၣ်ခိၣ်ကဘၣ် ဆိကမိၣ်န့ၢ်တၢ်လၢ အဟံၣ်ဖိဃီဖိတဖၣ်အဂီၢ်လီၤ. (ဖး ကလၤတံ ၆:၅ တက့ၢ်.) ပကြၢးပာ်ကဲ ဟံၣ်ခိၣ်တဖၣ် အတၢ်ဆၢတဲာ်လီၤ. ဒီးဟံၣ်ခိၣ်တဖၣ် မ့ၢ်မၤဝဲတၢ်ဆၢတဲာ် ဒ်လဲၣ်ဂ့ၤဒ်လဲၣ်ဂ့ၤ ပကဘၣ်ပာ်ကဲ အတၢ်ဆၢတဲာ်ဒီး တူၢ်လိာ်အဟံၣ်ဖိဃီဖိလၢ ပတၢ်အိၣ်ဖှိၣ်အပူၤ ဒီးပာ်ဖျါထီၣ် တၢ်အဲၣ်တၢ်ကွံလၢ အဝဲသ့ၣ်အဖီခိၣ်လီၤ.—ရိမ့ၤ ၁၅:၇.
၁၉. ဟံၣ်ခိၣ်တဖၣ် ကဘၣ်ဆိကမိၣ်ထံ ဒီးဃ့ဘါထုကဖၣ်လီၤတံၢ်လီၤဆဲး ဘၣ်ဃးဒီး တၢ်ဂ့ၢ်မနုၤလဲၣ်.
၁၉ ဟံၣ်ဖိဃီဖိအဂၤတနီၤ အဝဲသ့ၣ်လဲၤထီၣ်တၢ်အိၣ်ဖှိၣ်လၢ အနီၢ်ကစၢ်ကျိာ် ဘၣ်ဆၣ် အဖိသ့ၣ်တဖၣ် တသ့အနီၢ်ကစၢ်ကျိာ် ဂ့ၤဂ့ၤဘၣ်. မ့ၢ်လၢ အဝဲသ့ၣ်လဲၤထီၣ် တၢ်အိၣ်ဖှိၣ်လၢ အနီၢ်ကစၢ်ကျိာ်အဃိ အဖိသ့ၣ်တဖၣ် တနၢ်ပၢၢ်တၢ်အိၣ်ဖှိၣ် အတၢ်ရဲၣ်တၢ်ကျဲၤဂ့ၤဂ့ၤဘၣ် ဒီးတလဲၤထီၣ်လဲၤထီလၢ နီၢ်သးတခီလၢၤဘၣ်. ဘၣ်မနုၤအဃိလဲၣ်. မ့ၢ်လၢ ဖိသၣ်တဖၣ် လဲၤထီၣ်ကၠိဒီး တဲထဲထံကီၢ်တဘ့ၣ်န့ၣ်အကျိာ် အဃိ အဝဲသ့ၣ်တတဲအမိၢ်အပၢ် အကျိာ်လၢၤဘၣ်. တၢ်မ့ၢ်ကဲထီၣ်အသးဒ်အံၤန့ၣ် ဟံၣ်ခိၣ်တဖၣ် ကဘၣ်ဆိကမိၣ်ထံ ဒီးဃ့ဘါထုကဖၣ်လီၤတံၢ်လီၤဆဲး ဒ်သိးအကအိၣ်ဒီးတၢ်ကူၣ်သ့လၢ ကမၤစၢၤဝဲအဖိသ့ၣ်တဖၣ်လၢ ကဘူးထီၣ်ဒီးယဟိဝၤယွၤ ဒီးယဟိဝၤယွၤအခ့အပှၤ ကသ့ဒ်လဲၣ်အဂီၢ်န့ၣ်လီၤ. မိၢ်ပၢ်တဖၣ် ကဘၣ်သိၣ်လိအဖိလၢ အနီၣ်ကစၢ်အကျိာ် ဒ်သိးအဖိသ့ၣ်တဖၣ် ကနၢ်ပၢၢ်ထီၣ်ဝဲအကျိာ် ကသ့ဂ့ၤဂ့ၤအဂီၢ်လီၤ. မ့တမ့ၢ် ကလဲၤသုးအသးလၢ တၢ်အိၣ်ဖှိၣ်လၢ အသူကျိာ်လၢအဖိနၢ်ပၢၢ်ဝဲညီတခီဧါန့ၣ် အဝဲသ့ၣ်ကြၢး ဆိၣ်ကမိၣ်ထံဝဲစ့ၢ်ကီးလီၤ. ဟံၣ်ခိၣ်မ့ၢ်ဆၢတဲာ်ဝဲ ဒ်လဲၣ်ဂ့ၤဒ်လဲၣ်ဂ့ၤန့ၣ် တၢ်အိၣ်ဖှိၣ်ဖိတဖၣ် ကြၢးပာ်ကဲ ဒီးနၢ်ပၢၢ်စၢၤအဝဲသ့ၣ်လီၤ.
ပပာ်ဖျါထီၣ်လၢ ပနၢ်ပၢၢ်စၢၤပှၤလၢ အမၤလိကျိာ်အသီတဖၣ် ကသ့ဒ်လဲၣ် (ကွၢ်လံာ်အဆၢ ၂၀)
၂၀. ပပာ်ဖျါထီၣ်လၢ ပပာ်ကဲဒီးနၢ်ပၢၢ်စၢၤ ပဒီပုၢ်ဝဲၢ်မုၣ်ခွါတဖၣ်လၢ အမၤလိကျိာ်အသီ ကသ့ဒ်လဲၣ်.
၂၀ ဒ်တၢ်ဂ့ၢ်လၢ ပတဲသကိးတ့ၢ်အသိးန့ၣ် ပအိၣ်ဒီးဒီပုၢ်ဝဲၢ်မုၣ်ခွါတဖၣ်လၢ အဂုာ်ကျဲးစၢးမၤလိဝဲ ကျိာ်အသီလၢ တၢ်အိၣ်ဖှိၣ်အါဖျၢၣ်အပူၤလီၤ. အဝဲသ့ၣ်တဲဖျါထီၣ်ဝဲ အတၢ်တူၢ်ဘၣ်တဖၣ် တသ့ဂ့ၤဂ့ၤဘၣ် သနာ်က့ ပတဘၣ်ကွၢ်ထဲ အဝဲသ့ၣ်အတၢ်သ့တၢ်ဘၣ် လၢကျိာ်တကပၤဘၣ်. လၢတၢ်န့ၣ်အလီၢ် ပကဘၣ်ထံၣ်လၢ အဝဲသ့ၣ်အဲၣ်ယဟိဝၤယွၤ ဒီးအဲၣ်ဒိးမၤအါထီၣ် ယဟိဝၤယွၤအတၢ်မၤန့ၣ်လီၤ. ပမ့ၢ်ဃုထံၣ်န့ၢ် ဒီပုၢ်ဝဲၢ်မုၣ်ခွါတဖၣ် အတၢ်ဂ့ၤတၢ်ဝါဒ်အံၤန့ၣ် ပကပာ်ကဲဒီး နၢ်ပၢၢ်စၢၤအဝဲသ့ၣ်လီၤ. ပမ့ၢ်မၤဒ်န့ၣ်န့ၣ် တမ့ၢ်ပကတဲအဝဲသ့ၣ်လၢ နတဲယကျိာ် တသ့ဂ့ၤဂ့ၤဘၣ် အဃိ “ယတလိၣ်ဘၣ်နၤဘၣ်” န့ၣ်ဘၣ်.
ပမ့ၢ်ပှၤလုၢ်ဒိၣ်ပှ့ၤဒိၣ် လၢယဟိဝၤယွၤအဂီၢ်
၂၁-၂၂. ပအိၣ်ဒီးတၢ်ခွဲးတၢ်ယာ်လၢ ပကမၤတၢ်မနုၤလဲၣ်.
၂၁ ပစံးဘျုးစံးဖှိၣ်ဘၣ် ယဟိဝၤယွၤဒိၣ်မး မ့ၢ်လၢအဝဲဟ့ၣ်လီၤပှၤ မူဒါလၢအတၢ်အိၣ်ဖှိၣ်အပူၤအဃိလီၤ. ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, သးစၢ်မ့ၢ်ဂ့ၤ, သးပှၢ်မ့ၢ်ဂ့ၤ, ပှၤဆီဟံၣ်ဆီဃီမ့ၢ်ဂ့ၤ, ပှၤအိၣ်သဘျ့မ့ၢ်ဂ့ၤ, ပှၤတဲကျိာ်အသီသ့ ဂ့ၤဂ့ၤမ့ၢ်ဂ့ၤ, တသ့ဂ့ၤဂ့ၤဘၣ်မ့ၢ်ဂ့ၤ ပမ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ် ဒီးလၢပဒီပုၢ်ဝဲၢ်မုၣ်ခွါတဖၣ် အဂီၢ်စ့ၢ်ကီးလီၤ.—ရိမ့ၤ ၁၂:၄, ၅; ကလီးစဲ ၃:၁၀, ၁၁.
၂၂ မ်ပကဂုာ်ကျဲးစၢး မၤထွဲတၢ်မၤလိတဖၣ်လၢ စီၤပီလူးဟ့ၣ်ဝဲတၢ်အဒိ ဘၣ်ဃးဒီး ပှၤနီၢ်ခိက့ၢ်ဂီၤအံၤတက့ၢ်. တၢ်ဂ့ၢ်တဖၣ်အံၤ ကမၤစၢၤပှၤလၢ ပကဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါတဖၣ်လီၤ. တကးဒံးဘၣ် ကမၤစၢၤစ့ၢ်ကီးပှၤလၢ ပကပာ်ကဲဒီး အဲၣ်ပဒီပုၢ်ဝဲၢ်မုၣ်ခွါတဖၣ်လီၤ.
တၢ်သးဝံၣ် ၉၀ ဟ့ၣ်ဂံၢ်ဟ့ၣ်ဘါလိာ်သး
a ယဟိဝၤယွၤအပှၤဂီၢ်မုၢ်တဖၣ် ဟဲလၢတၢ်အိၣ်အသး အကလုာ်ကလုာ် ဒီးမူဒါလၢတၢ်အိၣ်ဖှိၣ်အပူၤတဖၣ်န့ၣ် လီၤဆီလိာ်အသးလီၤ. တၢ်မၤလိအံၤ ကမၤစၢၤပှၤလၢ ဘၣ်မနုၤအဃိ အရ့ဒိၣ်လၢ ပဘၣ်ပာ်ကဲလိာ်သး တဂၤဒီးတဂၤ လၢယဟိဝၤယွၤအဒူၣ်ဖိထၢဖိ အကျါလဲၣ်န့ၣ်လီၤ.
b ပတဲလၢစီၤတံၤမသ့း တဆီဟံၣ်ဆီဃီ နီတဘျီဘၣ်န့ၣ် တသ့ဘၣ်.