တၢ်အကတၢၢ်ကဘၣ်​ အခါဖဲလဲၣ်

ဘၣ်ဃးဒီး တၢ်ကတၢၢ်အဂ့ၢ်န့ၣ်​ ဆိကမိၣ်ကွၢ် ယ့ၣ်ၡူးအတၢ်ကတိၤ ခံထံၣ်အံၤ–

“မ့ၢ်လၢ မုၢ်နံၤအဝဲန့ၣ်​ ဒီးနၣ်ရံၣ်အဝဲန့ၣ်​ သုတသ့ၣ်ညါဘၣ်အဃိ အိၣ်ပလီၢ်သုသး ထီဘိတက့ၢ်.”—မးသဲ ၂၅:၁၃.

“မ့ၢ်လၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ်​ သုတသ့ၣ်ညါဘၣ်အဃိ ခိးကွၢ်တၢ် ဒီးစီၣ်မဲာ်စီၣ်နါ ထီဘိတက့ၢ်.”—မၢ်ကူး ၁၃:၃၃.

အဃိ ဟီၣ်ခိၣ်​ အတၢ်ရဲၣ်တၢ်ကျဲၤ ကကတၢၢ်အခါဖဲလဲၣ်န့ၣ်​ ပှၤဟီၣ်ခိၣ်ဖိ တသ့ၣ်ညါဝဲ လီၤတံၢ်လီၤဆဲး နီတဂၤဘၣ်. ဘၣ်ဆၣ်​ တၢ်အကတၢၢ် ကဘၣ်အခါဖဲလဲၣ်န့ၣ်​ ကစၢ်ယွၤ ပာ်ပနီၣ်ဃာ် တၢ်ဆၢကတီၢ်ဒီး “မုၢ်နံၤအဝဲန့ၣ်​ ဒီးနၣ်ရံၣ်​ အဝဲန့ၣ်” ဝံၤလံ. (မးသဲ ၂၄:၃၆) အဃိ ဖဲတၢ်အကတၢၢ် ဘူးထီၣ်အခါ ပသ့ၣ်ညါအီၤကသ့ဧါ. ပသ့ၣ်ညါအီၤသ့. ယ့ၣ်ၡူးတဲဘၣ်​ အပျဲၢ်အဘီၣ် တၢ်မၤအသးတဖၣ်လၢ ကပာ်ဖျါထီၣ်ဝဲလၢ တၢ်အကတၢၢ်ဘူးထီၣ်လံ.

တၢ်ပနီၣ်တဖၣ်

တၢ်မၤအသးတဖၣ်အံၤ မ့ၢ်ဝဲ “တၢ်အစိၤလၢအလီၢ်ခံကတၢၢ်” အတၢ်ပနီၣ်လီၤ. ယ့ၣ်ၡူးတဲဝဲလၢ “ပှၤကလုာ် တဒူၣ်ဒီးတဒူၣ်​ ကဒုးလိာ်အသး ဒီးဘီမုၢ်တဘ့ၣ်ဒီးတဘ့ၣ်​ ကဒုးလိာ်အသးလီၤ. တၢ်သၣ်ဝံၤလီၤဒိ ကအိၣ်ထီၣ်ဝဲ ဒီးဟီၣ်ခိၣ်​ ကဟူးဝဲလၢ တၢ်လီၢ်တတီၤဝံၤတတီၤလီၤ.” (မးသဲ ၂၄:၃, ၇) ယ့ၣ်ၡူး တဲစ့ၢ်ကီးဝဲလၢ “တၢ်ဆါသံသတြိာ်” လၢအမ့ၢ် တၢ်ဆူးတၢ်ဆါလၢ အရၤလီၤအသးလၢ ဟီၣ်ခိၣ်ဒီတဘ့ၣ်န့ၣ်​ ကအိၣ်ထီၣ်ဝဲ. (လူၤကၣ်​ ၂၁:၁၁) တၢ်မၤအသးလၢ ယ့ၣ်ၡူးတဲဆိပာ်စၢၤဝဲတဖၣ်အံၤ မ့ၢ်နထံၣ်ဘၣ်လံဧါ.

မုၢ်မဆါတနံၤအံၤ ပှၤဟီၣ်ခိၣ်ဖိ ဘၣ်ကီဘၣ်ခဲ ခီဖျိလၢ တၢ်ဒုးတၢ်ယၤ, တၢ်သၣ်ဝံၤလီၤဒိ, ဟီၣ်ခိၣ်ဟူး ဒီးခီဖျိလၢတၢ်ဆါ ဟဲကဲထီၣ်​ တခါဝံၤတခါအဃိလီၤ. အဒိ, ဖဲ ၂၀၀၄ န့ၣ်ဟီၣ်ခိၣ်ဟူးဖးဒိၣ်​ လၢအ့ဒံယါ ပီၣ်လဲၣ်မိၢ်ပှၢ် အပူၤအဃိ ကလံၤမုၢ်ဖးဒိၣ်လီၤဝဲ ဒီးပှၤသံဝဲအဂၤ ၂၂၅,၀၀၀ ညါ. တကးဒံးဘၣ် လၢသၢနံၣ် အတီၢ်ပူၤ လၢဟီၣ်ခိၣ်ဒီဘ့ၣ်န့ၣ်​ ပှၤသံလၢ ခိၤရိၤနၤတၢ်ဆါ (COVID-19) အဃိ အိၣ်ဝဲဘူးထီၣ်လၢ ၆.၉ ကကွဲၢ်ညါ. ယ့ၣ်ၡူးတဲဝဲလၢ တၢ်မၤအသးတဖၣ်အံၤန့ၣ်​ ပာ်ဖျါထီၣ်ဝဲလၢ ဟီၣ်ခိၣ်အတၢ်ရဲၣ်တၢ်ကျဲၤ ကကတၢၢ်ဘူးထီၣ်လံ.

“မုၢ်နံၤခံကတၢၢ်တဖၣ်​ အဆၢကတီၢ်”

တၢ်လၢကမၤအသးဖဲ တချုး “မုၢ်နံၤခံကတၢၢ်တဖၣ်” ဘၣ်ဒံးဘၣ်န့ၣ်​ လံာ်စီဆှံ တဲဖျါထီၣ်ဝဲ. (၂ ပ့းတရူး ၃:၃, ၄) ၂ တံၤမသ့း ၃:၁-၅ ပာ်ဖျါထီၣ်ဝဲလၢ လၢမုၢ်နံၤခံကတၢၢ်တဖၣ်အပူၤန့ၣ်​ ပှၤဟီၣ်ခိၣ်ဖိတဖၣ်​ အလုၢ်လၢ်သကဲာ်ပဝး တဂ့ၤလၢၤဘၣ်. (ကွၢ်တၢ်လွံၢ်နၢၣ်​ “တချုး ဟီၣ်ခိၣ်ကတၢၢ်ဒံးဘၣ်.”) မ့ၢ်နထံၣ်ဘၣ်​ ပှၤလၢ အအဲၣ်လီၤထဲ အနီၢ်ကစၢ်အသး, အဲၣ်ကျိၣ်အဲၣ်စ့, မၤဆူၣ်မၤစိးတၢ် ဒီးပှၤလၢအတအဲၣ်​ ပှၤဂၤဘၣ်ဧါ. တၢ်ပာ်သူၣ်ပာ်သးတဖၣ်အံၤ မ့ၢ်ဝဲ တၢ်အုၣ်သးလၢ ပအိၣ်မူဘၣ်လၢ ဟီၣ်ခိၣ်ကကတၢၢ် ဘူးထီၣ်လံ.

မုၢ်နံၤခံကတၢၢ်တဖၣ်န့ၣ်​ ကယံာ်ဝဲထဲလဲၣ်. ကယံာ်ဝဲထဲဒၣ်​ “တၢ်ဆၢကတီၢ် . . . တစိၢ်ဖိ” လီၤ. ဝံၤဒီး ကစၢ်ယွၤ “ကမၤဟးဂီၤ ပှၤလၢ အမၤဟးဂီၤဟီၣ်ခိၣ်” လီၤ.—လီၣ်ဖျါ ၁၁:၁၅-၁၈; ၁၂:၁၂.

ဟီၣ်ခိၣ်ကကဲထီၣ်​ ပၤရဒံစူးန့ၣ်​ ဘူးထီၣ်လံ

ကစၢ်ယွၤ ကမၤကတၢၢ်ကွံာ် ဟီၣ်ခိၣ်​ အတၢ်ရဲၣ်တၢ်ကျဲၤလၢ အအၢအသီအံၤအဂီၢ် အဝဲပာ်ပနီၣ်ဃာ် တၢ်ဆၢကတီၢ် ဒီးမုၢ်နံၤမုၢ်သီဝံၤလံ. (မးသဲ ၂၄:၃၆) ဘၣ်ဆၣ်​ တၢ်သးခုကစီၣ်​ အိၣ်ဒံး. ကစၢ်ယွၤ “တအဲၣ်ဒိးလၢ ပှၤကတုၤလၢတၢ်ဟးဂီၤ နီတဂၤဘၣ်.” (၂ ပ့းတရူး ၃:၉) အဃိ ကစၢ်ယွၤဟ့ၣ်ဝဲ ပှၤဟီၣ်ခိၣ်ဖိ အတၢ်ခွဲးတၢ်ယာ်လၢ ကမၤလိဘၣ်ဃးဒီး အတၢ်ဘၣ်သး ဒီးဒိကနၣ်အကလုၢ်လီၤ. ဘၣ်မနုၤအဃိ အမၤဝဲဒ်န့ၣ်လဲၣ်. အမၤဝဲဒ်န့ၣ်​ ခီဖျိလၢ အအဲၣ်ဒိးလၢ ပကပူၤဖျဲးဖဲ ဟီၣ်ခိၣ်ကတၢၢ်အဆၢကတီၢ် ဒီးအိၣ်မူဘၣ်လၢ အဟီၣ်ခိၣ်သီ ဖဲဟီၣ်ခိၣ်ကဲထီၣ်​ ပၤရဒံစူးအခါလီၤ.

ဒ်သိး ပှၤခဲလၢာ် ကအိၣ်ဘၣ်လၢ ဟီၣ်ခိၣ်သီလၢ ကစၢ်ယွၤ ဘီမုၢ်တၢ်ပၢဖီလာ်အပူၤအဂီၢ် ကစၢ်ယွၤ ရဲၣ်ကျဲၤဝဲခီဖျိ တၢ်စံၣ်တဲၤတဲလီၤတၢ်သးခုကစီၣ်​ အတၢ်မၤလၢ ဟီၣ်ခိၣ်ဒီဘ့ၣ်လီၤ. ယ့ၣ်ၡူးတဲဝဲလၢ “ဘီမုၢ်တၢ်သးခုကစီၣ်န့ၣ်​ ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ” လီၤ. (မးသဲ ၂၄:၁၄) ယဟိဝၤပှၤအုၣ်အသး လၢဟီၣ်ခိၣ်ဒီဘ့ၣ်​န့ၣ် သူဝဲအတၢ်ဆၢကတီၢ် အနၣ်ရံၣ်​ အကကွဲၢ် လၢအကထိတဖၣ် လၢ ကစံၣ်တဲၤတဲလီၤတၢ် ဒီးသိၣ်လိပှၤဂၤလၢ လံာ်စီဆှံ အတၢ်သးခုကစီၣ်လီၤ. ယ့ၣ်ၡူးတဲဝဲလၢ တချုး တၢ်အကတၢၢ်ဘၣ်ဒံးဘၣ်န့ၣ်​ တၢ်စံၣ်တဲၤတဲလီၤတၢ် အတၢ်ရဲၣ်တၢ်ကျဲၤအံၤ ပှၤကမၤအီၤလၢ ဟီၣ်ခိၣ်ဒီဘ့ၣ်ညါလီၤ.

တၢ်ဆၢကတီၢ်လၢ ပှၤဟီၣ်ခိၣ်ဖိပၢတၢ်အဂီၢ်န့ၣ်​ ကကတၢၢ်ဘူးထီၣ်လံ. ဘၣ်ဆၣ်​ တၢ်သးခုကစီၣ်အိၣ်ဝဲလီၤ. ဖဲတၢ်အကတၢၢ်ဘၣ်အခါ နပူၤဖျဲး ဒီးအိၣ်ဘၣ်လၢ ဟီၣ်ခိၣ်ပၤရဒံစူး လၢကစၢ်ယွၤ အၢၣ်လီၤပာ်စၢၤဝဲ အပူၤသ့. ဒ်သိးနကအိၣ်မူဘၣ်လၢ ဟီၣ်ခိၣ်သီအပူၤအဂီၢ် နကဘၣ်မၤမနုၤလဲၣ်န့ၣ်​ တၢ်ဂ့ၢ်လၢခံတခါ ကပာ်ဖျါထီၣ်ဝဲ.