နတၢ်အိၣ်မူလၢ ခါဆူညါအဂီၢ်န့ၣ် နဃုထၢအီၤသ့
ပူၤကွံာ်အနံၣ် ၃,၅၀၀ ဃၣ်ဃၣ်န့ၣ် ယဟိဝၤယွၤတဲဘၣ် ပှၤလၢ အဘူၣ်ထီၣ်ဘါထီၣ်အီၤတဖၣ်လၢ ဒ်သိး အဝဲသ့ၣ် ကအိၣ်ဒီး တၢ်အိၣ်မူလၢအဂ့ၤ လၢခါဆူညါအဂီၢ် အဝဲသ့ၣ် ကဘၣ်မၤဝဲဒ်လဲၣ်. ယဟိဝၤယွၤ တဲအဝဲသ့ၣ်လၢ “ယပာ်လီၤလံတၢ်မူဒီးတၢ်သံ, တၢ်ဆိၣ်ဂ့ၤဒီးတၢ်ဆိၣ်အၢ, လၢသုမဲာ်ညါလံ. ဒီးဃုထၢတၢ်မူ, ဒ်သိးနဲဒၣ်ဒီးနချံနသၣ်ကမူ.”—၅ မိၤၡ့ ၃၀:၁၉.
ဒ်သိး အဝဲသ့ၣ် ကအိၣ်ဘၣ်ဒီး တၢ်အိၣ်မူလၢအဂ့ၤအဂီၢ် အဝဲသ့ၣ် ကဘၣ်မၤ တၢ်ဆၢတဲာ် လၢအဘၣ်. မုၢ်မဆါတနံၤအံၤ ပအိၣ်ဒီး တၢ်ဃုထၢ ဒ်သိးဒီး အဝဲသ့ၣ်လီၤ. တကးဒံးဘၣ် ဒ်သိး ပကအိၣ်ဒီး တၢ်အိၣ်မူလၢအဂ့ၤ လၢခါဆူညါအဂီၢ် လံာ်စီဆှံ တဲပၠးပှၤလၢ ပကဘၣ် ‘အဲၣ်ယဟိဝၤယွၤ’ ခီဖျိ ‘ဒိကနၣ်အကလုၢ်.’—၅ မိၤၡ့ ၃၀:၂၀.
ပအဲၣ်ယဟိဝၤယွၤ ဒီးဒိကနၣ်အကလုၢ် ကသ့ဒ်လဲၣ်
မၤလိလံာ်စီဆှံ– ဒ်သိးနကအဲၣ် ယဟိဝၤယွၤအဂီၢ် အဆိကတၢၢ်န့ၣ် နကဘၣ်မၤလိအဂ့ၢ်လၢ လံာ်စီဆှံအပူၤ. နမ့ၢ်မၤလိအဂ့ၢ်န့ၣ် နကသ့ၣ်ညါဘၣ်လၢ အကဲဝဲ ကစၢ်ယွၤလၢ အပှဲၤဒီးတၢ်အဲၣ်တၢ်ကွံ ဒီးအအဲၣ်ဒိးဟ့ၣ်နၤ တၢ်လၢအဂ့ၤကတၢၢ်. မ့ၢ်လၢ ကစၢ်ယွၤ ‘သးအိၣ်နၤအဃိ’ အဝဲ ကွဲမုာ်နၤလၢ နကဃ့ထုကဖၣ်လၢအအိၣ်. (၁ ပ့းတရူး ၅:၇) တကးဒံးဘၣ် လံာ်စီဆှံ အၢၣ်လီၤဝဲလၢ နမ့ၢ်ဂုာ်ကျဲးစၢး မၤလိဘၣ်ဃးဒီး ကစၢ်ယွၤအဂ့ၢ်န့ၣ် ‘အဝဲ ကသုးဘူးအသး ဆူနအိၣ်လီၤ.’—ယၤကိာ် ၄:၈.
မၤထွဲ တၢ်လၢနမၤလိဘၣ်အီၤ– နဒိကနၣ် ကစၢ်ယွၤ အကလုၢ်သ့ခီဖျိ နအိၣ်မူမၤထွဲ အတၢ်ဟံးစုနဲၣ်ကျဲလၢ အအိၣ်လၢ လံာ်စီဆှံအပူၤ. နမ့ၢ်အိၣ်မူမၤထွဲ အတၢ်ဟံးစုနဲၣ်ကျဲန့ၣ် “နကဒုးဘီၣ်ထီၣ်ညီထီၣ်နကျဲ, ဒီးနကမၤဒီးတၢ်ကူၣ်သ့လီၤ.”—ယိၤၡူ ၁:၈.