တၢ်မၤလိ ၂
ဟံးန့ၢ်တၢ်မၤလိလၢ “ယ့ၣ်ၡူး အပျဲၢ်အဘီၣ်လၢ အအဲၣ်ဝဲတဂၤ” အအိၣ်
“မ်ပဆဲးအဲၣ်လိာ်ပသး တဂၤဒီးတဂၤ, မ့ၢ်လၢတၢ်အဲၣ်န့ၣ် ဟဲလၢ ကစၢ်ယွၤအအိၣ်အဃိလီၤ.”—၁ ယိၤဟၣ် ၄:၇.
တၢ်သးဝံၣ် ၁၀၅ “ယွၤမ့ၢ်တၢ်အဲၣ်တၢ်ကွံ”
တၢ်မၤလိအံၤ အတၢ်တိာ်ပာ်a
၁. ကစၢ်ယွၤအတၢ်အဲၣ်န့ၣ် ဒုးသ့ၣ်ညါပှၤတၢ်မနုၤလဲၣ်.
တၢ်မၢဖိယိၤဟၣ်ကွဲးဝဲလၢ “ကစၢ်ယွၤန့ၣ် မ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) တၢ်ကတိၤအံၤ ဒုးသ့ၣ်နီၣ်ထီၣ်ပှၤ တၢ်မ့ၢ်တၢ်တီလၢကစၢ်ယွၤန့ၣ် မ့ၢ်တၢ်မူအဂံၢ်ခီၣ်ထံးလီၤ. တကးဒံးဘၣ် မ့ၢ်စ့ၢ်ကီးတၢ်အဲၣ်တၢ်ကွံအဂံၢ်ခီၣ်ထံးလီၤ. ယဟိဝၤယွၤအဲၣ်ပှၤအဃိ အဝဲအဲၣ်ဒိးဝဲလၢ ပကအိၣ်ဘၣ်မုာ်မုာ်ခုၣ်ခုၣ်, ဘံၣ်ဘံၣ်ဘၢဘၢ ဒီးပကသူၣ်ဖှံသးညီလီၤ.
၂. ဒ် မးသဲ ၂၂:၃၇-၄၀ ပာ်ဖျါထီၣ်ဝဲအသိး တၢ်မၤလိာ်အဒိၣ်ကတၢၢ်ခံထံၣ်န့ၣ် မ့ၢ်မနုၤလဲၣ် ဒီးဘၣ်မနုၤအဃိ ပမၤထွဲတၢ်မၤလိာ်ခံထံၣ်တထံၣ်အဂီၢ် တညီဝဲလဲၣ်.
၂ ခရံာ်ဖိတဖၣ် ဘၣ်ပာ်ဖျါထီၣ်တၢ်အဲၣ်တၢ်ကွံဧါ, တဘၣ်ပာ်ဖျါထီၣ်ဧါန့ၣ် အဝဲသ့ၣ်ဃုထၢဝဲတသ့ဘၣ်. အဝဲသ့ၣ်အမူဒါအိၣ်လၢ ကဘၣ်ပာ်ဖျါထီၣ်ဝဲ တၢ်အဲၣ်တၢ်ကွံလီၤ. (ဖး မးသဲ ၂၂:၃၇-၄၀ တက့ၢ်.) ဖဲပသ့ၣ်ညါထီၣ် ယဟိဝၤယွၤအဂ့ၢ်ဂ့ၤဂ့ၤအခါ ညီဒိၣ်မးလၢ ပကဒိကနၣ် အတၢ်မၤလိာ်အဆိကတၢၢ်တထံၣ်န့ၣ်လီၤ. မ့ၢ်လၢယဟိဝၤယွၤမ့ၢ် ပှၤလၢပှၤပှဲၤ, အနၢ်ပၢၢ်စၢၤပှၤဒီး ရ့ဒီးပှၤလၢတၢ်အဲၣ်တၢ်ကွံအပူၤလီၤ. ဘၣ်ဆၣ် ပကမၤထွဲတၢ်မၤလိာ် ခံထံၣ်တထံၣ်အဂီၢ်န့ၣ် တညီဘၣ်. ဘၣ်မနုၤအဃိလဲၣ်. ခီဖျိပဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်အပူၤ ဒီးပှၤလၢပခိၣ်ပဃၢၤတဖၣ် တမ့ၢ်ပှၤလၢပှၤပှဲၤဘၣ်အဃိ တဘျီတခီၣ် ကမၤဘၣ်ဒိပသး ဒီးကမၤဟးဂီၤပသးလၢ အတၢ်စံးတၢ်ကတိၤ ဒီးအတၢ်မၤတဖၣ်လီၤ. ပထံၣ်ဘၣ်ဒီး တၢ်ကီတၢ်ခဲတဖၣ်အံၤန့ၣ် ယဟိဝၤယွၤသ့ၣ်ညါဝဲလီၤ. အဃိ အဝဲမၢဝဲပှၤကွဲးလံာ်စီဆှံဖိတနီၤ ကွဲးလီၤဝဲတၢ်ဂ့ၢ်လီၤတံၢ်လီၤဆဲး ဘၣ်ဃးဒီးတၢ်ဟ့ၣ်ကူၣ်လၢ ဘၣ်မနုၤအဃိ ပကဘၣ်ပာ်ဖျါထီၣ် တၢ်အဲၣ်တၢ်ကွံလၢ ပှၤဂၤအဖီခိၣ်လဲၣ်. ဒီးပပာ်ဖျါထီၣ် တၢ်အဲၣ်တၢ်ကွံလၢ ပှၤဂၤအဖီခိၣ် ကသ့ဒ်လဲၣ်. လၢပှၤကွဲးလံာ်ဖိတနီၤအကျါန့ၣ် ပၣ်ဃုာ်ဒီး စီၤယိၤဟၣ်လီၤ.—၁ ယိၤဟၣ် ၃:၁၁, ၁၂.
၃. ဘၣ်ဃးဒီး တၢ်အဲၣ်တၢ်ကွံန့ၣ် စီၤယိၤဟၣ်တဲဖျါထီၣ်ဝဲဒ်လဲၣ်.
၃ စီၤယိၤဟၣ်အတၢ်ကွဲး တဲဝဲလၢ ခရံာ်ဖိတဖၣ် ကဘၣ်ပာ်ဖျါထီၣ် တၢ်အဲၣ်တၢ်ကွံလီၤ. စီၤယိၤဟၣ်ကွဲးဖျါထီၣ် ဘၣ်ဃးဒီးယ့ၣ်ၡူးအတၢ်အိၣ်မူအဂ့ၢ်န့ၣ် အသူတၢ်ကတိၤ လၢအမ့ၢ် “အဲၣ်” ဒီး “အဲၣ်တ့ၢ်” အါန့ၢ်ဒံး အလံာ်တၢ်သးခုကစီၣ် အဂၤသၢဘ့ၣ်လီၤ. ဖဲစီၤယိၤဟၣ်ကွဲးဝဲ အလံာ်တၢ်သးခုကစီၣ် ဒီးအလံာ်ပရၢသၢဘ့ၣ်အခါ ဘၣ်သ့ၣ်သ့ၣ် အသးနံၣ်ကအိၣ်ဝဲ တကယၤလံလီၤ. ဒီးလၢအတၢ်ကွဲးအပူၤပာ်ဖျါထီၣ်ဝဲ တၢ်အဲၣ်တၢ်ကွံန့ၣ် မ့ၢ်တၢ်အရ့ဒိၣ်မးလၢ ခရံာ်ဖိတဖၣ်အဂီၢ်လီၤ. (၁ ယိၤဟၣ် ၄:၁၀, ၁၁) ဘၣ်ဆၣ် ဒ်သိးစီၤယိၤဟၣ် ကနၢ်ပၢၢ်တၢ်ဂ့ၢ်အံၤအဂီၢ် အကလိၣ်ဘၣ်တၢ်ဆၢကတီၢ် ဖးအါညါလီၤ.
၄. မ့ၢ်စီၤယိၤဟၣ်ပာ်ဖျါထီၣ် တၢ်အဲၣ်တၢ်ကွံလၢ ပှၤဂၤအဖီခိၣ်ထီဘိဧါ.
၄ ဖဲစီၤယိၤဟၣ်အသးစၢ်ဒံးအခါ အဝဲတပာ်ဖျါထီၣ် တၢ်အဲၣ်တၢ်ကွံထီဘိဘၣ်. အဒိ, ဘၣ်တဘျီ ဖဲယ့ၣ်ၡူးဒီးအပျဲၢ်အဘီၣ်တဖၣ်လဲၤဝဲလၢ ယရူၤၡလ့ၣ်အခါ အဝဲသ့ၣ်ဘၣ်လဲၤဖၠးဝဲ ၡၤမရံလီၤ. ပှၤၡၤမရံဖိတနီၤ တတူၢ်လိာ်ခီၣ်ဆၢအဝဲသ့ၣ်ဘၣ်. အဃိ စီၤယိၤဟၣ်မၤဝဲဒ်လဲၣ်. စီၤယိၤဟၣ်ဒီး အဒီပုၢ်ဝဲၢ်ခွါစီၤယၤကိာ်န့ၣ် မၢယ့ၣ်ၡူးဒုးလီၤမ့ၣ်အူလၢမူခိၣ်ဒီး မၤဟးဂီၤပှၤဖဲန့ၣ်တဖၣ်လီၤ. (လူၤကၣ် ၉:၅၂-၅၆) ဒီးပသ့ၣ်ညါဘၣ်စ့ၢ်ကီး တၢ်အိၣ်သးအဂၤတခါလၢ စီၤယိၤဟၣ်တပာ်ဖျါထီၣ် တၢ်အဲၣ်တၢ်ကွံလၢ ယ့ၣ်ၡူးအတၢ်မၢဖိတဖၣ်အကျါဘၣ်. စီၤယိၤဟၣ်ဒီး အဒီပုၢ်ဝဲၢ်ခွါစီၤယၤကိာ် ဃ့ကညးအမိၢ်ဒ်သိး ကလဲၤဃ့န့ၢ်အလီၢ်လၤလၢယ့ၣ်ၡူးအအိၣ် ဒ်သိးကဆ့ၣ်နီၤဘၣ်လၢ ယ့ၣ်ၡူးအခီၣ်ထံး လၢကစၢ်ယွၤအဘီအမုၢ်အပူၤလီၤ. ဖဲတၢ်မၢဖိအဂၤတဖၣ် သ့ၣ်ညါဝဲတၢ်ဂ့ၢ်အံၤအခါ အဝဲသ့ၣ်သးထီၣ် စီၤယိၤဟၣ်ဒီး စီၤယၤကိာ်ဒိၣ်မးလီၤ. (မးသဲ ၂၀:၂၀, ၂၁, ၂၄) စီၤယိၤဟၣ်အတၢ်ကမၣ် မ့ၢ်အိၣ်ဒ်လဲၣ်ဂ့ၤ ဒ်လဲၣ်ဂ့ၤ သနာ်က့ ယ့ၣ်ၡူးအဲၣ်အီၤလီၤ.—ယိၤဟၣ် ၂၁:၇.
၅. လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်.
၅ လၢတၢ်မၤလိအံၤအပူၤ ပကတဲသကိး စီၤယိၤဟၣ်အဒိအတဲာ် ဒီးတၢ်ဂ့ၢ်တနီၤလၢ အဝဲကွဲးဘၣ်ဃးဒီး တၢ်အဲၣ်တၢ်ကွံအဂ့ၢ်လီၤ. ဖဲပတဲသကိးတၢ်ဂ့ၢ်တဖၣ်အံၤအခါ ပကမၤလိဘၣ်လၢ ပကဘၣ်ပာ်ဖျါထီၣ် တၢ်အဲၣ်တၢ်ကွံလၢ ပဒီပုၢ်ဝဲၢ်မုၣ်ခွါတဖၣ် အဖီခိၣ်ဒ်လဲၣ်. ဒီးပကမၤလိဘၣ်စ့ၢ်ကီး ကျဲအရ့ဒိၣ်တဘိလၢ ဟံၣ်ခိၣ်သ့ၣ်တဖၣ် ကဘၣ်ဂုာ်ကျဲးစၢးမၤဂ့ၤထီၣ် ဒီးပာ်ဖျါထီၣ် တၢ်အဲၣ်တၢ်ကွံလၢ အဟံၣ်ဖိဃီဖိအပူၤဒ်လဲၣ်န့ၣ်လီၤ.
ပာ်ဖျါထီၣ် တၢ်အဲၣ်လၢ နတၢ်မၤတက့ၢ်
ယဟိဝၤယွၤပာ်ဖျါထီၣ် အတၢ်အဲၣ်လၢပဖီခိၣ် ခီဖျိအဆှၢလီၤဝဲ အဖိခွါ လၢဟီၣ်ခိၣ်ချၢ ဒ်သိးကတူၢ်သံအသးလၢပဂီၢ်လီၤ (ကွၢ်လံာ်အဆၢ ၆-၇)
၆. ယဟိဝၤယွၤ ပာ်ဖျါထီၣ်တၢ်အဲၣ် လၢပဖီခိၣ်ဒ်လဲၣ်.
၆ ဘၣ်သ့ၣ်သ့ၣ် ပကဆိကမိၣ်လၢ ပမ့ၢ်အဲၣ်ပှၤဂၤန့ၣ် ပကတဲတၢ်ဒီးအီၤမုာ်မုာ် ဒီးပကရ့ဒီးအီၤဂ့ၤဂ့ၤလီၤ. ဘၣ်ဆၣ် တၢ်အဲၣ်နီၢ်နီၢ်န့ၣ် ပပာ်ဖျါထီၣ်အီၤခီဖျိ ပမၤန့ၢ်တၢ်လၢ ပှၤဂၤအဂီၢ်လီၤ. (ထိၣ်သတြီၤဒီး ယၤကိာ် ၂:၁၇, ၂၆ တက့ၢ်.) အဒိ, ယဟိဝၤယွၤအဲၣ်ပှၤလီၤ. (၁ ယိၤဟၣ် ၄:၁၉) ဒီးယဟိဝၤယွၤ ပာ်ဖျါထီၣ်အတၢ်အဲၣ် ခီဖျိအကလုၢ်ကထါလံာ်စီဆှံန့ၣ်လီၤ. (စံးထီၣ်ပတြၢၤ ၂၅:၁၀; ရိမ့ၤ ၈:၃၈, ၃၉) ဘၣ်ဆၣ် ပသ့ၣ်ညါသပှၢ်ကတၢၢ်လၢ ယဟိဝၤယွၤအဲၣ်ပှၤန့ၣ် တမ့ၢ်ထဲအတၢ်ကတိၤတဖၣ်ဘၣ် ခီဖျိတၢ်လၢအမၤဝဲတဖၣ်လီၤ. စီၤယိၤဟၣ်ကွဲးဝဲလၢ “ကစၢ်ယွၤ အတၢ်အဲၣ်တၢ်ကွံန့ၣ် ဘၣ်တၢ်ပာ်ဖျါထီၣ်အီၤလၢ ပဖီခိၣ် ခီဖျိလၢ ကစၢ်ယွၤဆှၢလီၤ အဖိခွါနီၢ်နီၢ် ထဲတဂၤဧိၤလၢ ဟီၣ်ခိၣ်ချၢဒ်သိး ပကဒိးန့ၢ်ဘၣ်တၢ်မူ ခီဖျိလၢ အဝဲဒၣ်အဃိလီၤ.” (၁ ယိၤဟၣ် ၄:၉) ယဟိဝၤယွၤဟ့ၣ်လီၤပှၤ အဖိခွါထဲတဂၤဧိၤလၢ ဟဲတူၢ်ဆါအသး ဒီးတူၢ်သံအသးလၢပဂီၢ်န့ၣ်လီၤ. (ယိၤဟၣ် ၃:၁၆) ခီဖျိလၢတၢ်ဂ့ၢ်အံၤအဃိ ပသ့ၣ်ညါဘၣ်လၢ ယဟိဝၤယွၤအဲၣ်ပှၤသပှၢ်ကတၢၢ်လီၤ.
၇. ယ့ၣ်ၡူးအဲၣ်ပှၤန့ၣ် အပာ်ဖျါထီၣ်ဝဲလၢ ကျဲဒ်လဲၣ်.
၇ ယ့ၣ်ၡူးတဲဘၣ်အပျဲၢ်အဘီၣ်တဖၣ်လၢ ယ့ၣ်ၡူးအဲၣ်အဝဲသ့ၣ်လီၤ. (ယိၤဟၣ် ၁၃:၁; ၁၅:၁၅) ယ့ၣ်ၡူးအဲၣ်အဝဲသ့ၣ်န့ၣ် အဝဲတပာ်ဖျါထီၣ်ထဲ အတၢ်ကတိၤတဖၣ်ဘၣ်, အပာ်ဖျါထီၣ်စ့ၢ်ကီးလၢ အတၢ်မၤတဖၣ်လီၤ. ယ့ၣ်ၡူးတဲဝဲလၢ “ပှၤလၢ အတၢ်အဲၣ်ဒိၣ်န့ၢ်ဒံး ပှၤတဂၤလၢ အဟ့ၣ်လီၤကွံာ် အသးသမူလၢ အတံၤသကိးတဖၣ်အဂီၢ်န့ၣ် တအိၣ်နီတဂၤဘၣ်.” (ယိၤဟၣ် ၁၅:၁၃) ဖဲပဆိကမိၣ်ထီၣ်ဘၣ်ဃးဒီး ယဟိဝၤယွၤဒီးယ့ၣ်ၡူး မၤန့ၢ်တၢ်လၢပဂီၢ်အခါ ပကအဲၣ်ဒိးမၤတၢ်မနုၤလဲၣ်.
၈. ၁ ယိၤဟၣ် ၃:၁၈ ပာ်ဖျါထီၣ်ဝဲလၢ ပကဘၣ်မၤတၢ်မနုၤလဲၣ်.
၈ ပပာ်ဖျါထီၣ်လၢ ပအဲၣ်ယဟိဝၤယွၤဒီး ယ့ၣ်ၡူးန့ၣ် ခီဖျိလၢ ပဒိကနၣ်အဝဲသ့ၣ်အကလုၢ်န့ၣ်လီၤ. (ယိၤဟၣ် ၁၄:၁၅; ၁ ယိၤဟၣ် ၅:၃) ဒီးယ့ၣ်ၡူးမၤလိာ်စ့ၢ်ကီးပှၤလၢ ပကဘၣ်အဲၣ်လိာ်ကွံလိာ်ပသး တဂၤဒီးတဂၤလီၤ. (ယိၤဟၣ် ၁၃:၃၄, ၃၅) ပအဲၣ်ပဒီပုၢ်ဝဲၢ်မုၣ်ခွါတဖၣ်န့ၣ် ပတအဲၣ်ဒိးပာ်ဖျါထီၣ်ထဲ ပတၢ်စံးတၢ်ကတိၤတဖၣ်ဘၣ် ပအဲၣ်ဒိးပာ်ဖျါထီၣ်ဃုာ်ဒီး ပတၢ်မၤတဖၣ်လီၤ. (ဖး ၁ ယိၤဟၣ် ၃:၁၈ တက့ၢ်.) ပအဲၣ်ပဒီပုၢ်ဝဲၢ်မုၣ်ခွါတဖၣ်န့ၣ် ပပာ်ဖျါထီၣ်အီၤကသ့ဒ်လဲၣ်.
အဲၣ်နဒီပုၢ်ဝဲၢ်မုၣ်ခွါတဖၣ်
၉. တၢ်အဲၣ်တၢ်ကွံ ထိၣ်ဟူးထိၣ်ဂဲၤထီၣ် စီၤယိၤဟၣ်လၢ အကမၤတၢ်မနုၤလဲၣ်.
၉ စီၤယိၤဟၣ်မ့ၢ်အိၣ်ဒီးအပၢ် ဒီးအမ့ၢ်မၤဝဲဟံၣ်ဖိဃီဖိ တၢ်ဖံးတၢ်မၤလၢ တၢ်ဃုအီၣ်ညၣ်န့ၣ် အကျိၣ်အစ့ ကအိၣ်ဒီဒူၣ်ညါလီၤ. ဘၣ်ဆၣ် အဝဲဟ့ၣ်လီၤအသးဒီး မၤစၢၤပှၤဂၤဒ်သိး ပှၤကသ့ၣ်ညါထီၣ် တၢ်မ့ၢ်တၢ်တီဘၣ်ဃးဒီး ယဟိဝၤယွၤဒီးယ့ၣ်ၡူးအဂ့ၢ်န့ၣ်လီၤ. စီၤယိၤဟၣ်အတၢ်ဆၢတဲာ်န့ၣ် တညီလၢအတၢ်အိၣ်မူအဂီၢ်ဘၣ်. ဖဲတၢယၤဖှိၣ်ကကတၢၢ် အဆၢကတီၢ်န့ၣ် စီၤယိၤဟၣ်အသးပှၢ်လံ သနာ်က့ ပှၤမၤအၢမၤနးအီၤဒီး ထၢနုာ်အီၤလၢဃိာ်ပူၤလီၤ. (မၤတၢ် ၃:၁; ၄:၁-၃; ၅:၁၈; လီၣ်ဖျါ ၁:၉) ဖဲစီၤယိၤဟၣ်အိၣ်လၢ ဃိာ်ပူၤအဆၢကတီၢ် ခီဖျိလၢအအဲၣ်ပှၤဂၤအဃိ အစံၣ်တဲၤတဲလီၤပှၤဂၤ ဘၣ်ဃးဒီးယ့ၣ်ၡူးအဂ့ၢ်န့ၣ်လီၤ. အဒိ, ဖဲအအိၣ်လၢ ကီးပးမူးအခါ အဝဲကွဲးဝဲလံာ်လီၣ်ဖျါ ဒီးလၢခံ အဝဲဆှၢဝဲအလံာ်အံၤလၢ တၢ်အိၣ်ဖှိၣ်တဖၣ်အအိၣ် ဒ်သိးတၢ်အိၣ်ဖှိၣ်ဖိတဖၣ် ကသ့ၣ်ညါဘၣ်ဝဲလၢ “တယံာ်တမီၢ် တၢ်လၢအကဘၣ်မၤအသးန့ၣ်လီၤ.” (လီၣ်ဖျါ ၁:၁) ဖဲစီၤယိၤဟၣ် ဟးထီၣ်ဘၣ်လၢဃိာ်ပူၤ လၢကီးပးမူးဝံၤအလီၢ်ခံ အဝဲကွဲးဝဲယ့ၣ်ၡူးအဂ့ၢ် ဒီးတၢ်စံၣ်တဲၤတဲလီၤတၢ်မၤအဂ့ၢ်လီၤ. စီၤယိၤဟၣ်ကွဲးစ့ၢ်ကီးဝဲ လံာ်ပရၢသၢဘ့ၣ် ဒ်သိးအကဟ့ၣ်ဂံၢ်ဟ့ၣ်ဘါ ဒီးကဟ့ၣ်သဆၣ်ထီၣ်ဝဲ အဒီပုၢ်ဝဲၢ်မုၣ်ခွါတဖၣ်အဂီၢ်န့ၣ်လီၤ. စီၤယိၤဟၣ်တၢ်ဟ့ၣ်လီၤသးန့ၣ် ပကွၢ်လိမၤဒိးအီၤကသ့ဒ်လဲၣ်.
၁၀. နအဲၣ်ပှၤဂၤန့ၣ် နပာ်ဖျါထီၣ်အီၤကသ့ဒ်လဲၣ်.
၁၀ နအဲၣ်ပှၤဂၤန့ၣ် နပာ်ဖျါထီၣ်အီၤသ့ခီဖျိ တၢ်လၢနဃုထၢအီၤလၢ နတၢ်အိၣ်မူအပူၤလီၤ. ဟီၣ်ခိၣ်လၢမုၣ်ကီၤလံၢ်ပၢဝဲတဘ့ၣ်အံၤ အဲၣ်ဒိးဝဲလၢ နကဆိမိၣ်လီၤထဲ နနီၢ်ကစၢ်အဂီၢ် ဒီးဂုာ်ကျဲးစၢးမၤစၢၤလီၤထဲ နနီၢ်ကစၢ်အသးလီၤ. ဒီးတကးဒံးဘၣ် အအဲၣ်ဒိးဝဲလၢ နကဃုကျိၣ်ဃုစ့ ဒီးနမံၤဟူသၣ်ဖျါလီၤ. ဘၣ်ဆၣ် ဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်န့ၣ် ဟ့ၣ်လီၤအတၢ်ဆၢကတီၢ် ဒ်သိးကစံၣ်တဲၤတဲလီၤတၢ်သးခုကစီၣ် ဒီးကမၤစၢၤဘၣ်ပှၤဂၤလၢ ကသုးဘူးအသးဆူ ယဟိဝၤယွၤအအိၣ်န့ၣ်လီၤ. ဒီးအဝဲသ့ၣ်တနီၤန့ၣ် စံၣ်တဲၤတဲလီၤတၢ် ဒီးသိၣ်လိပှၤဂၤလၢဆၢကတီၢ်လၢပှဲၤလီၤ.
ပအဲၣ်ပဒီပုၢ်ဝဲၢ်မုၣ်ခွါဒီး ပဟံၣ်ဖိဃီဖိန့ၣ် ပပာ်ဖျါထီၣ်သ့ခီဖျိ တၢ်လၢပမၤန့ၢ်တၢ်လၢ အဝဲသ့ၣ်အဂီၢ်လီၤ (ကွၢ်လံာ်အဆၢ ၁၁, ၁၇)b
၁၁. ခရံာ်ဖိလၢအအိၣ်ဒီး တၢ်သးတီတဖၣ် ပာ်ဖျါထီၣ်လၢ အအဲၣ်ယဟိဝၤယွၤဒီး အဒီပုၢ်ဝဲၢ်မုၣ်ခွါတဖၣ် လၢကျဲဒ်လဲၣ်.
၁၁ ခရံာ်ဖိလၢအအိၣ်ဒီး တၢ်သးတီတဖၣ်န့ၣ် ဘၣ်ဖံးအီၣ်မၤအီၣ်တၢ်လၢ ဆၢကတီၢ်လၢပှဲၤ ဒ်သိးကလုၢ်အီၣ်လုၢ်အီ အဟံၣ်ဖိဃီဖိ ဒီးအနီၢ်ကစၢ်အဂီၢ်လီၤ. ဘၣ်ဆၣ် အဝဲသ့ၣ်ဆီၣ်ထွဲမၤစၢၤဝဲ ကစၢ်ယွၤအတၢ်ကရၢကရိလၢ ကျဲလၢအဝဲသ့ၣ်မၤဝဲသ့န့ၣ်လီၤ. အဒိ, ဖဲန့ဆၢၣ်တၢ်ဘၣ်ဒိဘၣ်ထံးကဲထီၣ်အခါ အဝဲသ့ၣ်လဲၤမၤစၢၤတၢ်လီၤ. အဂၤတနီၤ လဲၤမၤစၢၤတၢ်လၢ တၢ်သူၣ်ထီၣ်ဘှီထီၣ် ဒီးပှၤကိးဂၤဒဲး အိၣ်ဒီးတၢ်ခွဲးတၢ်ယာ်လၢ ကဟ့ၣ်မၤဘူၣ်လီၤကျိၣ်စ့လၢ ဟီၣ်ခိၣ်ဒီဘ့ၣ်အတၢ်မၤအဂီၢ်လီၤ. အဝဲသ့ၣ်မၤဝဲဒ်အံၤန့ၣ် ခီဖျိလၢအဝဲသ့ၣ်အဲၣ်ကစၢ်ယွၤ ဒီးအဒီပုၢ်ဝဲၢ်မုၣ်ခွါတဖၣ်အဃိလီၤ. တနွံဘၣ်တနွံ ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါတဖၣ် သ့ခီဖျိလၢ ပထီၣ်တၢ်အိၣ်ဖှိၣ်ရိဖှိၣ် ဒီးပရ့ဒီးအဝဲသ့ၣ်န့ၣ်လီၤ. ဘၣ်သ့ၣ်သ့ၣ် ပကလီၤဘှံးလီၤတီၤ ဘၣ်ဆၣ် ပလဲၤထီၣ်တၢ်အိၣ်ဖှိၣ်ဒီးအဝဲသ့ၣ်လီၤ. ဖဲန့ၣ်ပကပျံၤတၢ် ဘၣ်ဆၣ် ပဟ့ၣ်ထီၣ်တၢ်စံးဆၢလီၤ. ပမ့ၢ်အိၣ်ဒီး နီၢ်ကစၢ်တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ သနာ်က့ တချုးတၢ်အိၣ်ဖှိၣ်စးထီၣ် ဒီးတၢ်အိၣ်ဖှိၣ်ဝံၤအလီၢ်ခံန့ၣ် ပဟ့ၣ်ဂံၢ်ဟ့ၣ်ဘါပှၤဂၤတဖၣ်သ့လီၤ. (ဧ့ၤဘြံၤ ၁၀:၂၄, ၂၅) တၢ်လၢပဒီပုၢ်ဝဲၢ်မုၣ်ခွါတဖၣ်မၤဝဲန့ၣ် ပစံးဘျုးဘၣ်အဝဲသ့ၣ်ဒိၣ်မးလီၤ.
၁၂. ကျဲအဂၤတဘိလၢ စီၤယိၤဟၣ်ပာ်ဖျါထီၣ်တၢ်အဲၣ်လၢ အဒီပုၢ်ဝဲၢ်မုၣ်ခွါတဖၣ်အဖီခိၣ်န့ၣ် မ့ၢ်မနုၤလဲၣ်.
၁၂ စီၤယိၤဟၣ်ပာ်ဖျါထီၣ်ဝဲလၢ အအဲၣ်အဒီပုၢ်ဝဲၢ်မုၣ်ခွါတဖၣ်န့ၣ် တမ့ၢ်ထဲအပတြၢၤအဝဲသ့ၣ်ဘၣ်. လၢတၢ်န့ၣ်အလီၢ် စီၤယိၤဟၣ်ဘှီဘၣ်ထီၣ်က့ၤ အဝဲသ့ၣ်စ့ၢ်ကီးလီၤ. အဒိ, လၢအလံာ်ပရၢတဖၣ်အပူၤ စီၤယိၤဟၣ်ပတြၢၤအဒီပုၢ်ဝဲၢ်မုၢ်ခွါတဖၣ်လၢ အဝဲသ့ၣ်အိၣ်ဒီး တၢ်နာ်လၢအဂၢၢ်ကျၢၤ ဒီးမၤတၢ်ဆူၣ်ဆူၣ်အဃိလီၤ. ဘၣ်ဆၣ် စီၤယိၤဟၣ်သိၣ်က့ၤသီက့ၤအဝဲသ့ၣ် ဘၣ်ဃးဒီး တၢ်ဒဲးဘးလၢအဝဲသ့ၣ် မၤဘၣ်ဝဲတဖၣ်လီၤ. (၁ ယိၤဟၣ် ၁:၈–၂:၁, ၁၃, ၁၄) ဒ်န့ၣ်အသိး ပကဘၣ်ပတြၢၤစ့ၢ်ကီး ပဒီပုၢ်ဝဲၢ်မုၣ်ခွါတဖၣ် ခီဖျိတၢ်လၢအဝဲသ့ၣ်မၤဝဲတဖၣ်လီၤ. ဘၣ်ဆၣ် ပဒီပုၢ်ဝဲၢ်မုၣ်ခွါတနီၤ မ့ၢ်မၤဘၣ်တၢ်ကမၣ် ဒီးအိၣ်ဒီးလုၢ်လၢ်သကဲာ်ပဝးလၢ အတဂ့ၤဘၣ်တဖၣ်န့ၣ် ပပာ်ဖျါထီၣ်တၢ်အဲၣ်လၢ အဝဲသ့ၣ်အဖီခိၣ် ခီဖျိပဘှီဘၣ်ထီၣ်က့ၤအဝဲသ့ၣ်န့ၣ်လီၤ. ပကမၤစၢၤအဝဲသ့ၣ်ဒ်န့ၣ်အဂီၢ် ပလိၣ်ဘၣ်တၢ်သူၣ်ဒူသးဒူလီၤ. ဘၣ်ဆၣ် လံာ်စီဆှံတဲဝဲလၢ တံၤသကိးနီၢ်နီၢ်န့ၣ် လီၤဂာ်ဒီးနးလၢ အကနၣ်အ့ၣ် ဒီးဘှီဘၣ်ထီၣ်လိာ်သး တဂၤဒီးတဂၤလီၤ.—ကတိၤဒိ ၂၇:၁၇.
၁၃. တၢ်လၢပကြၢးဟးဆှဲးအီၤန့ၣ် မ့ၢ်မနုၤလဲၣ်.
၁၃ တဘျီတခီၣ် ပပာ်ဖျါထီၣ် ပအဲၣ်ပဒီပုၢ်ဝဲၢ်မုၣ်ခွါတဖၣ် ခီဖျိပဟးဆှဲးဝဲ တၢ်လၢပတကြၢးမၤတဖၣ်လီၤ. အဒိ, တၢ်လၢပှၤဂၤတဲဝဲန့ၣ် ပတဆိကမိၣ်ကမၣ် ဒီးသးထီၣ်အီၤတဘျီဃီဘၣ်. ပကကွၢ်သကိး တၢ်ကဲထီၣ်အသးဖဲ ယ့ၣ်ၡူးအတၢ်အိၣ်မူလၢ ဟီၣ်ခိၣ်ချၢကကတၢၢ်ဘူးထီၣ် အဆၢကတီၢ်တက့ၢ်. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ သုမ့ၢ်တအီၣ်ယသွံၣ်ဒီး ယညၣ်ဘၣ်န့ၣ် သုဒိးန့ၢ်ဘၣ်တၢ်မူတသ့ဘၣ်. (ယိၤဟၣ် ၆:၅၃-၅၇) ယ့ၣ်ၡူးအတၢ်ကတိၤအံၤ ဒုးကမၢကမၣ်ဝဲ အပျဲၢ်အဘီၣ်အါဂၤအသးဒီး အဝဲသ့ၣ်ပာ်တ့ၢ်ကွံာ်အီၤလီၤ. ဘၣ်ဆၣ် ယ့ၣ်ၡူးတံၤသကိးနီၢ်နီၢ်တနီၤ ဒ်သိးဒီးစီၤယိၤဟၣ်န့ၣ် တပာ်တ့ၢ်ကွံာ်အီၤဘၣ်. အဝဲသ့ၣ်တနီၤ သးတီဒီးယ့ၣ်ၡူးလီၤ. တၢ်လၢယ့ၣ်ၡူးတဲဝဲန့ၣ် အဝဲသ့ၣ်တနၢ်ပၢၢ်ဝဲဘၣ်. ဘၣ်ဆၣ် အဝဲသ့ၣ်ကမၢကမၣ်ဝဲဒိၣ်မးလီၤ. ယ့ၣ်ၡူးအသကိးလၢ အသးတီတနီၤ ဆိကမိၣ်ထံ တၢ်လၢယ့ၣ်ၡူးတဲဝဲန့ၣ် တကမၣ်ဘၣ်. ဒီးအဝဲသ့ၣ်တသးထီၣ် ယ့ၣ်ၡူးစ့ၢ်ကီးဘၣ်. လၢတၢ်န့ၣ်အလီၢ် အဝဲသ့ၣ်နာ်ဝဲယ့ၣ်ၡူး ဒီးသ့ၣ်ညါဝဲလၢ ယ့ၣ်ၡူးတဲတၢ်မ့ၢ်တၢ်တီလီၤ. (ယိၤဟၣ် ၆:၆၀, ၆၆-၆၉) အဃိ အရ့ဒိၣ်ဒိၣ်မးလၢ တၢ်လၢပတံၤသကိးတဲဝဲတဖၣ်န့ၣ် ပတဘၣ်ဆိကမိၣ်ကမၣ် ဒီးသးထီၣ်အဝဲသ့ၣ်တဘျီဃီဘၣ်. လၢတၢ်န့ၣ်အလီၢ် ပကပျဲလၢ အဝဲသ့ၣ်ကတဲဖျါထီၣ် တၢ်လၢပနၢ်ပၢၢ်ကမၣ်ဘၣ်တဖၣ်လီၤ.—ကတိၤဒိ ၁၈:၁၃; စံၣ်တဲၤတဲလီၤတၢ် ၇:၉.
၁၄. ဘၣ်မနုၤအဃိ ပတကြၢးသးဟ့ ပဒီပုၢ်ဝဲၢ်မုၣ်ခွါတဖၣ် နီတဘျီဘၣ်လဲၣ်.
၁၄ စီၤယိၤဟၣ်ဟ့ၣ်ပလီၢ်စ့ၢ်ကီးပှၤလၢ ပတဘၣ်သးဟ့ ပဒီပုၢ်ဝဲၢ်မုၣ်ခွါတဖၣ်ဘၣ်. ပမ့ၢ်တဒိကနၣ် အတၢ်ဟ့ၣ်ပလီၢ်ဘၣ်န့ၣ် မ့ၢ်ဝဲပပျဲမုၣ်ကီၤလံၢ် ကဒိၣ်စိလၢပဖီခိၣ်န့ၣ်လီၤ. (၁ ယိၤဟၣ် ၂:၁၁; ၃:၁၅) တၢ်ဂ့ၢ်အံၤဟဲကဲထီၣ်အသး ဖဲ ခ.န တၢယၤဖှိၣ် ဘူးကကတၢၢ် အဆၢကတီၢ်န့ၣ်လီၤ. မုၣ်ကီၤလံၢ်ဂုာ်ကျဲးစၢးဝဲဒ်သိး ကစၢ်ယွၤအခ့အပှၤတဖၣ် ကသးဟ့လိာ်အသး ဒီးကဒုးအိၣ်ထီၣ် တၢ်လီၤမုၢ်လီၤဖးအဂီၢ်လီၤ. ဖဲစီၤယိၤဟၣ်ကွဲးလံာ်ပရၢတဖၣ်အခါ ပိာ်ခွါတနီၤအိၣ်ဒီး တၢ်ပာ်သူၣ်ပာ်သး ဒ်မုၣ်ကီၤလံၢ်အသိး အဃိ ဒုးအိၣ်ထီၣ်ဝဲ တၢ်လီၤမုၢ်လီၤဖးလၢ တၢ်အိၣ်ဖှိၣ်အပူၤလီၤ. အဒိ, စီၤဒံအိၤတြ့ၤဖံန့ၣ် အဝဲဒုးအိၣ်ထီၣ် တၢ်လီၤမုၢ်လီၤဖးလၢ တၢ်အိၣ်ဖှိၣ်အပူၤလီၤ. (၃ ယိၤဟၣ် ၉, ၁၀) အဝဲတပာ်ကဲ ပှၤပၢဆှၢတၢ်ကမံးတံာ် အပှၤခၢၣ်စးတဖၣ်ဘၣ်. ဒီးဒီပုၢ်ဝဲၢ်လၢ အတူၢ်လိာ်ခီၣ်ဆၢ ပှၤတမှံၤလၢအတဘၣ်သးဝဲတဖၣ်န့ၣ် အဝဲဂုာ်ကျဲးစၢးနီဟးထီၣ်ကွံာ်ဝဲ လၢတၢ်အိၣ်ဖှိၣ်အပူၤလီၤ. ခီဖျိအမၤဝဲဒ်န့ၣ်အဃိ ဖျါလၢအအိၣ်ဒီးတၢ်ပာ်ထီၣ်ထီသးဒိၣ်မးလီၤ. မုၣ်ကီၤလံၢ်ဂုာ်ကျဲးစၢးသပှၢ်ပှၢ် ဒ်သိးကစၢ်ယွၤအခ့အပှၤတဖၣ် ကလီၤမုၢ်လီၤဖးဒီး အသုတဆီၣ်ထွဲလိာ်အသး တဂၤဒီးတဂၤလၢၤတဂ့ၤန့ၣ်လီၤ. ဒီးမုၢ်မဆါတနံၤအံၤ မုၣ်ကီၤလံၢ်ဆဲးမၤဝဲ ဒ်န့ၣ်အသိးလီၤ. အဃိ ပတဟ့ၣ်အခွဲးလၢ ပကသးဟ့ပဒီပုၢ်ဝဲၢ်မုၣ်ခွါတဖၣ် ဒီးဒုးအိၣ်ထီၣ် တၢ်လီၤမုၢ်လီၤဖးဘၣ်.
အဲၣ်နဟံၣ်ဖိဃီဖိ
ယ့ၣ်ၡူးမၢစီၤယိၤဟၣ် ကွၢ်ထွဲန့ၢ်အမိၢ်လၢ နီၢ်ခိဒီးနီၢ်သးအတၢ်လိၣ်ဘၣ်တဖၣ်လီၤ. မုၢ်မဆါတနံၤအံၤ ဟံၣ်ခိၣ်တဖၣ်စ့ၢ်ကီး ကဘၣ်ကွၢ်ထွဲကဟုကယာ် အဟံၣ်ဖိဃီဖိအတၢ်လိၣ်ဘၣ် တဖၣ်လီၤ (ကွၢ်လံာ်အဆၢ ၁၅-၁၆)
၁၅. ပှၤလၢအကဲဟံၣ်ခိၣ်တဂၤန့ၣ် ကဘၣ်သ့ၣ်နီၣ်ထီၣ်က့ၤ တၢ်ဂ့ၢ်မနုၤလဲၣ်.
၁၅ ကျဲအရ့ဒိၣ်တဘိလၢ ဟံၣ်ခိၣ်တဂၤအဲၣ်အဟံၣ်ဖိဃီဖိန့ၣ် အဝဲကဘၣ်အံးထွဲကွၢ်ထွဲ အဝဲသ့ၣ်လၢနီၢ်ခိတခီလီၤ. (၁ တံၤမသ့း ၅:၈) ပှၤလၢအကဲဟံၣ်ခိၣ်န့ၣ် ကဘၣ်သ့ၣ်နီၣ်ထီၣ် တၢ်လိၣ်ဘၣ်လၢနီၢ်သးတခီ မ့ၢ်တၢ်အရ့ဒိၣ်ဒိၣ်မးလၢ ကမၤစၢၤအဟံၣ်ဖိဃီဖိ အတၢ်ရ့လိာ်သးဒီး ယဟိဝၤယွၤကဂ့ၤအဂီၢ်လီၤ. (မးသဲ ၅:၃) အဒိ, ယ့ၣ်ၡူးပာ်လီၤဒိဂ့ၤတဲာ်ဘၣ် လၢဟံၣ်ခိၣ်တဖၣ်အဂီၢ်လီၤ. လံာ်ယိၤဟၣ်ပာ်ဖျါထီၣ်န့ၢ်ပှၤလၢ ဖဲယ့ၣ်ၡူးဘူးထီၣ်လၢအကသံ ဒီးအိၣ်လၢသ့ၣ်တၢၣ်လိၤ ဒီးတူၢ်ဘၣ်တၢ်နးနးကလဲာ်အခါ အဝဲဆိကမိၣ်န့ၢ်တၢ်လၢ အဟံၣ်ဖိဃီဖိအဂီၢ်လီၤ. ဖဲန့ၣ်အဆၢကတီၢ် စီၤယိၤဟၣ်ဆၢထၢၣ်လၢ ယ့ၣ်ၡူးအမိၢ် နီၢ်မၤရံအကပၤလီၤ. ယ့ၣ်ၡူး မၢစီၤယိၤဟၣ်ကွၢ်ထွဲန့ၢ်က့ၤ အမိၢ်နီၢ်မၤရံလီၤ. (ယိၤဟၣ် ၁၉:၂၆, ၂၇) ယ့ၣ်ၡူးအဒီပုၢ်ဝဲၢ်မုၣ်ခွါလၢ ကကွၢ်ထွဲအမိၢ်နီၢ်မၤရံလၢ နီၢ်ခိတခီန့ၣ် အိၣ်ဝဲလီၤ. ဘၣ်ဆၣ် ယ့ၣ်ၡူးတမၢအဝဲသ့ၣ်ဘၣ်. မ့ၢ်လၢအဝဲသ့ၣ်တကဲထီၣ် ယ့ၣ်ၡူးအပျဲၢ်အဘီၣ်ဒံးဘၣ်အဃိလီၤ. လၢတၢ်န့ၣ်အလီၢ် ယ့ၣ်ၡူးအဲၣ်ဒိးဝဲလၢ စီၤယိၤဟၣ် ကကွၢ်ထွဲအမိၢ်နီၢ်မၤရံလၢ နီၢ်ခိဒီးနီၢ်သးအတၢ်လိၣ်ဘၣ်တဖၣ်လီၤ.
၁၆. စီၤယိၤဟၣ်အိၣ်ဒီးမူဒါ မနုၤသ့ၣ်တဖၣ်လဲၣ်.
၁၆ စီၤယိၤဟၣ်န့ၣ် အိၣ်ဒီးအမူဒါအါမးလီၤ. ခီဖျိလၢ အမ့ၢ်ပှၤတၢ်မၢဖိတဂၤအဃိ အဝဲဘၣ်တီခိၣ်ရိၤမဲဝဲ တၢ်စံၣ်တဲၤတဲလီၤအတၢ်မၤလီၤ. တကးဒံးဘၣ် ခီဖျိလၢအမ့ၢ်စ့ၢ်ကီး ပှၤလၢအဆီဟံၣ်ဆီဃီအဃိ အကဘၣ်အိၣ်ဒီး တၢ်ထံၣ်အကြၢးအဘၣ်လၢ အကဘၣ်လုၢ်အီၣ်လုၢ်အီ အဟံၣ်ဖိဃီဖိလၢ နီၢ်ခိဒီးနီၢ်သးလီၤ. (၁ ကရံၣ်သူး ၉:၅) မုၢ်မဆါတနံၤအံၤ ဟံၣ်ခိၣ်သ့ၣ်တဖၣ် မၤလိန့ၢ်တၢ်မနုၤသ့လဲၣ်.
၁၇. ဘၣ်မနုၤအဃိ အရ့ဒိၣ်ဒိၣ်မးလၢ ဟံၣ်ခိၣ်တဂၤ ကဘၣ်ကွၢ်ထွဲကဟုကယာ် အဟံၣ်ဖိဃီဖိလၢ နီၢ်သးတခီလဲၣ်.
၁၇ ဒီပုၢ်ဝဲၢ်ခွါလၢ အကဲဟံၣ်ခိၣ်တဂၤန့ၣ် ဘၣ်သ့ၣ်သ့ၣ်အကအိၣ်ဒီး မူဒါအရ့ဒိၣ်တဖၣ်လီၤ. အဒိ, အဝဲကဘၣ်ဖံးတၢ်မၤတၢ်ဆူၣ်ဆူၣ် လၢနီၢ်ခိတခီ ဒ်သိးယဟိဝၤယွၤကဘၣ် တၢ်စံးထီၣ်ပတြၢၤအီၤအဂီၢ်လီၤ. (အ့းဖ့းစူး ၆:၅, ၆; တံတူး ၂:၉, ၁၀) ဘၣ်သ့ၣ်သ့ၣ် အဝဲကအိၣ်ဒီးမူဒါလၢ တၢ်အိၣ်ဖှိၣ်အပူၤ ဒ်သိးဒီးကဘၣ်ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ် ဒီးကဘၣ်တီခိၣ်ရိၤမဲလၢ တၢ်စံၣ်တဲၤတဲလီၤတၢ်မၤတခီလီၤ. တကတီၢ်ဃီ အရ့ဒိၣ်ဒိၣ်မးလၢ အဝဲကဘၣ်မၤလိသကိးလံာ်စီဆှံ ဒီးအဖိအမါထီဘိလီၤ. အဝဲမ့ၢ်မၤဝဲဒ်န့ၣ်န့ၣ် အဖိဒီးအမါကစံးဘျုးစံးဖှိၣ် အတၢ်ထဲးဂံၢ်ထဲးဘါလၢ အမၤစၢၤအဝဲသ့ၣ် ဒ်သိးကဆဲးအိၣ်ဆူၣ်အိၣ်ချ့, ကသူၣ်ခုသးခု ဒီးကဆဲးမၤဘၣ် ယဟိဝၤယွၤအတၢ်မၤ ထီဘိအဂီၢ်လီၤ.—အ့းဖ့းစူး ၅:၂၈, ၂၉; ၆:၄.
“ဆဲးအိၣ်လၢ ယတၢ်အဲၣ်အပူၤ”
၁၈. စီၤယိၤဟၣ် နာ်န့ၢ်တၢ်မနုၤလဲၣ်.
၁၈ စီၤယိၤဟၣ်အိၣ်မူဘၣ်ဖးယံာ် ဒီးအလဲၤခီဖျိဘၣ်တၢ်အါမံၤလီၤ. စီၤယိၤဟၣ်ထံၣ်ဘၣ် တၢ်ကီတၢ်ခဲအါမးလၢ ကမၤလီၤစၢ်အတၢ်နာ်လီၤ. ဘၣ်ဆၣ် အဝဲဂုာ်ကျဲးစၢးဝဲ အဂ့ၤကတၢၢ်ထီဘိ ဒ်သိးကမၤထွဲဝဲ ယ့ၣ်ၡူးအတၢ်မၤလိာ် လၢအပၣ်ဃုာ်ဒီး အကဘၣ်အဲၣ် အဒီပုၢ်ဝဲၢ်မုၣ်ခွါတဖၣ်လီၤ. ခီဖျိလၢ စီၤယိၤဟၣ်မၤဝဲဒ်န့ၣ်အဃိ အသ့ၣ်ညါဝဲလၢ ယဟိဝၤယွၤဒီး ယ့ၣ်ၡူးအဲၣ်အီၤ ဒီးကဟ့ၣ်အီၤတၢ်ဂံၢ်တၢ်ဘါလၢ အကလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ်လီၤ. (ယိၤဟၣ် ၁၄:၁၅-၁၇; ၁၅:၁၀; ၁ ယိၤဟၣ် ၄:၁၆) စီၤယိၤဟၣ် ပာ်ဖျါထီၣ်တၢ်အဲၣ်လၢ အဒီပုၢ်ဝဲၢ်မုၣ်ခွါတဖၣ်အဖီခိၣ်န့ၣ် မုၣ်ကီၤလံၢ် ဒီးဟီၣ်ခိၣ်လၢအပၢဝဲတဘ့ၣ်အံၤ မၤပတုာ်အီၤတန့ၢ်ဘၣ်.
၁၉. ၁ ယိၤဟၣ် ၄:၇ ဟ့ၣ်ဂံၢ်ဟ့ၣ်ဘါပှၤလၢ ပကမၤတၢ်မနုၤလဲၣ် ဒီးဘၣ်မနုၤအဃိလဲၣ်.
၁၉ ဒ်စီၤယိၤဟၣ်အသိး ပအိၣ်မူဘၣ်လၢ မုၣ်ကီၤလံၢ်အတၢ်ပၢအဃိ ပှၤဟီၣ်ခိၣ်ဖိသ့ၣ်တဖၣ် တအိၣ်ဒီးတၢ်အဲၣ်တၢ်ကွံလၢၤဘၣ်. (၁ ယိၤဟၣ် ၃:၁, ၁၀) အဃိ မုၣ်ကီၤလံၢ်အဲၣ်ဒိးမၤဝဲဒ်သိး ပသုတအဲၣ် ပဒီပုၢ်ဝဲၢ်မုၣ်ခွါတဖၣ်လၢၤ တဂ့ၤအဂီၢ်လီၤ. ဘၣ်ဆၣ် ပမ့ၢ်တဟ့ၣ်အခွဲးဘၣ်န့ၣ် အမၤဝဲတန့ၢ်ဘၣ်. အဃိ မ်ပပာ်လီၤပသး ဂၢၢ်ဂၢၢ်ကျၢၤကျၢၤလၢ ပကပာ်ဖျါထီၣ် ပအဲၣ်ပဒီပုၢ်ဝဲၢ်မုၣ်ခွါ ခီဖျိတၢ်လၢပမၤ ဒီးတၢ်လၢပတဲတဖၣ်လီၤ. ပမ့ၢ်မၤဒ်န့ၣ်န့ၣ် ပကအိၣ်ဒီးတၢ်သူၣ်မံသးမုာ် လၢပပၣ်ဃုာ်ဘၣ်လၢ ယဟိဝၤယွၤအဟံၣ်ဖိဃီဖိအကျါ ဒီးပတၢ်အိၣ်မူန့ၣ် ကပှဲၤဒီးတၢ်သးခုလီၤ.—ဖး ၁ ယိၤဟၣ် ၄:၇ တက့ၢ်.
တၢ်သးဝံၣ် ၈၈ ဒုးသ့ၣ်ညါယၤလၢ နကျဲဧိၤကပူၤဧိၤတက့ၢ်
a လံာ်စီဆှံတဲဝဲလၢ တၢ်မၢဖိယိၤဟၣ်န့ၣ် မ့ၢ်ဝဲ “ယ့ၣ်ၡူးအပျဲၢ်အဘီၣ်လၢ အအဲၣ်ဝဲတဂၤ” လီၤ. (ယိၤဟၣ် ၂၁:၇) ဖဲစီၤယိၤဟၣ်အိၣ်ဒီးယ့ၣ်ၡူးအခါ အမ့ၢ်ဒံးဝဲပှၤသးစၢ်တဂၤလီၤ. ဘၣ်ဆၣ် အအိၣ်ဒီးတၢ်ဂ့ၤတၢ်ဝါအါမးလီၤ. လၢခံ ဖဲအသးပှၢ်ထီၣ်အခါ ယဟိဝၤယွၤသူအီၤလၢ ကကွဲးဖျါထီၣ် တၢ်အဲၣ်တၢ်ကွံအဂ့ၢ်လီၤ. လၢတၢ်မၤလိအံၤအပူၤ ပကတဲသကိး စီၤယိၤဟၣ်အတၢ်ကွဲးတနီၤ ဒီးပကတဲသကိးစ့ၢ်ကီး ပမၤလိန့ၢ်တၢ်လၢ စီၤယိၤဟၣ်အဒိအတဲာ်ဒ်လဲၣ်န့ၣ်လီၤ.
b တၢ်တဲဖျါထီၣ်တၢ်ဂီၤ အခီပညီ– ဟံၣ်ခိၣ်တဂၤအတၢ်မၤအါ သနာ်က့ အဝဲလဲၤမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံးကဲထီၣ်အလီၢ်, အဝဲဆီၣ်ထွဲမၤစၢၤဟီၣ်ခိၣ်ဒီဘ့ၣ်တၢ်မၤ ခီဖျိ ဟ့ၣ်လီၤတၢ်မၤဘူၣ်, အဝဲကွဲမုာ်ပှၤဂၤလၢ ကဟဲမၤဟံၣ်ဖိဃီဖိ တၢ်မၤလိလံာ်စီဆှံ ဒီးအဟံၣ်ဖိဃီဖိလီၤ.